1Mos. 40
40
Si Josep masipakolou pangamutetda situpapatpat
1Lepat aipuaili sangamberi nenda, utet sipasikeli lo rimata Misir samba utet sipasikeli rotinia masigalai puseleat katubut tuannia, rimata Misir itu, 2oto pugolunangan si Parao katubut rua sipugagalai ka uma purimataatnia, utet sipasikeli lo samba utet sipasikeli roti nenda. 3Tangsiakenangan sia kabagat lalep utet sipasijago rimata, kabagat tangsi ka kudduat aitangsiake si Josep. 4Ute sipasijago rimata masigalakake si Josep pasamba sia, masipasikeli sia. Kisedda te aratangsiake sia piga pa' burunia.
5Ka sara gogoi pangamutrangan ruatda – utet sipasikeli lo samba utet sipasikeli roti rimata Misir, sitangsiakenen kabagat tangsi nenda – senesenenda ai pangamutetda, ka soibo nenda leu et, samba pangamutetda senenda ai katukolobatnia. 6Kateteret simansep si Josep mei katubutda, itconangan sia, ai sia murereureu baga. 7Lepa parerenangan katubut sipugagalai ka uma purimataat Parao sitangsiakenen pasambania ka lalep tuannia nenda: “Angoi mareureu bagamui kineneiget?” 8Alegirangannia: “Amangamut kai, tapoi taanai siagai masikolouake.” Lepa kuanangan si Josep katubutda: “Ta pa Taikamanua le masikokolouake pangamute? Pumumuanake pei kam pangamutetmui nenda katubukku.”
9Sipuuku lo' nenda masikua, “Kabagat pangmutet nenda aku itco ai loinat anggur ka mataku. 10Loina nenda ai rannia telu. Rannia nenda iapei aipubuluk, iapei ai bela kinosonia, lepa buania bailiu mara'. 11Kateteret nenda aikuukka gale lo' rimata, oto alakungan buat anggur nenda samba piotkungannia kabagat pulokat rimata, lepa labbeiakekungan katubunia.”
12Kuanangan si Josep, “Nene te katukolobatnia: telunga ran nenda katukolobatnia telunga gogoi. 13Kabagat telu ngagogoi nene ibuakngake le ekeu si Parao samba itoiliake le ekeu minca ka puukuketnu siboiki samba kaunungan geti pulokat ka kabei Parao kele siburu, kateteret ai aibailiu ekeu sipasikeli lot rimata. 14Tapoi repdep le aku ke'amagoraan ekeu. Ropmake nusegeake paukelatku katubut rimata, bule ibelaake aku ka tangsi nene. 15Aipoi, siripokatnia siboiki aranangkou aku ka laggaira tai Heber samba sene leu et, ka Misir nene, ta'pei kuagai akugalai pukakatai pat guruake kabagat tangsi.”
16Kele aiagainia sipasikeli roti nenda, katukolobagat pangamutet sipasikeli lo' nenda maeru, iageti kuanangan leu et kai Josep, “Amangamut leu et aku, aku akkatnake telungambua karakjak roti ka uteku. 17Kabagat karakjak sikuddu bulat kapata ai senengamata kue addeat kai rimata, tapoi oi uma' masipakomi kue nenda.”
18Aleginangan si Josep, “Nene te katukolobagat pangamutet nenda: Telu karakjak nenda katukolobatnia telunga gogoi. 19Kabagat telunga gogoi nene ikokoiniake te geti sirimanua rimata masitippu utenu lepa toakngakenangan tubuna ka sara arigi, samba pauma-uma ikom akkulanu.”
20Pasat telunga gogoi iate pasirepdeman putu'tu'kat matat rimata, samba baraakenangan punen sabeu kasangamberi sipugagalai. Parentaakenangan bule sipasikeli lo' samba roti tubelaake kabagat tangsi samba tuambit kamatat sangamberi sipasikeli uma purimataat. 21Sipasikeli lo' itoiliakenia ka kudduat galaiet siboiki. 22Tapoi sipasikeli roti tuukum matei le. Sangamberinia nenda muaili siripot aponia sikuat Josep. 23Tapoi sipasikeli lo' nenda ta'an irerepdep minca kai Josep. Aikalipogingan le nia.
Currently Selected:
1Mos. 40: MWV
Highlight
Share
Copy
Want to have your highlights saved across all your devices? Sign up or sign in
@LAI 2015
