एहुन्‍ना 18

ईसु कू पकड़ो तेडा

(मत्ती 26:47-56; मरकुस 14:43-50; लूका 22:47-53)

1ईसु बिनती पिटो केन राः बाद रे अनेज रेनकू चेलाकू सुदा किदरोन सोती खँडा केनते जयतुन काठ राः बगेयचा दोहो एना, हेना रेय सेनेना।

2अवुर ईसु एर पकड़ो अय एहूदा हो हेना जघाय पपाड़ी दोहो एनु, कहेकि ईसु अनेज रेनकू चेलाकू सुदा हेना रेय सेनुः दोहो एनु। 3तहाँ एहूदा गोटाचार रोमि सिपाहिकू, अवुर बड बडे आजककू अवुर फरीसिकू कुलतेड कुः हेंकू मँडिल पहराकू, हेना रेय इदी तेडकुआ। अवुर हेंकू बती अवुर मुरी अवुर हथियार सबके तेकू सेनेना।

4ईसु अनेज सुदा ची ची होयाआ मेनाअय पपाड़ी केनते मड़ंग हनतेय तोरा एना, अवुरिय होंबोर तेडकुआ,

“अपे ईया पे छपा यडा?”

5हेना वरी हेंकू जबाब वडियू,

“नसरेत रेनिय ईसु।” तहाँ ईसु हेंकू थरेय कहनी तेडा, “हेंय इंञ हवे।” अवुर हेना रे एर ससाबय एहूदा हो हेंकू सुदाय चड़ाँ तना। 6ईसु हेंकू थरे “हेंय इंञ हवे” मेनतेय कहनी तेड तहाँ, हेंकू होड़कू ओतेत रेकू चिगी चिटाः यनु।

7तहाँ ईसु फे-रिय होंबोर तेडकुआ,

“अपे ईया पे छपा यडा?”

हेना वरी हेंकू कहनी तेडा,

“नसरेत रेनिय ईसु।”

8हेना वरी ईसु जबाब वडकू, “इंञ अपे थरेंञ कहनी केडामा हेंय इंञ हवे मेनते, अगर अपे इंञ पे छपा यड रेदो, नेकू होड़कू इका वकू पे।” 9नआँ, ईसु मड़ंग ते ना याःतेय कहनी तडा टेबोः पूरा होयाः लगड ना घयते होया एना, “जे जे इंञ मी ओवाडा, हेंकू मेंडे मियाँहोड़ हो मेनेंञ इकम गँवों गडकुआ।”#एहुन्‍ना 6:39; 17:12 10तहाँ सिमोन पतरस अनेज थरे दोहो एना, तरवार ओर उडूंग केते सींड़ वरी बडेअय आजक रेनिय नोकर लुतूर जोम गतारिय फंको गोत्तेडू। हेंय नोकर ञुमू मलखुस मेनते दोहो एना। 11#मत्ती 26:39; मरकुस 14:36; लूका 22:42हेना वरी ईसु पतरस थरेय कहनी तेडा, “तरवार तम कठी#18:11 तरवार दोहो कू कठी वआ। रेम दोहोता। भगवान राः मन इदाना कि इंञ नआँ दुख ते खँडाः जरूरी इदाना, इंञ नआँ दुख अलोंञ सहोवे किदो?”

ईसु हन्‍ना थरे कू इदी तेडिया

(मत्ती 26:57-58; मरकुस 14:53-54; लूका 22:54)

12हेना वरी रोमि सिपाहिकू अवुर हेंकू रेनिय मुखिया अवुर एहूदिकू राः मँडिल पहराः हेंकू सिपाहिकू, ईसु सब केडिय तेकू तोलतेडिया। 13अवुर हेंकू मड़ंग ते हेंय कयफा होंञहर हन्‍ना थरे कू इदी तेडिया, हेना साल कयफा सींड़कू वरी बडेअय आजक दोहो एना। 14#एहुन्‍ना 11:49,50नेय हें-नी कयफा#एहुन्‍ना 11:49-50 दोहो एना, नेय एहूदिकू रेनकू मुखिया कुय लाय हटींग वड दोहो एनु कि अगर मियाँहोड़ होड़ सींड़ होड़कू लगाडिय गोजेन रेदो बढ़ियाँ दोहोएन मे-नू मेनते।

पतरस ईसुय नहकार तेडा

(मत्ती 26:69-70; मरकुस 14:66-68; लूका 22:55-57)

