POTETALA WA'A NCURO 8

1aPai i Saulu mawongko woʼu rayanya ua pepepate setu.

I Saulu majeani dompu

8:1b-3

1bRi reme setu seʼe, natepuʼumo ntau maduduki dompu ri Yerusale painaka waʼa ntau meaya, sangadika waʼa ncuro tewuraga ri sambawo ntana Yudea pai Samaria. 2Waʼa ntau anu mampokaeka i Pue Ala inceʼemo anu mampotaumate wata ngkoro i Ncetepanu, tau seʼemo anu mantangisi siʼa ri kapari ndaya ntau seʼe. 3#Pwn. 22:4-5, 26:9-11 Paikanya i Saulu mampari-mpari da maʼopisaka waʼa anggota dompu setu, nasuaki waʼa banua ntau meaya, nanoʼo ri sambalikunya waʼa ntau meaya setu nepa napari ntarunggu.

Nuntu ngKatuwu ungka i Pue Ala ndapobambarika ri Samaria

8:4-25

4Waʼa ntau meaya anu tewuragamo ungka ri Yerusale mampetumbu Nuntu ngKatuwu ungka ri Pue Ala ri mbeʼi-mbeʼi kanjoʼunya. 5I Pilipu njou ri kota Samaria, njairia siʼa mampobambarika ri waʼa ntau kono Mokole Tadungkadago anu ndajanji i mPue Ala. 6Padonge ntau seʼe pompau i mPilipu pai nakita woʼu ntau seʼe waʼa tanda ngkuasa anu napowia, maria tau anu mampokono mampedongeka totoraka i mPilipu. 7Maka waʼa inosa majaʼa anu mesuwu ungka ri waʼa ntau anu napesuaki, mekiu-kiu nepa napalaika waʼa ntau setu. Waʼa ntau anu pungku pai anu dingge maria anu napakaʼosa. 8Maʼai kojo kawongko ndaya ntau ri kota Samaria.

9Ri kota setu reʼe sambaʼa tuama i Simo toʼonya, masae-saemo kareʼenya njairia mampaka jingki raya ntau njairia pai paincaninya mowalia. Natoʼoka waʼa ntau, siʼa sambaʼa tau anu maria paincaninya. 10Painaka pura-pura tau ri raya ngkota setu montepuʼu ungka ri ananggodi nakarataka ri waʼa ntau tuʼa mangaunde siʼa natoʼo, “Tau seʼi inceʼemo roso mPue Ala anu ndatoʼo ‘Kuasa anu Bangke’ setu.” 11Masaemo kojo siʼa mampakatontoa raya waʼa ntau njairia ua roso mbalianya, painaka maʼai katenoʼo raya ntau ri siʼa. 12Paikanya i Pilipu mampetumbuka tau seʼe Nuntu ngKatuwu, kono da ndapampatunda Poparenta i mPue Ala pai kono i Yesu Kerisitu Mokole Tadungkadago. Naayamo ntau seʼe Nuntu anu napetumbu i mPilipu – mekiriu tau seʼe waʼa ntuama pai waʼa mbeʼa. 13I Simo ngkalionya woʼu meayamo. Karoonya ndariu siʼa, nalulu mpaliu i Pilipu. Waʼa ntanda ngkuasa anu napowia i mPilipu napojingki ndaya i Ncimo mangkita.

14Nadonge waʼa ncuro ri Yerusale kono peayamo nto Samaria ri nuntu i mPue Ala. Inceʼe painaka napokau ntau seʼe i Peturu pai i Yohane njoʼu njairia. 15Karata i mPeturu pai i Yohane njairia, napekakaika ntau seʼe to Samaria da naka marata Inosa mPue Ala. 16Maka Inosa mPue Ala bareʼepa natarima ntau seʼe, ua tau seʼe nepa ndariu ri toʼo Yesu. 17Nadonco i mPeturu pai i Yohane tanoana nto Samaria, nepa natarima ntau seʼe Inosa mPue Ala.

18Nakita i Ncimo pewalinya ewanceʼe, ua popadonco waʼa ncuro ri wawo ntanoana ntau seʼe painaka tau seʼe marata Inosa mPue Ala. Painaka njoʼu siʼa madadu i Peturu pai i Yohane, nawaika tau seʼe doi, 19natoʼo, “Ndiwaika yaku woʼu kuasa setu, da naka isema ntano anu kudonco tanoananya, tau setu da marata Inosa mPue Ala.”

