परेरित 19

पवलुस इफिसुस सहर रे

1अपुल्लोस कुरिन्थि सहर रेय दोहो एना, हेना तोलोग पवलुस पहील ते सगोर देस होयोर होयोर ते इफिसुसिय सेनेना, अवुर हेना रे हेंय गोटाचार चेलाकू सुदाय जुमो एना। 2तहाँय होंबोर तेडकुआ, “ईसु मसीह थरे पे बिसवास तेड तोलोग अपे पवितर आत्मा पे ञँमतेडा कि मेने?” तहाँ कू जबाब वडिया, “अले दो पवितर आत्मा राः बारे ते अँजोम तु घली बेगर ले अँजोमा।” 3हेना वरी पवलुस फे-रिय होंबोर तेडकुआ, “फेर अपे ईया राः बतिस्मा पे तिला केडा?” तहाँ कू जबाब वडिया, “एहुन्‍ना राः बतिस्मा।” 4#मत्ती 3:11; मरकुस 1:4,7,8; लूका 3:4,16; एहुन्‍ना 1:26,27तहाँ पवलुस कहनी तेडा, “एहुन्‍ना दो पाप वरी मन मिड़ाः राः बतिस्माय एमतेडा। हेंय होड़कू थरेय कहनी तेडा, इंञ तयोम तेय मेजुः तना मतलोब ईसु मसीह थरे पे बिसवासे।” 5नआँ अँजोम केते परभु ईसु राः ञुमू ते बतिस्मा कू तिला तेडा। 6तहाँ पवलुस हेंकू भोःतु कुरे छुँवों छुँवों ते बतिस्माय ओवाकू दोहो एनु, तहाँ हेंकू थरे पवितर आत्मा अगड़ू एना, अवुर एट एटाः भासा तेकू टेबोऊ, अवुरकू भविस्यवाड़िय दोहो एनु। 7नआँ रे लगभग बारह झन कोड़ाकू दोहो एना।

8फेर पवलुस एहूदिकू राः आराधना ओड़ाः ते सेनकेन ते तीन महिना अँगम भगवान राः राज राः बारे ते निडर तेय परचारे, अवुर समझोकू लगाडिय अड़ा चवकीऊ। 9लेकिन कुछ होड़कू हठू कू दोहो एना, हेंय राः टेबोः मेने कू मनो गडा, हेंकू होड़कू मड़ंग रे नआँ रास्ता बढ़ियाँ कोवाआ मेनते कू कहनियू, हेनाते हेंकुय बगी वडकू ते, अनेज रेनकू चेला कुय हिगरो तेडा, अवुर रोज दिन तुरन्‍नुस राः स्कूल रे सेनकेन तेकू चरचाय दोहो एनु। 10दूय साल अँगम नेन घयते होया एना, हेनाते आसिया रे दोहो एनकू एहूदिकू, अवुर उनानिकू, सींड़कू परभु राः बचन कू अँजोम तेडा।

