एहुन्‍ना 20

ईसु जियो रिमेनायू

(मत्ती 28:1-8; मरकुस 16:1-8; लूका 24:1-12)

1हपता राः सुरू दिन एतवार चेका मगदल गाँव रेनिय मरियोम झूमुर झूमुर ञींदाते मरघटी रेय सेनेना। अवुर हेंय मरघटी दुवर राः दिरी अड़ी तन हेनाय ञेंल ञँमतेडा। 2तहाँ हेंय हुंको सेनकेन ते सिमोन पतरस अवुर ईसु अखीरिय परेमिय दोहो एनु, हेंय चेला थरेय लाय तेडा, “मरघटी वरी परभु कू उडूंग गोःयाडिया, अवुर करे कू दोहो केडिया अले मेने ले पपाड़िआ।”

3तहाँ पतरस अवुर हेंय एटागी चेला उडूंग केनते मरघटी हनते कींञ सेनेना। 4हेंकींञ मियाँ तेकींञ हुंकोः दोहो एनु। लेकिन हेंय एटागी चेला पतरासिय तयोम अटुडू, अवुर हेंय मरघटी रे मड़ंग तेय तयाः तेडा। 5अवुर कुबूंग केनतेय कोटे तेड दो मोलामा कफन भरिय ञेंल ञँमतेडा। लेकिन हेंय भीतर मेनेय बोलो गना। 6तहाँ हेंय तयोम ते सिमोन पतरस तयाः तेडा अवुर हेंय मरघटी भीतारिय बोलो एना। अवुर कफन दोहो एना, हेना भरिय ञेंलवाडा। 7अवुर हेंय भोःतू रेकू गुरघेट तडा, हेना चिथरा कफन वरी दो एटाः हँडे गुटमुटड़ी केते दोहो तडा, हेना होय ञेंलवाडा। 8तहाँ मरघटी मड़ंग तेय तयाः मड़ंग तेड हेनी एटागी चेला हो भीतरिय बोलो एना। अवुर हेंय ञेंलके तेय बिसवास तेडा। 9अवुर हेंकींञ भगवान राः कागद रे, “हेंय गोजकेनकू मेंडे रेय जियो रिमुआँ” मेनते लिखो केन हेना, नीमित मेनते मेने कींञ जेर गडा। 10तहाँ नेकींञ चेला कींञ ओड़ाः हनते कींञ मिड़ाः चलो यनु।

ईसु मगदलीनी रेनिय मरियोम थरेय देखर एना

(मरकुस 16:9-11)

11लेकिन मरियोम मनारघटी बँदे रे बहेर हँडे चड़ाँ केनतेय ईयाम दोहो एनु। अवुर हेंय ईनियाम तींग ते मरघटी भीतर हन कुबूंग केनतेय कोटे तेड दो, 12लास कू दोहो तड हेनारे बाटंग सरगदूत कींञ पुँडी पुँडिआ कपड़ा तुसींञ तडकीञिंय ञेंलवाडा। मियाँहोड़ भोःतू गतर रेय दुड़ूब तना, मियाँहोड़ कटत गतर रे।

13हेना वरी हेंकींञ हेंय कींञ होंबोर तेडा, “ए बेहिन, अम चीम ईया वताना?” हेना वरी हेंय हेंकींञ थरेय कहनी तेडा, “ईञाअय परभु कू रिम गोःयाडिया, अवुर इंञ मेनेंञ पपाड़ी तना हेंय करे कू दोहो केडिया।” 14नआँ कहनी केड राः बाद रे तयोम हनिय तेरेज तेडा, अवुर चड़ाँ तन तोलोग ईसुय ञेंल ञँमतेडा। लेकिन ईसु हवे मेनाआँ मेनेय चिन्हों सको गना। 15हेना वरी ईसु हेंय थरेय कहनी तेडा, “ए बेहिन, अम चीम ईया वताना? ईयाम छपा यडा?” हेंय बगेयचा देख रेखायिय अड़ींग वते हेंय थरेय कहनी तेडा, “ए मालिक, अम रिम गोःकेडिय रेदो लाय वंञ मी, करेम दोहो केडिया? अवुर इंञ हेंयिंञ गोगेया।” 16हेना वरी ईसु हेंय थरेय कहनी तेडा, “मरियोम!” हेना वरी हेंय तयोम हनते मुँहियों केनते हेंय इबरानी भासा तेय कहनी तेडा, “रब्बूनी!” मतलोब “ए गुरू।” 17हेना वरी ईसु हेंय थरेय कहनी तेडा, “इंञ अलोम सब बगिताञूँ, कहेकि इंञ निहों मेनते अपुंञ थरे अगस हनते बेगारिंञ से-ना, लेकिन ईञाःकू भाईकू थरे सेनकोः तेम लाय वकू कि इंञ अपुंञ अवुर अपे अपापे, अवुर ईञाअय भगवान अवुर अपे रेनिय भगवान हनते अगस हनतेंञ चलोः तना।” 18हेना वरी मगदल गाँव रेनिय मरियोम सेनकेनते चेला कुय लाय वडा, “इंञ परभुंञ ञेंलवाडा” अवुर ईसु जे-नाय हेंय थरेय कहनी तेडा, हेना चेला कुय लाय वडा।

