परेरित 13

बरनबास अवुर साऊल कू कुलतेडा

1अन्ताकिया कलीसिया रे केय्यो झन भविस्यवक्‍ताकू अवुर भगवान राः टेबोः चेचेडकू दोहो एना, हेंकू ञुमू हवे, बरनबास, नीगर मेनते कू कहनी वय हेनी सिमोन, कुरेन रेनिय लुकियुस, हेरोदेस राजा सुदा बडे एन हेनी मनाहेम, अवुर साऊल। 2एक दिन हेंकू उपास केनते परभु राःकू भक्‍ति दोहो एनु, तहाँ पवितर आत्मा कहनी तेडा, “बरनबास अवुर साऊल जे काम लगाडिंञ राःकेड किञाँ, हेना काम लगड अलग कींञ पे।” 3तहाँ हेंकू उपास अवुर बिनती एना कू, अवुर बरनबास अवुर साऊल तीत कुते छुवों केडकींञ तेकू बिदा तेडकिञाँ।

पवलुस पपरचारिय उडूंग बोंहड़ी एना

4हेना वरी हेंकींञ पवितर आत्मा कुलतड किञाँ हेना राः अनुसार ते सिलूकिया कींञ सेनेना, अवुर हेंकींञ हेना वरी जहाज रे रकब केनते साइपरास टापू हनते कींञ चलो एना। 5अवुर हेंकीञ सलमीस सहर रे तयाः केते, भगवान राः बचन एहूदिकू राः आराधना ओड़ाः तेकींञ लाय तेडा। अवुर एहुन्‍ना हेंकींञ रेनिय सेवेखिया दोहो एना। 6हेंकीञ सींड़ टापू भर होयोर होयोर ते पाफुस अँगम कींञ तयाः तेडा। हेना रे हेंकींञ एहूदी जादू वाला अवुर झूठा भविस्यवक्‍ता कींञ ञँमतेडा, नेय ञुमू बरईसु मेनते दोहो एना। 7बरईसु, अधिकारी सिरगियुस पवलुस सुदाय दोहो एना। नेय अधिकारी बुद्धमान होड़ दोहो एना। नेय बरनबास अवुर साऊल अनेज एचे रे राःके कींञ ते भगवान राः बचन अँजोम गिसन तेडिया। 8लेकिन बरईसु, (उनानी भासा ते इलीमास मेनते कू कहनी वया) जादू वाला, बडेअय अधिकारी अलोय बिसवासे लगड हेंकीञिंय बिरोध तेडा। 9तहाँ पवलुस मेनते हो ञुमूत इदान हेनी साऊल, पवितर आत्मा ते भरपूर केनते हेंय एक ढीठ तेय तको तेडिया, अवुरिय कहनी तेडा, 10“ए जे-निरीता छल कपट अवुर धोधोखा लगड ओसताज केनाय सयतान होपोन, सगोर बढ़ियाँः चीज रेनिय मुदेय अम परभु राः सही रास्ताम उलट पुलट यड हेना, एरोम बगी वडा किदो?#नीति 10:9; होसे 14:9 11नआँ पपाड़िकोः मी, परभु राः हाथ अम थरे लगो केना; कुछ समय लगड अम अंद्हा अमू अवुर बेर तरास एरोम ञेंल सको एना।” तहाँ तुरेत्ते हेंय मेड अंधरा यनु, अवुर अंधरा बगी यनु। अवुर हेंय कनय डोरियोविय मेनते जात कात हनिय टंम्बड़ो बेड़ा। 12तहाँ हेंय अधिकारी हेना घटना ञेंलते, अवुर परभु राः बारे ते टेबोः अँजोम केतेय अकचँदो यनु, अवुरिय बिसवास तेडा।

