POTETALA WA'A NCURO 13

I Baranaba pai Saulu ndapilisi mewali pomokau dompu

13:1-3

1Ri oyo dompu ri Antiokia reʼe bara tesangkuja nabi pai guru, ewa i Baranaba, i Simeo anu ndalantika i Maeta, i Lukiu anu ungka ri Kirene, i Menahe anu ndapatuwu sangkani-ngkani pai Mokole Herode pai i Saulu. 2Ntongo-ntongo tau seʼe manyomba ri Pue pai mopuasa, mompaumo Inosa mPue Ala ri tau seʼe ndatoʼo, “Ndipilisimo i Baranaba pai i Saulu ndipatani da tila-Ku, da mawianaka tetala anu Kupebooka tau seʼe.”

3Roo mekakai pai mopuasa waʼa ntau seʼe nepa nadonco ntau seʼe i Baranaba pai i Sauli, nepa napokau malai.

Ri Kiperu

13:4-12

4Ua pombawanaka Inosa mPue Ala njoʼumo i Baranaba pai Saulu ri Seleukia, ungka njairia nepa mowote tau seʼe njoʼu ri Kiperu. 5Kajela ntau seʼe ri Salami, napobambarika ntau seʼe Nuntu i mPue Ala ri banua mpekakai nto Yahudi. I Yohane Marakusi njoʼu woʼu mantulungi tau seʼe ri raya mpelinjanya.

6Nalinjaki ntau seʼe juku-juku togongi setu jela-jela ri Papo. Njairia tau seʼe momberata pai to Yahudi i Bari Yesu toʼonya, siʼa sambaʼa to powalia pai natoʼo woʼu siʼa sambaʼa nabi. 7To powalia setu mobale-bale pai i Serigiu Paulu anu mewali Petoro ri togongi setu, siʼa sambaʼa tau madago raya pai loʼe. Napeboo i Baranaba pai i Saulu maka da rayanya madonge Nuntu i mPue Ala. 8Paikanya njoʼu i Elimasi (inceʼe toʼo nto powalia setu ane ri basa Garika) maewa i Baranaba pai Saulu, siʼa mampasuaka pau i Petoro da naka neʼe naaya i Yesu. 9Paikanya i Saulu – anu ndatoʼo woʼu i Paulu – nakuasai Inosa mPue Ala, painaka nakomatasi to powalia setu, 10nepa natoʼoka, “Ee tau kalopu-lopu, muli ntau baleparu! Pura-pura anu madago mampoʼiwalika siko. Wenu painaka bareʼe nupeʼontoka masalempori pepokono mPue Ala anu damancorepaka tolino? 11Seʼi-seʼi peole, i Pue Ala da mahuku siko! Siko da ndapakabuta matamu bareʼemo da nukita ogu ndeme bara tesangkuja ndeme kasaenya.”

Liu-liu naepe i Elimasi ewa reʼe gawu maeta anu mangkaʼuwi matanya, painaka melinja moama-amamo siʼa mampepali tau anu da manini siʼa. 12Pangkita i mPetoro anu mewali setu, naayamo i Yesu; maka lawi napobenge ndaya kojo mampedongeka pompaguru kono i Pue.

Ri Antiokia, Pesidia

13:13-52

13Ungka ri Papo mosumombamo i Paulu pai waʼa yununya njoʼu ri Perigia ri tana Pampilia. Njairia i Yohane Marakusi mampalaikamo tau seʼe mewalili ri Yerusale. 14Ungka ri Perigia napaliu ntau seʼe pelinjanya njoʼu ri Antiokia Pesidia; ri eo Umapo mesua tau seʼe ri banua mpekakai. 15Roo ndabasa sura i Nabi Musa pai sura waʼa nabi, napokau waʼa ntadulako banua mpekakai tau mampeoasi ri Paulu pai waʼa yununya, “Bara da reʼe ri tau seʼe anu da mawai totoraka ri waʼa ntau seʼe, ndawai tempo da mompau.” 16Meokomo i Paulu naokotaka palenya nepa mompau siʼa natoʼo,

“Ee waʼa ngkasangkompoku to Isaraeli, pai pura-pura waʼa ngkasangkompo anu reʼe ireʼi anu mampokaeka i Pue Ala! Ndipedongeka anu da kutoʼo seʼi: 17#Pa. 1:7, 12:51 I Pue Ala, Pue nto Isaraeli roo mampilisi tau piamota, ndapapewali tau seʼe sambaʼa banca anu bangke, ntongo tau seʼe mewali tau mencua ri tana Masiri. Nepa ndapapesuwu tau seʼe ungka njairia ua kakuasa i mPue Ala anu bangke kojo. 18#Pai. 14:34, Paw. 1:31 Aopo mpuyu ntaʼu kasaenya ndapamponinika i mPue Ala tau seʼe ri pada bone, bareʼe ndapepalisi poʼengko ntau seʼe anu majaʼa. 19#Paw. 7:1, Yos. 14:1 Papitu banca ndagero i mPue Ala ri tana Kanaa, nepa ndatilaka to Isaraeli tana setu, da napotumpu ncambaʼa seʼe pai mulinya. 20#Tdu. 2:16, 1 Sem. 3:20 Inceʼe mewali ri tempo anu aopoatu lima mpuyu ntaʼu kasaenya.

