Mk 3

Gerizon enn zour saba

(Mt 12:9-14; Lk 6:6-11)

1Ankor enn fwa, Zezi rant dan sinagog; enn boug ek lame mognon ti la. 2Bannla ti pe vey Zezi, pou gete si li ti pou geri sa boug la zour saba; koumsa zot ti pou kapav met enn sarz lor li. 3Li dir ar sa boug lame mognon la, “Leve, vinn devan.” 4Lerla li dir bannla, “Dapre lord, ki gagn drwa fer zour saba? Fer bon kiksoz, fer move kiksoz? Sov enn lavi, tir enn lavi?” Zot tou res trankil. 5Li get zot ar lakoler, anmemtan, li sagrin ki zot leker dir. Li dir boug la, “Dres to lame.” Mognon la dres so lame; so lame revinn normal. 6Kouma bann Farizien tom deor, zot fer enn konplo avek bann Erodien pou touy Zezi.

Lafoul swiv Zezi

7Zezi retir li dan borlamer avek so bann disip. Enn pake dimoun ti pe swiv li. Zot sorti partou kote dan Galile, Zide, 8Zerizalem, Idoume, lot kote larivier Zourdin, dan rezion Tir ek Sidon. Nouvel ti finn fane komie kiksoz li ti pe fer; akoz samem zot ti pe vinn get li. 9Zezi ti bizin dir so bann disip pare enn pirog pou li, tansion lafoul kraz li. 10Li ti finn geri boukou dimoun; tou saki ti malad, ti pe pouse pou tous li. 11Sak fwa bann move lespri trouv li, zot tonbe, zot kriye, “Tomem Garson Bondie.” 12Zezi menas zot pouki zot pa fer dimoun kone ki li ete.

Zezi nom Ledouz

(Mt 10:1-4; Lk 6:12-16)

13Li mont lor montagn. Li apel dimoun ki li ti oule. Bannla vini. 14Li swazir douz parmi zot, (li donn zot nom apot), pou bannla res avek li e pouki li avoy zot proklame avek 15lotorite sas demon. 16Alors li nom Ledouz. Li donn Simon enn lot nom, li apel li Pier; 17apre ti ena Zak ek so frer Zan, toulede garson Zebede. Li sanz zot nom, li apel zot Boanerzes, savedir zanfan loraz ek zekler; 18ti ena osi Andre, Filip, Bartelmi, Matie, Toma, Zak garson Alfe, Tade, Simon ki ti res Kana 19ek Zida Iskaryot, limem ki ti vann Zezi.

Fami Zezi

20Apre sa Zezi rant dan lakaz. Lafoul rekomans rasanble; telman dimoun ti pe ale-vini, ki zot pa ti kapav manz enn bout dipin. 21Kan fami Zezi aprann sa, zot ale pou trap li. Zot ti pe dir li ti finn perdi latet.

Zezi ek Belzeboul

(Mt 12:22-32; Lk 11:14-23; 12:10)

22Bann dokter lalwa ki ti finn desann depi Zerizalem ti pe dir ki ena Belzeboul lor Zezi, ki li sas demon par lafors sef bann demon. 23Li apel zot, li koz ar zot an parabol. Li dir zot, “Ki manier Satan kapav sas Satan? 24Si enn Rwayom divize kont limem, Rwayom la pa kapav tini dibout. 25Si enn fami divize kont limem, fami la pa pou kapav tini dibout. 26Si Satan lev lager ar limem, savedir li divize, li pa pou kapav tini, li pou fini limem.

27Ou pa kapav rant dan lakaz enn dimoun for pou kokin so bann dibien san ki ou atas li avan; lerla ou pou kapav kokin kouma ou anvi. 28Mo dir zot enn zafer: laverite, laverite mo dir zot, tou pese, tou blasfem, ki dimoun fer pou pardone; 29enn sel blasfem pa pou pardone, blasfem kont Lespri Sin. Li enn pese ki zame pou efase.”

30Zezi ti pe koz koumsa parski bannla ti pe dir ki li ena enn move lespri lor li.

Vre fami Zezi

(Mt 12:46-50; Lk 8:19-21)

31So mama ek so bann frer vini. Zot res deor zot fer kriye li. 32Enn kantite dimoun ti pe asize; zot tou ti pe antour li; zot dir li, “Gete, to mama ek to bann frer inn vinn rod twa.” 33Li reponn zot, “Kisannla mo mama, kisannla mo frer?” 34Li lev so latet, li promne so regar lor sak dimoun ki ti pe asize. “Ala mo mama, ala mo bann frer. 35Dimoun ki fer volonte Bondie, limem mo frer, limem mo ser, limem mo mama.”

Currently Selected:

Mk 3: NTKM2009

Highlight

Copy