1Mos. 7

Eba

1Lepa kuanangan si Tuhan kai Noak, “Akuitco ekeu saram le sirimanua sipasigagalaiake siobat bagaKu. Oto, tuguru le kabagat kinapat nenda pasamba sangamberi keluargam. 2Ambit leuet pitu ngamuneng simateu samba pitu ngamuneng sinanalep sibara ka senengamata uma' samba tarimeu bagei sitaikasitsitnakenen, tapoi kasenen uma' samba tarimeu kasitsitnakenen sara simanteu samba sara sinanalep le. 3Galaiake le nenda bule ka senengamata tarimeu ai sibebela sibara katusubuat samba momoi ramakakra minca ka polak. 4Ai pei pitunga gogoi Kubebeleake urat sitaimalelegeu ujunia epat pulu ngata'go epat pulunga soibo, bule sigalaiKu sipuririmanua nenda masubu.” 5Lepa galaiakenangan si Noak sangamberi siparentaakenen Tuhan katubunia.

6Si Noak ainia enemngotu ngarura, keteteret aibara eba sabeu ka polak. 7#Mat. 24:38-39; Luk. 17:27 Si Noak samba sinanalepnia, samba tatogania pasamba sinanalepra, tuguru' kabagat kinapat nenda addeat masibelaake tubu ka eba sabeu nenda. 8Sangamuneng simanteu samba sangamuneng sinanalep ka senengamata uma' samba tarimeu bagi – ta'kasitsitnakenen samba kasitsitnakenen – 9tuguru' kabagat kinapat nenda pasamba si Noak, siripot parentat Taikamanua. 10Pasat pitu ngagogoi oi eba sabeu masikuilu' polak.

11 # 2Ptr. 3:6 Kateteret nenda si Noak ainia enemngotu ngarura, ka gogoi pulu pitu laggo rua, maragatnangan sangamberi bubuaket katei polak. Sangamberi matat baliu oinan ka manua tunga'nganangan, 12samba bele urat ujunia epat pulu ngata'go epat pulu ngasoibo. 13Ka gogoi nenda leuet, si Noak samba sinanalepnia tuguru' kabagat kinapat nenda pasamba telu togania, iate si Sem, Jafet samba Ham pasamba sinanalepra. 14Pasamba sia tuguru' leuet senengamata uma' samba tarimeu bagei, simaam samba simalia, sabeu samba leu sigoiso. 15Sangamuneng simanteu samba sangamuneng sinanalep sibara ka senengamata sipungongoingoi guru' kabagat kinapat nenda pasamba si Noak, 16siripot parentat Taikamanua katubunia. Lepa aituguru sangamberinia. Luplupmakenangan matat baliu kinapat si Tuhan.

17Eba nenda mariuriu le ipasikuilu ujunia epat pulu ngagogoi, samba oinan ibailiu mabuak pat oinangan iputekbuk kinapat nenda. 18Oinan memei mabubuak, samba kinapat nenda putekbuknangan ka uddut oinan. 19Oinan nenda riuriu le imakeru, pat talunangan leleu simakope buak. 20Oinan riuriu le imabuak pat aili pulu lima eto barania ka uddut leleu. 21Isubuake le si Tuhan senengamata sipungngoingoi ka polak nene: 22Sirimanua, uma' samba tarimeu ka polak, sigoiso samba leu sabeu. 23Sitaimasusubu geti sarat si Noak le samba sangamberi sibabara pasambania kabagat kinapat nenda. 24Oinan nenda ta'magagarak sangotu limapulu ngagogoi ujunia.

Currently Selected:

1Mos. 7: MWV

Highlight

Copy