Rôm̃i 5

1Ndô avegag’ôṉôm̃e, ini nyè ne Ananyas, ayè n’ômwantô wè Safira, w’agôli ntye y’aṉivyô waô, n’azimbyi yè mbèy y’igôlô, 2ômwantô wè kè amyeṉ’igamba; n’aṽagi yè mbèy y’alèki, alimbiṉa yô gw’agôlô mi rôm̃i. 3Pyère awulinyi yè inè: Ananyas, ezom̃a nde zi re Satan jônya p’ôrèm̃i wo, gôre wè gô nôkiṉ’Iṉiṉ’Iṽya, azimbye mbèy y’igôlô nyi ntye? 4Gw’avegagi yô yi pa kôlô, yi re pegeg’iyomè? Na yô kôlô pa yi re pegege gô ngulu yo? Ô re pikilya p’ôsam̃u wiṉo g’ôrèm̃i wo sèṉi? Ô pa nôkiṉ’aṉaga, ndô Anyambyè. 5Gw’ayogyô Ananyas agamba miṉo, avôswi gô ntye, azul’ômwèy. N’arweṉ’itya sipôlô gôre waôdu w’ayogyô isam̃u yiṉo. 6N’agum̃aṉi awanjo, avingè, arwaṉè, aṽèṉè.

7Pyèrè n’agwèr’ararô pyagaṉa pa, ômwantô wè ayingiṉi, imya fo g’ômwanja w’ôsam̃u w’arweṉi. 8N’awulinyô yè ne Pyèrè inè: Wulinya myè, nyiṉo n’igôlô ny’agôli ṉwè ni ntye mè? N’awiṉizi yè inè: èñ, igôlô ne mènyoṉo. 9Vovo awulinyô yè ne Pyère inè: Ezom̃a nde zi re ṉwè dataṉa pa gô demb’Iṉiṉa nya Rerè? Vôna, intyôzô sa mongi w’abèṉ’ôṉôm̃u wo si re g’ômpômbala, waô kè wi be twaṉo. 10N’avôswi yè pelè gw’agôlô m’erôm̃i, azul’ômwèy. N’ayingiṉi awanjo aliṽinyè juwa pa, n’arwaṉi waô yè, aṽèṉè pyèrè n’ôṉôm̃u wè. 11N’arweṉ’itya sipôlô gôre mandô yôdu, na gôre waôdu w’ayogyô isam̃u yiṉo.

12Lemba yenge n’isam̃u yi mamô y’alendyô n’ago mi rôm̃i gôr’aṉaga. N’alwaṉi waôdu ta gw’evungu zi Salômôn, 13na gôr’aṉag’am̃ori e pa joly’ôma gô kweṉa gôre waô; ndô aṉaga waôdu w’azum̃inyi waô pôlô. 14Ntangô ya mongi w’aṽekelyi gôre Rerè y’agundyô vyagaṉô na vyagaṉô, aṉôm̃e n’antô; 15yeṉo arwaṉi waô mongi w’avegagi n’inkaṉi gw’agala alimbiṉa waô gw’adô na gw’aṉanô, inè, gô be pyagaṉe Pyère, vangaṉ’iviri nyè nyi ga vugiṉe gôr’ôm’edu gôre waô. 16N’alataṉi kè aṉag’awenge avila gw’inkala s’avegagi pyèrè ni Yerusalèm, ntwaṉaga mongi w’avegagi n’inkaṉi n’aṉaga w’azokolyô n’aṉiṉ’ambe; n’ayingyô waôdu.

17Miṉisè mpôlô na waôdu w’avegagi na yè, waô ne nkumba y’isadusi, w’agum̃aṉi jônya pa ralye ni ñandi, 18araly’ago gôre rôm̃i, awela waô gô ntyôgô yi nkala. 19Ndô yenjèl ya Rerè y’aṉunguṉ’aguge mi nagô yi ntyôgô ôgwèra, awulinya waô inè: 20Gèndaṉi, ko kum̃aṉaṉi gô nagô y’Anyambyè, amyez’aṉaga agamba môdu m’em̃èṉo ziṉo. 21Gw’ayogyô waô yeṉo, w’ayingiṉi gô nagô y’Anyambyè ayenjiṉa, avakilya gô nènja.

Ndô miṉisè mpôlô na waô w’avegagi na yè w’aṽyeṉi, alatiz’ôvagô n’aṉèro waôdu w’awaṉa w’Israèl, n’arôm̃i waô aṉaga gô kôve rôm̃i gô nagô yi ntyôgô. 22Gw’aṽyeṉ’aṉaga w’arôm̃yô wi pa diṽinye waô gô nagô yi ntyôgô. N’awinyi waô, amyez’igamba, awulya inè: 23Azw’adiṽinye nagô yi ntyôgô ngwa mbyambye, n’ivenjavenji kum̃aṉa pa swaswo n’impômbala; ndô gw’aṉunguṉa zwè nagô, azwè pa diṽiny’ôma gôgô.

