Yôan 6

1Isam̃u yiṉo vya, Yesu agèndi gô ntye mori y’eliṽa zi Galile, zô n’eliṽa zi Tiberyade. 2N’azôngyô yè n’aṉag’awenge, konde w’ayeṉi lemba y’alendyô yè gôre waô w’ayogyô inkaṉi. 3N’avandi Yesu gô nômba, alwaṉa vovo baru ayè n’iṉèngi yè.

4Ndô Paki, yi fèti y’Iju, y’arweṉi pyèrè.

5Gw’arômbiṉi Yesu antyo mè, ayeṉ’aṉag’awenge wi bya gôre yè, awulinyi Filipi inè: Azwè be kôl’inya na gweṉi, ko aṉaga wiṉo nya? 6Awulyi yeṉo gô kèṉizè, konde ayèmè amyeṉi nte be dendè. 7Awiṉizyô yè ne Filipi inè: Inya si re ko kôlô ni nkam̃a s’ifura mbaṉi s’ageke gôre waô gôr’ôm’edu gô bonga ’mwezom̃a. 8Ôm̃ori avila gôr’iṉèngi yè, Andru ya mwô’ngwè wi Simôn Pyère, awulinyi yè inè: 9Vèṉo r’ômwaṉa wi re n’amunga mi mpèmba ataṉè ni ntyuè mbaṉi, ndô yom̃a yiṉo ande gôr’aṉag’awenge wiṉo? 10Awulyi Yesu inè: Lwaṉizaṉi aṉaga barugebaru. Avegagi kè am̃aṉi am̃enge gô mbôra mèyoṉo. Yeṉo alwaṉi waô barugebaru; w’avegagi pyèrè ni ntozèny s’aṉaga ôtaṉè. 11Yeṉo awongi Yesu amunga mè mi mpèmba, n’ayè pa p’akeṽa, ageriṉi waô w’avegagi barugebaru, n’aveṉi yè waô kè intyuè nt’aṽeli waô. 12Gw’ayôri waô, awuliny’iṉèngi yè inè: Gum̃inyaṉi nkizi y’adèka, ko aver’ezom̃a. 13Yeṉo agum̃inyi waô yô, ayôny’igôm̃i ny’itôndô n’itôndô mbaṉi yi nkizi y’arigaṉi avila gw’amunga mi mpèmb’ataṉè m’anyenyô ne waôdu.

14Gw’ayeṉi aṉaga mè elemba z’alendyô ne Yesu, w’awulyi nè: Giligili wiṉo n’ôvogisi mè wi bya gô ntye yiṉo. 15Gw’amyeṉi Yesu inè, wi bela gô bya gô kôtè ni ngulu avangè ôga, arô tômbi ôkuṽi wè, agènda gô nômba ayè anka.

16Gw’arweṉi nkôlô, iṉèngi yè y’azum̃iṉi gw’eliṽa. 17N’agweṉi waô gw’elende, alaly’eliṽa agènda gô Kapèrnaum. N’ayili ôwenja, ndô Yesu e pa diwô abyeṉi gôre waô. 18N’azingi ôgulônkangwè ômpôlô, n’aṽendi eliṽa. 19Waô nuga p’agôm̃i m’inanda ambaṉi ni nand’ôtaṉè ntyo agôm̃i m’inanda ararô, ayeṉi waô Yesu e jar’eliṽa aṽya pyèrè n’elende; n’aryeṉi waô. 20Ndô Yesu awulinyi waô inè: Ne myè, aryaṉi! 21Yeṉo aṽeli waô gô bongè gw’elende, n’aziṽi elende pelè gô ntye y’agèndyô waô.