Karoonya ndatila tana, nepa ndawaika tau seʼe tadulako mombesawa-sawani, pai tadulako anu kapusanya i Nabi Semueli. 21#1 Sem. 8:5, 10:21 Ungka lairia naperapi ntau seʼe mokole, ndawai i mPue Ala Mokole inceʼemo i Saulu ana i ngKisi to Benyami anu napomokole ntau seʼe aopo mpuyu ntaʼu kasaenya. 22#1 Sem. 13:14, 16:12, Pol. 89:20 Karoonya ndawawence i mPue Ala siʼa ungka potundanya, ndalanti woʼu i mPue Ala i Daudi mewali mokole ntau seʼe. Pai ewaseʼimo pantoʼo i mPue Ala kono i Daudi, ‘Kuratamo i Daudi ana i Isai setu sambaʼa tau anu mampakawongko rayaku. Siʼamo tau anu da mawianaka pepokono-Ku.’ 23Ungka ri muli i Daudi seʼimo da ndapampatoka i mPue Ala tila nto Isaraeli sambaʼa Mokole Tadungkadago ewa anu ndajanjimo. Pai i Yesu inceʼemo Mokole Tadungkadago. 24#Mrk. 1:4, Luk. 3:3 Ri kabareʼepanya ndatepuʼu i Yesu tetala-A mesindiumo i Yohane mantotoraka to Isaraeli da naka majea ungka ri waʼa ncalaanya pai da ndariu. 25#Mat. 3:11, Mrk. 1:7, Luk. 3:16, Yoh. 1:20,27 Mosumo da potando mpotetalanya natoʼo i Yohane ri waʼa ntau, ‘Malulu pantoʼo ndayami isema yaku seʼi? Yaku banyapa anu ndipopea, ndipeole, Sira da jela mantonda yaku; sako da malede soʼo ntalupa-A yaku seʼi bareʼe sintinaja.’

26Ee waʼa ngkasangkompoku muli i Burahima, pai pura-pura waʼa ngkasangkompo anu reʼe ireʼi anu mampokaeka i Pue Ala! Roomo ndaparata i mPue Ala bambari ngkatesorepaka seʼi ri kita. 27Maka waʼa ntau anu meari ri Yerusale pai waʼa ntopombawanaka ntau seʼe ka-Siranyamo toponcorepaka setu. Tau seʼe bareʼe narata ndaya pompaguru waʼa nabi anu ndabasa sangkani-sangkani eo Umapo, painaka nahuku ntau seʼe i Yesu. Paikanya ua powia ntau seʼe anu ewanceʼe, mampapopuʼumo kakobanganinya nunjaa anu napowatika waʼa nabi. 28#Mat. 27:22-23, Mrk. 15:13-14, Luk. 23:21-23, Yoh. 19:15 Mau bareʼe narata ntau seʼe salanya anu da naponcuruka ndahuku mate, paikanya naperapi ntau seʼe ri Pilatu da naka ndapepate. 29#Mat. 27:57-61, Mrk. 15:42-47, Luk. 23:50-56, Yoh. 19:38-42 Karoonya nawianaka ntau seʼe pura-pura setu, ewa anu teʼukimo ri Sura Magali kono Sira, napapenaʼu ntau seʼe wata ngkoro-A ungka ri kaju ndapanggo, nepa ndapari dayo. 30Paikanya i Pue Ala mampatuwu muni Sira ungka ri kapate-A. 31#Pwn. 1:3 Ungka lairia maria ndeme woʼu Sira mepapamara ri waʼa ntau anu malulu Sira ungka ri Galilea ndeku ri Yerusale, waʼa ntau seʼemo anu mewali sabi kono Sira ri waʼa nto Isaraeli. 32Mewali seʼi kapetumbu ri komi Nuntu ngKatuwu; inceʼemo anu roo ndajanji mPue Ala ri tau piamota, 33#Pol. 2:7 inceʼe ndawianakamo ri kita ua ndapampatuwu muni i Yesu ungka ri kapate-A. Maka lau ndaʼuki ri sura ngayu i Daudi anu karadua ewaseʼi,

‘Sikomo Ana-Ku,

sandeme seʼi Yaku mewali Papa-Mu.’

34 # Yes. 55:3 I Pue Ala mampatuwu muni Sira ungka ri kapate-A. Seʼi-seʼi Sira bareʼemo da maepe kapate ri raya dayo. Kono inceʼe ndatoʼo i mPue Ala,

‘Yaku da mawaika Siko janji magali pai manoto sangaya-ngaya da kobangani,

anu roomo Kujanjika i Daudi.’

