परेरित 7

ईसतेफनुस राः भाँसड़

1तहाँ सींड़कू वरी बडेअय आजक होंबोर तेडा, “नआँ टेबोः सीरित गिआ किदो?” 2हेना वरी ईसतेफनुस कहनी तेडा, “एगा भाईकू, अवुर सपायँड़कू, अँजोमे पे। अबू रेनिय खुटियारा अबराहम हरान देस रे दोहोन वरी पहील ते मेसोपोटामिया रेय दोहोएन तोलोग, महिमामय भगवान हेंय थरेय दरसन एना। 3अवुर हेंय थरेय कहनी तेडा, ‘अम अपन देस अवुर अपन होड़कू बगी वते, इंञ तिःवामा, हेना देस हनतेम चलोऊ।’#उत्प 12:1

4तहाँ हेंय कसदिकू राः देस बगी वते, हरान देस रेय सेन बसो एना,#उत्प 11:31; 12:4 हेना वरी हेंय अपत गोजकेन राः बाद रे भगवान हेना हरान देस वरी उडूंग केडिय ते निहों अपे दोहोन तना, हेना रेय बसो तेडिया। 5भगवान ना रे अबराहम कनर हँक मेनेय एमगाडिया, कटा मँडो मेनमोट जघा घली मेनेय एमगाडिया। अवुर हेंय रेनकू कनय चोंडिजकू मेने कू दोहो गना, हेंडे रेहो भगवान हेंय थरेय जबान तेडा कि ‘इंञ नआँ देस अम अवुर अम तयोम ते अमाःकू चोंडिजकू राः हाँथ गाँथ रेंञ ए-मेआ।’#उत्प 12:7; 13:15; 15:18; 17:8

6अवुर भगवान हेंय नआँ याःते होय कहनी वडिया, ‘अमाःकू चोंडिजकू एटाः देस रे परदेसी कोःतेकू दोहोना; अवुर हेंकू हेनारे अमाःकू चोंडिजकू हरवाह कुकू बनो कुआ, अवुर चार सव बरिस अँगम हेंकू कू ससीत कुआ।’#उत्प 15:13,14; निर्ग 3:12 7अवुर भगवान कहनी तेडा, ‘जे जात रेनकू अपे हरवाहकू बनो पेआ, हेंकू इंञ सजांञ ओवा कुआ, हेना वरी अमाःकू चोंडिजकू उडूंग कोःते ने-ना जघा रे इंञ कू सेवाआ।’#उत्प 15:13,14; निर्ग 3:12

8अवुर भगवान अनेज राः जबान पक्‍का लगड, अबराहम लगड खतना राः नियामिय ओवाडिया। अबराहम होपोन इसहाक जनम एना, अवुर आठ रोज रे हेना जबान राः अनुसार तेकू खतना तेडिया; अवुर इसहाक वरी एकूब अवुर एकूब वरी बारह झन चोंडिजकू जनम एना, अवुर नेनकू वरी बारह गोति सुरू एना।”#उत्प 17:10-14; 21:2-4; 25:26; 29:31—35:18

9अबू रेनकू दादी पुरखाकू एठेड ते बोहोत कू मतलोब उसुफ मिसरी देस हनते चलोःकू थरे कू केजा तेडिया।#उत्प 46:1-7; 49:33 लेकिन भगवान हेंय सुदाय दोहो एना। 10अवुर हेंय सींड़ बिपेत वरिय उबर केडिय ते, मिसरी रेनिय राजा फिरोन राः नँजेर रे किरपा अवुर बुद्हिय ओवाडिया। अवुर हेंय मिसरी देस रे अवुर अनेज ओड़ाः तुरेनिय बडेअय अधिकारिय बनो तेडिया।#उत्प 41:39-41 11तहाँ गोटा मिसरी अवुर कनान देस रे अकाल तेडा; अवुर होड़कू अखीर बिपेत रेकू पड़ो एना, अवुर अबू रेनकू दादी पुरखाकू अन्‍न मेने ञँमुः दोहो एनु।#उत्प 42:1,2

