Rôm̃i 16

1Aṽyeṉi yè kè gô Dèrba, na gô Listra. Na vôna, avegagi vovo ôṉèngi, ini nyè ne Timôte, ngi yè avegagi mw’Iju aṽekelyi, ni reri yè mwô’Grèk. 2Timôte yiṉo avegagi n’in’iṽya gôr’awarerè wi Listra na w’Ikônyum. 3Pol aṽeli yè gô kènda na yè; n’awongyè yè, agèrè, g’ômwanja w’Iju s’avegagi gw’imbôra mèsoṉo, konde waôdu w’amyeṉi nè, reri yè mwô’Grèk. 4Gw’avyagaṉagi waôgw’inkala, w’aveṉ’agamba m’azômbyô ne rôm̃i n’aṉèro gô Yerusalèm gôr’awarerè gô penjavenja mô. 5Yeṉo ayolizyô imandô gw’ibekelya, awuṉ’aṉaga ntyugw’edu.

6Waô degô pa n’Iṉiṉ’Iṽya gô kamb’igamba gw’Azya, w’avyagaṉi gô Frijya na gô ntye yi Galati. 7Waô bya pa pyèrè ni Misya, w’aṽeli gô kènda gô Bitinya; ndô Iṉiṉa nyi Yesu nyi pa jivira waô gô kènda. 8N’avyagaṉi waô Misya, aṽya gô Trôas. 9Ôgwèra Pol ayinô nyinô inè: Agum̃aṉi mwô’Makedônya gôre yè, agwenè inkolo inè: Lalya guṉu gô Makedônya, ko nunguṉa zwè! 10Pol jinô pe nyinô yiṉo, agèṉizi zwè pelè gô kènda gô Makedônya, nkôntizaga inè, Rerè aweyi zwè gô bunguṉe ntyangô mbya gôre waô.

11Yeṉo aluli zwè avila gô Trôas agènda gôre gô Samôtrake, na bunya avungi zwè gô Neapôlis. 12Avila vovo agèndi zwè gô Filipi, nkala mpôlô yi mbèy yi ntye yi Makedônya, ni mbôra y’aṉivyô ne mongi Rôma. N’alwaṉi zwè gô nkala mèyoṉo intyugu sinyèwo.

13Gô ntyugu yi soṉo, agogwi zwè avila gô nkala, agènda g’ôloṽi, konde azw’avikilyi nè, gôgô re mbôra y’ikambiṉa. N’alwaṉi zwè baru, agamba gôr’antô w’avegagi dataṉa pa vovo. 14Ômwant’ôm̃ori gôre waô, ini nyè ne Lidya, ôgôlisi w’iṉamba ya gelô, avili gô nkala yi Tiyatira, avegag’ômwantô wi ty’Anyambyè, avôganyôgô gw’agambagi zwè. Rerè aṉunguṉ’ ôrèm̃i wè, ko yè jogw’isam̃u y’agambyô ne Pol. 15Gw’aṽatizyô yè, ayè ni nagô yè, agweni waô inkolo inè: J’aṉw’atanga myè n’inyanga nyi bekelyô gôre Rerè, yingiṉaṉi gô nagô yam̃, ko dwaṉaṉi vovo. N’aṽègi yè zwè pôlô.

16Gw’agèndagi zwè gô mbôra y’ikambiṉa, nyôngô nyantô y’avegagi n’iṉiṉa ny’ipoga, y’alèngiṉi mongi w’aṉivi yè sika nyenge n’ipogi sè, aṽyeṉi gw’azô mazô, 17n’avakilyi yè gô sônga zwè, Pol na zwè. Arôngi yè inè: Aṉôm̃e wiṉo wi r’inyôngô s’Anyambyè y’Igôṉômè, wi myeza zwè mpoṉo y’isungiṉô. 18Alendagi yè yeṉo intyugu sinyenge. Ndô gw’aludyô Pol, agegwi, awuliny’iṉiṉa inè: Mi sômbyo gw’ina nyi Yesu‐Krist inè, gogwa avila gôre yè. N’agogwi nyô gw’igwèra mènyoṉo.

