मरकुस 15

पिलातुस मड़ंग रे ईसु

(मत्ती 27:1-2,11-14; लूका 23:1-5; एहुन्‍ना 18:28-38)

1अँगा एन सी तुरेत्ते बड बडे आजककू, अवुर सपायँड़कू, अवुर एहूदी नियम चेचेडकू, अवुर गोटा दरबार रेनकू सींड़कू सलाह केनते ईसु कू एर तोलतेडिया, अवुर हेंय इदी केडिय ते पिलातुस थरे कू जिमा तेडिया। 2तहाँ पिलातुस होंबोर तेडिया, “अम एहूदिकू रेनिय राजा हवे किदो?” हेना वरी ईसु हेंयिय जबाब वडा, “अनम कहनी गोत्तेडा।” 3बड बडे आजककू ईसु अखीर कू दोस तेडिया। 4तहाँ पिलातुस फे-रिय होंबोर तेडिया, “अम ची लगड मेनेम जबाब यडा? ञेंलकुमू, नेकू अम तीमिन टेबोः रेकू दोस यडमिआँ?” 5लेकिन ईसु फेर कनर याःते मेनेय जबाब गडा; हेनाते पिलातुस अहचरज चुवेर यनियू।

पिलातुस ईसु मिरतू दंडिय ओवाडिया

(मत्ती 27:15-31; लूका 23:13-25; एहुन्‍ना 18:39—19:16)

6पिलातुस परब रे होड़कू जे-कू मनहें वआ, हेंय बंधवा हेंकू लगाडिय अड़ाः गोत्तेय दोहो एनु। 7बरअब्बा मेनते कू ञुमू तडिया हेनी, बलवाईयों#15:7 करकू घियाःकू हवे? कू सुदा जेहेल रेकू डलो तेडिया, हेंकू हुड़दंग कू मचो तेड रे होड़कू कू ञेंड गोजतेडा। 8अवुर भीड़ रेनकू होड़कू पिलातुस थरे कू कहनी तेडा कि जेयसे अम अले लगड मी करो अगियाडा, हेन घयतेम करोवे। 9हेना वरी पिलातुस होंबोर तेडकुआ, “एहूदिकू रेनिय राजांञ अड़ाः लगड अपे चहोः तना पे किदो मेने?” 10कहेकि बड बडे आजककू, हिसका तेकू एर पकड़ो तेडिया। हेना हेंय पपाड़ी दोहो एनु। 11लेकिन बड बडे आजककू अनाकू लगड, बरअब्बाय अड़ाः गोत्ते लगड होड़कू कू चड़हो बड़हो तेडा। 12नआँ टेबोः अँजोम केते पिलातुस फे-रिय होंबोर तेडकुआ, “नेय अपे एहूदिकू रेनिय राजा मेनते पे कहनी वया, हेंयिंञ चीया?” 13तहाँ हेंकू हल्ला एना, “मेय कुरूस रेम रकाबियू।” 14हेना वरी पिलातुस हेंकू थरेय कहनी तेडा, “ची लगाडू, नेय चीय गलती केडा?” लेकिन हेंकू अनावुर कू हल्ला एना, “मेय कुरूस रेम रकाबियू!” 15तहाँ पिलातुस भीड़ रेनकू होड़कू खुस लगड, बरअब्बा हेंकू लगाडिय अड़ाः तेडिया, अवुर ईसु कोड़ा ते एर ञेंडके डियते कुरूस रेकू रकाबिय लगड हेंकू थरेय जिमा तेडिया।