15सिमोन पतरस सुदा मियाँहोड़ एटागी चेला हो ईसु तयोम तेकींञ सेनेना। नेय एटागी चेला सींड़कू वरी बडेअय आजक सुदा कींञ थितो ओड़ेंग तना, हेनाते हेंय ईसु सुदा सींड़कू वरी बडेअय आजक राः भीतर राच अँगामिय सेनेना, 16लेकिन पतरस दुवर वरी बहेर हँडेय चड़ाँ तना, तहाँ सींड़कू वरी बडेअय आजक सुदा कींञ थितो ओड़ेंग तनाय चेला, बहेर हन सेनकेनते, दुवर रेय पपाहराअय कोड़ीहोन थरे लाय केते भीतर हनतेय इदी तेडिया। 17हेना वरी मियाँहोड़ हरवाहिन दुवार पपाहराअय कोड़ीहोन पतरासिय होंबोर तेडा, “अम हो मेय रेनकू चेलाकू मधे हवे किदो?” तहाँ हेंय कहनी तेडा, “इंञ न लगे।” 18तहाँ हरवाहकू अवुर मँडिल पहराकू लेयेड़ ते कोयला कुडा केतेकू जुरू तना, अवुर पतरस हो हेनकू सुदाय जुरू तना।

सींड़कू वरी बडेअय आजक ईसु खोदी नेदी तेय होंबोर तेडिया

(मत्ती 26:59-66; मरकुस 14:55-64; लूका 22:66-71)

19हेना वरी बडेअय आजक ईसु चेलाकू राः बारे ते अवुर ची चीय चेडयड कुआ मेनाः बारे ते खोदी नेदी तेय होंबोर तेडिया। 20तहाँ ईसु जबाब तेडा, “इंञ होड़कू थरे फरी फरी तेंञ टेबोः केडा, सगोर एहूदिकू जवारुःआ, हेना आराधना ओड़ाः ते अवुर मँडिल रे, हमेसांञ चेडतेड कुआ अवुर कनर टेबोः उकू केते बेगारिंञ कहनिआँ। 21अम ची लगड मी होंबोर यडिञाँ? इंञ ची चिंञ कहनी केडा, हेना अअँजोम कुम होंबोरू, हेंकू हेना कू पपाड़िआ?” 22नआँ अँजोम केते बँदेत रेय चड़ाँ तना, मियाँहोड़ मँडिल पपाहराअय ईसु पाड़ो केडिय तेय कहनी वडिया, “बडेअय आजक घली मेनेम बोरो वयतन ते न घतेम जबाब वयताना।” 23हेना वरी ईसु हेंयिय कहनी वडा, “ची बेजय टेबोईंञ टेबोः केडा, बेजय टेबोईंञ टेबोः केड रेदो लाय वंञ मी; अवुर सहिंञ टेबोः केड रेदो ची लगड मी ञेंडियाडिञाँ?” 24तहाँ हन्‍ना, ईसु ती एर तोलकेते, बडेअय आजक कयफा थरेय कुलतेडिया।

पतरस फेर ईसुय नहकार तेडा

(मत्ती 26:71-75; मरकुस 14:69-72; लूका 22:58-62)

25सिमोन पतरस हेना रे चड़ाँ केनतेय जुरू तना। तहाँ अनेज सुदा जुरूतन हेंकू होंबोर तेडिया, “अम हो ईसु रेनकू चेलाकू गति हवे किदो?” हेना वरी हेंय नहकार केतेय कहनी तेडा, “इंञ न लगे।” 26तहाँ बडेअय आजक रेनकू हरवाहकू मेंडे, हेना रे मियाँहोड़ दोहो एना। पतरस लुतूर तुय फंको तेडा, हेनी होड़ रेनिय हित नात दोहो एना। हें-नी पतरस थरेय कहनी तेडा, “अम बगेयचा रे ईसु सुदाम दोहोएन तोलोगिंञ ञेंलवड मिआँ।” 27हेना वरी पतरस फे-रिय नहकार तेडा, अवुर तुरेत्ते मुरगा कुकड़ूचुः #18:27 करीब करीब तीन बजे वरी पाँच बजे अँगम एना।

पिलातुस मड़ंग रे ईसु

(मत्ती 27:1-2; 11—14; मरकुस 15:1-5; लूका 23:1-5)

