Joh. 6

Ipakom lima ribu sirimanua Jesus

(Mat. 14:13-21; Mrk. 6:30-44; Luk. 9:10-17)

1Pasat nene ei Jesus ka silat koat Galilea, sipuoni leu koat Tiberias. 2Maigi sirimanua masitut nia, araitco poi kerek sigalainia aialeake simabesi. 3Panataranangan Jesus ka leleu, puuddetnangan sedda sambada sipasiuluinia. 4Ka teteret nenda amalegerengan Paska, punenda tai Jahudi. 5Kele ailoggouake matania Jesus itconangan simakope igi sirimanua moi ka matania, kuanangan ka matat Pilipus, “Kaipa tasasaki roti bule rapukom tainene?” 6Kei ikukua nene masisibo si Pilipus le, aipoi aiagaian galaiakenennia.

7Aleginangan nia si Pilipus, “Kenanen rua ngotu ropia iginia roti tusaki, ia leu et ta iaaili sia kenanen pagogoiso.”

8Kuanangan ka matania sara sipasiuluinia sipuoni si Andreas, sarainan Petrus, 9“Ai se sara toga sibara lima roti samba rua iba; tapoi apa kauta nia ka simigi?”

10Kuanangan Jesus, “Kau rapuuddet sirimanua.” Maigi poi sese sedda; puuddetrangan sangamberida, ai pa lima ribu igida sarat taimanteu. 11Ia geti alanangan roti Jesus, kuanangan sura, lepa parubeinangan nia ka sipukukuddu sedda, kisedda leu et iba, siobara le iginia. 12Kele aramaektek kuanangan Jesus ka matada sipasiuluinia, “Ruruake kam legeira, bui malimai.” 13Ia geti ruruakerangan nia ai pulu rua ngagaraga sarat sisusun, legei sikopda ka silima roti.

14Kele araitco sirimanua simigi kerek sigalai Jesus nene, kuarangan, “Sinene le bulat nabi siooi ka polak!” 15Kalulut iagai le poi Jesus, momoi le sia rapurut nia rakau nia rimata, siksiknangan tubunia mei ka leleu sarania.

Jesus muenung ka uddut koat

(Mat. 14:22-33; Mrk. 6:45-52)

16Kele aimasoibo gorosot sia sipasiului Jesus ka bebet koat, 17lepa janang sia ka abak mei mutalipo ka Kapernaum. Amagepgepman tapei amoi Jesus ka tubuda, 18koat pei ka teteret nenda maonu kalulut rusa simapiret. 19Ai pa lima ele enem kilometer reunannia arapuabak, itcorangan Jesus ai nia mueenung ka uddut koat itagetnake abak. Malotorangan sangamberida. 20Tapoi kuanangan ka matada, “Aku le, ba maloloto kam!” 21Kei raalaan le nia ka abak, ka teteret nenda leu asegean sia ka kapi ka kudduat ailiakenenda.

Ragaba Jesus sirimanua simigi

22Pato aimapato, itcorangan sirimanua simigi sipuririo ka sila, ta anai abak bagei sarania le sedda, ia leu et ta atujanang Jesus sambada sipasiuluinia ka abak, sarat sipasiuluinia le amutuitui. 23Lepa oi abak bagei sibara ka Tiberias, ka legeret kudduat pukomanda roti lepa aikua pusurakat si Tuhan. 24Kele araitco sirimanua simigi ta anai Jesus sedda, sipasiuluinia leu ta anai, tujanangrangan ka abak raei ka Kapernaum masigaba Jesus.

Jesus roti purimanuaiat

25Kele arasese Jesus sirimanua simigi ka sila, kuarangan ka matania, “Rabbi, pigamoi anuoi sene?”

26Aleginangan nia Jesus, “Kukua nia kamatamui, ta kalulut iitcomui kerek nugagaba kam aku, kalulut ektekmui mukom roti le. 27Ba momomoake kam tubumui mugalai kalulut kan simaruei tata, tapoi kan simatom siaili ka purimanuaiat sitaitatata le, akenen Togatsirimanua ka kam; nia le poi aipatone Ukkui, Taikamanua.”

28Lepa kuarangan ka matania, “Aponia galaiakenenmai, bule kugalai kai galajet obaket Taikamanua?”

29Aleginangan nia Jesus, “Nene le galajet obaket Taikamanua galaietmui, ia te: masikatonemi nia sikoiniakenen Taikamanua.”

30Kuarangan ka matania, “Oto aponia katuaggaiat baraakenennu itcoketmai, bule imatonem bagamai ka tubum? Pakoinong pei aponia nugagalai? 31#2Mos. 16:4, 15; Psalm. 78:24 Taikebbukatmai arakoman manna ka simatangeu, kele sitususurat ka Surat Sipunenan, ‘Kaunangan katda roti sibara ka sorga.’ ”

32Kuanangan ka matada Jesus, “Kukua nia ka matamui, ta si Mose amasiake ka kam roti sibara ka sorga; tapoi Ukkuiku le amasiake ka kam bulat roti sibara ka sorga. 33Aipoi roti sibara ka Taikamanua ia te nia situgogorosot sibara ka sorga samba siake purimanuaiat ka taikapolak.”

34Kuarangan ka matania, “Tuhan, ake ka kai roti nenda simariuriu.”

35Kuanangan ka matada Jesus, “Aku te roti purimanuaiat; kasei siooi kaku, taan malalaje nia; samba kasei simatonem baga kaku, taan maooggou nia buru.