सिपाहिकू ईसु राः मजाक कू उड़ो तेडा

16सिपाहिकू ईसु गड़ही भीतर राच रेकू इदी तेडिया, हेना पीरिटोरियुन मेनते कू कहनी वआँ, अवुर सींड़ दल रेनकू सिपाही कुकू राःतेडा। 17हेना वरी हेंकू ईसु ला-ला कपड़ा कू तुसींञ वडियू, अवुर जनोम राः मुकुट बनो केते भोःतू रेकू दोहो तेडा। 18अवुर हेंकू नआँ घयते कहनी केतेकू जोहार वडिया, “ए एहूदिकू रेनिय राजा, जोहार!” 19अवुर डंटा ते भोःतू रेकू ञेंडेयू, अवुर कू बेजेयू, अवुर हेंय उकड़ुम कोःतेकू जोहार वयू। 20हेना वरी हेंकू हेंय कू मजाक पिटो केनते, हेंय वरी ला-ला कपड़ा कू तुलुज केते, अनानेज राः कपड़ा कू तुसींञ वडिया; हेना वरी हेंय कुरूस रे रकाबिय लगड बहेर हनतेकू गोःतेडिया।

ईसु कुरूस रेकू ठोको तेडिया

(मत्ती 27:32-44; लूका 23:26-39; एहुन्‍ना 19:17-19)

21 # रोमि 16:13 सिमोन मेनते कू ञुमू तडिय हेनी, मियाँहोड़ होड़ दोहो एना, नेय कुरेनी सहर रेनिय सिकन्दर अवुर रूफुस अपत दोहो एना। अवुर नेय गाँव वरिय मेजुः दोहो एनु, हेन तोलोग सिपाहिकू ईसु राः कुरूस गोः लगड कू सब चकड़ो तेडिया। 22हेंकू ईसु गुलगुथा मेनते कू ञुमू केडा हेना जघा रेकू इदी तेडिया, नआँ राः मतलोब हवे खोपड़ी राः जघा। 23हेना रे हेंकू बुबूल हेना जड़ी बुटी तेकू मेड़वा तआ, अंगूर रस ञुँय लगड कू ओवाडियू, लेकिन हेंय मेनेय ञूँगाडा। 24हेना वरी हेंकू ईसु कुरूस रेकू रकब तेडिया, अवुर हेंकू हेंय राः कपड़ा ईया अँगेरेआ मेनते चिट्ठी कू डलो तेडा, हेना वरी हेंकू आपस रेकू हटींग वन दोहो एनु। 25कुरूस रेकू रकब तेडिय तोलोग ञींदात हन नव बजो तना। 26अवुर हेंय भोःतू अगस हँडे “नेय एहूदिकू रेनिय राजा हवे” मेनते दोस पट्टी लिखो केतेकू ठोको तेडा। 27हेंकू ईसु सुदा बा होड़ चोरहा कींञ हो कुरूस रेकू रकब तेडकिञाँ, मियाँहोड़ जोम गतर हँडे, अवुर मियाँहोड़ कोंञ गतर हँडे। 28[तहाँ भगवान राः कागद रे न घयते लिखो केडा हेना टेबोः पूरा केना, हेंय कसूर केड हेंकू सुदा कू लेखा एड़वा तेडिया।] 29#मरकुस 14:58; एहुन्‍ना 2:19अवुर होर ते सेन बेड़ाः कुहो डडुब वयते अवुर ठट्ठा उड़ो केय तेकू कहनी वयू, “चिली ख! मँडिल धसगों केते, तीन दिन रे फेर बनोवेअयू! 30लेगे निहों कुरूस वरी अगड़ू कोःते अनाम मी बंचोवू।” 31नेन घयते बड बडे आजककू अवुर एहूदी नियम चेचेडकू हो, ठट्ठा कू उड़ो तेडिया अवुर कू कहनी तेडा, “नेय एटाः कुय बंचो तेडा, अनानेज मेनेय बंचो सकोः तना। 32नेय दो इसराएलिकू रेनिय राजा, मसीहा हवे, निहों कुरूस वरिय अगड़ुऊ, हेंडे मा ञेंलकेय तेबू बिसवासेआ।” अवुर हेंय सुदा कुरूस रेकू रकब तडकिञाँ हेंकींञ होकींञ निन्दाय दोहो एनु।

ईसु साँसिय अड़ाः तेडा

(मत्ती 27:45-56; लूका 23:44-49; एहुन्‍ना 19:28-30)

