परेरित 5

हनन्याह अवुर सफीरा

1हनन्याह मेनते कू ञुमू तडिया मियाँहोड़ होड़ दोहो एना, अवुर हेंय इंगत कू सफीरा, नेकींञ अनाकींञ राः कुछ ओतेत कींञ केजा तेडा। 2हनन्याह हेना दाम वरी अद्हा अनाकींञ लगाडिय दोहो तेडा, अवुर नआँ इंगत कुहोय पपाड़ी दोहो एनु। हेंय अद्हा अगकेते परेरितकू मड़ंग रेय मँडो तेडा। 3हेना वरी पतरस कहनी तेडा, “ए हनन्याह, पवितर आत्मा थरे जलिया तेम टेबोः लगड अवुर ओतेत राः अद्हा दाम मी भंगियो लगड सयतान अमाः मन रे ची लगाडिय डलो केडा? 4अनायिन केजाः मेन दिन अनामाआ मेने दोहो गना किदो? अवुर केजा एन दो, अमाः हाँथ गाँथ रे मेने दोहो गना किदो? अम नआँ अपन मन रे ची लगड मी पसींद तेडा? अम होड़कू थरे मेने, लेकिन भगवान थरे जलिया तेम कहनी केडा।” 5नआँ टेबोः अँजोम तेड सी हनन्याह लोजोर यनु, अवुरिय गोजियानु। नआँ ञेंलते सींड़ अअँजोमकू अखीर कू बोरो यनु। 6हेना वरी ढिंगवाकू रिमकेनते लास कफन तेकू गुरघेट तेडा, अवुर बहेर हँडे इदी केडिय तेकू हर गोत्तेडियू। 7लगभग तीन घंटा बितो केन रे हेंय इंगत कू पतरस थरे भीतारिय मेजेना, अवुर जो कुछ होया तना हेना मेनेय पपाड़ी गना। 8हेना वरी पतरस होंबोर तेडिया, “इंञ मी लायवा, अबा बना होड़ हेना ओतेत नेन मेनते बा केजा केडा किदो?” तहाँ हेंय कहनी तेडा, “हूँ, नेन मेनते लिंञ केजा तेडा।” 9तहाँ पतरस हेंयिय कहनी वडू, “नआँ ची टेबोः हवे, अबा बना होड़ परभु राः आत्मा परखो लगड न घयते ची लगड बा गुट केना? ञेंल कू मू, अपापे राः मटी एम कू दुवार रेकू चड़ाँ केना, अवुर अम हो बहेर हनतेकू गोःमिआ।” 10हेना वरी हेंय हो तुरेत्ते पतरस कटा दुबी रेय लोजोर यनु, अवुरिय गोजियानु। तहाँ ढिंगवाकू भीतर रे गोजतू कू बोलो ञँमतेडा, अवुर हेंय हो बहेर उडूंग केडिय ते अपत कू बँदेर रेकू हरतेडिया। 11अवुर सींड़ कलीसिया ते अवुर नआँ टेबोः अअँजोमकू थरे अखीर बोर समसो यनु।

परेरितकू राः दोवारा ते चिन्ह अवुर अहचरज काम

12परेरितकू राः दोवारा ते अखीर चिन्ह अवुर अहचरज काम होड़कू राः बीच रेकू करोवे दोहो एनु। अवुर हेंकू सींड़कू एक मन कोःते सुलेमान राः झोपड़ी रेकू जवारूः दोहो एनु। 13लेकिन हेंकू सुदा मेड़वाः लगड कनय मेने कू हिम्माते दोहो एनु, हेंडे रेहो होड़कू हेंकू अखीर कू बडेय वकू दोहो एनु। 14बिसवासेःकू कोड़ाकू अवुर कोड़िकू परभु राः कलीसिया रे अखीर कू मेड़वाः दोहो एनु। 15पतरस मेजुः रे रोगियाकू मेंडे कनय थरे हो कम सेकम उँबुल तू होता पवुः लगड, होड़कू रोगियाकू सँड़क अड़ी ते, अग-अग ते परकोम ते अवुर छटिया तेकू गितीज तकू दोहो एनु। 16एरुसलेम राः आस पास राः सहर वरी हो अखीर होड़कू जवर जोम दोहो एनु। अवुर रोगियाकू अवुर भूतकू लगोतन हेंकू होड़कू होकू अगतेड कुआ, अवुर हेंकू सींड़ कुकू चिकन जोम दोहो एनु।

