मरकुस 14

ईसु ञेंड लगड कू सलाह एना

(मत्ती 26:1-5; लूका 22:1-2; एहुन्‍ना 11:45-53)

1दूय दिन राः बाद रे पस्का अवुर अखमीरी रोटी जोम हेना तेवहार तयाः बंचो तना, अवुर बड बडे आजककू अवुर एहूदी नियम चेचेडकू काःते ईसु ले गोजेया मेनाआँ दाव कू जोहो दोहो एनु, 2लेकिन हेंकू कहनिय दोहो एनु, “परब तेवहार राः समय रे अलो, नहींतर होड़कू राः बीच रे अखीर ते हल्ला मचोआ।”

बयतिनयाह गाँव रे ईसु थरे सोओं सुनूमिय दुलतेडा

(मत्ती 26:6-13; एहुन्‍ना 12:1-8)

3 # लूका 7:37,38 जब ईसु बयतानियाह रे सिमोन कुड़गा तनय ओड़ाः रे जोमुः लगाडिय दुड़ूब तना, हेना वरी मियाँहोड़ कोड़ीहोन संगमरमर दिरी राः चुकाः ते असली जटामासी राः अखीर महंगा राः सेन्ठिय अगतेडा; अवुर चुकाः पोहाः केते ईसु भोः रेय दुलतेडा। 4लेकिन कुछ होड़कू अपन अपन मन रे खीस केनतेकू कहनी तेडा, “नआँ सेन्ठ ची लगाडिय दुल एंडा गोत्तेडा? 5कहेकि नआँ सेन्ठ तीन सव सिक्‍का#14:5 एक साल राः बनी वरी बगरा दाम ते केजा केते गरिबकू हटींग वडकू मेनू।” अवुर हेंकू कोड़ीहोन कू दबेट तेडिया। 6तहाँ ईसु कहनी तेडा, “नेय ची लगड पे सतो यडिया? बगी वयपे; नेय दो इंञ सुदा बढ़ियाँ कामिय काम केडा। 7कहेकि गरीब होड़कू अपे सुदा हरदम कू दोहोना; अवुर जबेह पे चहोऊ तबेह हेंकू सुदा बढ़ियाँ काम पे करो सकोआ, लेकिन इंञ अपे सुदा हमेसा एरोंञ दोहो एना। 8जे-ना नेय करो सको एना, हेनाय करो केडा, नेय इंञ लोसोडिंञ वरी मड़ंग ते इंञ देंह रे सेन्ठिय ओजाः तेडा। 9इंञ अपे थरे सही मेतेंञ कहनी यडा, गोटा दुनिया राः कनर जघा रे बढ़ियाँ खभेर कू लाया, हेना रे नआँ काम उहयार केतेकू लायेआ।”

एहूदा ईसुय एर पकड़ोआ

(मत्ती 26:14-16; लूका 22:3-6)

10तहाँ बारह झनकू दोहो एना, हेंकू मेंडे मियाँहोड़ एहूदा इस्करयोती, एर पकड़ोविय लगड बड बडे आजककू थरेय सेनेना। 11तहाँ हेंकू नआँ टेबोः अँजोम केतेकू खुसी एना, अवुर हेंय पेयसा ओवय लगड कू मंजूर तेडिया, अवुर हेंय कनार न कनार याःते एर पकड़ोविय लगड मोकाय छपा बेड़ा दोहो एनु।

ईसु चेला कुतय सुदा पस्का पराबिय मनो तेडा

(मत्ती 26:17-25; लूका 22:7-14,21-23; एहुन्‍ना 13:21-30)

