Luk. 18
18
Pasikat sinanalep silumang samba sipasiukum
1Ia geti tiboinangan Jesus sara pasikat ka matada masikolouake buita imariuriu rapanindou, bui raoreake nia. 2Kuanangan, “Ai ka sara laggai sara sipasiukum taimaloto ka Taikamanua samba taimaletsei ka sirimanua. 3Ka laggai nenda ai leu sara sinanalep silumang simareirei moi masitaget nia masikua, ‘Sineseatnake aku ka matat pajoggoloakenenku.’ 4Piga pa ujunia ta aipuletsei nia. Lepa kuanangan ka paatuatnia, ‘Kenanen ta kukalotoake Taikamanua samba ta kupuletsei beri sara sirimanua, 5kusisineseatnakean le sinanalep nene, amagejangan bagaku, bui ioi buruburu geti irabak aku.’ ”
6Kuanangan si Tuhan, “Paatu pei kam apa sikuat sipasiukum sikatai. 7Iangan pa Taikamanua, ta pa isisineseatnake sia sipilinia, sipusosoga ka matania sinago samba sinoibo, iooreake pa iromake sia? 8Kukua nia ka matamui: Maruei le isineseatnake sia. Tapoi ke moi geti Togatsirimanua, isesese leu pa tonem baga ka polak nene?”
Pasikat sara tai Parise samba sipuuku cukai
9Itiboi leu Jesus sara pasikat ka matada siumunake tubuna sia le simaroipo, sabagei rapaloloi. 10Kuanangan, “Ai rua sirimanua sieei manindou ka Uman Taikamanua, sara tai Parise, sara sipuuku cukai. 11Purionangan si Parisena manindou ka paatuatnia kise, ‘Kukua sura ka matam Taikamanua, ta poi pakere aku ka sirimanua sabagei, sipasiraraurau, simapajoat, sipaeelet, ele kele sipuuku cukai nene. 12Rua ngaminca kupupuaso ka bagat sangamenggui, samba saparpulu ka sangamberi bibiletku kupanguruatnake.’ 13Sipuuku cukai geti ai le nia muririo ka sareunan, beri masiteila manua ta maro bagania, tapoi ibobo le rurukatnia kuanangan, ‘Taikamanua kau imakate bagam kaku sijo nene!’
14 #
Mat. 23:12; Luk. 14:11 Kukua nia ka matamui: Sipuuku cukai le aiparoipo Taikamanua aitoili ka lalepnia, ta si Parisena. Aipoi siabeuake tubuna tupagogoiso le nia, samba sipagoiso tubuna tuaabeuake le nia.”
Isukatnake tatoga Tuhan Jesus
(Mat. 19:13-15; Mrk. 10:13-16)
15Ia geti oi sipasiaambit tatogada sigoiso ka matat Jesus bule irape sia. Kele araitco nia sipasiuluinia golurangan sia. 16Sogainangan sia Jesus kuanangan, “Obaake kam tatoga raoi kaku, ba kekera kam sia; sirimanua kele nene le poi sibakkati Purimataat Taikamanua. 17Kukua nia ka matamui: Kasei pa ke ta kele tatoga ipasiala Purimataat Taikamanua, ta tuguguru nia ka bagania.”
Sirimanua simakayo mabesi tuguru ka Purimataat Taikamanua
(Mat. 19:16-30; Mrk. 10:17-31)
18Ai sara utera tai Jahudi masinounou Jesus kuanangan, “Guru simatopit, kipa kugagalai bule kuikepmake purimanuaiat sitaitatata?”
19Kuanangan ka matania Jesus, “Nukukua kodda aku simatopit? Ta anai kasei pa simatopit, sarat Taikamanua le. 20#2Mos. 20:12-16; 5Mos. 5:16-20 Surukat Taikamanua anuagaian: Bui nupaelet, bui nupamatei, bui nupanangkou, bui nupaboko, suru ukkuinu samba inam.”
21Kuanangan simakayo, “Sangamberinia nene akugalaiakean ka pusulekatku pei le.”
22Kele aiarep nia Jesus, kuanangan ka matania, “Ai pei sara galaiakenennu: sakiake sangamberi sibabara ka tubum, parubeinungan bulagatnia ka simageba, baranangan pukayoatnu ka sorga; lepa oi ekeu masitut aku.” 23Kele aiarep tiboiet nene simakayo, mareureunangan bagania, simakope kayo le poi nia.
24Kinerenangan nia Jesus kuanangan, “Bulat mabesi ka simakayo tuguru ka Purimataat Taikamanua. 25Onta pei le malabbei tubuluk ka matat susuilak ka simakayo tuguru ka Purimataat Taikamanua.”
26Kuarangan sipasiaarep, “Kisedda bai nia, kaseian le masisesese puaragat?”
27Aleginangan nia Jesus, “Sitaioi ka sirimanua, momoi ka Taikamanua.”
28Kuanangan si Petrus, “Sangamberinia le akukaddiuake kai, kutut kai ekeu.”
29Kuanangan ka matada Jesus, “Kukua nia ka matamui, senen sikaddiuake lalepnia, sinanalepnia ele sarainania, eppunia ele tatogania kalulut Purimataat Taikamanua, 30isisilo piga ngaoleat pa silinia ka tetere kineneiget pei le samba ka gogoi sialu ikepmakerangan purimanuaiat sitaitatata.”
Pangasegekat Jesus sikatelunia pagalaiat kamateiat samba katusuruatnia
(Mat. 20:17-19; Mrk. 10:32-34)
31Ia geti sogainangan sipasiuluinia sipulurua Jesus, kuanangan ka matada, “Aian tebai sita mananatara ka Jerusalem, muaailingan te sangamberi sinuratda tai nabi pagalaiat Togatsirimanua. 32Rasegeake nia ka sipuarat sabulungan, asarangan nia, paloloirangan nia samba raluji nia, 33rabobo nia samba ramateiake nia; tapoi ka gogoi sikatelunia, suru nia minca.”
34Tapoi beri goiso ta makolou ka bagada sipasiului, malipput le katukolobat tiboiet nene, ta raagai apa sikuania.
Ialeake simapeset ka legeret Jeriko Jesus
(Mat. 20:29-34; Mrk. 10:46-52)
35Malelegerengan le isege Jesus ka Jeriko, ai sara simapeset mukuddu ka bebet enungan manindou panguruat. 36Kele aiarep maigi sirimanua situsasabau, nounounangan, “Aponia sibabara?”
37Kuarangan ka matania, “Aitusasabau Jesus tai Natsaret.”
38Pusoganangan leu et, “Jesus, Togat David, kau imakate bagam kaku!”
39Aserangan nia sia sipueenung ka mata ipumengmeng; tapoi memei le iaabeuake ngangania musoga, “Togat David, kau imakate bagam kaku!”
40Ia geti tokko Jesus, kuanangan rataroake nia ka matania. Kele aisege, nounounangan nia Jesus, 41“Aponia noba kugalai ka tubum?”
Aleginangan nia, “Bule imaitco mataku, Tuhan!”
42Kuanangan ka matania Jesus, “Kauan imaitco matam. Aialeakean ekeu tonem bagam.”
43Maitconangan leu matania, aitutut Jesus, aiuumunake Taikamanua. Itco araitco nene sirimanua simigi, umunakerangan leu Taikamanua.
Currently Selected:
Luk. 18: MWV
Highlight
Share
Copy
Want to have your highlights saved across all your devices? Sign up or sign in
@LAI 2015