परेरित कुकू पकड़ो तेडा

17हेना वरी सींड़कू वरी बडेअय आजक अवुर हेंय रेनकू सींड़ गतिकू सदूकी दल रेनकू दोहो एना, हेंकू एठेड वकू दोहो एनु। 18हेंकू परेरितकू सबकेड कुते जेहेल रेकू डलो तेडकुआ। 19लेकिन हेना ञींद परभु रेनिय मियाँटंग सरगदूत जेहेल राः दुवार जीजकेड ते बहेरिय उडूंग तेडकुआ। 20अवुरिय कहनी वडकू, “जू, मँडिल रे चड़ाँ कोःते नआँ नवाँः जीवन राः सींड़ टेबोः होड़कू पे लायवा।” 21जेयसे हेंकू थरेय कहनी तडा, हेन घयते हेंकू ञींदा ञींदाते मँडिल रे सेनकेनते होड़कू सिक्छा कू लाय वकू दोहो एनु।

तहाँ सींड़ वरी बडेअय आजक अवुर हेंय रेनकू गतितकू मेजकेन ते इसराएलिकू रेनकू सींड़ सपायँड़कू अवुर महासभा लगड कू जवर तेडकुआ। तहाँ जेहेल वरी परेरित कुकू अग लगड सिपाही कुकू कुलतेडा।

22लेकिन सिपाहिकू जेहेल कू सेनेन दो, परेरितकू मेने कू ञँमगड कुआ। हेना वरी हेंकू मिड़ाः केनतेकू लाय वडकू दोहो एनु, 23“अले जेहेल एकदम बढ़ियाँ ते सिंञताडा अवुर पपाहराकू बहेर हँडे चड़ाँ तन तोलोग ले ञेंलवड कुआ; अले जिज तेड तहाँ दो भीतर रे कनय मेने ले ञँमगाडा।” 24मँडिल रेनकू सिपाहिकू रेनिय अधिकारी अवुर बड बडे आजककू नआँ टेबोः कू अँजोम तेड दो, हेंकू राः बारे ते ची यनाकू मेनते अखीर चिन्ता रेकू पड़ो यनु। 25हेना वरी कनय मेजकेनते हेंकुय लाय वडा, “अँजोम पे, जे होड़कू अपे जेहेल रेपे बँद तडकुआ, हेंकू दो मँडिल रे चड़ाँ केनते होड़कू सिक्छा कू लाय वकू तना।” 26हेना वरी सिपाहिकू रेनिय अधिकारी सिपाहिकू सुदाय सेनेना, अवुर चेला कुकू अगतेडा। हेंकू अपन बल जँगड़ ते मेने, कहेकि हेंकू बोर दोहो एनु कि होड़कू दिरी ते अलोकू तिकी ले मेनते।

27हेंकू परेरितकू अगकेड कुते महासभा तनकू मड़ंग रेकू चड़ाँ तेडकुआ। तहाँ सींड़कू वरी बडेअय आजक होंबोर तेडकुआ, 28“अले नेय ञुमू ते सिक्छा अलोपे लाये मेनते मेने ले चेतवन गडपेआ किदो? हेंडे रेहो, अँजोमे पे, अपे सींड़ एरुसलेम सहर रेनकू सिक्छा पे लाय वकू तना, अवुर ञेंड गोज तेडिय हेनी होड़ राः खून अले थरे पे लदगो सोयाडा।”#मत्ती 27:25