20Paikanya mesono i Peturu, “Nakageromo siko sangkani pai doimu setu! Nusarumaka pombai i mPue Ala maya da nuolika doi? 21Bareʼe sintempo siko da malulu tetala mami, maka bareʼe mayoa rayamu ri Pue Ala. 22Inceʼe painaka kajeamo ungka ri kajaʼamu setu pai pekakaimo ri Pue Ala da naka tuarapa bareʼemo ndakitanaka salaamu pai nawa-nawamu anu jaʼa setu. 23Maka kuincani rayamu buke pai sina ndaya pai siko napowatuamo i majaʼa.”

24Natoʼo i Ncimo ri Peturu pai i Yohane, “Nditulungi ndipekakaika yaku ri Pue Ala da naka neʼe mewali ri yaku pindongo waʼa anu nditoʼo roo.”

25Roo mawai posabi pai mampetumbu nuntu i mPue, mewalili muni i Peturu pai i Yohane ri Yerusale. Pai ri pelinja ntau seʼe napobambarika Nuntu ngKatuwu ri waʼa lipu nto Samaria anu kono napoliu.

I Pilipu pai tau bangke lantinya ungka ri Etiopia

8:26-40

26Mompau sambaʼa malaʼeka i mPue ri Pilipu natoʼo, “Palaimo pakaliga! Tondo Selata kanjoʼumu, lulumo jaya ri oyo Yerusale pai Gasa.” Ri jaya setu bereʼe tau. 27-28Malaimo kojo i Pilipu. Tempo setu reʼe sambaʼa pegawai ri langkanae Etiopia ntongo mpelinja da mewalili ri tananya. Tau setu sambaʼa tau bangke anu ndasarumaka majagai aga-aga i Kandake, datu weʼa ri Etiopia. Tau setu mewalilimo ungka ri Yerusale ndeku manyomba ri Pue Ala, pewalilinya seʼe siʼa meʼulaya ri karetanya. Ri raya ngkareta setu siʼa ntongo mabasa Sura i Nabi Yesaya. 29Natoʼo Inosa mPue Ala ri Pilipu, “Akomo njoʼu timosuki kareta setu.” 30Njoʼumo kojo i Pilipu, nadonge i mPilipu tau setu ntongo bahasa Sura i Yesaya. Napeoasi i mPilipu ri siʼa, “Bara ndirata ndaya anu ndibasa setu?”

31Mesono tau setu, “Ewambeʼi da kuparata ndaya ane bereʼe tau anu mantotoraka yaku?” Nepa nasale i Pilipu mepone ri karetanya motunda sangkani-ngkani pai siʼa. 32#Yes. 53:7-8 Nuntu anu nabasa seʼe ewaseʼi katetoʼonya,

“Sira ndakeni ewa bimba anu da ndasambale,

ewa ana bimba anu bareʼe membee ane ndagunci wuyunya

ewanceʼemo Sira bareʼe da mompau sako sapiu.

33Sira ndapetikodi pai ri Sira ndapapakoyoka pobotusi anu bareʼe mayoa.

Inosa-A ndayali ungka ri lino,

painaka bareʼe reʼe mau sambaʼa tau anu mangkoto da mampau kono muli-Nya.”

34Natoʼo tau bangke ungka ri Etiopia setu ri Pilipu, “Koisa toʼoka yaku isema anu natinako ndaya nabi seʼi? Koronya ngkalionya bara kono tau ntaninya?” 35Natepuʼumo i mPilipu mantotoraka; siʼa mantotoraka waʼa anu nabasa ntau setu mewali jaya pantepuʼunya mampobambarika Nuntu ngKatuwu kono i Yesu ri tau bangke setu. 36Bareʼe masae pelinja ngkareta setu jelamo tau seʼe ri kareʼe ue, natoʼo mpegawai setu ri Pilipu, “Ireʼi reʼe ue bara madago ndiriumo yaku?”

[37Mesono i Pilipu, “Ane ndiayamo kojo ungka ri rayami, mayamo komi ndariu.”

Mesono pegawai setu, “Kuaya kojo i Yesu Kerisitu Ana i mPue Ala.”]

38Napokau ndapapeʼonto karetanya nepa menaʼu tau seʼe radua, i Pilipu pai pegawai setu, menaʼu ri ue; pai i Pilipu mariu siʼa. 39Pesore ntau seʼe ungka ri ue, i Pilipu nakenimo Inosa mPue Ala ungka njairia. Bareʼemo nakita mpegawai ungka ri Etiopia setu siʼa. Napaliumo mpegawai ungka ri Etiopia setu pelinja maʼai kawongko ndayanya. 40Bareʼe ndapasoro-soro ndakitasaka i Pilipu njaumo ri lipu Asido. Melinja woʼu siʼa mampetumbu Nuntu ngKatuwu kono i Yesu Kerisitu ri pura-pura kota rantani rata siʼa ri Kaisaria.

Currently Selected:

POTETALA WA'A NCURO 8: LAIPMF

Highlight

Copy