28तहाँ ईसु कयफा ओड़ाः वरी मियाँहोड़ अधिकारी पिलातुस गड़ही#18:28 रोमि सरकार रेनिय बडेअय अधिकारी दोहोन हेना गड़ही रेकू इदी तेडिया, अवुर हेना तोलोग अँगाः दोहो एना, एहूदिकू, राजा गड़ही रे बोल तहाँ ले असुद्धुआ#18:28 गयेर एहूदिकू ओड़ाः रे बोल तहाँ असुद्ध जोमा मेनते नेकू राः नियम रे दोहो एना अवुर पस्का परब राः खाय पिय रे एरो ले एड़वा एना मेनते, मेने कू बोलो गना। 29हेना वरी पिलातुस बहेरिय उडूंग एना, अवुरिय होंबोर तेडकुआ, “नेय होड़ अपे ची टेबोः रेपे दोस यडिया?” 30तहाँ हेंकू जबाब तेडा, “अगर नेय होड़ कनर बेगारिय गलती रेदो, अम ती रे एरो ले जिमा तेडिय मेनू।” 31हेना वरी पिलातुस हेंकू थरेय कहनी तेडा, “नेय इदी केय ते अनापे राः नियम राः अनुसार ते नेय राः पे न्याये।” तहाँ एहूदिकू रेनकू अधिकारी कहनी तेडा, “अले कनय हो एर ञेंड गोजकू लगड हँक कोवाआ।” 32#एहुन्‍ना 3:14; 12:32नआँ ईसु पहील तेय कहनी तडा टेबोः पूरा होयाः लगड ना घयते होया एना। हेंय इंञ करेःतेंञ गोजुआ#18:32 ईसु करेःते कुरूस रेंञ गोजुआ मेनाआ टेबोः मड़ंग तेय लाय तडा हेनेन घयते होया एना। मेनतेय कहनी अगुय दोहो एनु।

33तहाँ पिलातुस गड़ही भीतारिय बोलो एना, अवुर ईसु राःकेडिय तेय होंबोर तेडिया, “अम एहूदिकू रेनिय राजा हवे किदो?” 34हेना वरी ईसु जबाब तेडा, “नआँ टेबोः अपन मन तेम कहनी यडा किदो, ईञाः बारे ते एटाःकू लाय वडमिआँ, हेना अँजोम केतेम कहनी यडा?” 35तहाँ पिलातुस कहनी तेडा, “अम एहूदी मेनतेम अड़ींग वंञतन किदो? अनामाःकू जात सगाकू अवुर बड बडे आजककू अम चीम गलती केडा ते, हेंकू इंञ ती रेकू जिमा केडमिआँ?” 36हेना वरी ईसु जबाब तेडा, “ईञाः राज नआँ दुनिया राः न लगे। अगर ईञाः राज नआँ दुनिया राः राज दोहोएन रेदो, ईंञाःकू सेवेखियाकू एहूदिकू रेनकू मुखियाकू राः ती वरी बंचोविंञ लगड कू लड़ाई एन मेनू, लेकिन ईञाः राज न राः न लगे।” 37तहाँ पिलातुस हेंयिय होंबोर तेडा, “हेंडे दो अम राजा हवे किदो?” हेना वरी ईसु जबाब वडिया, “अम सही मेतेम कहनी यडा, इंञ राजा हवे मेनते। इंञ नेन लगाडिंञ जनम एना, अवुर न दुनिया रे होड़कू भगवान राः सत लाय वकू लगाडिंञ मेजकेना। कनय हो सत कू मनोआँ, हेंकू ईञाः टेबोः कू चे-डेआ।” 38हेना वरी पिलातुस, “सत ची हवे,” मेनते होंबोर केडिय ते फेर बहेर हनतेय उडूंग एना। अवुर एहूदिकू रेनकू मुखियाकू थरे सेनकेन तेय कहनी तेडा, “इंञ नेय थरे कनर सजा ओवाय घियाआ गलती बेगारिंञ ञाँमा।”

पिलातुस मिरतू दंड ओवाय लगाडिय हुकूम तेडा

39हेना वरी पिलातुस फे-रिय कहनी तेडा, “अपे राः न घयते रिवाज इदाना कि पस्का परब रे कनय अपे लगड मियाँहोड़ बंधवंञ अड़ाः गोडवा मेनते। अगर अपे चहोः तन रेदो इंञ नेय, ‘एहूदिकू रेनिय राजा,’ अपे लगाडिंञ अड़ाः गोत्तेया?” 40तहाँ हेंकू हल्ला केनतेकू कहनी तेडा, “नेय अलोम अड़ागियू, बल्कि अले लगड बरअब्बम अड़ाः गोत्ते।” अवुर बरअब्बा डाकुय दोहो एना।

Currently Selected:

एहुन्‍ना 18: ksz

Highlight

Copy