पिसिदिया रे पवलुस सेनेना

13फेर पवलुस अवुर गतीत कींञ पाफुस वरी जहाज ते पंफूलिया राः पिरगा रेकू मेजेना; अवुर एहुन्‍ना हेंकींञ बगी वते एरुसलेम हनतेय मिड़ाः यनु। 14अवुर हेंकींञ पिरगा वरी मड़ंग हनते कींञ तोरा एना, अवुर पिसिदिया राः अन्ताकिया रेकींञ सेनेना। सब्द राः दिन आराधना ओड़ाः रे सेनकेन तेकींञ दुड़ूब यनु। 15धरम नियम अवुर भविस्यवक्‍ताकू राः कागद पड़हो केड राः बाद रे, आराधना ओड़ाः रेनकू अधिकारिकू नआँ याःते हेंकींञ थरे कू एर होंबोर तेडकुआ, “एगा भाई कींञ, होड़कू चेडकू लगड कनारा टेबोः अबा राः मन रे इदान रेदो लायेबा।” 16तहाँ पवलुस चड़ाँ एनायू, अवुर तीत तेय इसारा वडकुआ, अवुरिय कहनी तेडा, “ए इसराएलिकू, अवुर भगवान राः डर-भय ते दोहोनकू, अँजोमे पे। 17इसराएलिकू रेनिय भगवान अबू रेनकू दादी पुरखा कुय चुनो तेडा, अवुर नेकू मिसरी देस रे परदेसिकू घयतेकू दोहोएन रे, हेंकुय बड़हो तेडकुआ अवुर अनेज राः सक्‍ति ते हेना देस वरिय उडूंग अगतेड कुआ।#निर्ग 1:7; 12:51 18अवुर लगभग चालीस बरिस अँगम सुनहर ओत रे हेंकू कुड़कुड़ो एन हेना, अवुर चाल बेवहारिय सहो तेडा।#गिनती 14:34; बेवस्था 1:31

19अवुर कनान देस रे सात गोटंग जातकू नास केकू ते हेंकू राः जमीन लगभग चार सव पचास बरिस अँगम अबू रेनकू दादी पुरखाकू राः हाँथ रे हेंकू राः हँक होयाः लगाडिय एमतेडा।#बेवस्था 7:1; एहो 14:1

20अवुर भगवान हेंकू लगड न्यायेअयिय कुलतेडा। अवुर भविस्यवक्‍ता समूएल अँगम नेन याःतेय ओवाकू दोहो एनु। 21तहाँ इसराएलिकू, अले लगड मियाँहोड़ राजा चहोआ मेनते कू माँग तेडा, अवुर भगवान हेंकू लगड बिन्यामीन गोति रेनिय कीस कोड़ा होपोन साऊल राजाय बनो तेडा, अवुर हेंय चालीस बरिस अँगामिय राज तेडा।#1 समू 8:5; 10:21 22हेना वरी साऊलिय हटो केते, भगवान हेंकू लगड राजा दाऊदिय बनो तेडा। दाऊद राः बारे ते भगवान गोवाहिय एमतेडा, ‘इंञ मियाँहोड़ होड़, ईसेय कोड़ा होपोन दाऊद, ईञाः मन घियाअय ञँमियाना, ने-नी ईञाः सींड़ इक्छाय पूराया।’#1 समू 13:14; 16:12; सिरिंग 89:20 23ने-नी दाऊद राः पिढ़ी रे भगवान अनेज जबान तेड हेना राः अनुसार ते इसराएलिकू उबारय ईसुय कुलतेडा। 24नेय मेजुः वरी मड़ंग ते एहुन्‍ना इसराएल रेनकू सगोरकू थरे मन मिड़ाः राः अवुर बतिस्मा राः बारे तेय परचार तेडा।#मरकुस 1:4; लूका 3:3 25एहुन्‍ना अनेज राः करताबिय पूरा बंचो तोलोगिय कहनी तेडा, ‘अपे इंञ ईया पे अड़ींग वंञ तना? भगवान कुलेय लगाडिय जबान केडा, हेनी इंञ न लगे। लेकिन हेंय इंञ तयोम तेय मेजुः तना, इंञ हेंय कटा राः फनहीं तुलूज लायिक हो कोवाञाँ।’ मेनते एहुन्‍ना कहनी तेडा।#मत्ती 3:11; मरकुस 1:7; लूका 3:16; एहुन्‍ना 1:20,27

26एगा भाईकू, अपे अबराहम रेनकू चोंडिजकू हवे, अवुर भगवान राः डर-भय ते दोहोनकू अबू लगड उबारुआ हेना खभेरिय कुलकेडा। 27कहेकि एरुसलेम रे दोहोनकू अवुर हेना रेनकू अधिकारिकू ईसु मेने कू चिन्हों गडिया, अवुर हर सब्द राः दिन गँड़ीं, भविस्यवक्‍ताकू राः टेबोः कू पड़होवे दोहो एनु, हेना मेने कू जेर गडा। हेनाते हेंकू ईसु बदी केडिय ते हेना टेबोः कू पूरा तेडा। 28हेंय थरे मिरतू दंड ओवय राः कनारा गलती मेने कू ञँमगाडा, हेंडे रेहो ञेंड गोजेय लगड पिलातुस थरे कू माँग तेडा।#मत्ती 27:22,23; मरकुस 15:13,14; लूका 23:21-23; एहुन्‍ना 19:15

