परेरित 8

कलीसिया रे अत्याचार

1हेन देवह वरी एरुसलेम राः कलीसिया रे अखीर सताव बोंहड़ी एना, अवुर परेरितकू छोड़ सींड़ बिसवासिकू, अहूदिया अवुर सामरिया जिला रेकू जतकतो यनु। 2भगवान रेनकू सेवेखियाकू ईसतेफनुस कू जतन तेडा, अवुर हेंय लगड अखीर कू फिकीर एना। 3साऊल कलीसियाय उजड़ दोहो एनु; हेंय ओड़ाः ओड़ाः ते बोलो कोःते कोड़ाकू अवुर कोड़ीकुय घिरलो अगकू अवुर जेहेल रेय डलोकू दोहो एनु।#परेरित 22:4,5; 26:9-11

सामरिया सहर रे फिलिपुस परचार तेडा

4अवुर जे जे जतकतो यन दोहोएन हेंकू, जहाँ जहाँ कू सेनेना, हेनाते बढ़ियाँः खभेर कू लाय तेडा। 5अवुर हेंकू मेंडे फिलिपुस सामरिया सहर राः मियाँटंग सहर रेय सेनेना, अवुर हेना रे होड़कू थरे मसीहा राः बारे तेय परचार तेडा। 6अवुर होड़कू फिलिपुस राः टेबोः कू अँजोम तेडा, अवुर हेंय चमत्कार कामिय काम तेड हेना कू ञेंलतेड दो, हेंकू हेंय राः टेबोः रे धियान कू एमतेडा। 7कहेकि केय्यो झन होड़कू थरे भूत परेतकू लगोतन हेंकू अहीज केनतेकू उडूंग चलो एना, अवुर अखीर लंगड़ा तनकू अवुर लवका ञेंडतड कुः हेंकुय चिकन तेडा। 8हेनाते हेना सहर रेनकू होड़कू अखीर कू खुसी एना।

सिमोन जादू वाला

9हेना सहर रे सिमोन मेनते कू ञुमू तडिया, हेनी होड़ दोहो एना, हेंय जादू मंतर केकू ते सामरी रे दोहोनकू होड़कुय अकचँदो गोत्ते दोहो एनु, अवुर अनानेज बडे गिअंञ मेनतेय कहनिऊ। 10अवुर होड होडिंञकू बड बडे कू, सगोरकू हेंय राः टेबोः कू मनो दोहो एनु, अवुर कू कहनियू, “भगवान राः बडेआ सक्‍ति मेनते कू कहनी वआ, हेना नेय होड़ थरे इदाना।” 11हेंय अखीर दिन अँगम हेंकू अनेज राः जादू मंतर ते अकचँदो केडकू तेय रखो तडकुआ। हेनाते हेंकू हेंय अखीर कू मनोविय दोहो एनु। 12लेकिन हेंकू फिलिपुस भगवान राः राज राः बढ़ियाँः खभेर, अवुर ईसु मसीह राः ञुमू तेय परचार तेड हेना रेकू बिसवास तेडा, हेना वरी सगोर कोड़ाकू कोड़िकू बतिस्मा कू तिला तेडा। 13तहाँ सिमोन होय बिसवास तेडा, अवुर बतिस्मा तिला केते फिलिपुस तयोम तेय सेनतेडा। हेंय चिन्ह अवुर बडे बडेआ चमत्कार ञेंल तेय अकचँदो जोम दोहो एनु।

सामरिया रे पतरस अवुर एहुन्‍ना

14परेरितकू एरुसलेम रेकू दोहोएन तोलोग कू अँजोम तेडा कि सामरिया रेनकू होड़कू भगवान राः बचन कू मनो केडा, तहाँ हेंकू हनते पतरस अवुर एहुन्‍ना कू कुलतेडा। 15पतरस अवुर एहुन्‍ना एडकींञ हेना कींञ सेनेना, अवुर हेंकू पवितर आत्मा कू ञँम लगड कींञ बिनती एना। 16कहेकि पवितर आत्मा निहों मेनते हेंकू मेंडे कनय थरे अनायिन अगड़ुः दोहो एनु। हेंकू सीरिफ परभु ईसु राः ञुमू ते बतिस्मा भर कू तिला तडा। 17हेना वरी पतरस अवुर एहुन्‍ना एडकींञ हेंकू थरे भोःतू कुते कींञ छुवों तेडा, अवुर हेंकू पवितर आत्मा कू ञँमतेडा। 18हेना वरी सिमोन ञेंलतेडा कि परेरितकू एटाःकू भोःतू कुकू छुवों रे, हेंकू पवितर आत्मा कू ञाँमा, तहाँ हेंय हेंकू थरे रूपया अगकेड तेय कहनी तेडा, 19“नआँ अधिकार इंञ होपे ओवाञूँ, ताकि इंञ हो जेयिंञ छुवोंआ, हेंकू पवितर आत्मा कू ञाँमू।” 20हेना वरी पतरस हेंयिय कहनी वडू, “अमाः रूपया अनाम सुदा नासुऊ, कहेकि अम भगवान राः दान रूपया ते तिलाय मेनतेम पसींद केडा। 21अले राः काम रे अमाः हिसा बंटा कोवाआ, कहेकि अमाः मन भगवान राः मड़ंग रे सही कोवाआ। 22हेनाते अम नआँ खराब काम वरी मन मी मिड़ाः केते परभु थरेम बिनतिऊ, ताकि हेंय अमाः मन राः नआँ घियाआ बिचारिय माफ गोत्ते। 23इंञ ञेंलियाडा अम थरे एठेड अवुर पाप राः बंधन रेम पड़ो केना।” 24हेना वरी सिमोन जबाबिय एमतेडा, “अम इंञ लगड परभु थरेम बिनतिऊ कि जे टेबोः अम कहनी केडा, हेना मेंडे कनारा टेबोः इंञ थरे अलो मेजुऊ।”