22Aṉaga w’arigaṉi gô ntye mori y’eliṽa gw’ayeṉi waô inè, e re pegeg’elend’ezèṉè vovo, kaô em̃ori, na inè, Yesu e pa kweṉa n’iṉèngi yè gw’elende mè, ndô inè, w’agèndi waô dadyè. 23Bunya gw’aṽyeṉi lende mori avila gô Tiberyade pyèrè ni mbôra y’anyeṉi waô mpèmba, Rerè pa p’akeṽa, 24gw’ayeṉ’aṉaga inè, Yesu ge iṉèngi yè wi re pegege vovo, waômè w’agweṉi gô lende mèyoṉo agènda gô Kapèrnaum gô bute Yesu. 25Na gw’alèngi waô yè gô ntye mori y’eliṽa, w’awulinyi yè inè: Ôṉènji, w’aṽyeṉi egômbe zeṉi? 26N’awiṉizyô waô ne Yesu inè: Giligili mi bulinya ṉwè inè, aṉwè buta myè, aranga konde aṉw’ayeṉi lemba, ndô konde aṉw’anyeṉi mpèmba ayôra. 27Ayanjaṉi gô dèng’inya si maṉe maṉaga, ndô g’ômwanja w’inya mè si dwaṉa gw’em̃èṉo za koṉako, si be pô ṉwè n’Ômwaṉa w’ôma; konde ayè re dingilyô pa ne Rerè, Anyambyè, n’elingilyô zè. 28Vovo awulinyi waô yè inè: Azwè ga lende ande gô janje ṽilô y’Anyambyè? 29Awiṉizyô waô ne Yesu inè: Eṽilô z’Anyambyè ze ziṉo inè, aṉwè ga ṽekelye ôma wi re yè tôm̃a pa. 30Awulinyi waô yè inè: Sambô elemba nde zi dendô wè, ko zwè jeṉa zô, aṽekelyo? Ô dend’ande? 31Ireri sazô s’anyeṉi manu gw’itôve, ga nt’are tèndô pa inè: Aveṉi waô mpèmba avila g’ôrôṽa gô nya. 32Yeṉo awulinyô waô ne Yesu inè: Giligili, mi bulinya ṉwè inè, arange Môsès aveṉi ṉwè mpèmba avila g’ôrôṽa, ndô Reri yam̃ ayè pa ṉwè mpèmba ya rèti avila g’ôrôṽa; 33konde mpèmba y’Anyambyè ne yô yi sum̃iṉa avila g’ôrôṽa av’em̃èṉo gô ntye yiṉo.

34N’awulinyi waô yè inè: Rera, va zwè mpèmba mè egômbe zôdu.

35Awulinyô waô ne Yesu inè: Myè ne mpèmba y’em̃èṉo. Ayè yi bya gôre myè arô jogo njaṉa nyèṉè, n’ayè yi bekelya myè arô jeṉ’esôve nyèṉè. 36Ndô my’awulinyi ṉwè inè, aṉw’are jeṉa pa myè, ndô aṉwè pa bekelya. 37Ôm’edu e pô myè ne Reri yam̃ e bya gôre myè, n’ayè yi bya gôre myè, my’awiṉize yè du; 38konde my’are sum̃iṉa pa avila g’ôrôṽa, aranga gô dende ntondiṉi yam̃, ndô ntondiṉi y’ôma w’arôm̃i myè. 39Ni ntondiṉi y’ôma w’arôm̃i myè ye yiṉo inè, my’averiz’ôma avila gôr’aṉaga waôdu wi re yè pa myè, ndô inè, mi ga rôngunye waô gô num̃uṉa. 40Ntondiṉi ya Reri yam̃ ye yiṉo inè, ôm’edu e jeṉ’Ômwaṉa aṽekelyè e be dwaṉa n’em̃èṉo za koṉako, na mi be tôngunyè gô ntyugu num̃uṉa.

41N’alagalag’Iju g’ômwanji wè, konde awulyi nè: Myè ne mpèmba y’azum̃iṉi avila g’ôrôṽa. 42N’awulyi waô inè: Wiṉo arange Yesu mè, y’ômwaṉa wi Yôsèf, are reri yè ni ngi yè azw’avôrô waô? Sambô ntiṉa nde yi bulyè inè: My’azum̃iṉi avila g’ôrôṽa?

43N’awiṉizyô waô ne Yesu inè: Alagalagaṉi aṉwè n’aṉwè. 44E zel’ôma wi bya gôre myè, kaô Rerè y’arôm̃i myè adurè, na mi be tôngunyè kè gô ntyugu num̃uṉa. 45Are tèndô pa kè gô yangô y’ivogisi inè: Waôdu wi be nènjô n’Anyambyè. Yeṉo ôm’edu kè are jogo pa gôre Rerè awong’inènji sè e bya gôre myè. 46Aranga nè Rerè are jeṉô pa n’ôm’edu, kaô ayè y’avili gôre Rerè. 47Giligili mi bulinya ṉwè inè: Ayè yi bekelya myè, are n’em̃èṉo za koṉako. 48Myè ne mpèmba y’em̃èṉo. 49Ireri saṉi s’anyeṉi manu gw’itôve, n’ayuwi waô. 50Yiṉo ne mpèmba yi sum̃iṉa avila g’ôrôṽa, yi re jog’ôma anya yô ayuwe du. 51Myè ne mpèmba ya bo y’azum̃iṉi avila g’ôrôṽa. Jog’ôma anye mpèmba yiṉo, e be dwaṉa bo egômbe zôdu, ni mpèmba yi be pô myè, yô n’ôzôṉe wam̃, wi be pô myè gw’em̃èṉo zi ntye yiṉo.

