1Mos. 38

Jehuda samba Tamar

1Kateteret nenda kaddiuakenangan sasarainania si Jehuda samba mukuddu pasamba si Hira, sara simanteu sibara ka laggai Adulam. 2Sedda paagai si Jehuda pasamba sara siokko togat Sua tai Kanaan, lepa putalimourangan. 3Togadra siboiki iate simanteu kaunangan ukkuinia oninia si Er. 4Toga sikarua leuet simateu, ioniakenia si Onan. 5Toga sikatelu leu simanteu, samba ioniakenia Syela. Kateteret aiputu'tu' matat Syela si Jehuda ainia ka Kezib.

6Jehuda masitalimouake si Er, togania sikebbukat pasamba si Tamar. 7Paraboat Er bulat makatai, pat pugolunangan si Tuhan katubunia samba mateiakenangania. 8Lepe kuanangan si Jehuda kai Onan, bagit Er, “Kenan ka palumangakenen kebbunu, samba perep pasamba nia. Sunnake le' pasikelatnu katubunia, aipoi ekeu bagit simanteunia; kabagat nene oinangan ibara tuppai tubut kebbunu.” 9Tapoi si Onan iagai, tatogania lepa geti ta'ibailiu bakkatnia. Oto, senen iamiake iperemi palumangakenen kebbunia nenda, iobaake le imalimai suat tubunia, bule bui ibara tuppai tubut kebbunia. 10Sigalainia nenda sikaumagolu si Tuhan samba si Tuhan imateiake leu nia. 11Lepa geti kuanangan si Jehuda kai Tamar talikunia nenda, “Toiliake ekeu ka lalep eppum samba kudduake ekeu sedda sibailiu silumang teret imabeu togaku si Syela.” Ikua kele nene kalulut loto, babara si Syela imamateiake leu geti si Tuhan, kele karua kebbunia. Iageti toili si Tamar ka lalep eppunia.

12Pasat piganga gogoi pa' tusabau matei sinanalep Jehuda. Pasat ailepa teteret puleppei goni, si Jehuda masinana si Hira, aleinia sibara ka Adulam nenda, mei ka Timna, ka kudduat pasisapuat bulut biribirinia. 13Lepa bara katuareman kai Tamar, si Jehuda talikunia moi ka Timna masisapu bulut biribirinia. 14Iageti silinangan bibilet pulumangannia pasamba bibilet bagei. Itabbo le matania pasamba komak tabbo, lepa kuddunia ka matat baliu gugurukat laggai Enaim, sikuddu ka enungan siailiake ka Timna. Si Tamar makolou le againa si Syela, togat Jehuda sisule, amabeuannia, tapoi ta'pei tutalimouake pasamba silainge tubu nenda.

15Kateteret aiitco si Jehuda si Tamar, kabagania le si nanalep nenda sirimanua sipaelet kalulut pumataatnia katatabbokat. 16Lepa legerinangannia si Jehuda ka bebet enungan nenda, samba kuanangan, “Piga tiddougetnu?” Aipoi ta'iagai sinanalep nenda talikunia.

Aleginangan si Tamar, “Teu Tuan le.”

17Kuanangan minca si Jehuda, “Kua le geti kekeu sangamuneng kambing sibautubu.”

Aleginangan si Tamar, “Kauan, tapoi bui' tabara sili, teret akenungan kambing nenda.”

18Nounounia si Jehuda “Jaminan aponia?”

Aleginangan si Tamar, “Ake katubuku materainu pasamba inum samba tutura kakabeinu nenda.” Lepa kaunangannia sangamberinia nenda katubunia, iageti ailiakenangannia. Sinanalep nenda bailiu musuruket. 19Toili si Tamar ka lalepnia samba goloknangan tabbot matania, iageti leppeakenangan leppei pululumangnia minca.

20Pasat piganga gogoi pa' koiniakenangan si Jehuda si Hira, aleinia, itaroake kambing nenda samba masitiddou minca bibilet sikaunia sibailiu jaminan, tapoi si Hira ta'aisese sinanalep nenda. 21Panounouginangan si Hira sirimanua ka Enaim, “Kaipa simareirei ipangena sipaelet ka bebet enungan nene?”

Alegirangannia, “Ta'anai senen sinanalep sipaelet.”

22Lepa toili si Hira kai Jehuda samba kuanangan, “Ta'anai aku sese sinanalep nenda. Arakua sirimanua sedda ta'anai sipaelet sedda.”

23Kuanangan si Jehuda, “Eddangania bibilet nenda addeat ka sia, sarat bui le tamaila. Akubesiakean masilului, tapoi ta'amoi anuse'se'nia.”

24Pasat telungalaggo bara katuareman kai Jehuda, si Tamar talikunia aibailiuannia sipaelet samba amusuruketnannia.

Lepa parentaakenangan si Jehuda, “Alakamnia samba labo teret matei!”

25Kateteret tuambit si Tamar ka uja, segeakenangan tiboiet katalikunia, kuanangan, “Amusuruketnan aku ka sirimanua sibakkat bibilet nene. Lelekngake kam kasei sibakkat materai pasamba inu samba tututra nene.”

26Si Jehuda iagai bibilet nenda samba kuanangan, “Sinanalep nenda ta' masele. Ta'amoi aku sunnake pasikelatku katubunia; siripokatnia kutalimouake le nia pasamba togaku si Syela.” Si Jehuda ta'an aiailiaake si Tamar.

27Kele aiaili terenia ipusule si Tamar, tu'tuakenangan matat tatoga tairua. 28Kateteret ainia mususule, sara katalagat tatoga sirua nenda belaakenangan kabeinia, lepa si Bidan ukkaakenangan kabei nenda samba apranangannia pasamba banang simabonan. Kuanangan Toga nene muboiki mutu'tu' mata.” 29Tapoi toga nenda tiktiknangan minca kabeinia, samba toga minca sara muboiki mutu'tu' mata. Lepa geti kuanangan si bidan, “Oto kise te' enungannu nubesiake bela!” Iageti toga siboiki mutu'tu' mata nenda ioniakenia si Peres. 30Pasat nenda iapei tu'tu' matat baginia sibara apra banang simabonan ka kabeinia. Lepa kau onia si Zerah.

Currently Selected:

1Mos. 38: MWV

Highlight

Copy