Lk 23

Zezi devan Pilat

(Mt 27:1-2, 11-14; Mk 15:1-5; Zn 18:28-38)

1Lasanble ki ti prezan leve e amenn Zezi devan Pilat. 2Zot koumans akiz li. Zot dir, “Nou finn trouv li pe met lepep dan trou, anpes nou pey tax Sezar, e lorla li pe dir ki limem Lemesi ek lerwa.” 3Lerla Pilat poz li enn kestion, “Eski tomem Lerwa bann Zwif?”

Zezi reponn li, “Twa ki pe dir.” 4Pilat dir ar bann sef pret ek lafoul, “Mo pa trouv okenn sarz kont sa boug la.” 5Zot kriy pli for, “So lansegnman exsit lepep pou revolte partou dan Zide; li finn koumanse depi Galile e li finn ariv ziska isi.”

Zezi devan Erod

6Letan Pilat finn tann sa, li demande si sa boug la sorti Galile. 7Kouma li aprann ki Zezi sorti sa landrwa ki Erod ti pe administre la, li avoy li ar Erod ki ti dan Zerizalem pandan sa peryod la. 8Letan Erod trouv Zezi, li ti bien kontan. Depi lontan Erod ti pe anvi zwenn Zezi parski li ti finn tann koz li e li ti espere ki li pou trouv Zezi fer detrwa mirak. 9Li poz li boukou kestion me Zezi pa reponn nanye. 10Bann sef pret ek bann dokter lalwa ki ti pe dibout lamem akiz Zezi avek violans. 11Erod ek so bann solda boufonn li, maltret li koumadir li enn pouritir. Zot abiy li kouma enn lerwa e zot reanvway li ar Pilat. 12Sa zour la Erod ek Pilat ti vinn de bon kamarad; avan zot pa ti kapav santi zot kamarad.

Zizman Pilat

(Mt 27:15-26; Mk 15:6-15; Zn 18:39—19:16)

13Pilat reyni bann sef pret, bann dirizan ek lepep. 14Li dir zot, “Zot finn amenn devan mwa sa boug la e zot finn akiz li kouma kikenn ki pe met lepep dan trou. Mwa mo finn interoz li, e mo pa pe trouv okenn sarz ki zot finn met lor li. 15Erod osi pa finn trouv nanye e li finn reanvway li ar nou parski li pa finn komet enn fot ki merit lamor. 16Mo pou dir bannla fwet li apre sa mo pou larg li.” 17Pou sak fet Pak, Pilat ti abitie larg enn prizonie.#23:17 Dan plizir ansien maniskri pena sa verse la. 18Me zot tou kriye bien for, “Fini li enn fwa, larg Barabas.” 19Barabas ti dan prizon parski li ti finn diriz enn emet dan lavil e li ti finn komet enn krim. 20Pilat ti ankor anvi liber Zezi, alors li kontigne diskit ar zot. 21Me zot revolte, zot kriye pli for, “Krisifie li! Krisifie li!” 22Trwaziem fwa, li redir zot, “Ki krim li finn fer? Mo pa trouv okenn sarz ki dir ki li merit lamor. Mo pou dimann bannla fwet li apre sa mo pou relarg li.” 23Me zot kriye ankor pli for e zot dimann koulout li lor lakrwa. Zot lavwa dominn partou. 24Lerla Pilat desid donn zot seki zot pe dimande. 25Li larg sa boug ki zot ti dimann pou grasie la, e ki ti dan prizon akoz enn emet ek enn krim, e li livre zot Zezi dapre ki zot ti pe rode.

Zezi krisifie

(Mt 27:32-44; Mk 15:21-32; Zn 19:17-27)

26Letan bannla ti pe amenn Zezi, zot zwenn Simon ki enn abitan lavil Sirenn. Li ti sorti dan karo, li pe ale. Zot aret li pou li sarye lakrwa deryer Zezi. 27Enn gran lafoul ti pe swiv li; bann fam ti pe kriye, plore e zot ti pe sagrin li. 28Zezi vire, get par deryer e li dir zot, “Fam, zot ki tifi Zerizalem, pa plor pou mwa. Plor plito pou zotmem e pou zot bann zanfan. 29Parski zour pou vini kot zot pou dir, ‘Bienerez bann fam ki pa kapav gagn zanfan, bann seki zame finn akouse, bann ki zame finn donn bwar.’