12अवुर अखमीरी रोटी जो-मा परब राः दिन मेजेना, हेना पस्का रे पूजा कू एम दोहो एनु, तहाँ एक दिन राः मड़ंग ते चेला कुतय होंबोर तेडिया, “पस्का रे जो-मेआँ रोटी अम करेम चहोः तना? अले सेनकोःते अम लगड ले तयार हताड़ेआ?” 13हेना वरी हेंय अनेज रेनकू चेलाकू मेंडे बा होड़ न घयते कहनी केतेय कुलतेड किञाँ, “सहर रेबा सेनुऊ, अवुर मियाँहोड़ होड़ गगेर ते दाईय गोः तोलोग बा ञँमेया, हे-नी तयोम तेबा सेनुऊ, 14अवुर हेंय जे ओड़ाः रेय सेनुआ, हेना ओड़ाः मुँवर थरे बा कहनियूँ, ‘गुरू कहनी केडा, पोहनाकू दुड़ूब हेना जघा करेआ, हेना रे इंञ चेला कुतंञ सुदा पस्का राः रोटिंञ जो-मा’, 15हेंय अबा छत अगस रे सजो केडा कोठरिय तिःवा बआ, हें-डे अबू लगड बा तयार हताड़े।” 16तहाँ चेला कींञ हेना जघा वरी सहर कींञ सेनेना, अवुर जेयसे ईसु हेंकींञ थरेय कहनी तडा, हेन घयते कींञ ञँमतेडा, अवुर पस्का रे जो-मे लगड रोटी कींञ तयार तेडा। 17हेना वरी अयुब एना, तहाँ ईसु बारहो झन चेलाकू सुदाय सेनेना। 18तहाँ दुड़ूब केनतेकू जोमुः तोलोग ईसु कहनी तेडा, “इंञ अपे थरे सही मेतेंञ कहनी यडा, अपे मेंडे मियाँहोड़ इंञ सुदाय जोमुः तना, हें-नी एर पकड़ो विञाँ।” 19हेना वरी हेंकू मन उदास यनकू, अवुर मियाँड मियाँड होड़ तेकू कहनियूँ, “हेंय इंञ हवे किदो?” 20तहाँ हेंय कहनी तेडा, “अपे बारह झन वरी मियाँहोड़ हवे, हेंय इंञ सुदा मियाँ टंगाआ टठिया रेय जोमुः तना, 21कहेकि इंञ होड़ होपोन लगड दो, जे घयते ईञाः बिसेय ते लिखल इदाना, हेन घयते होनोयाआ, लेकिन जे होड़ एर सबेञाँ हेंय अखीर दुख रेय पड़ोआ। अगर हेंय होड़ अलोय जनम एन रेदो, हेंय लगड बढ़ियाँ दोहोएन मेनू।”

परभु भोज

(मत्ती 26:26-30; लूका 22:15-20; 1 कुरि 11:23-25)

22हेंकू जोनोमुः दोहो एनकू, हेना वरी हेंय रोटिय सबतेडा, अवुर भगवानिय धन्यावाद वडा, हेना वरी हेंकुय ओवाडा, अवुरिय कहनी तेडा, “ने, ना ईञाः देंह हवे।” 23हेना वरी फेरेच हेंय डुबहा सबके ते भगवानिय धन्यावाद वडा, हेना वरी हेंकुय ओवाडा; तहाँ हेना वरी हेंकू सींड़ कुकू ञुँतेडा। 24हेना वरी ईसु हेंकू थरेय कहनी तेडा, “ना ईञाः लोहू हवे, अवुर इंञ गोजुः हेना चलते ते भगवान अखीर होड़कू सुदा, नवाँः रिस्ताय जोरोआ। 25इंञ अपे थरे सही मेतेंञ कहनी यडा, अंगूर रस भगवान राः राज रे नवाँः अनायीनिंञ ञुँय मेन दिन, अब वरी एनेरोंञ ञुँतेडा।” 26हेना वरी हेंकू सिरिंग कू सीरिंग केड राः बाद रे जयतून बुरू रेकू सेनेना।

