PALABURU 16
16
I Hagari pai Sumaila
16:1-16
1I Sarai rongo i Burahima bareʼepa reʼe ananya. Paikanya siʼa reʼe anamayununya ungka ri Masiri, sambaʼa anaweʼa toʼonya i Hagari. 2Natoʼo i Sarai ri Burahima, “Lawi nuincani bareʼe ndawai i mPue yaku da moana. Inceʼe painaka moruana kayoremo pai anamayunuku seʼi. Bara da siʼa anu da mampoana ana da galaku.” Nasintuwunaka i Burahima perapi i Sarai setu. 3Ewanceʼemo i Sarai mawaika i Burahima i Hagari napokaradua. Ri tempo setu i Burahima sampuyu ntaʼumo ri Kanaʼa. 4I Burahima yoremo pai Hagari, painaka maneemo koronya weʼa setu. Paikanya jabutu naincani i Hagari siʼa maneemo koronya, mekiundemo siʼa bareʼemo natubunaka i Sarai.
5Natoʼo i Sarai ri Burahima, “Kuwaika siko anamayunuku i Hagari, paikanya ungka ri napaincani siʼa maneemo koronya, bareʼemo natubunaka yaku. Incetu salamu. Mbolimo i Pue da mangabotusi isema anu masala ri kita radua.”
6Mesono i Burahima natoʼo, “Madago, siʼa anamayunumu pai siko makuasa ri siʼa; powiamo gori mpepokonomu.” Inceʼe painaka i Sarai majea-jeani i Hagari painaka meloso malai siʼa.
7Narata malaeka i mPue i Hagari mosu ri mata ue ri pada bone, ri jaya anu da njoʼu ri pada bone Suri. 8Natoʼo malaeka setu, “Hagari, anamayunu i Sarai, ungka ri mbeʼi siko pai da rimbeʼi kanjoʼumu?”
Mesono i Hagari natoʼo, “Yaku molonco ungka Sarai pueku.”
9Natoʼo malaeka setu, “Pewalili ri siʼa pai poriokoi siʼa.” 10Nepa mompau woʼu malaeka setu natoʼo, “Yaku da mangawaika siko mulimu anu sondo kojo, painaka bereʼe mau sambaʼa tau anu mangkoto mangaimba kasondonya ntau seʼe. 11Bareʼemo masae siko da mampoana ana tuama pai papotoʼoka siʼa i Sumaila, maka ndadongemo i mPue potumangimu. 12Paikanya ana setu da tuwu ewa kalide anu lampu; siʼa da mangaewa pura-pura tau pai pura-pura tau da mangaewa siʼa. Siʼa da tuwu tepatani ungka ri pura-pura tinanya.”
13Natoʼo i Hagari ri rayanya, “Ara monco yaku mangkitamo i Pue Ala anu mampetiro yaku?” Inceʼe painaka natoʼo i Pue, anu roomo mompau ri siʼa, “I Pue Anu Mampetiro siʼa.” 14Inceʼe puʼunya painaka napapotoʼo ntau tibubu anu ri oyo Kades pai Beredi setu, “Tibubu Sira Anu Tuwu Anu Mampetiro Yaku.”
15 #
Gal. 4:22
Napoanamo i Hagari sambaʼa ana tuama anu napapotoʼo mpapanya i Burahima i Sumaila. 16Ri tempo setu i Burahima tinuwu uayu mpuyu pai aono ntaʼu.
Currently Selected:
PALABURU 16: LAIPMF
Highlight
Share
Copy
Want to have your highlights saved across all your devices? Sign up or sign in
