लूका 16

चतुरय बराहील

1हेना वरी हेंय चेलाकू थरेय कहनी तेडा, “मियाँहोड़ धनमान, अन धन देख रेख लगड मियाँटंग बराहीलिय रखो तेडा। हेंय बराहील राः बारे ते होड़कू अन धन तमिय उड़ो यडा मेनते हेंय धनमानकू लाय वडा। 2तहाँ धनमान बराहीलिय राःकेडिय तेय होंबोर तेडिया, ‘नआँ ची घियाः टेबोः हवे, इंञ अमाः बारे तेंञ अँजोम यडा? अमाः सींड़ काम राः हिसाब किताब मी ओवाञूँ, कहेकि अम इंञ थरे बराहील एरोम दोहो सको एना।’ 3हेना वरी बराहील पसींद तेडा, ‘अब इंञ चिंञ बनोआँ? मालिकींञ बराहील काम वरी होय उडूंग यडिञाँ। हास पोड़ाः लगड जँगाड़िंञ हो कोवाआ, अवुर असी जोमुः होंञ गेवुआ। 4इंञ जेर गोत्तेडंञू, इंञ चिंञ बनोआ, इंञ बराहील कमींञ बगीवा रेदो, होड़कू इंञ अपन ओड़ाः तेकू इदिञाँ कनारा जोमे लगड दोकू ओनोवाञाँ।’

5तहाँ हेंय अनेज मालिक थरे कू करजा तन हेंकू मियाँड होंड़ मियाँड होंड़ तेय राःकेड कुते मड़ाँगायिय होंबोर तेडा, ‘अम थरे मालिक राः करजा तीमिन इदाना?’ 6तहाँ हेंय कहनी तेडा, ‘सव मन सुनूम,’ तहाँ बराहील हेंय थरेय कहनी तेडा, ‘दुड़ूब कोःते अमाः परची रे तुरेत्ते पचास मेनतेम लिखो गोत्ते।’ 7हेना वरी एटागिय होंबोर तेडा, ‘अम थरे तीमिन करजा इदाना?’ हेंय कहनी तेडा, ‘सव बोरा गोहोम,’ तहाँ बराहील हेंय थरे होय कहनी तेडा, ‘अमाः परची रे तुरेत्ते अस्सी बोरा गिआ मेनतेम लिखो गोत्ते’।”

8“मालिक हेंय जलकट होड़ चलाकी तेय काम केडा मेनाअतेय बडेय वडिया। कहेकि नआँ दुनिया रेनकू अपन काम वरी निपटोः लगड भगवान रेनकू होड़कू वरी हो अखीर कू चतुरा। 9इंञ अपे थरेंञ कहनी यडा, नआँ दुनिया राः अन धन ते, होड़कू पे मदेद वते हेंकू अपन गति पे बनो कू। नआँ धन हनीः रे सरग रे अपे खुसी तेकू मान मरजाद पेआ। 10कनय हो दमभराआ टेबोः रे ईमानदारिय दोहोन रेदो, हेंय बडेआ टेबोः रेहो ईमानदारिय दोहोना। अवुर कनय हो दमभराआ टेबोः रेय ठकलबराः रेदो, हेंय बडेआ टेबोः रेहोय ठकलबराआ। 11हेनाते अपे दुनिया राः धन सम्पत्ति रे मेने ईमानदार पे दोहो गना, दो सरग राः धन सम्पत्ति अपे ईया जिमा वपेआ? 12अवुर अपे एटाःकू राः धन सम्पत्ति रे ईमानदार मेने पे दोहो गना, दो अपे लगड सरग रे इदान हेना ईया ओवा पेआ?”

13 # मत्ती 6:24 “कनय हरवाह बा होड़ गिरहत कींञ राः काम एरोय करो सको एना। कहेकि हेंय मियाँहोड़ सुदा मया मिलन तेय दोहोना, अवुर मियाँहोड़ एरोय बेस वडिया। अपे भगवान अवुर धन मियाँ मियाँ ते एरो पे सेवा सको एना।”

ईसु राः कुछ सिक्छा

(मत्ती 11:12-13; 5:31,32; मरकुस 10:11,12)

14हेना वरी लोभिया फरीसिकू नआँ टेबोः अँजोम केते ईसु राः ठट्ठा कू उड़ो तेडा। 15तहाँ ईसु हेंकू थरेय कहनी तेडा, “अपे होड़कू मड़ंग रे अपन आप धरमी पे ठहरोआ। लेकिन भगवान अपे राः मन राः टेबोः घलिय पपाड़िआ। नआँ दुनिया रेनकू होड़कू अखीर किमती गिआ मेनते कू पसींदेआ, हेना भगवान राः नँजेर रे बढ़ियाँ कोवाआ।