30Alor dimoun pou dir bann montagn,

Tom lor nou,

ek kolinn

Kasiet nou,

31Parski si zot fer koumsa ar dibwa ver, ki zot pou fer ar dibwa sek?”

Zezi lor lakrwa

32Ti amenn osi ansam avek li de malfeter ki ti finn kondane amor. 33Ler zot ariv landrwa ki ti apel Krann, zot koulout li lor lakrwa e zot met bann malfeter la, enn dan so drwat ek lotla dan so gos. 34Zezi dir, “Papa pardonn zot parski zot pa kone ki zot pe fer.” Zot fer enn tiraz osor pou partaz so linz. 35Lepep ti pe dibout e ti pe gete. Bann sef Zwif ti pe kontigne boufonn li. Zot ti pe dir, “Li finn sov lezot; les li sov limem si vremem li Lekris ki Bondie finn swazir.” 36Bann solda boufonn li. Zot koste pre ar li e zot donn li vineg. 37Zot dir li, “Si to Lerwa Zwif, sov twa tomem.”

38Lao lor lakrwa ti finn ekrir, “Limem Lerwa Zwif.”

Enn bandi repanti

39Enn sa de kriminel ki ti lor lakrwa la insilte li. Li dir li, “Eski to pa Lekris? Sov twa tomem ek sov nou.” 40Lotla repros li, “To pa gagn per Bondie, twa ki finn kondane parey kouma li? 41Nou, nou pe gagn seki nou merite parski nou pe pey pou seki nou finn fer, me li, li pa finn fer nanye de mal.” 42E li dir Zezi, “Zezi pa bliye mwa kan to vini kouma Lerwa.” 43Zezi reponn li, “Laverite, laverite mo dir twa, azordi mem to pou avek mwa dan paradi.”

Lamor Zezi

(Mt 27:45-56; Mk 15:33-41; Zn 19:28-30)

44Ti apepre midi, letan teneb tom lor antie later ziska trwa-zer tanto. 45Letan soley aret briye, rido tanp desire damilie. 46Zezi kriye bien for, “Papa, mo met mo lespri dan to lame.” Letan li fini dir sa, li rann so dernie soupir. 47Letan santiryon Romin trouv seki ti finn arive, li rann laglwar Bondie, li dir, “Vremem sa dimoun la ti inosan.” 48Kan sa gran lafoul ki ti finn vini pou get spektak la trouv seki ti finn arive, zot rant kot zot latet bese. 49Tou bann kamarad Zezi ek bann fam ki ti akonpagn li depi Galile ti pe dibout lwin e zot ti pe get seki ti pe pase.

Met Zezi dan tonbo

(Mt 27:57-61; Mk 15:42-47; Zn 19:38-42)

50-51Ti ena enn dimoun ki ti apel Zozef ki ti sorti Arimate, enn lavil Zwif. Li ti bon ek bien drwat e li ti enn manm Gran Tribinal bann Zwif. Li pa ti dakor ar zot desizion e zot aksion, e li ti pe atann Rwayom Bondie. 52Zozef al get Pilat e li dimann li lekor Zezi. 53Li desann so lekor e li anvlop li dan enn dra an lin e li met li dan enn tom ki ti finn kreze dan ros kot personn pa ti ankor antere. 54Ti vandredi, zour Preparasion, e saba ti pre pou koumanse.

55Bann fam ki ti pe swiv Zezi depi Galile vinn avek Zozef e zot trouv tom kot ti met so lekor. 56Apre sa zot retourne e zot prepar bann delwil ek bann parfin.

Zour saba, zot repoze dapre seki lalwa dir.

Currently Selected:

Lk 23: NTKM2009

Highlight

Copy