35 # Pol. 16:10 Ewanceʼe seʼe ndatoʼo ri sura ntaninya,

‘Komi bareʼe da mampapaliuka Ana-Mi anu mepoʼinaya setu da magero ri raya dayo.’

36I Daudi matemo pai roomo ndadayo sangkani-ngkani pai waʼa ngkainya, ri karoonya siʼa mawianaka anu ndapepokauka i mPue Ala ri siʼa. Wata ngkoro i Daudi puramo magero ri raya dayo. 37Paikanya i Yesu, anu ndapatuwu muni i mPue Ala ungka ri kapate-A bareʼe magero. 38Inceʼe painaka ee waʼa ngkasangkompo, sangaya-ngaya komi da mangaincani mampojaya i Yesu seʼi, bambari kabareʼenya ndakitanaka salaa ndapetumbuka komi; 39sangaya-ngaya ndiincani, kaʼisemanya tau anu meaya ri Sira, ndasorepaka ungka ri waʼa ncalaa anu bareʼe ndakoto mampalisi mampoliu waʼa ncongka mPue Ala anu naparata i Musa. 40Inceʼe puʼunya painaka da ndinawa-nawa mpodago da naka neʼe mewali ri komi anu natoʼo waʼa nabi seʼi,

41 # Hab. 1:5 ‘Ndinawa-nawa mpodago, ee komi anu mampokono mempetikodi! Dajingki rayami nepa mate!

Maka ri tempo seʼi

Yaku mawianaka sangaya anu bareʼe da ndiaya monco, mau reʼemo tau anu mantotorakaka komi.’ ”

42Pesuwu i mPaulu pai i Baranaba ungka ri banua mpekakai setu, merapi woʼu waʼa ntau da naka ri eo Umapo anu da rata da maʼi woʼu tau seʼe mantotoraka woʼu kono inceʼe. 43Karoonya mesuwu waʼa ntau setu ungka ri raya banua mpekakai, maria to Yahudi pai waʼa ntau anu malulumo agama Yahudi malulu i Paulu pai i Baranaba. Natotoraka waʼa ncuro setu tau seʼe da naka mampeondaka katuwunya ri puru ndaya mPue Ala.

44Ri eo Umapo tondanya, pura-pura waʼa ntau ri kota setu maʼi mampedongeka Nuntu i mPue Ala. 45Pangkita nto Yahudi waʼa ntau sondo, maʼai kojo kanyau ndayanya. Napetikodi ntau seʼe i Paulu pai nasapu ntau seʼe pura-pura anu natoʼo. 46Powia nto Yahudi ewanceʼe, banya mampakaeka raya i mPaulu pai i Baranaba paikanya jakakomakoje-koje raya ntau seʼe mompau natoʼo, “Kamonconya kojo nuntu i mPue Ala da ndatuntuka komi riunya. Paikanya ua bareʼe ndipokono mantarima, komi mabotusimo ngkaliomi kakominya bareʼe sintinaja da marata katuwu anu monco pai bareʼe da reʼe kapusanya. Inceʼe puʼunya painaka kami mampalaika komi, seʼi-seʼi kami da njoʼu ri banca ntaninya. 47#Yes. 42:6, 49:6 Maka ewaseʼi songka i mPue ri kami, ndatoʼo i mPue,

‘Komi roomo Kupakanoto da mewali reme, ri waʼa ntau ntaninya anu banya to Yahudi,

da naka komi mamparata katesorepaka tila ntau sambawo lino.’ ”

48Ri padonge waʼa ntau banca ntaninya anu banya to Yahudi pau setu, maʼai kawongko ndayanya naunde-unde Nuntu i mPue. Pai waʼa ntau anu ndapakanotomo i mPue Ala da marata katuwu anu monco pai bareʼe da reʼe kapusanya, waʼa ntau setu meayamo.

49Tolelemo nuntu i mPue ri sambawo ntana setu. 50Paikanya waʼa nto Yahudi mantundeki waʼa ntau bangke ri kota setu, pai waʼa mbeʼa anu tetubunaka anu mampokaeka i Pue Ala. Da naka mampoʼiwalika i Paulu pai i Baranaba, da napangairi suro radua setu ungka ri tananya. 51#Mat. 10:14, Mrk. 6:11, Luk. 9:5, 10:11 Ua ewanceʼe powia ntau seʼe painaka natanongkosi ncuro radua setu awu anu metaka ri payaʼanya ri suara waʼa ntau seʼe, inceʼe da mewali sambaʼa petondoni, nepa malai njoʼu i Ikoniu. 52Jawaʼa anaguru anu ri Antiokia maʼai kawongko ndaya ntau seʼe maka naponinika Inosa mPue Ala.

Currently Selected:

POTETALA WA'A NCURO 13: LAIPMF

Highlight

Copy