12लेकिन एकूब मिसरी देस रे अनाज इदाना मेनाआ अँजोम केते, अबू रेनकू पुरबुजकू पहलो पहीलिय कुलतेड कुआ। 13हेंकू दुबारा कू सेनेन रे, उसुफ अनानेज मगत एडकू थरेय लाय एना, हेंडे फिरोन हो उसुफ राः जातिय पपाड़ी एना।#उत्प 45:1,16 14तहाँ उसुफ अनेज अपत एकूब अवुर अनेज परिवार रेनकुय एर राःतेडा। हेंकू पचहत्तर झनकू दोहो एना।#उत्प 45:9-10,17,18; 46:27 15तहाँ एकूब मिसरी देस रेय सेनेना; हें-डे नेय अवुर अबू रेनकू दादी पुरखाकू गोजेना कू।#उत्प 46:1-7; 49:33 16हेंकू राः लास अबराहम सकेम रे हमोर होपोनकू वरी चाँदी एमकेतेय तिला तडा, हेना मरघटी रेकू जतन तेडकुआ।#उत्प 23:3-16; 33:19; 50:7-13; एहो 24:32

17भगवान अबराहमिय जबान वडा, हेना पूरा होयाः समय आय लिघियो एना। तहाँ मिसरी देस रे अबू रेनकू होड़कू राः संख्या अखीर बढ़ो यनु। 18तहाँ मिसरी देस रे एटागी राजा बनो एना। अवुर हेंय राजा उसुफ मेनेय पपाड़ी दोहो एनु।#निर्ग 1:7,8 19हेंय राजा अबू रेनकू दादी पुरखाकू सुदा धोखा धड़िय करो तेडा, अवुर अखीरिय ससीत तेडकुआ, एतनाय ससीत तेडकुआ कि कोड़ा चोंडिजकू जनमुः रे हेंकू फेकेक पड़ो एना।#निर्ग 1:10,11,22 20हेन तोलोग मूसा जनम एना। हेंय बनल ओकोनिय दोहो एना। अवुर हेंय इंगत अपत तीन महिना अँगम उकू उकू तेकींञ असुल तेडिया।#निर्ग 2:2 21हेना वरी हेंय कू अटड़ तेडिया, तहाँ फिरोन कोड़ी होपोन हलंग गोःतेडिया, अवुर अनेज कोड़ा होपोन घयतेय असुल तेडिया।#निर्ग 2:3-10 22अवुर मूसा मिसरिकू राः सींड़ अनुन कानून कू चेडते डिया, अवुर हेंय टेबोः अवुर काम बुता रे अच्छा बलगारिय दोहो एना।

23“मूसा राः चालीस बरिस होया एना, तहाँ अनेज रेनकू भाई बंधुकू इसराएलिकू सुदा जुमोः लगाडिय पसींद तेडा। 24तहाँय सेनेन दो मियाँहोड़ मिसरी होड़, इसराएली हो-ड़िय ञेंड तोलोगिय ञेंल ञँमतेडिया। हेनाते मूसा सेनकेनते इसराएली हो-ड़िय बंचो तेडा, अवुर मिसरी हो-ड़िय ञेंड गोजतेडा। अवुर इसराएली हो-ड़िय ञेंड तेडा, हेना राः बदलाय तिला तेडा। 25अवुर हेंय अड़ींग एना कि ईञाःकू जाति भाईकू पपाड़िआ कि भगवान ईञाः दोवारा तेय छडो बुआ मेनते। लेकिन हेंकू मेने कू जेर गडा।

26हेना ञींदावत बा होड़ इसराएली कींञ अकींञ अकींञ कलाहुः दोहो एनु, तहाँ हेंकींञ थरेय सेनेना; अवुर हाँःते कहनी केतेय टेबोः समझो सोतड किञाँ, ‘एगा कोड़ाकिञूँ, अबा दो भाई भाई कींञ हवे मा, अनाबा चीबा कलाह वताना?’ 27लेकिन गतित सुदाय कलाहुः दोहोएन हेंय मूनुसा ढोकलो बेड़ा वतेय कहनी तेडा, ‘अम अले रेनिय अधिकारी अवुर न्यायी ईया बनो केडमिआँ? 28होला मिसरी होड़ मी ञेंड गोजतेडा घयते इंञ होम ञेंड गोजेंञ मेनते किदो?’ 29नआँ टेबोः अँजोम केते मूसा ञींरे नयू अवुर मिदयान देस रे परदेसी घयतेय दोहो एना।#निर्ग 2:11-15 अवुर हेनारे बाटंग कोड़ा होपोन कींञतय होया एना।”#निर्ग 18:3,4