ईसु चेलाकू थरेय देखर एना

(मत्ती 28:16-20; मरकुस 16:14-18; लूका 24:36-49)

19हेना चेका हपता राः सुरू दिन दोहो एना। हेना चेका सिंगड़ जुवर चेलाकू मियाँ रेकू जवर तना। अवुर हेंकू एहूदिकू रेनकू मुखियाकू राः बोर ते दुवार कू सिंञताडा। तहाँ हेन तोलोग ईसु मेजेना, अवुर हेंकू मँझर रेय चड़ाँ केनते हेंकू थरेय कहनी तेडा, “अपे सींड़कू जोहार#20:19 मूल भासा ते सांति मेनतेआ।।” 20अवुर हेंय नेन याःते कहनी केते तीत अवुर पँजर तुय तिःवड कुआ। तहाँ चेलाकू परभु ञेंलके तेकू खुसी एना। 21हेना वरी ईसु फेरेचिय कहनी तेडा, “अपे सींड़कू जोहार#20:21 मूल भासा ते सांति मेनतेआ; जेयसे अपुंञ ईञिय कुलकेडा, हेन घयते इंञ अपे होंञ कुलियाड पेआ।” 22नेन याःते कहनी केते हेंकुय ओंगतेड कुआ, अवुर हेंकू थरेय कहनी तेडा, “पवितर आत्मा पे अँगेर जोमू। 23#मत्ती 16:19; 18:18जे राः पाप अपे माफेआ, हेंकू राः पाप भगवान होय माफेआ, अवुर जे राः पाप अपे मेने पे माफेआ, हेंकू राः पाप भगवान हो एरोय माफ तेडा।”

ईसु थोमा थरेय देखर एना

24लेकिन बारह झन चेलाकू मेंडे रे मियाँहोड़ थोमा, नेय दिदमुस मेनते होकू कहनी वया, नेय ईसु मेजेन तोलोग हेंकू सुदा मेनेय दोहो गना। 25एटाःकू चेलाकू हेंय थरे कू कहनिय दोहो एनु, “अले परभु ले ञेंलकेडा,” हेना वरी हेंय हेंकू थरेय कहनी तेडा, “तीत राः कीला छेदा ञेंल बिगर अवुर कीला छेदा रे अंगरिंञ कसो केते अवुर पँजर तुरे तींञ कसो बिगर इंञ एरोंञ बिसवास तेडा।”

26हेना वरी आठ दिन राः बाद रे चेला कुतय फेर ओड़ाः भीतर रेकू दोहो एना, अवुर थोमा हो हेंकू सुदाय दोहो एना; अवुर दुवार कू सिंञताडा, हेंडे रेहो ईसु फे-रिय मेजेना, अवुर हेंकू मँझर रे चड़ाँ केनतेय कहनी तेडा, “अपे सींड़कू जोहार#20:26 मूल भासा ते सांति मेनतेआ।”

27तहाँ ईसु थोमा थरेय कहनी तेडा, “इंञ ती रे अंगरिम कसो केतेम ञें-ले, अवुर पँजारिंञ छेदा होम छुवों केतेम ञें-ले, अवुर अलोम संखायू, बल्कि बिसवासेमू।” 28नआँ अँजोम केते थोमा कहनी तेडा, “ओ ईञाअय परभु, ओ ईञाअय भगवान!”

29हेना वरी ईसु हेंय थरेय कहनी तेडा, “अम ञेंलके डिञाँमू, हेनातेम बिसवास केडा, लेकिन बेगर ञेंलते बिसवासेः हेंकू आसीस कू ञाँमा।”

नआँ कागद राः उद्देस्य

30ईसु केय्यो गोटंग चमत्कार काम चेला कुतय मड़ंग रेय काम तेडा, हेना नआँ पोथी रे बेगर लिखोआ। 31लेकिन अपे, ईनिसु भगवान होपोन, मसीहा हवे मेनते पे बिसवासे लगड अवुर बिसवास केते हेंय ञुमू ते जीवन पे ञँम लगड नआँ कू लिखो केडा।

Currently Selected:

एहुन्‍ना 20: ksz

Highlight

Copy