36Akukuangan ka matamui, anuitcoan kam aku, tapoi ta matonem bagamui. 37Sangamberi siaket Ukkui kaku, ia te momoi kaku, samba kasei siooi kaku, ta kukekekele nia. 38Aipoi akutugorosot baraku ka sorga, ta mugalai siobat bagaku, siobat bagat sikoiniake aku le. 39Samba ne le siobat bagat sikoiniake aku: bui kupalimai beri sara siakenia kaku; tapoi kusuruake le nia ka gogoi sialu. 40Nene le poi siobat bagat Ukkuiku: bule senen sipasiitco Toga samba simatonem baga ka tubunia, masibakkati purimanuaiat sitaitatata, lepa suruakekungan nia ka gogoi sialu.”

41Ia geti pungungukirangan nia tai Jahudi, kalulut kukuana, “Aku te roti sibara ka sorga.” 42Kuarangan, “Ta si Jesus nia, togat Josep, kuagai le kai ukkuinia samba inania? Kipa te momoi ikua, sibara ka sorga le nia?”

43Kuanangan ka matada Jesus, “Ba pungungungu kam. 44Ta anai beri sara siooi moi kaku ke ta igirit nia Ukkui sikoiniake aku; samba kusuruake nia ka gogoi sialu. 45#Jes. 54:13 Atusuratnakean ka bukoda tai nabi, ‘Sangamberi le ipangangantoman Taikamanua.’ Sangamberi sipasiaarep ngangan Ukkui samba sipasigegelai, ia te momoi kaku. 46Nene ta masikua aian sipasiitco Ukkui; sarat nia sibara ka Taikamanua le, amasiitco Ukkui.

47Kukua nia ka matamui: Kasei simatonem baga, ai ka tubunia purimanuaiat sitaitatata. 48Aku te roti purimanuaiat. 49Taikebbukatmui arakoman manna ka simatangeu, tapoi amateian leu sia. 50Roti situgogorosot sibara ka sorga geti, kasei sikom nia ta mamatei nia. 51Aku te roti purimanuaiat sibara ka sorga. Kasei sikom roti nene, muririmanua le nia teret buruburu. Roti akenenku nenda, ia te tubuku, purimanuaiatda taikapolak.”

52Ia geti pagolurangan tai Jahudi pasasambada, kuarangan, “Kipa te iooi iake tubunia takom nia?”

53Kuanangan ka matada Jesus, “Kukua nia ka matamui: Ke ta nukom kam tubut Togatsirimanua samba nulo kam logaunia, ta anai purimanuaiat ka tubumui. 54Kasei sikom tubuku samba silo logauku, aibakkatingan purimanuaiat sitaitatata, ia geti suruakekungan nia ka gogoi sialu. 55Tubuku poi bulat kan, logauku poi bulat lo. 56Sipasikokom tubuku samba sipasilolo logauku, ai le nia ka tubuku, aku leu ka tubunia. 57Kele Ukkui sipuririmanua, sikoiniake aku, aku leu murimanua kalulut Ukkui, kisedda leu sikom aku, muririmanua le nia kalulut aku. 58Nene le roti sibara ka sorga; ta makere nia ka roti sikopda taikebbukatmui, lepa arakom nia matei sia. Tapoi sikom roti nene geti, muririmanua le nia teret buruburu.”

59Ia te aitiboi Jesus ka teteret aipungantoman ka uma parurukat ka Kapernaum.

Tiboiet purimanuaiat sitaitatata

60Oto maigi sipasiului Jesus, kele araarep tiboiet nene kuarangan, “Tiboiet simakela le nene, kasei ioom iarep nia?”

61Aiagaian le poi ka paatuatnia Jesus pungungungura sipasiuluinia pagalaiat nene, kuanangan ka matada, “Ibabaraake kodda belet bagamui nene? 62Kipangan le geti ke nuitco kam Togatsirimanua tusakai ka kudduatnia siboiki? 63Ketsat le sikau murimanua, tubu geti ta anai kauta nia. Oto tiboiet siniboiku ka matamui, ia te Ketsat samba purimanuaiat. 64Tapoi ka talagamui ai sia sitaimatonem baga.” Kirenangan poi aiagaian Jesus kasei sia sitaimatonem baga samba kasei sipajo nia geti. 65Kuanangan minca, “Ia te akukua ka matamui, ta momoi ioi kasei pa ka tubuku, ke ta Ukkui masikau nia ioi.”

66Barania ka teteret nenda maigi sipasiuluinia mutuitui, taan rapaalei nia. 67Lepa kuanangan Jesus ka matada sipasiuluinia sipulurua, “Taleu mututuitui leu kam ka kam?”

68 # Mat. 16:16; Mrk. 8:29; Luk. 9:20 Aleginangan nia si Simon Petrus, “Tuhan, ka tubut kaseian le kueei kai? Tiboietnu ia te tiboiet purimanuaiat sitaitatata. 69Amatoneman bagamai samba akuagaian kai, Sipunenan sibara ka Taikamanua le ekeu.”

70Aleginangan nia Jesus, “Pulurua tebai kam akupili, ele? Tapoi sara ka talagamui sanitu le!” 71Si Judas togat Simon tai Iskariot le ikukua nene; nia poi geti masisesegeake Jesus, sara ka talagat sipasiului sipulurua.

Currently Selected:

Joh. 6: MWV

Highlight

Copy