25पतरस अवुर एहुन्‍ना गोवाही एमकेते अवुर परभु राः टेबोः लाय केते एरुसलेम कींञ मिड़ाः मेजेना। हेंकींञ मिड़ाः तोलोग सामरिकू राः गाँव ते बढ़ियाँः खभेर कींञ लाय अगतेडा।

फिलिपुस अवुर कूस देस रेनिय अधिकारी

26परभु रेनिय मियाँटंग सरगदूत फिलिपुसिय कहनी वडू, “रिमुःमी, अवुर देखीन गतर हँडा होर तेम सेनुऊ, हेना एरुसलेम वरी गाजा हनते चलो यना, अवुर हेना बलकुही होर हवे।” 27हेना वरी हेंय रिमकेन तेय चलो एना। अवुरिय ञेंलतेडा कि कूस देस रेनिय मियाँहोड़ होड़ मेजुः दोहो एनु। नेय करबेय दोहो एना, अवुर नेय कूस देस रेनिय कन्दाके राज राः रानी रेनिय बडेअय अधिकारी अवुर कोसा अध्याछिय दोहो एना। नेय एरुसलेम आराधनाईय सेनेन दोहो एनु। 28अवुर हेंय अनेज राः रथ रेय दुड़ूब तना, अवुर एसायाह भविस्यवक्‍ता राः कागद ओड़ाः तू हनतेय मिड़ाः तोलोगिय पढ़हो अगुय दोहो एनु। 29हेना वरी पवितर आत्मा फिलिपुस थरे कहनी तेडा, “ठँव रे सेनकोःते मेना रथ सुदाम से-ने।” 30तहाँ फिलिपुस हुंको सेनेना, अवुर हेंय एसायाह भविस्यवक्‍ता राः कागद पढ़हो तोलोगिय अँजोवडियू, हेना वरी हेंयिय होंबोर तेडा, “मेनम पढ़हो यड हेनाम जेर यडा किदो कोवानू?” 31तहाँ हेंय कहनी तेडा, “जब तक इंञ कनय मेने कू सझोविञूँ, दो काःतेंञ समझोआ?” हेना वरी फिलिपुस रथ रे दुड़ूब लगाडिय कहनी वडिया।

32धरमग्रंथिय पड़हो दोहो एनु, हेना नआँ पाठ हवे,

“हेंय भेड़ा कुकू पूजा तोलोग कू जपनो कोआ घयतेय जपनो तना, अवुर पठरू, रोंवत कू गे-डा, हेंकू मड़ंग रेय जपनो बगी कोआ, हेन घयते हेंय होय जपनो बगी तना।

33हेंय कू बेजत्ती तेडिया, अवुर हेंय राः न्याय मेने होया गना। हेंय पिढ़ी रेनकू होड़कू राः बारे ते ईया लाय सकोआ? कहेकि धरती वरी हेंय राः जीविय रिम गोःतेडा।”#एसा 53:7,8

34हेना वरी करबे होड़ फिलिपुसिय होंबोर तेडा, “अम थरे ईञाः अरजीः हवे, इंञ मी लायवा, भविस्यवक्‍ता ईया राः बारे तेय कहनी केडा, अनेज राः बारे ते कि एटाःकू राः बारे तेय कहनी तेडा?” 35तहाँ फिलिपुस ललायिय बोंहड़ी तेडा, अवुर धरमग्रंथ राः ने-ना पाठ वरी बोंहड़ी केते अवुर ईसु राः बढ़ियाँः खभेरिय लाय वडिय दोहो एनु। 36होर ते से-ने से-ने ते हेंकींञ मियाँटंग दाः जघा कींञ तयाः तेडा, तहाँ करबे होड़ कहनी तेडा, “होन ञेंल मी, न रे दाः इदाना, अब इंञ बतिस्मा तिला लगड ची रोक टोक इदाना?” 37हेना वरी फिलिपुस कहनी तेडा, “अगर अम पूरा मन तेम बिसवास यड रेदो, अम तिला सकोआ।” तहाँ हेंय जबाब तेडा, “इंञ बिसवास यडाञूँ, ईसु मसीह भगवान होपोन हवे।” 38अवुर हेंय रथ चड़ाँ लगाडिय कहनी तेडा। तहाँ करबे अवुर फिलिपुस बना होड़ दाः रेकींञ अगड़ू यनु, अवुर फिलिपुस हेंय बतिस्माय ओवाडिया। 39हेना वरी हेंकींञ दाः वरी बहेर कींञ उडूंग एना, तहाँ परभु राः आत्मा फिलिपुस रिम गोःतेडिया, हेना वरी फेर करबे होड़ हेंय मेनेय ञेंलगाडिया, लेकिन नेय होड़ खुसी मनो तींग ते अकू होर तेय चलो यनु। 40फिलिपुस असदोद रेय प्रगट एना, अवुर हेंय कयसेरिया अनायिन तयागे मेन दिन सहर सहर ते बढ़ियाँः खभेरिय लाय गोःतेडा।

Currently Selected:

परेरित 8: ksz

Highlight

Copy