33बारह बजे वरी तीन बजे अँगम गोटा देस रे अंधरा यनु। 34तीन बजे ईसु बडे आवाज ते हाक केनतेय कहनी तेडा, “इलोय, इलोय लमा सबक्‍तनी?” नआँ राः मतलोब हवे, “ओ इंञाअय भगवान, इंञाअय भगवान अम ची लगड मी बगी वडिञाँ?” 35हेन बँदे रे चड़ाँ तनकू, हेंकू मेंडे रे कुछ होड़कू कहनियूँ, “अँजोमिय पे, नेय एलियाहिय गोहरो यडा।” 36अवुर मियाँहोड़ हुँको सेनकेन ते सिरका रे रूवाय बोथो तेडा, अवुर लाठी रे लगो केतेय एर चेपेज तेडिया, अवुरिय कहनी तेडा, “रहा, ञेंलेय बू, एलियाह नेय अगड़ुय लगाडिय मेजुआ किदो एरोआ?” 37तहाँ ईसु बडे आवाज ते हाक केनते साँसिय अड़ाः गोत्तेडू। 38अवुर मँडिल राः अखीर पवितर अस्थान रे लगो तडा, हेना परदा अगस वरी पेंदी अँगम माँजे माँज ते ओड़ेज केनते बार भंग यनु। 39दरोगा हेंय मड़ंग रेय चड़ाँ तना, अवुर हेंय असीडुः तोलोग ञेंलकेडिय ते न घयतेय कहनी तेडा, “सहिचो मेते नेय होड़, भगवान होपोन दोहो एना!” 40#लूका 8:2,3केय्यो झन कोड़िकू बीच वरी कू ञेंल एनेज दोहो एनु; हेंकू सुदा मगदलीनी रेनिय मरियोम, अवुर होडीञाँय एकूब अवुर जोसेस इंगत मरियोम अवुर सलोमी दोहो एना। 41ईसु गलील रेय दोहोएन तोलोग, नेकू हेंय तयोम तेकू से-ने दोहो एनु, अवुर हेंय कू मदेद वय दोहो एनु, अवुरोह कोड़िकू होकू दोहो एना, हेंकू हो हेंय सुदा एरुसलेम रेकू मेजताना।

ईसु मरघटी रेकू दोहो तेडिया

(मत्ती 27:57-61; लूका 23:50-56; एहुन्‍ना 19:38-42)

42हेना चेका तयारीः राः दिन दोहो एना, मतलोब सब्द राः दिन वरी मड़ाँगाः दिन#15:42 सुक चेका, हेना वरी बेर डुबो एना, 43तहाँ अरिमतिया रे दोहोनय उसुफ मेजेना, हेंय एहूदिकू राः बनाडेआ कोट कछेरी रेनिय आदरनिय सदस्य दोहो एना, अवुर हेंय खुद भगवान राः राज मेजुआ मेनतेय असरा तना। हेंय हियो केते पिलातुस थरेय सेनेना, अवुर ईसु राः लास अगड़ू केते जतानिय लगड आदेसिय असी तेडा। 44हेना वरी पिलातुस न मेन हली ते ईसु काःतेय गोजियना मेनतेय अहचरज यनु; तहाँ एक सव रोमि सिपाहिकू रेनिय मुखिया राःकेडिय तेय होंबोर तेडिया, “हेंय गोनोज यनाय किदो?” 45तहाँ हेंय सिपाहिकू रेनिय मुखिया सींड़ हालिय पपाड़ियन तहाँ, लास उसूफिय एर ओवाडा। 46तहाँ हेंकू मोलामा चादर कू तिला तेडा, अवुर लास अगड़ू केते हेना चादर तेकू गुरघेट तेडिया, अवुर मियाँटंग मरघटी चटाँड़ी रेकू खोदियार केतेकू बनो तडा, हेना रेकू दोहो तेडिया। अवुर दुवार तुरे मियाँटंग दिरी तेकू रेड अटु तेडा। 47मगदल रेनिय मरियोम अवुर जोसेस इंगत मरियोम करे कू दोहो यडिया मेना अकींञ ञेंल एनेज दोहो एनु।

Currently Selected:

मरकुस 15: ksz

Highlight

Copy