1Mos. 43
43
Sikaruangamincania raei sakebbut Josep ka Misir
1Tapoi makope le oloi pulajeat ka laggai nenda. 2Samba kele aisapru arakom gandum siambitra sibara ka Misir, kuanangan ukkuira: “Kenan kam minca sedda samba sakikam gandumta.”
3Lepa kuanangan si Jehuda katubunia, “Gubernur Misir aiakean repdemen simatone, ta' momoi kuailiakekainia ke' ta'kuambit kai bagimai nenda. 4Ke nuobaake kuambit kai bagimai, obamaian mei sedda masisaki komen. 5Tapoi ke'tanuobaake ioi si Benjamin, ta'kuoba kai mei, aipoi aikuangan si Gubernur nenda, ta'momoi kuailiakekainia ke'ta' moi bagimai.”
6Kuanangan si Jakob, “Angoi nubesiki kam aku pasamba masikua katubut sirimanua nenda, aipei le bagimui?”
7Alegirangan, “Sirimanua nenda mariuriu le inounou pagalaiat kai samba keluargatta, kuanangan, ‘Aipeileu muririmanua ukkuimui? Aipeile bagimui simanteu bagei?’ Besiakemaian masialegi sangamberi panounougatnia. Kipa ioi kuagaikainia, kokoiniakenakai masiambit bagimai nenda?”
8Lepa kuanangan si Jehuda ka ukkuinia, “Obaake toga nenda ioi, samba aku le masipuukunia. Memeian te kai, bule bui'ibara beri sara sirimanua katalagatta simamatei kalulut laje. 9Aku le silinia, samba momoi nutiddou nia katubuku. Ke'ta'kuambitnia minca kabagat arau, aku masibairat ukumannia ujut puririmanua. 10Kele ta'tangena kam, imauju, amuruanga mincaan kutoili kuei kai.”
11Lepa kuanangan ukkuira, “Ke'bai kele kisedda, ambitmuian bua simokope eru sibara ka laggai nene kabagat gonimui sibailiu panguruat kai gubernur nenda: kismis, suat mani, pusinginan, buat kemiri samba buat badam. 12Ambit leu bulagat rua ngaminca siboiki, kalulut bulagat sinese kabagat gonimui nenda bui ta'nutoiliake kam. Ele nenda sara sitaipasesese le'. 13Ambitnan bagim nenda, samba toili le simaruei. 14Bule Taikamanua sipulugege masigalai gubernur nenda mununtu baga katubumui, pat obanangan masitoiliake si Benjamin samba Simeon katubumui. Pagalaiat aku nene, ke'bulatnangan imalimai tatogakku, apa poi tugagalai.”
15Lepa geti ambitrangan sangamberi panguruat nenda samba bulagat ruanga minca siboiki sasarainan Josep, lepa tuituisia ka Misir pasamba si Benjamin. Kele arasege sedda, ailiakerangan si Josep. 16Kele aitco si Josep si Benjamin samba sakebbunia, kuanangan ka sapaguguletnia sipasiuteake lalepnia, “Ambit le sirimanua nenda ka lalepku. Ja'ja' sangamuneng tarimeu lepa patarek nenda, aipoi sina'go nene sia pasamba aku mukom simakere.” 17Pagugulet nenda masigalaiake parenta nenda samba ambitnangan sasarainan Josep kalalep gubernur.
18Kateteret tuambit sia ka lalep Josep, malotorangan samba paaturangan, Aituambit sita sene, kalulut bulagat sinesetta kabagat goninta kateteret ataoi siboiki peile. “Labarangan sita sige'ge', lepa alarangan kalideita samba bailiuakerangan sita pakoiniendra.” 19Kalulut nenda, kabe'bet matat baliu lalep Josep, kuarangan katubut siuteake lalep Josep, 20“Bojoi, Tuan, siboiki amoian kai sene masisaki komen. 21Kapuenunganan tutoili, kateteret akupugogoikai, bukamaian gonimai. Agaimai le sangamberi bulagat pasilului mai gandum ai kauddut gandum. Ta kuagai kai kaseipa' amasiguruake bulagat nenda. 22Kineiget akuambitnankai minca kai Tuan. Ai leu bulagat bagei akuambit kai pasisakit kan minca.”
23Kuanangan pagugulet nenda, “Bui numaloto. Bui imakarat bagam. Taikamanuamui, iate Taikamanua panindogiet ukkuimui, Nia le amasiguruake bulagat nenda kabagat gonimui. Bulagat pasiluluimui gandum nenda akusiloan.”
Lepa geti ambitnangan Simeon katubudra, 24lepa taroakenangan sia ka lalep. Kaunangan oinan pasibui rere, samba leu komen kalideira. 25Lepa nenda patarekrangan panguruat kaunen kai Josep ke moinia sina'go, kalulut atupaagaian katubudra, rapukom pasambania. 26Kateteret aisege si Josep ka lalep, kaurangan sangamberi panguruat nenda kai Josep pasamba murapo katubunia. 27Parerenangan si Josep pagalaiat sia, lepa kuanangan, “Anupoiliatnan kam kaku pagalaiat ukkuimui simabaja nenda. Kipa puroronnia? Magogi leu nia?”
28Alegirangan, “Pagugulet Tuan, ukkuimai, magogoi le nia.” Lepa purekukrangan katubunia
29Kele aiitco si Josep si Benjamin, baginia, kuanangan, “Oto, nene le bagimui sisule nenda, kuanenmui kaku? Bule Taikamanua masipanukani ekeu, togakku.” 30Masou le bagat Josep kalulut irepdep samba nuntut bagania kabaginia. Aipei goiso ta'ioi ijago tubunia, lulut nenda einia kabilinia lepa pusonangan. 31Lepa nenda buinangan matania, iageti belania minca. Aiommake patuatnia, koiniakenangan rapatarek komen. 32Pukomnangan si Josep ka mejania sarania, samba sasarainania ka meja bagei. Tai Misir sikukuddu sedda mukom ka meja bagei, kalulut masitsit sia mukom pasamba tai Heber. 33Sasarainan Josep tuddetnake sia ka meja sipamamatai kai Josep, siripokat patunan ruradra senendra, barania ka sikebbukat teret ka sisule. Kele araitca galai pukukuddu nenda, paiitcorangan kamata pasamba masikisei. 34Kaukomendra sibara ka mejat Josep, samba si Benjamin tupuuku limanga minca iginia belepei ka sakebbunia. Lepa mukon samba mulo sia simakere pasamba si Josep pat sege' bagatda.
Currently Selected:
1Mos. 43: MWV
Highlight
Share
Copy
Want to have your highlights saved across all your devices? Sign up or sign in
@LAI 2015