52Yeṉo alôṽaṉag’Iju mpaga, awulya inè: Ôma wiṉo ko jolye pa zwè ôzôṉe wè gô nya sèṉi?

53Vovo Yesu awulinyi waô inè: Giligili mi bulinya ṉwè inè, j’aṉw’ any’ôzôṉe w’Ômwaṉa w’ôma, ayonge ntyiṉi yè, gambèṉè aṉwè azele n’em̃èṉo gw’ikuṽi yaṉi. 54Ayè yi ny’ôzôṉe wam̃ ayonge ntyiṉi yam̃ are n’em̃èṉo za koṉako; na mi be tôngunyè kè gô ntyugu num̃uṉa. 55Konde ôzôṉe wam̃ n’inya sa rèti, ni ntyiṉi yam̃ n’ijonga sa rèti. 56Ayè yi ny’ôzôṉe wam̃ ayonge ntyiṉi yam̃ e dwaṉa gôre myè, myè kè mi dwaṉa gôre yè. 57Ga nt’arôm̃yô myè ne Rerè ya bo, ko mi dwaṉa bo vo Rerè, yeṉo kè ayè yi nya myè e be dwaṉa bo vo myè. 58Yiṉo ne mpèmba y’azum̃iṉi avila g’ôrôṽa. Aranga ga nt’anyeṉ’ireri saṉi manu, ayuwa: ayè yi nye mpèmba yiṉo e be dwaṉa bo gô koṉako.

59Yesu awuly’isam̃u yiṉo gw’aṉènjagi yè gô nagô yi soṉo gô Kapèrnaum.

60Yeṉo awenge gôr’iṉèngi yè gw’ayogyô waô igamba nyiṉo, w’awulyi nè: Nyiṉo igamb’iyoli, mande re ko jolye pôganyô nyô? 61Ndô gw’amyeṉi Yesu g’ôrèm̃i wè inè, iṉèngi yè w’adagalaga g’ômwanja w’igamba mè, awulinyi yè waô inè; Igamba nyiṉo nyô bendya ṉwè? 62Na j’aṉwè tô jeṉ’Ômwaṉa w’ôma e panda gô mbôra y’avegôgô yè gw’alônga, gambèṉè? ... 63Iṉiṉa nyi dwaṉiza bo, ôzôṉe wi pa nunguṉe mpongo. Agamba mi re myè bulinya pa myè ṉwè mô n’iṉiṉa n’em̃èṉo. 64Ndô ar’awèwo gôre ṉwè wi re wi pa bekelya. Konde Yesu amyeṉi avila gw’ipakilya waô wi re wi pa bekelya, n’ayè y’avegagi gô kôtizè. 65N’arô bulyi yè inè: Gô ntiṉa yiṉo yô re myè bulinya pa ṉwè inè, e zel’ôma re ko bya gôre myè, kaô apô ngulu ne Rerè.

66Avila gw’egômbe mèziṉo, awenge gôr’iṉèngi yè w’awinyi ni nyum̃a, ko w’arô kangaṉa na yè nyèṉè.

67Yeṉo Yesu awuliny’iṉèngi yè inè: Aṉwè kè, aṉwè bele dubwa? 68Simôn Pyère awiṉizi yè inè: Rera, azwè be kènda gôre mande? Ô re n’agamba m’em̃èṉo za koṉako. 69N’azw’are bekelya pa amya kè inè, awè ne Krist, y’Ômwaṉa w’ôrunda w’Anyambyè. 70Awiṉizyô waô ne Yesu inè: Aranga myè re pinja pa ṉwè ôṉambaṉi? N’ôm̃ori gôre ṉwè n’iṉiṉ’iṽe! 71Agambi g’ômwanja wi Yudas Iskaryot, y’ômwaṉa wi Simôn; konde ayè avegagi gô kôtizè, ayè kè avegagi ôm̃ori gôr’igôm̃i n’aṽaṉi.

Currently Selected:

Yôan 6: MYE

Highlight

Copy