19Ndô gw’ayeṉ’ireri sè inè, igum̃u ny’iṉivi saô vo yè nyi mana, w’agôti Pol ni Silas, alura waô gw’igôliṉô gw’azô m’aṉèro. 20Waô baga pa waô gôr’ivangiṉi yi nkala w’awulyi nè: Aṉôm̃e wiṉo, Iju, wi sokolye nkali yazô pôlô, 21aṉènj’ intyale si re si zele kwèkwè gôre zwè gô bonga ge gô penjavenja, azwè mongi Rôma. 22N’agum̃aṉi kè aṉaga gôre waô, n’azoduṉ’ivangiṉ’ingoy saô, azômbya inè, wi ga ziṽô n’impava. 23Waô siṽa pa waô iziṽô imyenge, w’aweli waô gô ntyôgô, azômby’ôvenjavenji gô bandam̃iṉa waô mbyambye. 24Ôvenjavenji sômbyô pa yeṉo, aweli yè waô gô nontye yi nagô ya gare yi ntyôgô, awel’agôlô maô gw’ibôka.

25Ôgwèra ṉengeṉenge, Pol ni Silas, w’agambiṉagi ayembag’isum̃inya s’Anyambyè, n’ikôt’im̃ori y’avôganyôgô waô. 26V’igamba ny’agwaṉa arweṉ’isugyazugya si ntye sipôlô, ni ntiṉa yi nagô yi ntyôgô y’azugyazugyô, n’aṉungw’aguge môdu zange pelè, n’ibôka y’ôm’edu y’areṉi. 27N’aṉongw’ôvenjavenji avila gw’antyôviṉô, na gw’ayeṉi yè aguge mi nagô yi ntyôgô nungwa pa zange, agoguny’ôkwari wè avila gw’egôrô agènda gô sayuwa, mpinkilyaga inè, ikôtè y’aperi. 28Ndô Pol azôki ni ngulu inè: Alendiṉ’ôkuṽi wo mbe, konde azwèdu azw’are vèṉo. 29N’aṽambi ôvenjavenji ôjô, ayingiṉe ngwambè, njègèryaga gw’agôlô mi Pol ni Silas; 30n’agogunyi yè waô, awulya inè: Watata, mi ga lend’ande gô sungiṉô? 31Awiṉizi Pol ni Silas inè: Ṽekelye Rerè Yesu, gambèṉè w’asungiṉô, awè ni nagô yo. 32N’agambiṉi waô yè igamba nya Rerè, na gôre waôdu w’avegagi gô nagô yè. 33N’awongi yè waô, gw’igwèra mènyoṉo ny’ôgwèra, ayôvuṉ’izôwi yaô, n’aṽatizyô yè pelè, ayè na mongi yè waôdu. 34N’agèndizi yè waô gô nagô yè, azambiṉa waô tavulu, n’ayeṉi yè mbya ayè ni nagô yè yôdu, konde aṽekely’Anyambyè.

35Gw’ayenj’ôwenja, ivangiṉi yi nkala y’arôm̃’aṉaga gô buliny’ôvenjavenji wi nagô yi ntyôgô inè: Lèkiz’aṉaga mèwoṉo dyè. 36N’amyez’ôvenjavenji amyeze Pol igamba inè: Ivangiṉi yi nkala yi re tôm̃a p’aṉaga gô bulya inè, aṉwè ga lèkizô dyè; sambô yeṉo, gogwaṉi, ko kèndaṉi n’am̃ènjè. 37Ndô Pol awuliny’aṉaga inè: Wi re siṽa pa zwè gw’azô m’aṉaga, ôgara fo, azwè Rôma, awela zwè gô ntyôgô, ndô vèṉo wi bele kogunya zwè ntyorya! Alwaṉe yeṉo. Waômè wi ga ṽye gô kogunya zwè. 38Aṉaga w’arôm̃yô w’awuliny’ivangiṉi yi nkala agamba miṉo, n’aryeṉi waô gw’ayogyô waô inè, waô Rôma. 39N’aṽyeṉi waô avoṉiza waô; na waô kogunya pa waô, w’aṽègi waô gô dubwa avila gô nkala. 40Gw’agogwi waô avila gô ntyôgô, w’ayingiṉi gô nagô yi Lidya, na waô jeṉa p’awarerè, w’arevuṉi waô, agèndaga.

Currently Selected:

Rôm̃i 16: MYE

Highlight

Copy