परेरित 20

मकिदुनिया अवुर उनान रे पवलुस सेनेना

1हुड़दंग मधिम एना, तहाँ पवलुस चेलाकू राःकेतेय समझो तेडकुआ, अवुर टेबोः बहल केडकू ते, हेंकू वरी मकिदुनिया हनतेय चलो एना। 2हेंय सींड़ परदेस तेय हलका चलोऊ अवुर चेला कुय टेबोः बहल केकू ते उनान रेय मेजेना। 3हेंय हेना रे तीन महिना दोहो केन राः बाद रे, हेंय डोंगा ते सीरिया सेनुः लगाडिय सँबह तना, लेकिन हेना तोलोग एहूदिकू तक तक रेकू दोहो एना, हेनाते हेंय मकिदुनिया ते मिड़ाः लगाडिय निरलेय तेडा। 4बिरीया रेनिय पिरूस कोड़ा होपोन सोपतुरूस, अवुर थिस्सलुनी सहर रेनिय अरिस्तरखुस अवुर सिकुन्दुस, अवुर दिरबे रेनिय गयुस अवुर तीमुथियुस, अवुर एसिया रेनिय तुखिकुस, अवुर तुरुफिमुस नेनकू पवलुस सुदा एसिया अँगम कू सेनेना। 5नेकू मड़ंग ते सेनकेन ते तोरोवास रेकू तँगी ले दोहो एनु। 6अले अखमीरी रोटी जोमकेड राः बाद रे फिलिप्पी वरी जहाज रेले रकब एना, हेना वरी पाँच दिन रे हेंकू थरे तोरोवास ले तयाः तेडा, अवुर हेना रे अले सात दिन ले दोहो एना।

तोरोवास रे पवलुस उतुखुसिय जियो तेडा

7हपता राः सुरू दिन अले रोटी टोविज लगड ले जवर एना, तहाँ हेना ञींदावत हन पवलुस चलोः मेनते दो होड़कू सुदाय टेबोः दोहो एनु, अवुर बरा बरी ञींद मेनतेय टेनेबोः दोहो एनु। 8अवुर अले जवर तन हेना अगस कोठरी रे, अखीर बती कू सलगो तडा। 9अवुर उतुखुस मेनते कू ञुमू तडिय हेनी ढिंगवा, खिड़की रे दुड़ूब केनतेय देड़ुम दोहो एनु। अवुर पवलुस मसत ञींद मेनतेय टेबोः दोहो एनु, तहाँ हेंय देड़ुम देड़ुम वरी पेयछत अगस वरिय लोजोर यनु, तहाँ गोजतू कू रिमतेडा। 10हेना वरी पवलुस अगड़ू केनते हेंय थरेय तबेर यनु, अवुर ओंगोड केडिय तेय कहनी तेडा, “अलोपे बो-रू, कहेकि निहों नेय जीवत गिआयू।” 11हेना वरी फेर अगस रे सेनकेन ते रोटिय टोविज तेडा, अवुर जोमकेते अँगाः मेनते हेंकू सुदाय टेबोः एना। हेना वरी फे-रिय चलो एना। 12हेना वरी हेंय ढिंगवा जीवत ते ओड़ाः कू अगतेडिया, अवुर सान्ति कू ञँमतेडा

तोरोवास वरी मिलेतुस हनतेय चलो एना

13अले पवलुस वरी मड़ंग ते जहाज रेले रकब यनु, अवुर असुस रेले सेनेना, हेना रे अले पवलुस हो रकब गोःयाय मेनते ले पसींद तडा। हेंय रकब गोःयाय लगड मड़ंग तेय लाय वडले दोहो एनु, कहेकि हेंय पयदल ते असुसिय मेजुः मेनते। 14हेना वरी हेंय असुस रेले ञँमतेडिया, तहाँ अले रकब केडिय ते मितुलेने रेले सेनेना। 15हेना वरी अले जहाज तेले चलो एना, हेना ञींदावत खियुस बँदेर ले तयाः तेडा, फेर हेना ञींदावत सामोस रे जहाज कू चड़ाँ तेडा, हेना वरी फेरेच हेना ञींदावत मिलेतुस ले तयाः तेडा। 16अवुर आसिया रे अलो देरीः मेनते दो, पवलुस इफिसुस बँदे ते सेनुः लगाडिय निरलेय तेडा, अवुर पेन्तिकुस्त परब रे एरुसलेम रे दोहोन मेनते, हेंय हलिते तयागे राः कोसिस रेय दोहो एना।