16 # मत्ती 11:12,13 मूसा रआ नियम अवुर भविस्यवक्‍ताकू एहुन्‍ना अँगम दोहो एना। हेन वरी भगवान राः राज राः बढ़ियाँः खभेर कू लाय यडा, सींड़कू हेनाते से-ने लगड कू कोसिस यडा। 17#मत्ती 5:18अगस अवुर ओतेत मेटियोः सेथिया गिआ, लेकिन भगवान राः टेबोः तेनेमेन होडिञाँ कनर चेका एरो मेटियो एना।

18 # मत्ती 5:32; 1 कुरि 7:10,11 अवुर कनय होड़ अपन कोड़ीहोन बगी वते एटागी कोड़ीहोनिय असुल रेदो, हेंय लंदफँदुः तनायू अवुर कनय बगिवयाय कोड़ीहोनिय असुल रेदो, हेंय हो लंद फाँदुः तनायू।”

धनी होड़ अवुर लाजर राः उदाहरड़

19“मियाँहोड़ अखीर धनमानिय दोहो एना, हेंय बेजनी अवुर मलमल कपड़ाय तुसींञ दोहो एनु। अवुर रोज दिन मान मनिसाय जोम लिंबड़ दोहो एनु, अवुर मवोज मस्ति तेय दोहोन दोहो एनु। 20हे-नी दुवर रे मियाँहोड़ लाजर मेनते कू ञुमू तडिया, हेंय घाव तेय खलखँदर तना हेनी धनमान होड़ दुवर रेय दोहोन दोहो एनु। 21धनमान होड़ थआ सीथ चिली तेय जोम कयासुः लगाडिय तरसोः दोहो एनु; अवुर कुतूकू हो हेंय घवतन हेना कू जड़ाः दोहो एनु।

22एक दिन राः दिन रे गरीब होड़ गोजेना, अवुर सरगदूतकू हेंय अबराहम दोहो एना, हेना जघा रेकू इदी तेडिया। हेंय धनी होड़ होय गोजेना, अवुर कू हरतेडिया। 23अवुर नरक रे हेंय अखीर हहस तेय तड़पोः दोहो एनु। हेन तोलोग सगींञ रे अबराहामिय ञेंल ञँमतेडा। अवुर अबराहम बँदेर रे लाजर होय ञेंल ञँमतेडिया। 24तहाँ हेंय हाक एना, ‘ओ अपा, अबराहम इंञ थरे दयाः मी, अवुर लाजर अंगरित लोहा केते अलाँगिंञ रे दाः ते जोरो कयासींञ लगड मी कुल गोत्तेयू। कहेकि इंञ नआँ सेंगेल रेंञ तड़पोः तना।’ 25हेन तोलोग अबराहम कहनी तेडा, ‘ओ बाबू उहयारेमू, अम अपन जिनगी रे सुखे सुख रेम दोहो एना, अवुर हेना तोलोग लाजर अखीर दुख रेय दोहो एना। नेय नआँ रे सान्ति तेया अवुर अम बिपेत रेमा। 26नआँ दुख छोड़ अलिंञ अवुर अम मँझर रे अखीर बडेआ मियाँटंग गहीरा डोड्हा इदाना, हेनाते कनय हो नआँ वरी अम हन सेन गिसन कू रेदो, एरो कू सेन सको एना, न मेना वरी अलिंञ थरे कू मेज सकोआ।’ 27तहाँ धनमान कहनी तेडा, ‘हेंडे दो ओ अपा, अम थरेंञ अरजीः तना, अम मेय इंञ अपुंञ ओड़ाः हनतेम कुल गोत्तेयू। 28कहेकि पाँच झन मगंञ एडकू इदाना। हेंकू थरे सेनकोःते लाजर नआँ टेबोईय चेतवन कू, ताकि हेंकू दुख सहोः हेना जघा रे अलोकू मेजुऊ।’ 29हेना वरी अबराहम धनमान थरेय कहनी तेडा, ‘हेंकू थरे मूसा अवुर भविस्यवक्‍ताकू राः कागद इदाना, हेंकू हेनकू राःकू अँजोमा।’ 30तहाँ धनमान कहनी तेडा, ‘कोवानू, अपा अबराहम, अगर कनय मियाँहोड़ गोजकोः वरी जियो कोःते हेंकू थरेय सेनुः रेदो, हेंकू मन कू मिड़ाआ।’ 31फेर अबराहम हेंयिय कहनी वडा, ‘जब हेंकू मूसा अवुर भविस्यवक्‍ताकू राः मेने कू अँजोम यडा, दो गोजकोः वरी जियो रिमकोःकू राः हो एरो कू अँजोम तेडा’।”

Currently Selected:

लूका 16: ksz

Highlight

Copy