Ipakilya 9
9
1N’azaviṉi Anyambyè Nôa n’awaṉi wè aṉôm̃e, n’awulinyè waô inè: Yaṉaṉi ko buṉaṉi ayônye ntye. 2N’ityi saṉi n’ereryi zaṉi zi be dwaṉa gô nyam̃y’edu gô ntye, na gô nyony’edu y’ôrôṽa, na gw’ezom̃’edu zi dandalanda gô ntye, na gw’intyuwè sôdu si mbeṉe mpôlô; apenyô gw’ago maṉi. 3Ezom̃’edu zi kèndagènda na zi re bo zi be dwaṉ’inya gôre ṉwè; mi pa ṉwè yom̃a yiṉo yôdu, vangaṉ’agônjô ambezô. 4Ndô anyaṉi du ôzôṉe n’em̃èṉo za wô, ni ntyiṉa ya wô. 5Ndô ntyiṉi yaṉimè mi be bambya yô ni ntiṉa yi m̃èṉo yaṉi; mi be bambya yô gôre nyam̃y’edu; na mi be bamby’em̃èṉo z’ôma avila g’ôgo w’ôma, n’avila g’ôgo wa mwô’ngwè. 6J’ôm’edu apôvize ntyiṉa y’ôma, vo ôma ntyiṉi yè yi be pôvizô; konde Anyambyè avang’ôma gw’egolaṉi zè. 7N’aṉwè, yaṉaṉi ko buṉaṉi mbuṉaga gô ntye, wuṉaṉi gô yô.
8N’arô kambi Anyambyè gôre Nôa na gôr’awaṉi wè aṉôm̃e na yè inè: 9Vôna, mi dwaṉize njeki yam̃ gôre ṉwè, na gôr’imbambi saṉi gô nyum̃i yaṉi, 10na gô yom̃a yôdu yi re bo yi re na ṉwè, inyoṉi ni vugiṉa, n’inyam̃a sôdu si ntye, ni yom̃a yôdu yi re kogwa pa avila g’ôwatanga, n’inyam̃a sôdu si ntye. 11Mi dwaṉize njeki yam̃ gôre ṉwè inè: ôzôny’edu w’arô jilizô nyèṉè n’aṉingô m’eṉingô evôlô; arô dwaṉe kè nyèṉè eṉingô evôlô gô jilize ntye. 12N’awulyi Anyambyè inè: Ziṉo n’elingilyô zi njeka yi dwaṉizô myè ntyo myè ntyo wè ni ya ya bo yôdu yi re n’aṉwè, vo ampôm̃a m’egômbe zôdu; 13my’afweli mbumbi yam̃ gw’evindi, yi be dwaṉ’elingilyô zi njeka ntyo myè ntyo ntye. 14Gô be pindiza myè vindi gw’igôṉô nyi ntye, mbumba yi be jeṉô gw’evindi. 15Na mi be jônginye njeki yam̃ yi re ntyo myè ntyo ṉwè, ntyo yom̃a yôdu yi re bo gw’izôṉe yôdu; alwaṉe kè nyèṉè aṉingô m’eṉingô evôlô gô jiliz’izôṉe yôdu. 16Ndô mbumba yi be dwaṉa gw’evindi, ko mi pôna yô ayônginye njeka y’egômbe zôdu ntyo Anyambyè ntyo ya yôdu yi re bo gw’izôṉe yôdu yi re gô ntye. 17N’awulinyi Anyambyè Nôa inè: Ziṉo n’elingilyô zi njeka yi dwaṉizô myè ntyo myè ntyo izôṉe yôdu yi re gô ntye.
18Awaṉ’aṉôm̃e wi Nôa w’agogwi g’ôwatanga w’avegagi Sèm, Kam, ni Yafèt; ndô Kam avegagi rerè yi Kanaan. 19Wiṉo ararô ne awaṉ’aṉôm̃e wi Nôa; n’aṉaga wi ntye waôdu wi pila avila gw’imbambi saô. 20Ndô Nôa avakilyi gô janja gô ntye, n’aṽèṉi yè ntyaga y’igoli. 21N’ayongi yè ivè, awongô; n’avegagi yè tele gô nagô yè y’ikuku. 22Ni Kam, yi rerè yi Kanaan, ayeṉi ôtele wa reri yè, n’azali yè wô gw’igala gôr’awôngi yè aṽaṉi. 23N’awongi Sèm ni Yafèt ngoy mpôlô, aralya yô gw’ibegi saô, agèndi waô ni nyum̃a, aliṽiṉ’ôtele wa reri yaô; n’azô maô m’avegagi pôna pa gô nyum̃a; yeṉo wi pa jeṉa du ôtele wa reri yaô. 24N’aṉongwi Nôa avila gw’ivè ny’ayôngyô yè, n’amyeṉi ga nt’alendiṉô yè n’ômwaṉi wè ôrumbe. 25N’awulyi yè inè: Ôzavô gôre Kanaan; e ga lwaṉe nyôngô y’inyôngô gôr’awareri yè. 26N’awulyi yè inè: Ôzaviṉô gôre Yeôva, Anyambyè yi Sèm, Kanaan kè e ga lwaṉe nyôngô yaô! 27Anyambyè e be pendize Yafèt, ko yè dwaṉa gw’inagô s’akuku si Sèm; Kanaan kè e ga lwaṉe nyôngô yaô.
28Aṉingô m’eṉingô pyagaṉa pa, alwaṉi Nôa inkam̃a s’impum̃a ntyarô n’agôm̃i m’impum̃’ataṉè. 29Ndô intyugu si Nôa sôdu s’avegag’inkam̃a s’impum̃’eṉôgôm̃i n’agôm̃i m’impum̃’ataṉè; n’ayuwi yè.
Currently Selected:
Ipakilya 9: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