30“चालीस बरिस बितो केन राः बाद रे सिनेय बुरू बँदे, सुनहर ओत रे सेंगेल सलगोआ झवुड़ रे मूसा सरगदूतिय ञेंलवाडा। 31मूसा नआँ ञेंलके तेय अहचरज यनु, तहाँ ञेंञेंल लगड ठाँविय सेनेना, सेनेन दो परभु राः नआँ आवाजिय अँजोम तेडा, 32‘इंञ अमाःकू दादी पुरखाकू, अबराहम, इसहाक, अवुर एकूब रेनिय भगवान हवे;’ तहाँ मूसा एखला चुवेर यनियू, अवुर ञेंञेंल लगाडिय हियो बेचकाडा। 33तहाँ परभु हेंय थरेय कहनी तेडा, ‘जे जघा रे अम चँड़ा केना, हेना ओतेत पवितर गिआ, हेनाते कटाम वरी पनहीम तुलूज गोत्ते। 34मिसरी रे इदान कुआ, हेंकू ईञाःकू होड़कू राः खराब दसांञ ञेंलकेडा; अवुर हेंकू राः कँहरोः तन हेना अवुर ईयाम तन हेनांञ अँजोम केडा; हेनाते हेंकू छडो लगाडिंञ अगड़ू केना। अब मेजुः मी, इंञ मिसरी देस रेंञ कुलमिआँ।’”#निर्ग 3:1-10

35“अम अले रेनिय अधिकारी अवुर न्यायी ईया बनो केडमिआँ मेनते इसराएलिकू नहकार तेडिया। हें-नी मूसा लोः दोहोएन हेना झवुड़ रे भगवान रेनिय सरगदूत दरसन रेय ञेंलवाडिया, अवुर भगवान हेंय सरगदूत राः दोवारा ते अधिकारी बनो केडिय ते इसराएलिकू छडो लगाडिय कुलतेडिया। 36ने-नी होड़, मिसरी अवुर लाल समुन्धर अवुर जंगल रे चालीस बरिस अँगम, अहचरज वआ काम अवुर चिन्ह तिब तिब ते मिसरी देस वरिय उडूंग अगतेड कुआ।#निर्ग 7:5; 14:21; गिनती 14:33 37‘भगवान अपे भाई पाटिकू वरी अपे लगड इंञ घियाअय मियाँहोड़ भविस्वक्‍ताय#बेवस्था 8:15,18 कूला मेनते।’ ने-नी मूसा इसराएलिकू थरेय कहनी तेडा। 38अवुर जंगल रे सिनेय बुरू बँदे रे कलीसिया मतलोब अबू रेनकू दादी पुरखाकू जवर यन दोहो एनु, दो मूसा हेंकू सुदाय दोहो एना। हेना रे मूसा सिनेय बुरू रे भगवान रेनिय सरगदूत सुदाय टेबोः एना, अवुर हेना रे हेंय अपे ओवा लगड भगवान राः जिवाता बचन ञँमेना।#निर्ग 19:1—20:17; बेवस्था 5:1-33 39लेकिन अबू रेनकू दादी पुरखाकू हेंय राः मेने कू मनो गडा, अवुर कू नहकार तेडा। अवुर मिसरी देस हनते मिड़ाः मेनते कू सँबह तना। 40अवुर हारून थरे कू कहनी तेडा, ‘मिसरी देस वरिय उडूंग अगतेड लेआ, हेनी मूसा अले मेने ले पपाड़ी तना, ची यनायू? हेनाते अले लगड एयसाअय देवताम बनो कि अले मड़ंग मड़ंग तेय से-ने।’#निर्ग 32:1 41हेना वरी हेन तोलोगू हेंकू बछवा रेनिय मुरती बनो केते, हेंय मड़ंग रे पूजा कू रकब तेडा,#निर्ग 32:2-6 अपन हाँथ ते बनो तडा चीज राः मड़ंग रे खुसी कू मनो दोहो एनु। 42हेनाते भगवान हेंकू ञेंल लगड मेनेय मन गना, अवुरिय अयठो वडकू। अवुर हेंकू इपिलकू अवुर बेर-बँगो पूजा पाठ लगाडिय बगी वडकू; न याःते भविस्यवक्‍ताकू राः कागद रे लिखल इदाना कि भगवान कहनी केडा,

‘ए इसराएलिकू, चालीस बरिस अँगम सुनहर ओत रे

माल मोसिकू राः पूजा अवुर अन्‍न ईनिंञ भर पे रकब वडा किदो?

