YOHANE 9
9
Tau anu buta ndapakaʼosa i Yesu
9:1-12
1Sindara mpelinja i Yesu, ndakita tau buta ungka ri pampoana. 2Meoasi waʼa anaguru i Yesu ri Sira, “Guru, ara wenu tau seʼi butamo ungka ri pampoana? Isema anu masalaa, salaanya ngkalionya bara salaa ine pai papanya?”
3Mesono i Yesu, “Kabutanya setu banya salaanya ngkalionya bara salaa ine pai papanya, paikanya da napangkita ntau kuasa i mPue Ala motetala ri koronya. 4Sindara ntongo maremepa da tapotetalakamo waʼa ntetala anu ndapokauka Yaku. Maka ane mawengimo bemoreʼe tau anu mangkoto da motetala. 5#Mat. 5:14, Yoh. 8:12 Sindara Yaku laupa ri lino, yakumo reme ntolino.”
6Butu roo mompau ewanceʼe i Yesu, metupe Sira ri tana nepa ndaiko-iko rantani mewali lombu. Ungka lairia, lombu setu ndagereka tutumata ntau anu buta setu, 7nepa ndatoʼoka siʼa, “Palaimo mendoʼu ri liku Siloa.” (Siloa posokinya ‘Ndapokau’.) Malaimo tau setu njoʼu mendoʼu ri liku Siloa. Roo mendoʼu mewalili siʼa yosamo matanya.
8Natoʼo ntau anu samposori-sori banuanya pai pura-pura tau anu mangkita perapi-rapi ntau setu, “Ara banya tau seʼi anu motunda-tunda ri wiwi njaya wungkaeo merapi-rapi?”
9Reʼe tau anu mangantoʼo, “Siʼa kojo.” Paikanya reʼe woʼu anu mangantoʼo, “Banya siʼa, tau setu podo kasintolionya.”
Paikanya natoʼo ntau setu, “Yakumo i buta wungkaeo.”
10Meoasi tau seʼe ri tau setu, “Ewambeʼi pewalinya painaka yosamo matamu?”
11Mesono siʼa, “Tau anu mampotoʼo i Yesu anu magereka lombu tutumataku nepa ndatoʼo, ‘Palaimo mendoʼu ri liku Siloa.’ Malai kojo yaku njoʼu mendoʼu, roo setu kuepe yosamo mataku.”
12Natoʼo ntau seʼe, “Mbeʼimo tau setu?”
Mesono siʼa, “Bareʼe kuincani.”
To Parisi mampombebalika tau buta
9:13-34
13Pampakaʼosa i Yesu tau buta anu ndagereka lombu tutumatanya setu nepa ndapokau njoʼu mendoʼu, pewalinya setu kono eo Umapo.
14I buta anu yosamo matanya setu napoyunu ntau ri to Parisi. 15Napeoasi nto Parisi ri tau setu, ewambeʼi painaka yosamo matanya. Mesono siʼa, “Nagereka lombu tutu mataku nepa kumendoʼu, roo setu yosamo mataku.”
16Reʼe bara tesangkuja tau ri oyo nto Parisi anu mantoʼo, “Tau anu mampowia setu banya ungka ri Pue Ala, maka bareʼe natubunaka eo Umapo.”
Paikanya santila tau mantoʼo, “Ane siʼa tau masalaa bareʼe da nakoto mampowia tanda ngkuasa anu ewanceʼe?” Mewalimo posisala ri oyo ntau seʼe.
17Meoasi woʼu waʼa nto Parisi ri tau buta anu yosamo matanya setu, “Ewambeʼi parata ndayamu kono tau anu mampakayosamo matamu setu?”
Mesono tau setu, “Sira nabi.”
18Paikanya bareʼe naaya waʼa ntadulako nto Yahudi katau setunja inceʼemo tau anu buta wungkaeo. Inceʼe painaka napeboo ntau seʼe tau tuʼanya, 19butu jela, napeoasi, “Ara monco inceʼi anami anu buta ungka ri pampoana? Ewambeʼi painaka yosamo matanya wawaseʼi?”
