POTETALA WA'A NCURO 10

Peturu pai Koroneli

10:1-33

1Ri Kaisaria lau sambaʼa tuama i Koroneli toʼonya. Siʼa sambaʼa Kapite “Ncurodado nto Italia”. 2Siʼa sambaʼa tau anu mampokaeka i Pue Ala. Maria petulunginya ri waʼa nto Yahudi anu kaasi-asi pai siʼa madoyo mekakai ri Pue Ala. 3Ri anu sandeme tempo-temponya tinti tatogo tepile reme, yosa kojo pangkitanya ri pekita ndayanya, reʼe sambaʼa malaʼeka mPue Ala mampeboo siʼa natoʼo, “Koroneli!”

4Napeole i ngKoroneli malaʼeka setu seʼi maeka rayanya, natoʼo, “Nunjaa Pue?”

Mesono malaʼeka setu, “Pekakaimu pai kapande ndayamu ndatarimamo i mPue Ala, pai ndaendomo i mPue Ala siko. 5Seʼi-seʼi pokaumo tau njoʼu ri Yope mampeboo i Simo, toʼonya kojo i Simo Peturu. 6Siʼa njau melinggona ri banua i Ncimo, to poronu pela anu mosu ri wiwi ntasi.” 7Roo mompau malaʼeka setu pai Koroneli, njoʼumo i Koroneli mampeboo anamayununya radua pai sambaʼa surodado anu mayoa rayanya. 8Napatuntu i ngKoroneli ri tau seʼe nunjaa anu mewali setu nepa napokau tau seʼe njoʼu ri Yope.

9Bangke reme njoʼumo kojo tau anu napokau i ngKoroneli, bepa rata tau seʼe ri Yope, i Peturu mepone ri kataba banua da mekakai. 10Sindara setu naepe maoromo komponya da rayanya mangkoni. Pangkoni ntongo napatoka ntaliwanua. Siʼa mangkita sambaʼa pekita ndaya. 11Nakita teloka yangi pai nakita maʼi ewa ayapa ndabini teuyu ri lino, teloe-loe ua ndasoʼo ri sunonya aopo. 12Ri rayanya lau mpengaya-ngaya pinatuwu anu mowiti aopo anu menjoyo sangkani pai waʼa ntonci anu maila. 13Nepa nadonge oni nganga anu mantoʼoka siʼa, “Peturu, peoko! Sambalemo nupangkoni!”

14Paikanya mesono i Peturu, “Bareʼe Pue, bepareʼe kupangkoni mau sangkani pangkoni anu kapali pai karika.” 15Nadonge woʼu oni nganga setu mantoʼoka siʼa, “Nunjaa anu ndatoʼo i mPue bareʼe kapali, neʼe boi nutoʼo kapali.” 16Tatogo ngkani pewalinya ewanceʼe, nepa teoretaka muni ayapa setu ndeki suruga.

17Monawa-nawa i Peturu, natoʼo ri rayanya nunjaa posokinya anu nakita setu. Sindara mponawa-nawanya ewanceʼe jelamo ri boboka tau anu napokau i ngKoroneli, naratamo banua i Ncimo pai tau seʼe laumo ri wobo dampo. 18Napeboo ntau seʼe tau sambaʼa, nepa napeoasi, “Bara reʼe ireʼi linggona anu mampotoʼo i Simo Peturu?”

19Ntongo mponawa-nawa i Peturu kono posoki pekita ndaya setu, mompaumo Inosa mPue Ala ri siʼa natoʼo, “Ee Peturu, lau tau tatogo mampepali siko. 20Peokomo pakaliga, neʼe ipu rayamu lulumo tau seʼe, maka Yaku anu mampokau tau seʼe.” 21Liu-liu menaʼu i Peturu, natoʼoka waʼa ntau setu, “Yakumo anu maʼi ndipepali. Nunjaa anu ndikamaʼika?”

22Mesono tau seʼe, “I Koroneli tadulako ncurodado anu mampokau kami maʼi ireʼi. Sira tau madago raya pai mepoʼinaya ri Pue Ala. Sira woʼu natubunaka waʼa nto Yahudi. Reʼe sambaʼa malaʼeka i mPue Ala, mampokau Sira da mamperapi komi da loʼu ri banuaa, kamonconya inceʼemo sono mpekakaia. Sira ndapokau da naka mampedongeka nunjaa anu da nditoʼoka Sira.” 23Nataʼamaka i mPeturu tau seʼe setu sambengi njairia.

Bangke reme malaimo i Peturu sangkani-ngkani pai tau ndapokau setu. Reʼe woʼu bara tesangkuja tau anu meaya ri Yope mampoyunuki siʼa. 24Sandeme setu seʼe jelamo tau seʼe ri Kaisaria. Lawi napopopeamo i ngKoroneli da kajela ntau seʼe. Waʼa ngkasangkomponya pai waʼa bale-balenya njaumo pura-pura tepasambaka. 25Karata i mPeturu njairia, nasuncumo i ngKoroneli, mombukotu siʼa ri suara ri mPeturu. 26Paikanya napapeoko i mPeturu siʼa natoʼo, “Peoko! Yaku seʼe woʼu tolino.” 27Seʼi mompasimbaju siʼa pai i Koroneli, mesuamo i Peturu ri raya banua. Nakita njau tau sondo mompasambaka. 28Natoʼo i mPeturu ri tau seʼe, “Lawi ndiincanimo, malulu ada agama nto Yahudi, to Yahudi bareʼe maya da maogalo-galo pai tau anu banya to Yahudi. Paikanya i Pue Ala mampapakitaka yaku da naka neʼe kutoʼo kapali anu ndatoʼo i mPue Ala bareʼe kapali. 29Inceʼe puʼunya painaka ndipamperapi yaku da maʼi madadu komi, bareʼe reʼe kabarataku. Mewali seʼi da rayaku maincani nunjaa puʼunya painaka ndipeboo yaku.”

