Ipakilya 7
7
1N’awulinyi Yeôva Nôa inè: Yingiṉa g’ôwatanga, awè ni nagô yo yôdu; konde my’are jeṉo pa g’ôma w’ôgôre g’ôzô wam̃ gw’ivôm̃a nyiṉo. 2Ndô gw’evuginy’edu zi re nkèrè wonga gôre wè ôrwageṉô ôrwageṉô, eṉôm̃e n’ezantô zè; ndô gô nyam̃y’edu yi re yi zele nkèrè, ko bonge mbaṉi, nôm̃e ni nyantô yè. 3Na gô nyony’edu y’ôrôṽa ôrwageṉô ôrwageṉô, nôm̃e ni nyantô gô penjavenje mbuṽe ya sô bo g’ôzô wi ntye yôdu. 4Konde e p’are ntyugu ôrwageṉô, gambèṉè mi be nogize ningô gô ntye vo agôm̃i m’am̃and’anay n’agôm̃i m’igwèr’anay; na mi be jiliz’avila g’ôzô wi ntye yom̃a yôdu ya bo yi re myè panga pa.
5N’alendi Nôa ezom̃’edu z’azômbyô yè ne Yeôva.
6Ndô Nôa avegag’inkam̃a s’impum̃’ôrôṽa gw’arweṉ’eṉingô evôlô z’aṉingô gô ntye. 7N’ayingiṉi Nôa, n’awaṉi wè aṉôm̃e, n’ômwantô wè, n’antô w’awaṉi wè na yè, ayingiṉa g’ôwatanga gô fang’aṉingô m’eṉingô evôlô. 8Avila gw’inyam̃a si nkèrè, n’inyam̃a si re si zele nkèrè, n’inyoṉi, n’ezom̃’edu zi dandalanda gô ntye, 9ayingiṉi yô g’ôwantanga gôre Nôa, ṽaṉi ṽaṉi, eṉôm̃e n’ezantô, ga nt’azômbyô Nôa ne Anyambyè.
10Ntyugu ôrwageṉô pyagaṉa pa, aṉingô m’eṉingô evôlô m’avegagi gô ntye. 11G’ômpum̃a w’inkam̃a s’impum̃’ôrôṽa s’em̃èṉo zi Nôa, g’ôgwèli wi mbaṉi, gô ntyugu y’igôm̃i n’ôrwageṉô y’ôgwèli, gô ntyugu mèyoṉo, imbeṉe si ntyuṽa mpôlô ni vindi y’ôrôṽa y’ayarwayarwi, n’asangala m’ôrôṽa m’aṉungunyô. 12Ndô ningô y’aṉogi gô ntye agôm̃i m’am̃and’anay n’agôm̃i m’igwèr’anay. 13Gô ntyugu mèmô ayingiṉi Nôa ni Sèm, ni Kam, ni Yafèt, awaṉ’aṉôm̃e wi Nôa, n’ômwantô wi Nôa, n’antô ararô w’awaṉi wè aṉôm̃e na waô g’ôwatanga. 14Waô, n’inyam̃a sôdu g’ôṉongo wa sô, ni vugiṉa yôdu g’ôṉongo wa yô, ni ya yôdu yi dandalanda g’ôṉongo wa yô, inyoṉi sôdu g’ôṉongo wa sô, nyony’edu yi re n’ampava. 15N’ayingiṉi yô gôre Nôa g’ôwatanga ṽaṉi ṽaṉi avila gw’izôṉe yôdu yi fwel’ômwèy w’em̃èṉo. 16Y’ayingiṉi eṉôm̃e n’ezantô avila gw’izôṉe yôdu, ga nt’azômbyô Nôa n’Anyambyè. Avila vovo aṉunjyô yè ne Yeôva gôgô.
17Ndô eṉingô evôlô z’alwaṉi agôm̃i m’intyugu anay gô ntye, n’aṉingô m’awuṉi arômbiṉ’ôwatanga, n’ayanginyi wô gw’igôṉô nyi ntye. 18N’avendi aṉingô awuṉa pôlô gô ntye, n’ôwatanga w’ayakilagi gw’aṉingô. 19N’avendagi aṉingô pôlô gô ntye, n’avugyô inômb’indôndwi sôdu si re g’ôdôlôngô w’ôrôṽa. 20N’aṉingô m’avand’igôm̃i ny’ikude ni kude ôtaṉè gw’igôṉô, n’avugyô inômba sôdu.
21N’ayuwi ezom̃’edu zi kèndagènda gô ntye, inyoṉi ni vugiṉa, n’inyam̃a, ni ya yôdu yi dandalanda gô ntye, n’aṉaga waôdu. 22Ezom̃’edu z’awelag’ômwèy w’em̃èṉo gw’isoguṉa y’ômpômbô, na y’avegagi gô ntye ya kaka, y’ayuwi. 23Yom̃a yôdu y’em̃èṉo y’avegagi g’ôzô wi ntye y’ayilizyô, avila gôr’aṉaga kwanga gôr’inyam̃a, kwanga gôre ya yi dandalanda gô ntye, na gôr’inyoṉi s’igôṉô: y’ayilizyô avila gô ntye. Arigaṉi kaô Nôa, na waô w’avegagi na yè g’ôwatanga. 24N’avendi aṉingô gô ntye nkam̃a y’intyugu n’agôm̃i m’intyugu ataṉè.
Currently Selected:
Ipakilya 7: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
