1Mos. 29

Si Jakob ka lalep Laban

1Si Jakob masiriuriuake puenunganannia samba einia ka kupkumen laggai ka isit kabeleiat sulu Kanaan. 2Sinulut itconangan sara uggungan ka su'su, samba telungamungkuat biribiri ai memerep ka be'benia. Tarimeu nenda matukele le tukau lonia sedda. Uggungan nenda tutabbo bukku sabeu. 3Ke'aparuruan sangamberi biribiri ka kudduat nenda, sia sipasijajago tarimeu masiguiluake bukku nenda ka be'be, lepa biribiri nenda tukau lo. Lepat nenda sia sipasijajago tarimeu masitabbo minca uggungan nenda.

4Lepa panounounangan si Jakob katubut sipasijajago terimeu sedda, “Ale saalei, kaipa anubara kam nene?”

Alegirangan, “Baramai ka Haran.”

5Panounounangan minca si Jakob, “Nuagai leu kam si Laban togat Nahor?”

Alegirangan, “Kuagaikai.”

6Panounounangan minca si Jakob, “Masanang leu nia?”

Alegirangan, “Masanang le nia.” Itco pei, “nenda togania sinanalep sipuoni si Rahel. Aiaambit mungkuat biribiri ukkuinia.”

7Kuanangan si Jakob, “Mata'go peile samba ta'pei aiaili teterenia ituguruake biribiri kabagat gulak. Angoi sangamberi tarimeu nenda ta'nupalokam, lepa obakemuian ikom minca parou?”

8Alegirangan, “Ioi kupalokai sangamberi biribiri nenda ke' sangamberi mungkuat biribiri aparuruan sene samba bukku takke atuguiluakean.”

9Aipeile maninibo si Jakob pasamba sia, oi si Rahel pasamba mungkuat biribirinia. 10Kele aiitco si Jakob si Rahel pasamba biribiri nenda, ei si Jakob ka uggungan nenda, iageti guiluakenangan takkenia bukku ka be'be samba ikau lot mungkuat biribiri nenda. 11Lepa geti sigguknangan si Rahel, samba pusounangan kalulut sou bagania. 12Kuanangan kai Rahel, “Aku togat Ribka, saraianan ukkuinu.”

Lepa pabalaunangan si Rahel itoili ka lalepnia bule masipoiliat pagalaiat nenda ka ukkuinia. 13Kele aiarep katuareman si Laban pagalaiat si Jakob, buania nenda, pabalaunangan iailiakenia. Lakkaiakenangan si Laban si Jakob samba sigguknangannia, lepa ambitnangannia ka lelepnia. Lepat aipoiliat sangamberinia sipuaaili kai Laban. 14Kuanangan si Laban katubunia, “Aisesengan, ekeu sangalogau pasamba aku.”

Iageti pukuddunangan si Jakob sedda ujunia sangalaggo.

Si Jakob mugalai ka lalep Laban addeat masibesiake si Rahel samba si Lea

15Ka sara gogoi kuanangan si Laban kai Jakob, “Ta'mateu nupugalai katubukku ke'siboboi le, kalulut ekeu saeppukku. Piga siobanu upam?” 16Si Laban ai rua togania sinanalep, sikebbukat oninia si Lea samba sisule oninia si Rahel. 17Si Lea pumataatnia ta'makope eru, tapoi si Rahel malainge putubuatnia samba pumataatnia.

18Si Jakob maala bagania kai Rahel, lulut nenda kuanangan, “Kuaoba mugalai katubum pitu ngarura ujunia, ke'nuobaake kuputalimou pasamba si Rahel.”

19Kuanangan si Laban, “Ta'kuoba kukaunia ka sirimanua bagei, maeru peile kuakenia katubum. Oto kuddungan sene pasamba aku.” 20Iageti pugalainangan si Jakob pitu ngarura ujunia addeat masibesiake si Rahel. Kai Jakob rura nenda itusabau kele piga ngagogoi pa', kalulut nuntut bagania kai Rahel.

21Pasat nenda kuanangan si Jakob kai Laban, “Pitu ngarura atukapplungan, obaakean le kuputalimou pasamba si Rahel.” 22Lepa baraakenangan si Laban punen putalimougat samba sogainangan sangamberi sirimanua ka laggai nenda. 23Tapoi ka soibo nenda, ta' si Rahel, tapoi si Lea le aitaroake si Laban kai Jakob, samba pereminangan leuet nia si Jakob. (24Kaunangan si Laban paguguletnia sinanalep sipuoni si Zilpa kai Lea, addeat ibailiu paguletnia.) 25Kele aimapato againangan si Jakob, si Lea le aitalimouake. Lepa ei si Jakob kai Laban samba kuanangan, “Angoi anugalaiake kaku kise? Ta'pa' akupugalai masibesiake si Rahel? Angoi nupajoaku?”

26Aleginangan si Laban, “Siripokat arat laggai sene, sisuleket ta'momoi muboiki mukebbukat ka kebbu. 27Ngena boiki teret ilepa pitu ngagogoi punen putalimougat, lepa geti akekungan si Rahel katubum, ke'nuoba mugalai minca aipei pitu ngarura ujunia.”

28Iageti galaiakenangan kisedda si Jakob; kappluakenangan pitu ngagogoi putalimougatnnia pasamba si Lea, iageti si Laban kaunangan si Rahel, togania, ibailiunia sinanalep Jakob. 29Kuanangan si Laban paguguletnia sinanalep sipuoni si Bilha kai Rahel, addeat ibailiu paguguletnia. 30Pereminangan leuet si Jakob si Rahel, manuntu peile bagania kai Rahel bele pei kai Lea. Lepa geti pugalainangan pitu ngarura minca.

Tatogat Jakob

31Kele aiitco si Tuhan, si Lea taan makope ipununtukinia baga kele si Rahel, obaakenangan ipusuruket si Lea, tapoi si Rahel ta'bara suruketnia. 32Pusuruketnangan si Lea lepa tu'tuakenangan matat sara toga simanteu. Kuanangan, “Aiitcoa si Tuhan besit tubukku, samba kineneiget ipununtuki le geti aku baga simanteuku.” Lepa oniakenangan togania nenda si Ruben. 33Lepa pusuruketnang minca si Lea, tutuakenangan matat sara toga simanteu. Kuanangan si Lea, “Aiakean si Tuhan katubukku toga nene, kalulut Aiarep ta'tupununtukiaku baga.” Lepa oniakenangan togania nenda Simeon. 34Pusuruketnangan minca si Lea lepa tu'tuakenangan matat sara toga simanteu. Kuanangan, “Kineiget simanteuku aiobaan aku kelulut aku tutuakean matat telu tatoga simanteu.” Lepa oniakenangan togania nenda si Lewi. 35Lepa geti pusuruketnangan minca si Lea samba tutuakenangan matat sara toga simanteu. Kuanangan, “Sangaminca nene kuumunake le geti si Tuhan.” Lepa oniakenangan togania nenda si Jehuda. Lepa nenda taan amusule minca si Lea.

Currently Selected:

1Mos. 29: MWV

Highlight

Copy