पवलुस कू बिदा तेडा

17पवलुस मिलेतुस वरी इफिसुस राः कलीसिया रेनकू सपायँड़ कुय एर राःतेडा। 18हेना वरी हेंकू हेंय थरे कू मेजेना, तहाँ हेंकू थरेय कहनी तेडा, “आसिया रे पहलो पहीलिंञ मेजेना, हेना चेका वरी ईञाः चाल बेहवार अपे मझँर रे काःते दोहो एना, हेना अपे पपाड़िआ पे। 19अवुर इंञ का का याःते नरम मन ते अवुर ईयाम ईयाम ते अवुर एहूदिकू राः दूखिंञ रिमतेडा, अवुर परभु राः सेवांञ कनारो तेडा, नआँ दोपे पना पड़िआ। 20अवुर जे जे टेबोः अपे राः फयदा लगड दोहो एना, हेना लाय लगड अवुर होड़कू मड़ंग रे अवुर ओड़ाः ओड़ाः सेनकोःते, चेडकू लगड कबोह मेनेंञ हिचकिचो गना। 21लेकिन इंञ एहूदिकू अवुर उनानिकू थरेंञ कहनिय दोहो एनु कि हेंकू भगवान हनते मन कू मिड़ाऊ, अवुर अबू रेनिय ईसु मसीह थरे कू बिसवासे। 22अवुर अब अँजोम पे, इंञ पवितर आत्मा जिधाय ते एरुसलेम हनते चलोः लगाडिय कुलयाडिञाँ, अवुर इंञ मेनेंञ पपाड़ी तना कि हेना रे इंञ थरे ची ची बितोआ? 23इंञ बस नअँञ पपाड़िआ कि पवितर आत्मा सींड़ सहर ते, लाय वंञ दोहो एनु कि हँथकड़ी अवुर कलेस अम लगड तयार इदाना। 24#2 तीमुथि 4:7अवुर इंञ अपन जीव हो मेनेंञ मोंह वताना। लेकिन इंञ दो परभु ईसु मसीह ओवाडिञाँ काम अवुर सेवा पूरा करे कींञ चहोः तना, नआँ मियाँटंग दावुड़ घयगिआ, अवुर हेना काम दो नआँ हवे कि भगवान राः किरपा राः बढ़ियाँः खभेर राः बारे ते गोवाहिंञ एमू। 25अवुर अब इंञ पपाड़ी तना कि अपे मेंडे कनय हो, जे जे राः मँझर रे इंञ भगवान राः राज राः बारे तेंञ लाय वडपेआ, हेंकू अब वरी फेर एरो पे ञेंलतेडिञाँ। 26हेनाते तेसिञाँः दिन रे इंञ अपे थरे गोवाही एमके तेंञ कहनी यडा कि अपे मेने पे बिसवास यड रेदो अवुर पे नासुः रेदो, हेना राः इंञ थरे कनर दोस कोवाआ।#20:26 उनानी भासा ते लोहू राः दोसी कोवाञाँ मेनते इदाना; लोहू मतलोब जीवि पे नोकसानुः रेदो ईञाः दोसी कोवाआ 27कहेकि इंञ भगवान राः सींड़ इक्छा अपे लायवा लगड कभी मेनेंञ हिचकिचो गना। 28हेनाते अनापे अवुर सींड़ झुंड रेनकू पे ञेंल अँजोमू। अवुर पवितर आत्मा अपे भगवान#20:28 परभु ईसु राः कलीसिया पे ञेंल अँजोम लगड अघुवाय बनो केडपेआ; हेंय हेना अनेज राः लोहू तेय तिला केडा। 29इंञ पपाड़ी तना, इंञ चलोः राः बाद रे अपे थरे पोपोगड़कू बिगवाकू मेजुआ, अवुर हेंकू हेना झुंड रे एरो कू दया एना। 30अनापे मँझर वरी हो केय झन होड़कू रिमुआ, हेंकू चेलाकू अनाकू तयोम हनतेकू ओर कू लगड कू भरमो कुआ। 31हेनाते सँवचेती तेपे दोहोनू; अवुर उहयारे पे; इंञ तीन बरिस सींञ ञींद ईयाम ईयाम ते सींड़ कुंञ चेतवन तेडकुआ।

32अवुर इंञ अपे भगवान राः ती रेंञ जिमा यडपेआ, अवुर हेंय राः किरपा बचानिंञ जिमा वपे तना, हे-ना बिसवास रे बड़हो पेआ, अवुर हे-ना पवितर होड़कू सुदा हँक ओवा पेआ। 33अवुर इंञ कनय राः सोना चाँदी चहे ओढ़ना कपड़ा रे मेनेंञ लोभो गडा। 34अपे खुद पे पपाड़िआ कि इंञ अपन हाँथ ते इंञ अवुर ईञाःकू गतिकू राः जरूरातिंञ पूरा तेडा। 35इंञ अपे सींड़ चीज करो केतेंञ तिःवड पेआ, नेन याःते मेहनेत केते अबू बेगर बल जाँगड़ कुबू सम्भरो, अवुर परभु ईसु राः टेबोः उहयर बगी तबू, हेंय खूदिय कहनी केडा, ‘अँगेरे सेथा दो एएम बढ़ियाँ इदाना।’”

36नआँ कहनी केते हेंय उकड़ूम एना, अवुर सींड़कू सुदाय बिनती एना। 37तहाँ हेंकू सींड़कू अखीर कू ईयाम एना, अवुर पवलुस कू ओंगोड केडिय तेकू चोः तेडिया। 38हेंकू नआँ टेबोः पसींद केतेकू ईयाम एना, पवलुस कहनी तेडा कि ईञाः चेहरा फेर एरो पे ञेंलतेडा, अवुर हेंकू हेंय जहाज अँगम कू इदी अटु तेडिया।

Currently Selected:

परेरित 20: ksz

Highlight

Copy