Ipakilya 17

1Ndô gw’avegagi Abram agôm̃i m’impum̃’eṉôgôm̃i n’impum̃’eṉôgôm̃i, Yeôva awôm̃unyi gôr’Abram awulinyè inè: Myè ne Anyambyè yi ngulu yôdu, gangaṉa g’ôzô wam̃ ko dwaṉ’ôma w’ôgôre. 2Ndô mi be dwaṉize njeki yam̃ ntyo myè ntyo wè, ko mi buṉizo pôlô.

3N’avuri Abram ôzô wè gô ntye, n’agambi Anyambyè na yè inè: 4Yiṉo ne njeki yam̃ yi jekô myè na wè, ô be dwaṉe rerè y’aṉongw’am̃enge. 5Ini nyo ny’arô fweyô nyèṉè inè: Abram, ndô ini nyo nyi be dwaṉ’inè: Abraam, konde my’are wè panga pe rerè y’aṉongw’ am̃enge. 6Ndô mi be buṉizo pôlô, na mi be pang’aṉongo avila gôre wè, n’aga wi be kogwa avila gôre wè. 7Mi be dwaṉize njeki yam̃ ntyo myè ntyo wè, ni ntyo awaṉi wo gô nyum̃i yo gw’ampôm̃i maô; yi be dwaṉe njeka ya pèkèpèkè, gô dwaṉ’Anyambyè gôre wè na gôr’ awaṉi wo gô nyum̃i yo. 8Ndô mi be pa gôre wè na gôr’awaṉi wo gô nyum̃i yo ntye yi re wè ôgènda, ntye yôdu yi Kanaan vo iṉiva s’egômbe zôdu; myè kè mi be dwaṉ’Anyambyè yaô.

9N’awulinyi Anyambyè Abraam inè: Venjavenje njeki yam̃, awè n’awaṉi wo gô nyum̃i yo ga nt’ar’ampôm̃i maô. 10Yiṉo ne njeki yam̃ yi be penjavenjô ṉwè, ntyo myè ntyo ṉwè n’awaṉi wo gô nyum̃i yo inè: ômwaṉ’ôṉôm̃y’edu gôre ṉwè e ga gèrô. 11Aṉwè be kèr’ iluwu yaṉi; si be dwaṉ’itum̃inya si njeka ntyo myè ntyo ṉwè. 12Ômwany’ edu gôre ṉwè, ayè, jaṉô pa ntyugu eṉanay, e ga gèrô ga nt’ar’ampôm̃i maṉi, ajaṉô gô nagô, ge akôlô ni sika y’ômwany’edu w’ôgènda, wi re e zele gô mbuṽe yaṉi. 13Ayè yi jaṉô gô nagô yo, n’ayè yi kôlô ni siki yo e ga gèrô giligili, ko njeki yam̃ dwaṉa gw’iluwu yaṉi njeka y’egômbe zôdu. 14Ndô ôṉôm̃e w’ôzombè wi re e pa kèrô ôluwu wè, ôma mèwoṉo e be teṉô avila gôr’aṉagi wè, are jôṉa pe njeki yam̃.

15N’awulinyi Anyambyè Abraam inè: G’ômwanja wi Sarai y’ômwantô wo, aṽèt’ini nyè nyèṉè inè, Sarai, ndô ini nyè nyi be dwaṉa inè, Sara. 16Mi be saviṉè ko mi pè ômwaṉ’ôṉôm̃e; mi be saviṉè, n’aṉongo mi be pila gôre yè, n’aga w’aṉaga wi be kogwa avila gôre yè. 17N’avuri Abraam ôzô wè gô ntye, ayoṉa, awulya g’ôrèm̃i wè inè: Ôṉôm̃e wi nkam̃a y’impum̃a ko jaṉ’ômwaṉa? Sara kè y’atweṉi agôm̃i m’impum̃’eṉôgôm̃i g’ôṉèro, ko jaṉa? 18Ndô awulinyi Abraam Anyambyè inè: Gavoṉo Yismaèl ko dwaṉa bo g’ôzô wo! 19N’awulyi Anyambyè inè: Giligili, Sara y’ômwantô wo e be jaṉ’ômwaṉ’ôṉôm̃e gôre wè, ko wè bèt’ini nyè inè: Izaak; ndô mi be dwaṉize njeki yam̃ gôre yè, njeka y’egômbe zôdu gôr’awaṉi wè gô nyum̃i yè. 20G’ômwanja wi Yismaèl my’apôganyô wè, vôna, mi be saviṉè, mi be jaṉizè awuṉizè pôlô, e be jaṉ’igôm̃i ny’ivangiṉi n’ivangiṉi mbaṉi: mi be pangè iṉongw’ivôlô. 21Mi be dwaṉize njeki yam̃ gôr’Izaak, yi be jaṉô ne Sara gw’egômbe ziṉo g’ômpum̃a wi bya.

22Gw’am̃èṉizi yè gô kamba na yè, avandi Anyambyè avila gôr’Abraam.

23N’awongi Abraam Yismaèl, y’ômwaṉi wè, na waôdu w’ayanyô gô nagô yè, na waôdu w’agôlyô yè ni sika, n’aṉôm̃e waôdu gôr’aṉaga wi nagô y’Abraam, n’agèri yè waô iluwu yaô gô ntyugu mèmô, ga nt’azômbyô yè ne Anyambyè. 24Abraam avegag’agôm̃i m’impum̃’eṉôgôm̃i g’ôṉèro gw’agèryô yè. 25Yismaèl, y’ômwaṉi wè, avegag’ igôm̃i ny’impum̃a n’impum̃’irarô g’ôṉèro gw’agèryô yè. 26Gô ntyugu mèmô agèryô Abraam ni Yismaèl, y’ômwaṉi wè. 27N’aṉôm̃e waôdu wi nagô yè w’ayanyô gô nagô yè, ge waô w’agôlyô ni sika y’agènda, w’agèryô ta na yè.

Currently Selected:

Ipakilya 17: MYE

Highlight

Copy