1Mos. 45

Si Josep masipaagaiake tubunia ka sasarainania

1 # Pugap. 7:13 Taan amoi iopmake patuaatnia si Josep kamatatda sipugagalai katubunia. Kalulut nenda koiniakenangan sia rakaddiuake kudduat nenda, bule ioi ipaagai katubut sasaraianania kaseinia siripokatnia. 2Lepat arakaddiuake kudduat sangamberi sipugagalainia nenda, pusounangan si Josep simaron, pat areprengannia tai Misir sikukuddu ka uja, samba sege katuareman nenda ka uma purimataat rimata. 3Kuanangan si Josep katubut sasarainania, “Aku nene si Josep. Aipeileu muririmanua ukkui?” Masiarep nenda sasarainania malotorangan simakope pat taioinangan raaleginia. 4Lepa kuanangan si Josep katubutdra, “Konan kam sene.” Malegrerangan, samba kuanangan minca, “Aku si Josep te, sinakiakenenmui ka Misir. 5Bui numaloto kam ele iolei bagamui kalulut sasakiakemui aku. Siripokatnia Taikamanua le amasiambit aku sene muboiki kakam masipaarau siberikabaga. 6Kalulut ruangamincaan aibara pulajeat ka laggai nene samba aipei limangarura ujunia sirimanua taan masipapakru ele masimonei. 7Aiambitnan aku Taikamanua muboiki kakam masipaarau kam pasamba enungan kiseiet nene, samba masijamin puririmanuamui samba katuriuriugat nupupunuteteukam. 8Oto, siripokatnia ta'kam paluluatnia akukuddu sene, tapoi Taikamanua le. Aibaliakean aku sibara puakuket simabuak rimata Misir.

9 # Pugap. 7:14 Kineiget, olaake nutoili kam ka ukkui samba kua kam katubunia, si Josep, togania, masikua kise, ‘Aibailiuakean aku Taikamanua sibakkat sangamberi Misir; olaake nuoi. 10Ukkui momoi ikuddu ka Gosyen, malegre kabe'beku – ukkui, pasamba sapunuteteunu, biribiri, kambing, jaui samba sangamberi bakkat ukkui. 11Ke'bai ai ukkui ka Gosyen, momoi kupasikelinia. Pulajeat aipeile limangarura samba kubesiake geti ukkui, keluarga samba tarimeu ukkui bui ibara berisara simagulai.’ ”

12Kuanangan minca si Josep, “Kineiget anuitcoan kam saramui, ekeu leu Benjamin, aku nene sibulatnia si Josep. 13Kua kam katubut ukkuita, sangamberi gegeku sene, ka Misir, samba poiliatkam katubunia sangamberi siitcomui. Lepa olaake kam nuambit kamnia sene.” 14Lepa nenda lakkaiakenangan si Benjamin, baginia nenda, lepa pusonangan; samba ailalakkaiake si Josep pusounangan leuet kasia si Benjamin. 15Lepa geti, aipeile si Josep musosou, lakkaiakenangan sangamberi sasarainania samba sigguknangan sia. Lepa nenda taddaakerangan rapatibo pasamba si Josep.

16Kateteret ka uma purimataat rimata marepnangan, amoi sasarainan Josep, rimata samba sipugagalai muangka baga. 17Lepa kuanangan rimata kamatat Josep, “Koiniake sasarainam nenda rakau bairanen kalideira gandum samba toili ka laggai Kanaan, 18masiala ukkui samba muntogatra lepa oi sia masiailiake aku. Iageti kaukungan katubudra polak simaeru ka Misir, samba oinangan geti rapurimanua simakolou sibara buat polak nenda. 19Koiniake leu sia masiambit sibara sene piga pa' kereta addeat kasinanalep samba katatogadra sigoiso, samba masiala ukkuira. 20Buian rapaatu pukayoat sigalakngakenenda, kalulut sangamberi simaeru ka sangalio Misir ibailiu geti bakkatra.”

21Tatogat Jakob masigalaiake parentat rimata nenda. Kaunangan si Josep katubudra piga pa' kereta, siripot siparentaakenan rimata, samba leu panarengan ka enungan. 22Kaunangan leuet kasene-senendra patsara sia leppei sibau, tapoi kai Benjamin ikau le telungotu bulagat perak samba lima leppei sibau. 23Kaunangan raambit ka ukkuinia pulungamuneng kaliddei aibairanennia maigi bibilet bulat simaeru sibara ka Misir, samba pulu kaliddei bagei, aibairanennia gandum, roti samba komen bagei addeat komen kapuenunganannia ka Misir. 24Lepa geti taroakenangan sasarainania, samba kuanangan katubudra, “Bui nupagolu kam ka enungan.”

25Kaddiuakerangan Misir samba toili kai Jakob, ka ukkuira ka Kanaan. 26Kuarangan katubut ukkuira, “Si Josep aipeilenia muririmanua! Nia sibakkat gege ka sangamberi Misir!” Masiarep katuareman nenda, si Jakob taipuletsei, samba ta'matonem bagania katubudra.

27Tapoi lepa arapoiliat sangamberinia sikuat Josep katubudra, samba kele aiitco kereta siambitra sibara kai Josep addeat masialania samba masiambitnia ka Misir, bara ron tubunia. 28Kuanangan, “Togakku si Josep aipelenia muririmanua! Sarat nenda le kukiddi! Bui ta'mei aku samba masiitconia kepei matei aku.”

Currently Selected:

1Mos. 45: MWV

Highlight

Copy