ईसु पतरस नहकारिया हेनय भविस्यवाड़ी तेडा

27तहाँ ईसु हेंकू थरेय कहनी तेडा, “अपे सींड़कू इंञ पे बगी वञाँ, कहेकि भगवान राः कागद रे लिखल इदाना; ‘इंञ चरवाह तुंञ ञें-डा, अवुर भेंड़िकू छितीर बितीरुआ कू।’ 28#मत्ती 28:16लेकिन इंञ जियो रिमुः राः बाद रे अपे वरी मड़ंग ते गलील रेंञ सेनुआ।” 29तहाँ पतरस कहनी तेडा, “भले सींड़ कुकू बगी वमी, लेकिन इंञ कभी एरोंञ बगी वडमिआँ।” 30हेना वरी ईसु कहनी वडियू, “इंञ अम थरे सही मेतेंञ कहनी यडा, तेनेसिंञ ञींद मुरगा कुकड़ूचुः कोःतेय दोहड़ोवे वरी मड़ंग ते, अम पेय एस मी नहकारिञाँ।” 31लेकिन हेंय अनावुर जिदहाय तेय कहनी तेडा, “अगर इंञ अम सुदा भलेंञ गोजुऊ, तबो लेहो अम एनेरोंञ नहकार तेड मिआँ।” नेन घयते सींड़ कुकू कहनी तेडा।

गतसमनी रे ईसु बिनती एना

(मत्ती 26:36-46; लूका 22:39-46)

32फेर हेंकू गतसमनी मेनते कू ञुमू केडा हेना जघा रेकू सेनेना। अवुर ईसु अनेज रेनकू चेलाकू थरेय कहनी तेडा, “इंञ बिनतीः मेन दिन ने-डेपे दुड़ूब कोऊ।” 33अवुर हेंय पतरस, एहुन्‍ना अवुर एकूब एडकू अनेज सुदाय गोःतेड कुआ; अवुर ईसु मन उदास केनते अखीरिय अलमलोः दोहो एनु। 34हेना वरी हेंय कहनी तेडा, “इंञ गोज बंचोः मेनमोट ते अखीरिंञ उदास यना; अपे ने-डेपे दोहोनू, अवुर जाग जाग तेपे दोहोनू।” 35तहाँ हेंय दमभर मड़ंग हँडेय सेनेना, अवुर ओतेत रे हबकुनी केनतेय बिनती एना, “अगर होयाः रेदो, न दुख राः बेला इंञ वरिम अड़ीयू।” 36अवुरिय कहनी तेडा, “ओ अपा, अम रे सींड़ होया सकोआ, नआँ दुख राः डुभा इंञ वरिम अड़ी गोत्ते, हेंडे रेहो इंञ चहोः तन घयते मेने, लेकिन जेयसे अम चहोः तना हेन घयते होयाऊ।” 37फेर हेंय गितीज तन ञेंलते, पतरस थरेय कहनी तेडा, “ए सिमोनू, अम गितीज तनामू, अपे मियाँ घड़ी हो जगल मेने पे दोहो सकोः तन किदो? 38जाग जाग तेपे दोहोनू अवुर बिनतीः महल रेपे दोहोनू ताकि अपे परिक्छा रे अलोपे पड़ोऊ। आत्मा दो तयार इदाना, लेकिन देंह कमजोर गिआ।” 39हेना वरी फे-रिय चलो यनु, अवुर पनाहिलाः सब्द ले तेय बिनती एना। 40तहाँ फेर हेंकू गितीज तन तोलोगिय मेज ञँमतेड कुआ, कहेकि हेंकू अखीर गितीज गिसन कू दोहो एनु; अवुर ची मेनते कू जबाब वया हेना मेने कू पपाड़ी दोहो एनु। 41हेना वरी तीसरा बार हो मेजकेन तेय कहनी वडकू, “अब वरी गितीज पे, अवुर लुड़ूः पे, इंञ होड़ होपोन पापी होड़कू थरेंञ एर पकड़ोआ, हेना समय निहों मेजियाना। 42रिमुःपे, नआँ वरी चलोः बू! ञेंल कू पे, इंञ एर सब हेनी ठाँविय मेजियाना।”

ईसु कू पकड़ो तेडा

(मत्ती 26:47-56; लूका 22:47-53; एहुन्‍ना 18:3-12)