11भगवान पवलुस राः दोवारा ते, अखीर अदभूत कामिय तिब दोहो एनु। 12हेंय छुवों तेड हेना उरमाल अवुर सफी बेमारिया कुकू एर छुवों दो, हेंकू राः बेमारी वरी कू चिकन जोमु, अवुर भूतकू हो हेंकू वरी कू उडूंग जोम दोहो एनु। 13लेकिन जतकत होयोर होयोर ते झाड़ फूंक करे वाला कुछ एहूदिकू, भूतकू लगो कोःकू थरे न याःते कहनी केतेकू ओंगतेडा, “जे ईसु राः ञुमू ते पवलुस परचार यडा, हें-नी राः ञुमू ते इंञ कीरिया केमतेंञ कहनी वम तना उडूंगुःमी।” 14अवुर इसकिवा मेनते ञुमूत दोहो एनाय, एहूदिकू रेनिय बनाडेअय आजक रेनकू सात झन होपोनकू दोहो एना, हेंकू हो नेन घयतेकू कामे दोहो एनु। 15लेकिन भूत हेंकुय जबाब वडा, “ईसु दोंञ पपाड़िआ, अवुर पवलुस होंञ चिन्हों केडिया, अपे इयड कू हवे?” 16जे थरे भूत लगो तना, हेंकू थरेय टुटो एना, अवुरिय ञेंल सेथिया गोत्तेड कू, अवुर हेंकू एयसाय ञेंडतेड कुआ कि नगडा केनते अवुर अध घहिल केनते हेना ओड़ाः वरी कू ञींरयानू। 17नआँ टेबोः इफिसुस रे दोहोनकू एहूदिकू अवुर सींड़ उनानिकू थरे मिरीज यनु, हेंकू सींड़ कुकू बोरो यनु; अवुर हेना रे परभु ईसु राः ञुमू कू बड़ाई तेडा। 18बिसवास तेडकू मेंडे रे केय्यो झन अपन अपन पहील कू करो तेडा हेना काम, सींड़कू मड़ंग रेकू मनो तेडा। 19जादू टोना करो कू मेंडे, अखीर होड़कू अपन अपन जादू टोना राः कागद तकू जवर केते, सींड़कू राः मड़ंग रेकू तुयंग गोत्तेडू, हेना राः दाम तुकू जोरो तेड दो, पचास हजार चाँदी राः सिक्‍का मेनमोट दोहो एना। 20नेन घयते परभु राः बचन चरियो खुट हनते मिरीज चलो एना, अवुर नआँ होड़कू राः जीवन रे काम गोःतेडा।

21नेन्दोरा होया केन राः बाद रे, पवलुस मकिदुनिया अवुर अखाया ते एरूसलेम सेनुः लगाडिय पसींद तेडा। अवुरिय कहनी तेडा, “हेना रे सेनकोः राः बाद रे इंञ रोम हो सेनुः जरूरी इदाना।” 22हेनाते हेंय अनेज रेनकू सहेता एम कू मेंडे, बा होड़ तीमुथियुस अवुर इरास्तुस मकिदुनियाय कुलतेड किञाँ, अवुर अनेज कुछ दिन लगड आसिया रेय दोहो यनु।

इफिसुस रे हुड़दंग मचो एना

23ईसु थरे बिसवासे रे अनन्त जीवन ञँमुआराआ होर भगवान होड़कुय लाय वडा। हेना तोलोग नआँ होर राः बारे ते अखीर हुड़दंग मचो एना। 24देमेतिरियुस मेनते ञुमूत दोहोएन हेनी मियाँहोड़ सोनार दोहो एना। हेंय अरतिमीस देबी राः चाँदी राः मँडिलिय एर बनो दोहो एनु, कारीगरकू अखीर कामिय ओवाकू दोहो एनु। 25हेंय नेकू, अवुर एटाः चीज रेनकू कारीगरकू राः जवर केकू तेय कहनी तेडा, “एगा होड़कू, अपे पपाड़ी तना कि नआँ बुता ते, अबू बढ़ियाँ ते नफा ञँमुः तना। 26अपे ञेंलियाडा पे अवुर पे अँजोम यडा कि नेय पवलुस इफिसुस रे भर मेने, बल्कि सींड़ आसिया छेतर रे लहरो पुसलो केकू ते, अखीर होड़कुय भरमो गोत्तेडा, हेंय कहनिया कि होड़कू बनो केडकुआ हेंकू मूरती कू भगवान न लगे। 27नआँ राः चलते ते अबू राः धंधा भर दो एरो बदनाम एना, बल्कि बडेअय देबी अरतिमीस राः मँडिल कनर कोवाआ मेनते कू जे-रेआ, नआँ हो डर इदाना, अवुर नेय देबी राः पूजा सींड़ आसिया छेतर रेनकू, अवुर गोटा दुनिया रेनकू पुजाया, नेय राः मान दान हो अडुआ।”

