Lk 20
20
Kot lotorite Zezi sorti?
(Mt 21:23-27; Mk 11:27-33)
1Enn zour, Zezi ti pe ansegn lepep dan tanp e li ti pe anons Bonn Nouvel. Bann sef pret, bann dokter lalwa ek bann ansien vini tom lor li. 2Zot dimann li, “Dir nou, dapre ki lord to pe fer seki to pe fer la, kisannla finn donn twa sa lotorite la? 3Zezi reponn zot, “Mo pou poz zot enn kestion mwa osi. Dir mwa, 4eski batem Zan sorti depi lesiel ou bien ar bann imin?” 5Zot koumans diskite e zot dir ant zotmem, “Si nou dir depi lesiel, li pou dir nou, abe kifer nou pa finn krwar dan li? 6Me si nou dir ar bann imin, tou lepep pou avoy nou kout ros, parski zot krwar ki Zan ti enn profet.” 7Alor zot reponn, “Nou pa kone kot li sorti.” 8Zezi dir zot, “Mwa osi mo pa pou dir zot kot mo finn gagn lotorite pou fer seki mo pe fer.”
Parabol bann move planter pie rezin
(Mt 21:33-46; Mk 12:1-12)
9Zezi rakont lepep sa parabol la: “Enn dimoun ti plant enn karo rezin, li ti lwe li ar bann planter e li parti pou enn bon bout letan. 10Kan ler finn vini, li avoy so serviter al get bann planter la pou pran so par lor seki karo rezin la ti raporte. Bann planter la bat li, pous li e li retourn lame vid. 11Propriyeter karo avoy enn lot serviter; bann planter la bat li osi, insilte li e li retourn san nanye. 12Li kontigne mem, li avoy enn trwaziem. Sannla osi zot bien bles li e zot zet li deor. 13Lerla propriyeter karo dir, ‘Ki mo pou fer? Mo pou avoy mo garson ki mo bien kontan; mo espere zot pou respekte li.’ 14Letan bann planter la trouv garson la vini, zot konplote e zot dir ant zotmem, ‘Limem eritie; anou touy li e so leritaz pou vinn pou nou.’ 15Zot pous li andeor karo e zot touy li.
Ki propriyeter karo la pou fer ar zot? 16Limem pou vini, li pou touy zot enn par enn e li pou donn so karo lot dimoun.”
Letan zot tann sa, zot dir, “Pena sime!” 17Li get zot, li dir zot, “Ki vedir sa parol Lekritir la:
‘Ros ki bann mason finn rezete,
Samem finn vinn lakle prinsipal’?
18Tou dimoun ki tom lor sa ros la pou kas an morso e kan ros la tom lor kikenn, ros la pou kraz li.” 19Bann dokter lalwa, bann sef pret ti pe rod trap li lerlamem parski zot ti kone ki li ti finn rakont sa parabol la kont zot; me zot pa oze akoz lafoul.
Pey tax Sezar
(Mt 22:15-22; Mk 12:13-17)
20Alors bannla vey tou so mouvman; zot avoy bann espion ki deklar onet, pou trap Zezi kan li pou dir enn kiksoz ki pa korek. Koumsa zot pou kapav aret li e met li dan lame gouverner. 21Alors zot poz li enn kestion, “Met, nou kone ki to parol e to lansegnman zot bien drwat; to pa get dapre figir dimoun, me to ansegn sime Bondie dapre laverite. 22Dapre lalwa, eski nou bizin pey tax Sezar ou non?” 23Zezi ti konn zot lespri rize. Li dir zot, 24“Montre mwa enn pies larzan. Ki figir ena lor la e ki finn ekrir?” Zot reponn, “Sezar.” 25Zezi dir zot, “Abe rann Sezar seki pou Sezar, e Bondie seki pou Bondie.” 26Kouma zot pa ti kapav may li dan lak ar so prop parol devan lepep, zot ti res trankil. So bann parol ti inpresionn zot.
Enn kestion lor rezireksion
(Mt 22:22-33; Mk 12:18-27)
27Enn de Sadisein vinn get Zezi. (Zot ti dir ki pena rezireksion.) Alors zot poz Zezi enn kestion. 28Zot dir li, “Met, Moiz finn ekrir, ‘Si frer enn boug mor e pa les okenn zanfan e ki so fam ankor vivan, sa boug la bizin pran fam so frer pou donn so frer enn desandans.’ 29Ti ena set frer. Premie la marye. Li mor san ena okenn zanfan. 30Li parey pou deziem la. 31Trwaziem la osi marye ar li, e touleset ti marye ar li enn apre lot e zot inn mor san gagn zanfan. 32Alafin fam la osi ti mor. 33Zour larezireksion, kisannla so mari parski touleset ti marye ar li?” 34Zezi reponn zot, “Lor later dimoun marye e donn zot tifi an maryaz. 35Tou seki finn zize dign pou larezireksion bann mor, e pou viv dan lemonn ki pou vini, pa pou marye e pa pou donn zot tifi anmaryaz. 36Zot pa kapav mor ankor parski zot kouma bann anz e zot finn vinn bann zanfan Bondie parski zot bann zanfan larezireksion. 37Moiz limem finn fer kone ki bann mor pou leve parski dan sa pasaz lor bwison ardan la, li dir, ‘Lesegner Bondie Abraam, Bondie Izaak, Bondie Zakob’. 38Bondie, pa Bondie bann mor me Bondie bann vivan. Pou li, tou dimoun vivan.” 39Detrwa dokter lalwa ki ti la dir, “Met, to finn bien koze.” 40Lerla zot pa oze poz li okenn kestion ankor.
Enn kestion lor garson David
(Mt 22:41-46; Mk 12:35-37)
41Zezi dir zot, “Kouma li posib ki zot dir ki Lekris Garson David? 42Parski David limem dir dan Liv Psom,
‘Lesegner dir ar mo Segner,
asiz adrwat mo tronn,
43ziska ki mo servi to bann lennmi
kouma enn eskabo anba to lipie.’
44Si David apel Lekris Segner, kouma Lekris kapav so garson?”
Zezi denons manigans bann dokter lalwa
(Mt 23:1-36; Mk 12:38-40)
45Letan tou lepep pe ekout li, Zezi dir so bann disip, 46“Mefie zot bann dokter lalwa ki kontan pavane avek gran-gran rob e ki kontan kan dimoun salye zot dan bann plas piblik; dan sinagog, zot swazir bann plas kot tou dimoun pou trouv zot e dan bann dine, zot rod bann plas doner. 47Zot devor tikas ki bann vev finn ramase e zot fer long-long lapriyer pouki tou dimoun trouv zot. Zot pou gagn pli gran kondanasion.
Currently Selected:
Lk 20: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.