20Mesono ine pai papanya, “Lawi monco inceʼi ana mami anu buta ungka ri pampoana. 21Paikanya bara ewambeʼi painaka yosamo matanya wawaseʼi, bareʼe kaincani. Pai bara isema anu mampakaʼosa matanya, inceʼe seʼe bareʼe kaincani. Ndipeoasimo ri siʼa ngkalionya, siʼa bangkemo; naincani ngkalionya mancono.” 22Painaka ewanceʼe pompau ine pai papa i buta maka maeka raya ntau seʼe ri waʼa ntadulako nto Yahudi, maka nadongemo kabotu gombo ntau seʼe, pura-pura tau anu maʼaku i Yesu Mokole Tadungkadago, bareʼemo maya da mesua ri banua mpekakai. 23Inceʼe puʼunya painaka natoʼo ine pai papa i buta, “Siʼa bangkemo, ndipeoasimo ri siʼa.”
24Nepa napeboo woʼu ntau seʼe tau anu buta pai yosamo matanya setu, nepa natoʼoka, “Pontando koromo, toʼomo anu monco. Maka malulu paincani mami tau setu tau masalaa.”
25Mesono tau setu natoʼo, “Bara masalaa bara bareʼe, tau setu bareʼe kuincani. Podo sangaya anu kuincani iowi yaku buta wawaseʼi yosamo mataku.”
26Natoʼo woʼu ntau seʼe ri siʼa, “Nunjaa napowia ri siko? Ewambeʼi napampowia painaka yosa matamu?”
27Mesono tau setu, “Roomo kutuntuka komi, paikanya bareʼe ndiaya, ara wenu painaka ndipekituntu woʼu? Bara da rayami woʼu malulu Sira?”
28Napepepara ntau seʼe tau setu natoʼo, “Sikomo mangalulu siʼa; kami bareʼe! Kami mangalulu i Musa. 29Manoto kaincani i Pue Ala mamparatamo songka ri Musa. Paikanya tau setu bareʼe kaincani bara ungka ri mbeʼi kamaʼinya.”
30Mesono tau setu, “Ipu kojo rayaku ane nditoʼo bareʼe ndiincani ungka ri mbeʼi kamaʼinya tau setu, sako mataku anu buta napakayosa painaka kukita raoa. 31Taincani tau anu masalaa bareʼe da ndapedongeka i mPue Ala, podo tau anu mepoʼinaya ri Sira pai anu mangawianaka pepokonoa. 32Ungka ri pampewali lino bareʼepa reʼe ndadonge reʼe tau anu mampakayosa mata ntau anu buta ungka ri pampoana inenya. 33Ane tau setu banya ungka ri Pue Ala bareʼe da nakoto mampowia tanda ngkuasa.”
34Mesono tau seʼe, “Nunjaa nutoʼo? Siko tau anu buke-buke salaamu ungka ri pampoana inemu da mampaguru kami?” Montepuʼu ungka ri tempo setu bareʼemo nawai ntau seʼe tau anu buta pai yosamo matanya setu, da mesua ri banua mpekakai.
Buta raya
9:35-41
35Butu ndadonge i Yesu napairi nto Parisi tau setu ungka ri banua mpekakai, ndapepali tau setu nepa ndatoʼoka siʼa, “Ara nuaya i Ana Manusia?”
36Mesono tau setu, “Isema Sira, Pue? Nditoʼoka yaku da naka meaya yaku ri Sira.”
37Mesono i Yesu, “Nukitamo Sira, siʼamo anu mompasimbaju pai siko seʼi.”
38Natoʼo ntau setu, “Kuaya Pue.” Liu-liu mombukotu metutu manyomba ri Yesu.
39Ndatoʼo i Yesu, “Ri karataku ri lino seʼi ewa topobotusi da mampakanoto; tau anu buta da yosa matanya, pai tau anu yosa matanya da mewali buta.”
40Meoasi waʼa nto Parisi anu njau madonge-donge pompau i Yesu, natoʼo, “Mewali pantoʼo ndayamu kami seʼi woʼu buta?”
41Mesono i Yesu, “Ane rapanya komi buta, bareʼe da masalaa komi, paikanya ua nditoʼo, komi yosa matami, inceʼe posokinya komi ntongo tuwu ri raya ncalaa.”
Currently Selected:
YOHANE 9: LAIPMF
Highlight
Share
Copy
Want to have your highlights saved across all your devices? Sign up or sign in
