Gyenesis 22

Wɔsɔ Abraham hwɛ

1 # Heb 11.17; Yak 1.12 Na nsɛm yi akyi no, Onyankopɔn sɔɔ Abraham hwɛe, na ɔka kyerɛɛ no sɛ: Abraham! Na ose: Mini. 2#2 Be 3.1 Na ɔkae sɛ: Fa wo ba, wo ba koro a wodɔ no, Isak, kɔ Moria asase so, na fa no kɔbɔ ɔhyew afɔre wɔ hɔ, wɔ mmepɔw no mu biako a mɛkyerɛ wo so. 3Na Abraham sɔree anɔpatutu, na ɔhyehyɛɛ n'afurum, na ɔfaa ne mmofra mu baanu ne ne ba Isak kaa ne ho, na otwaa ɔhyew afɔre nnyina, na osiim kɔɔ nea Onyankopɔn kyerɛɛ no no. 4Na da a ɛto so abiɛsa no, Abraham maa n'ani so, na ohuu beae hɔ wɔ akyirikyiri. 5Na Abraham ka kyerɛɛ ne mmofra no sɛ: Mo ne afurum yi ntena ha, na me ne abarimaa yi bɛkɔ noho akɔsɔre, na yɛasan aba mo nkyɛn. 6Na Abraham faa ɔhyew afɔre nnyina no de soaa ne ba Isak, na ɔfaa ogya ne sekan kurae, na wɔn baanu kɔe. 7Na Isak ka kyerɛɛ n'agya Abraham sɛ: M'agya! Na ose: Mini, me ba. Na ose: Hwɛ, ogya ne nnyina ni, na oguammaa a wɔde rekɔbɔ ɔhyew afɔre no wɔ he? 8Na Abraham se: Me ba, Onyankopɔn ankasa bɛkyerɛ ɔhyew afɔre aguammaa no. Na wɔn baanu kɔe. 9Na wokoduu nea Onyankopɔn kyerɛɛ no hɔ, na Abraham sii afɔremuka wɔ hɔ, na osiesiee nnyina no, na ɔkyekyeree ne ba Isak, na ɔde no too afɔremuka no so wɔ nnyina no so. 10Na Abraham teɛɛ ne nsa faa ɔsekan no sɛ ɔde rebekum ne ba no.

11Na AWURADE bɔfo fi soro frɛɛ Abraham bio sɛ: Abraham, Abraham! Na ose: Mini. 12#Yer 7.31; Rom 8.32 Na ose: Mfa wo nsa nka abarimaa no, nso nyɛ no hwee, na afei mahu sɛ wusuro Onyankopɔn, na woankame me wo ba koro no.

13Na Abraham maa n'ani so, na ohui, na hwɛ, odwennini a ɔdɔtɔ aso ne mmɛn mu wɔ n'akyi; na Abraham kɔfaa odwennini no de no sii ne ba no ananmu bɔɔ ɔhyew afɔre.

14Na Abraham too beae hɔ din sɛ Yahwe-Yire. #22.14 YAHWE-YIRE: Asekyerɛ ne: AWURADE bɛhwɛ. Enti wɔka nnɛ ara sɛ AWURADE bepɔw so na wɔbehwɛ.

15Na AWURADE bɔfo fi soro frɛɛ: Abraham bio sɛ, 16#Heb 6.13 Sɛ AWURADE se ni: Esiane sɛ woadi saa asɛm yi, na woankame me wo ba koro no nti, maka me ho ntam sɛ: 17#Gye 13.16; 15.5; Heb 11.12; Gye 24.60 Nhyira na mehyira wo, na ɔdɔ na mɛma w'asefo adɔ sɛ ɔsoro nsoromma ne mpoano nwea, na w'asefo bɛfa wɔn atamfo nkurow ano apon adi so; 18#Gye 12.3; Gal 3.16 na w'asefo mu na wobehyira asase so amanaman nyinaa, efisɛ woatie me nne. 19Ɛnna Abraham san baa ne mmerante no nkyɛn, na wɔsɔre siim baa Beer-seba. Na Abraham tenaa Beer-seba.

20 # Gye 11.29 Na nsɛm yi akyi no, wɔka kyerɛɛ Abraham sɛ: Hwɛ, Milka nso awo mma ama wo nua Nahor: 21n'abakan Us, ne ne nua Bus, ne Kemuel a ɔyɛ Aram agya, 22ne Kesed ne Haso ne Pildas ne Yidlaf ne Betuel. 23#Gye 24.15 Na Betuel woo Rebeka. Nnipa baawɔtwe yi na Milka wo maa Abraham ne nua Nahor. 24Na ne yere biako bi a wɔfrɛ no Rehuma nso woo Teba ne Gaham ne Tahas ne Maaka.

Currently Selected:

Gyenesis 22: ATWDB

Highlight

Copy