29हेना वरी पतरस अवुर अवुरोह परेरितकू कहनी तेडा, “होड़कू राः हुकूम वरी बढ़कर भगवान राः हुकूम ले मनोः हेना अले राः करतब हवे। 30अपे ईसु मसीह कुरूस रेपे ठोको गोजतेडिया, हेंय अबू रेनकू दादी पुरखाकू रेनिय भगवान गोजतन वरिय जियो रिमतेडिया। 31भगवान ने-नी परभु अवुर उऊबरायिय बनो केडिय ते, अनेज वरी जोम गतर राः सींड़ वरी बडेआ अधिकार राः जघाय ओवाडिया, ताकि इसराएलिकू मन मिड़ाः राः इक्छा अवुर पाप वरी माफी ञँमुः राः दानिय ओवाकू। 32अले नआँ टेबोः राः गोवाही एमकू हवे, अवुर पवितर आत्मा हो गोवाही ए-मय हवे; नआँ पवितर आत्मा, भगवान अनेज राः हुकूम मनोः हेंकुय ओवाडा।”

33नआँ अँजोम केते दरबार रेनकू धको यनु, अवुर हेंकू परेरित कुकू ञेंड गोज मेनते कू सँबह तना। 34लेकिन हेंकू राः बीच रे गमलीएल मेनते कू ञुमू तडिय हेनी, मियाँहोड़ फरीसी दोहो एना, नेय नियम राः बारे ते जनगुन होड़ दोहो एना, अवुर सींड़ होड़कू नेय कू आदर इजेतिय दोहो एनु। नेय कोट कछेरी जघा रे चड़ाँ केनते परेरितकू मियाँ घड़ी बहेर हँडे उडूंग कू लगाडिय हुकूम तेडा। 35हेना वरी हेंय कहनी तेडा, “ओ इसराएलिकू, जो कुछ अपे नेकू होड़कू सुदा करेक पे चहोः तना, हेना तयोम मड़ंग पसींद केते पे करोवे। 36कहेकि नआँ समय वरी पहील ते थियूदास रिमेना, अवुरिय कहनियू, इंञ हो कनय दो हवे, अवुर चार सव होड़कू हेंय तयोम तेकू सेनतेडा। लेकिन हेंय ञेंडेना, अवुर जेतना होड़कू हेंय कू मनो दोहो एनु, हेंकू सींड़ कुकू जतकतो यनु, अवुर हेंकू राः नमों निसान हो मेने दोहो गना। 37हेना वरी तयोम ते होड़कू राः गिनती होयाः समय रे गलील जिला रेनिय एहूदा रिमेना। हेंय हो कुछ होड़कू अनेज हनतेय ओरतेड कुआ। लेकिन हेंय होय ञेंडेना। अवुर जेतना होड़कू हेंय कू मनो दोहो एनु, हेंकू होकू छितीर बितीर यनु। 38हेनाते इंञ अपेंञ कहनी वताना, नेकू होड़कू वरी बीच रेपे दोहोनू, अवुर मेकू बगी वकुपे, कहेकि अगर नेकू राः नआँ काम अवुर उदेस्य होड़कू हनवरी इदान रेदो, अपने अपन ते अडुआ। 39अगर भगवान हनवरी इदान रेदो, मेकू अपे कनार याःते एरो पे मेटो सको एना। अपे भगवान सुदा हो लड़ायुःकू अलोपे बनोः जहानू।”

40तहाँ हेंकू गमलीएल राः टेबोः कू मनो तेडा, हेना वरी परेरित कुकू राः केडकू तेकू एर पिटो तेडकुआ, फेर ईसु राः ञुमू ते होड़कू अलोपे चेडकू मेनते हुकूम वडकू तेकू अड़ाः गोडवडकू। 41हेना वरी परेरितकू अले हेंय राः ञुमू लगड बेज्जतिः लायिक ले ठहरो एना मेनाआ टेबोः ते, हेंकू दरबार वरी खुसी केनतेकू चलो यनु। 42लेकिन हेंकू हर दिन मँडिल ते अवुर ओड़ाः ओड़ाः ते सिक्छा लाय लगड, अवुर ईनिसु मसीहा हवे मेनाआ बढ़ियाँ खभेर लाये महल रेकू दोहो एना।

Currently Selected:

परेरित 5: ksz

Highlight

Copy