43अपे मोलेक राः तम्बू अवुर रिफान देवता रेनिय इपिल पे गोः बेड़ा तेडा,

नेकू मुरती कू अपे मनोकू लगड पे बनो तडकुआ,

हेनाते इंञ अपे होंञ गोःपेआ, अवुर सँगिंञ रे इदाना बेबीलोन देस रेंञ बसो पेआ।’”#आमो 5:25-27

44“सुनहर ओत रे अबू रेनकू दादी पुरखाकू थरे गोवाही राः तम्बू दोहो एना। भगवान नआँ राः बारे ते मूसाय लाय वडा, ‘जेयसे अम नक्साम ञेंलकेडा, हेन घयते नअँम बनोवे।’#निर्ग 25:9,40 45नआँ तम्बू पहील पिढ़ी रेनकू अबू रेनकू पुरखाकू ञँमतेडा, अवुर हेंकू हेना एहोसू सुदा नआँ देस रेकू अगतेडा।#एहो 3:14-17 नआँ देस अनजातकू राः हाँथ रे दोहो एना, लेकिन भगवान हेंकू अबू रेनकू दादी पुरखाकू राः मड़ंग वरिय उडूंग गोत्तेड कुआ। हेना तम्बू दाऊद राः समय अँगम ना रे दोहो एना। 46दाऊद भगवान किरपा वडिय दोहो एनु। अवुर हेंय एकूब रेनिय भगवान लगड हेना जघा रे मँडिल बनो लगड अनुमतिय असी तेडा।#2 समू 7:1-16; 1 इति 17:1-14 47लेकिन मँडिल सुलेमान बनो तेडा। 48लेकिन सींड़कू वरी सक्‍तिदारय भगवान ती ते बनो तआ मँडिल रे मेनेय दोहोना, भविस्यवक्‍ता कहनी तेडा,

49‘परभु कहनियाँ,

सरग#7:49 डेरा ईञाः सिंहासन अवुर धरती

कटांञ पेंदी राः चवकी हवे,

इंञ लगड अपे का घियाआ मँडिल पे बनोआँ? अवुर करा जघा रेंञ लुड़ूआ?

50नआँ सींड़ चीज अपन हाथ ते बेगारिंञ बनोआँ किदो?’”#एसा 66:1,2

51ईसतेफनुस अनावुरिय कहनी तेडा, “ए हठू अवुर केटेज होड़कू, अपे भगवान राः टेबोः मेने अँजोम गिसन यडपेआ। अपे हमेसा पवितर आत्मा पे बिरोधा, जेयसे अपे रेनकू दादी पुरखाकू करो तेडा, हेन घयते अपे होपे करो यडा।#एसा 63:10 52अपे रेनकू दादी पुरखाकू, भविस्यवक्‍ताकू मेंडे रे करकू बेगर कू ससीता? हेंकू पहील ते धरमी होड़ मेजुः राः खभेर कू लाय तेडा, हेंकू होकू ञेंड गोजतेड कुआ। अपे हो हेंय पपकड़ोकू अवुर ञेंड गोगोज कुपे बनो एना। 53अपे सरगदूतकू राः दोवारा तेय एमतेडा नियम दोपे ञँमतेडा, लेकिन हेना मेने पे मनो गडा।”

ईसतेफनुस कू तिकी तेडा

54नआँ टेबोः अँजोम केतेकू जिरखीरो यनु, अवुर तिरींग तुकू कू लुकड़ूम बेड़ा। 55लेकिन ईसतेफनुस पवितर आत्मा ते भरो केनते सरग हनिय तको तेडा, अवुर भगवान राः महिमा अवुर भगवान राः जोम गतर रे ईसुय ञेंलके तेय कहनी तेडा, 56“ञें-लेपे, इंञ सरग जीजकेन हेना, अवुर होड़ होपोन भगवान राः जोम गतर रेय चड़ाँ केन हेनांञ ञेंलियाडा।”

57तहाँ हेंकू लुतूर तुकू कू थोपा रेडकेड ते अच्छा तेकू हल्ला एना, अवुर मियाँ सोत्ते हेंय थरे कू टुटो एना; 58अवुर हेंकू सहर वरी बहेर हँडे उडूंग केडिय तेकू तिकी तेडिया। गोवाहिकू अकू राः कपड़ा साऊल मेनते ञुमूत दोहो एना, हेनी ढिंगवा कटा दुबी रे तुलूज केतेकू मँडो गोत्तेडू। 59हेंकू ईसतेफनुस कू तिनीकिय दोहो एनु, अवुर हेंय न याःते कहनी केतेय बिनतीः दोहो एनु, “ओ परभु, ईसु ईञाः आत्माम अपनोवू।” 60फेर उकड़ुम केनते अच्छा तेय हाक एना, “ओ परभु, नआँ पाप नेकू थरे अलोम लगोवे।” नेन याःते कहनी केतेय गोजियानु। अवुर साऊल हेंय कू ञेंड गोजतेड हेना रे हेंय होय मेड़वा तना।

Currently Selected:

परेरित 7: ksz

Highlight

Copy