43ईसु कनाहनिय दोहो एनु, तबले बारह झन मेंडे मियाँहोड़ एहूदा, अनेज सुदा तरवार अवुर लाठी सबकेते अखीर होड़कुय जवर इदी तेडा। नेकू बड बडे आजककू, अवुर एहूदी नियम चेचेडकू, अवुर सपायँड़कू कुलतेड कू दोहो एनु। 44हेंय पपकड़ोकू मड़ंग ते नआँय लाय वडकू दोहो एनु कि इंञ जेयिंञ चो-आ, हें-नी हवे, हेंय पकड़ो केय ते सावधानी तेपे गोगेयू। 45तहाँ एहूदा मेजेना, अवुर तुरेत्ते सेनकेनते ईसु थरेय कहनी तेडा, “ए गुरू!” अवुरिय चोः तेडिया। 46तहाँ हेंकू तुरेत्तेकू सब गोःतेडिया। 47लेकिन हेंय बँदेत रे मियाँहोड़ चेला तय चड़ाँ तना, हेनी अनेज राः तरवारिय उडूंग तेडा, अवुर सींड़कू वरी बडेअय आजक रेनिय नोकर तरवार तेय पूजा सोताडिय मेनाः दो, लुतूर तुय फंको गोत्तेडू। 48हेना वरी ईसु हेंकू थरेय कहनी तेडा, “अपे चोर पे अड़ींग वंञतन किदो? तरवार अवुर लाठी सबके तेपे मेजकेना। 49#लूका 19:47; 21:37इंञ रोज दिन मँडिल रे अपे सुदा दोहो केनते सिक्छांञ लाय वपे दोहो एनु, अवुर अपे मेने पे सबगाडिञाँ, नआँ भगवान राः कागद रे लिखो केडा टेबोः उतरोः लगड होया केना।” 50तहाँ सींड़ चेलाकू बगी वडिय तेकू ञींरियानु। 51बेगर कपड़ा तुसीञाँय मियाँहोड़ ढिंगवा चादर ते उयू केनते ईसु तयोम तेय ओतोंग दोहो एनु; अवुर हेंकू हेंय होकू सबतेडिया। 52लेकिन हेंय चादर बगी वते बेगर कपड़ा तेय ञींरेना।

महासभा रे ईसु

53हेना वरी ईसु बडेअय आजक थरे कू इदी तेडिया; अवुर सगोरकू बड बडे आजककू अवुर सपायँड़कू अवुर एहूदी नियम चेचेडकू, हेंय ओड़ाः रेकू जवार एना। 54पतरस ईसु तयोम तयोम ते बडेअय आजक राः भीतर राच अँगामिय सेनेना, अवुर पहरदारकू सुदा दुड़ूब केनते सेंगेल रेय जुरू तना। 55तहाँ बड बडे आजककू, अवुर गोटा दरबार रेनकू सगोरकू ईसु ञेंड गोज लगड हेंय राः बिसेय ते गोवाही एम कुकू ञँम बेड़ा तेडा। लेकिन कनाय मेने कू ञँमगाडा। 56कहेकि अखीर होड़कू हेंय राः बिरोध रे झूठ मुठ ते गोवाही कू एम दोहो एनु, लेकिन हेंकू राः गोवाही मेने मिलो गना। 57तहाँ कुछ होड़कू रिमकेन ते हेंय राः बिरोध रे नआँ घयते झूठ मुठ ते गोवाही कू एमतेडा। 58“अले मेय ‘होड़कू बनो केडा मँडिलिंञ धसगों वेआ, अवुर एनेटाः होड़कू बेगर बनोआ, हेना इंञ तीन दिन तेंञ बनो वेआ’#एहुन्‍ना 2:19 मेनतेय कहनिय तोलोग ले अँजोम केडिया।” 59नआँ रेहो हेंकू राः गोवाही मेने मिलो गना। 60तहाँ बडेअय आजक मँझर रे चड़ाँ केनते ईसुय होंबोर तेडा, “नेकू अमाः बारे ते ची मेनते गोवाही कू एमियाडा, अम कनर याःते मेनेम जबाब यडा?” 61लेकिन हेंय जपनो बगी यनु, अवुर कनर जबाब मेनेय मिड़ाः गडा। तहाँ बडेअय आजक हेंय फेरेचिय होंबोर तेडिया, “अम स्तुति वय लायिक भगवान होपोन मसीहा हवे किदो?” 62हेना वरी ईसु कहनी तेडा, “इंञ हें-नी हवे, अवुर अपे होड़ होपोन सक्‍तिदारय भगवान राः जोम गतर रेय दुड़ूब कोः तोलोग, अवुर अगस वरी लिंबीर सुदाय मेजुः तोलोग पे ञेंलेया।” 63तहाँ बडेअय आजक अनेज राः कपड़ाय ओड़ेज#14:63 भगवानिय निन्दा यडा मेनते धको केनतेय ओड़ेज तेडा केतेय कहनी तेडा, “निहों अबू अवुर गोवाही राः ची जरूरत इदाना? 64अपे भगवानिय निन्दा यडा हेना टेबोः पे अँजोम केडा। अपे ची मेनते पे पसींद यडा?” तहाँ हेंकू सींड़कू सजा ओवाय लगड कू कहनी तेडा, “नेय मिरतू दंड ञँमुः लायिक गिआयू।” 65तहाँ कोई कोई दोकू बेजेयू, अवुराःकू मेडतू कपड़ा तेकू तोल उकू तेडा, लगे कू ञेंडेयू अवुर कू कहनियू, “बेदे, भविस्यवाड़िय मी।” अवुर पहरदारकू सब केडिय तेकू ञेंड गोःतेडिया।