24Gw’ayogyô waô agamba miṉo, miṉisè mpôlô n’ôma w’avegagi gw’ewônjô zi nagô y’Anyambyè, n’imiṉisè impôlô, wi pa mya nt’are waô gô pikilya g’ômwanja wi rôm̃i ni nte be twa g’ômwanja w’igamba mè. 25N’aṽyeṉ’ôma gô bulinya waô inè: Vônaṉi, aṉôm̃e w’awelyô ṉwè gô ntyôgô wi re gô nagô y’Anyambyè nènjag’aṉaga.

26Vovo agènd’ôma w’avegagi gw’ewônjôzinagô y’Anyambyè agènda ni yôfisyè, aṽaga waô, ndô ni nkèngo, konde w’aryeṉi, wi vende pungô adô n’aṉaga. 27Na waô baga pe rôm̃i gw’azô m’ôvagô, miṉisè mpôlô aṽambyi waô inè: 28Azwè pa dega ṉwè pôlô inè, aṉènjaṉi gw’ina mènyoṉo? Na vônaṉi, aṉw’are jônya pe Yerusalèm n’inènji saṉi, ko ṉwè bela gô tô bage ntyiṉa y’ôma wiṉo gôre zwè.

29Ndô Pyère ni rôm̃i mori w’awiṉizi nè: Azwè ko jogiṉô Anyambyè vyagaṉô n’aṉaga. 30Anyambyè y’ireri sazô arôngunyi Yesu, y’ayônyô ṉwè, mbanyègè gw’erere. 31Anyambyè avendyè n’ôgo wè ôṉôm̃yè gô dwaṉ’Ôvangiṉi n’Ôzungè, gô p’iniga si ṉkôndi n’inyeza s’ibe gôr’Israèl. 32Azwè n’iyeṉi y’isam̃u yiṉo, ga nt’are kè Iṉiṉ’Iṽya, nyi r’Anyambyè pa pa gôre waô wi jogiṉô yè.

33Gw’ayogyô waô agamba miṉo w’aṽendi, aṽela gô jôṉa waô. 34Ndô agum̃aṉi g’ôvagô farisi mori, ini nyè ne Gamalyèl, ôṉènji w’ivanga, alubô n’aṉaga waôdu, n’azômbyi yè inè, rôm̃i yi ga gogunyô kwè. 35N’awulinyi yè waô inè: Aṉwè, aṉôm̃e w’Israèl, ṽandam̃iṉaṉ’ikuṽi yaṉi nte be denda ṉwè g’ômwanja w’aṉaga wiṉo. 36Konde pa pyagaṉ’ôling’ôla, awôm̃wi Tudas, arum̃iny’ôkuṽi wè inè, ayè ôma, n’alataṉi na yè aṉaga pyèrè ni nkam̃a nay: n’ayônyô yè, na waôdu w’azôngi yè w’avazanganyô arwa gô nyawènyawè. 37Ayè pila pa, awôm̃unyi Yudas yi Galile, gw’egômbe z’arèndyô ana m’aṉaga, alur’aṉag’awèwo na yè: averi yè kè, na waôdu w’azôngi yè w’avazanganyô. 38Na vèṉo, mi bulinya ṉwè inè, alendaṉi mpongo gôr’aṉaga wiṉo, ko dèkizaṉi waô dyè. Ja môndo yiṉo ge eṽilô ziṉo zi pila gôr’aṉaga, gambèṉè zi be jila; 39ndô ja zi pila gôr’Anyambyè, aṉw’ayolye jilize zô. Aṉwè vende dèngô inè, aṉwè nwa n’Anyambyè.

40N’ayiviri waô agambi mè. Waô fweya pe rôm̃i gôre waô, w’aziṽi waô n’impava, alega waô inè, w’arô kamba nyèṉè gw’ina nyi Yesu, n’alèkizi waô alèkiza waô dyè.

41Yeṉo alubwi rôm̃i avila g’ôzô w’ôvagô, njeṉage mbya, konde w’ayenyô n’inyanga nyi jeṉizô ntyoṉi g’ômwanja w’ina nyi Yesu. 42Ni ntyugw’edu gô nagô y’Anyambyè na gw’inagô saômè, wi pa tige nènja, agambiṉe Yesu‐Krist.

Currently Selected:

Rôm̃i 5: MYE

Highlight

Copy