28नआँ कू अँजोम तेड तहाँ कू धको मुरमुरो यनु, अवुर कू हाक हाक तेकू कहनियूँ, “इफिसिकू रेनिय अरतिमीस देबी बडे गिआयू!” 29गोटा सहर रे डींडिल यनु। होड़कू मकिदुनिया रेनकींञ गयुस अवुर अरिस्तरखुस, नेकींञ पवलुस सुदा कींञ सेन बेड़ाः दोहो एनु, हेंकींञ कू सब गोत्तेडू, अवुर मियाँ सोत्ते रंगसाला#19:29 अखीर होड़कू जवारुःआ मियाँटंग बडाआ ओड़ाः हवे हनतेकू हुंको एना। 30पवलुस होड़कू थरे भीतारिय सेनुः मेनते, लेकिन चेलाकू मेने कू इकम सेनगाडिया। 31आसिया छेतर रेनकू गोटाचार अधिकारिकू, पवलुस रेनकू गतिकू दोहो एना, हेंकू होकू कहनी गोत्तेडू कि हेंय रंगसाला रे अलोय सेनुऊ। 32हेना सभा रे हुड़दंग मचो यनु। अवुराःकू एटाआ कू कहनी दो अवुराःकू एनेटाःकू पटेसाःवा; ना रे अबू ची बू जवर वडा मेनाआँ हो अखीर होड़कू मेने कू पपाड़ी दोहो एनु। 33भीड़ रे गोटाचार एहूदिकू, सिकन्दर कू समझो केते मड़ंग हनतेकू ढोकलो तेडिया। अवुर सींड़ कुकू जपनोः लगड सिकन्दर तीत तेय इसारा वकू, ताकि हेंय होड़कू मड़ंग रे जबाबिय एम सकोऊ। 34होड़कू पपाड़ियानू कि नेय एहूदी हवे, तहाँ सींड़कू लगभग दूय घंटा मेनमोट न याःतेकू हाक एना, “इफिसिकू रेनिय अरतिमीस, बडे गिआयू।” 35तहाँ सहर रेनिय मंतिरी#19:35 हेंय राः जिमेदार हवे सींड़ चीज राः लिलिखो। होड़कू सानित केकू तेय कहनी तेडा, “ए इफिसुस रेनकू होड़कू, अपे इफिसि सहर रेनिय बडेअय देबी अरतिमीस राः मँडिल अवुर अगस वरी लोजोर केनाय मूरती राः देख रेख कू हवे मेनाआ, ईया मेने पपाड़िआ? 36नआँ टेबोः कनाय एरो नहकार सको एना, अपे सानित तेपे दोहोनू, अवुर बेगर सोचो बुझो ते कनर अलोपे करो। 37अपे नेकू होड़कू नआँ रेपे सब अक्‍केड कुआ, नेकू कनारा मँडिल हो बेगर कू लुसीआ, अवुर अबू रेनिय देबी हो बेगर कू निन्दाया। 38अगर दिमेतिरियुस अवुर हेंय गतिकू कारीगरिकू कनाय राः बिरूध रे, सिकायित इदान रेदो, कोट खुला इदाना, हेना रे सेनकोःते अधिकारिकू थरे कू लाय सकोआ। 39अगर अपे अवुर कनर बात होंबोर गिसन यड पे रेदो, नियम राः सभा रे हेना राः फसला होयाआ। 40कहेकि तेसिञाँः हुड़दंग राः चलते ते, अले थरे दोस लगोः राः डर इदाना, नआँ राः कनर कारन कोवाआ, अले न राः बारे ते कनर जबाब एरो ले एम सको एना।” 41नेन याःते कहनी केते हेंय सभा रेनकू होड़कुय बिदा तेडा।

Currently Selected:

परेरित 19: ksz

Highlight

Copy