पतरस ईसुय नहकार तेडा

(मत्ती 26:69-75; लूका 22:56-62; एहुन्‍ना 18:15-18; 18:25-27)

66तहाँ पतरस पेंदी हँडे, राच रेय दोहोएन तोलोग बडेअय आजक रेनकू हरवाहिनकू मेंडे, मियाँहोड़ हेना रेय मेजेना, 67तहाँ पतरस जुरूतन तोलोगिय ञेंलकेडिय ते एक ढीठ तेय तको हँड़ी वडिया, अवुरिय कहनी तेडा, “अम होता नसरेत रेनिय ईसु सुदाम दोहो एना।” 68लेकिन पतरस हेंयिय नहकार तेडिया, अवुरिय कहनी तेडा, “इंञ मेनेंञ पपाड़िआ अवुर ची मेनतेम कहनी यडा हेना मेनेंञ जेर यडा” अवुर हेंय बहेर हँडाः भिटका रेय सेनेना, तहाँ पहील मुरगा कुकड़ुचुः एना। 69हेना वरी हरवाहिन फे-रिय ञेंल ञँमतेडिया, तहाँ हेना रे चड़ाँ तनकू थरेय कहनी तेडा, “नेय हेंकू मेंडे रे मियाँहोड़ हवे।” 70लेकिन पतरस फे-रिय नहकार तेडिया। तहाँ मियाँ घड़ी रे हेना रे चड़ाँ तनकू पतरस थरे कू कहनी तेडा, “अम अलोम हेवेजवा, कहेकि अम गलील रेनिय हवे।” 71तहाँ हेंय अनानेजिय सराप तेडा अवुरिय कीरियाऊ, “अपे जे राः बारे तेपे टेबोः तना, हेंय इंञ पपाड़ित घलि मेनेंञ पपाड़िआ।” 72तहाँ तुरेत्ते मुरगा कुकड़ूचुःईय दोहड़ो तेडा। हेना वरी पतरस ईसु कहनी वडिया, हेना टेबोईय उहयार तेडा, “मुरगा बार एसिय दोहड़ोवे वरी मड़ंग ते अम पेय एस मी नहकारिञाँ।” अवुर हेंय नआँ टेबोः उहयार केते एनेक धँधेहिय ईयाम एना।

Currently Selected:

मरकुस 14: ksz

Highlight

Copy