30Mesono i Koroneli natoʼo, “Tatogo ndeme liu sindara yaku mekakai tinti tatogo tepile reme ri banuaku, tingkarasaka mekakore sambaʼa tuama ri suaraku. Rengkonya makilaya. 31Natoʼoka yaku, ‘Koroneli! Pekakaimu ndapedongeka i mPue Ala pai ndaendomo kapande ndayamu. 32Mewali pokaumo tau njoʼu ri Yope mampeboo tau sambaʼa anu mampotoʼo i Simo Peturu. Siʼa njau ri banua nto poronu pela i Simo toʼonya, banuanya reʼe ri wiwi ntasi.’ 33Inceʼe painaka maliga-liga kupokau tau mampeboo komi. Pai tongawa kojo kabuya ndayami maʼi ri kami pura-pura anu tepasambaka seʼi ri suara mPue Ala da mampedongeka pura-pura anu ndapepokauka i mPue Ala da nditoʼoka kami.”

Potuntu i mPeturu

10:34-43

34 # Paw. 10:17 Natepuʼumo i mPeturu motuntu natoʼo, “Seʼi-seʼi kurata ndayamo, i Pue Ala siwia-wia ndapampeole tau. 35Tau anu mampokaeka i Pue Ala pai monco powianya inceʼe anu ndapokono i mPue Ala, bareʼe ndapilisi bara ungka ri lemba mbeʼi. 36Ndiincanimo ewambeʼi nuntu i mPue Ala anu ndaparataka to Isaraeli. Nuntu setu inceʼemo Nuntu ngKatuwu kono kasimadago ua i Yesu Kerisitu. Siramo Pue ntau pura-pura. 37Sangaya-ngaya ndiincanimo ri sambawo ntana Yudea, anu montepuʼumo ungka ri Galilea, karoonya popariu anu napepokauka i Yohane. 38Ndiincanimo kaʼi Pue Alanya mampilisi i Yesu to Nasare, ndawaikamo Sira Inosa-A pai kuasa-A. Ndiincanimo i Yesu roomo moliliwu ri mbeʼi-mbeʼi. I Pue Ala anu mayunuki Sira mampakaʼosa waʼa ntau anu nakuasai i Majaʼa. 39Kamimo waʼa ntau anu mangkita pura-pura anu roo ndawianaka ri tana nto Yahudi pai ri kota Yerusale. Mau ewanceʼemo napepate ntau seʼe Sira. 40Paikanya ri katatogo ndemenya ndapapembangu muni Sira ungka ri kapate, nepa mepapamara Sira ri tolino. 41Sira mepatongawa banya ri pura-pura tau paikanya ri kami anu roomo ndapilisi i mPue Ala da mewali sabi-A. Kami mangkoni pai manginu sangkani-ngkani pai Sira ri karoonya membangu Sira ungka ri kapate-A. 42Pai Siramo anu mampokau kami da mampetumbu Nuntu ngKatuwu ri pura-pura tau pai da mangasabi kamonconya Siramo anu ndapakanoto i mPue Ala mewali to pobotusi huku ntau tuwu pai tau mate. 43Pura-pura waʼa nabi mantoʼo kono Sira. Natoʼo ntau seʼe pura-pura tau anu meaya ri Yesu bareʼemo da ndakitanaka salaanya ua kuasa Yesu.”

Waʼa ntau anu banya to Yahudi mantarima Inosa mPue Ala

10:44-48

44Ntongo motuntupa i Peturu, metudumo Inosa mPue Ala ri waʼa ntau anu mampedongeka potuntunya setu. 45Waʼa nto Yahudi anu meayamo ri Yesu anu mampoyunuki i Peturu ungka ri Yope, jingki raya ntau seʼe pura-pura mangkita, i Pue Ala mawaimo Inosa-A ri waʼa ntau anu banya to Yahudi. 46Maka nadonge waʼa ntau setu mompaumo ri mpengaya-ngaya basa maunde-unde kabangke mPue Ala. Nepa natoʼo i mPeturu, 47“Koisa ndipeole! Waʼa ntau seʼi maratamo Inosa mPue Ala ewa kita. Mewali ewambeʼi da tapampetangani tau seʼe da ndariuka ue?” 48Napokau i mPeturu tau seʼe da ndariu ri toʼo i Yesu Kerisitu. Roo setu naperapi ntau seʼe i Peturu da maroo-roo pai tau seʼe bara tesangkuja ndeme.

Currently Selected:

POTETALA WA'A NCURO 10: LAIPMF

Highlight

Copy