29हेंय राः बिसेय ते जो कुछ कू लिखो तडा, हेना सगोर टेबोः कू पूरा तेडा, हेंडे हेंकू कुरूस वरी अगड़ू केडिय ते मरघटी रेकू दोहो तेडिया।#मत्ती 27:57-61; मरकुस 15:42-47; लूका 23:50-56; एहुन्‍ना 19:38-42 30लेकिन भगवान हेंय गोजेन रेहो, फे-रिय जियो तेडिया। 31अवुर गलील जिला वरी हेंय सुदा एरुसलेम कू मेजताना हेंकू थरे केय्यो दिन मेनतेय देखर एना;#परेरित 1:3 जे जे कू ञेंलवाडिया, हेनकू होड़कू मड़ंग रे हेंय रेनकू गोवाहिकू हवे। 32अलिंञ अबू रेनकू दादी पुरखाकू थरेय जबान तेडा, हेना राः बिसेय ते नआँ बढ़ियाँः खभेर लिंञ लाय वपे तना। 33भगवान ईसुय जियो केडते, हें-ना जबान अबू रेनकू चोंडिजकू लगाडिय पूरा केडा; जेयसे कि एटाआ सिरिंग रेहो न याःते लिखल इदाना,

‘अम इंञ कोड़ा होपोन हवे, तेसींञ

इंञ अपुमिंञ बनो यना।’#सिरिंग 2:7

34नआँ टेबोः राः गोवाही ने-ना हवे कि भगवान हेंय गोजतनकू वरिय जियो तेडिया, अवुर हेंय राः देंह मेनेय एनेम सोया गडा। नआँ राः बारे ते भगवान कहनी तडा,

‘इंञ दाऊद थरेंञ जबान केड हेना पवितर अवुर थीर ते दोहोना आसीसिंञ ओवा मिआँ।’#एसा 55:3

35अवुर एटाः सिरिंग रे नआँ याःतेय कहनी केडा,

‘अम अपन पवितर होड़ एरोम एनेम सोया वडिया।’#सिरिंग 16:10

36दाऊद दो भगवान राः इक्छा राः अनुसार ते अनेज राः समय रेय सेवा तेडकुआ, अवुरिय गोजेना। अवुर अनेज रेनकू पुरखाकू सुदा कू जतन तेडिया, अवुरिय सोया एना। 37लेकिन भगवान गोजतन वरी ईसुय जियो तेडा, अवुर हेंय मेनेय सोया गना। 38एगा भाईकू, पपाड़िकोःपे कि ईसु राः दोवारा ते, पाप राः माफी ञँमुआ, हेना राः खभेर लिंञ लाय वपे तना। 39धरम नियम मनो ते अपे पाप वरी छुटकारा बेगर ञाँमा। लेकिन हेनेना पाप वरी ईसु अनेज थरे कू बिसवासेआ, हेंकू सगोरकू छुटकाराय ओवा कुआ। 40हेनाते सँवचेती तेपे दोहोनू, भविस्यवक्‍ताकू कहनी केड हेना टेबोः अपे थरे हो अलो उतरोः जहानू,

41‘ए नीनिदाकू, अँजोमे पे,

अवुर अकबको कोःते पे गोजुऊ;

कहेकि इंञ अपे राः जबाना रे

मियाँटंग एयसा कामिंञ काम यडा,

कि अगर कनय अपे हेना टेबोः कू लाय वपे रेदो, कभी एरो पे बिसवास तेडा’।”#हब 1:5

42पवलुस अवुर बरनबास हेना आराधना ओड़ाः वरी कींञ उडूंगुः दोहो एनु, तहाँ होड़कू मेजुः तना सब्द राः दिन नआँ टेबोः फेर बा लाय वले मेनते कू कहनी वडकिञूँ। 43सभा उड़ास एन तहाँ, एहूदिकू अवुर भगवान राः डर-भय ते दोहोनकू अनजातकू अखीर होड़कू, बरनबास अवुर पवलुस तयोम तेकू सेनतेडा; अवुर नेकींञ भगवान राः किरपा पे चिन्हों अवुर हेंय राः होर तेपे से-ने मेनते कींञ चेडकू अवुर कींञ समझोकू।

पवलुस अनजातकू थरे पपरचारिय बोंहड़ी तेडा

44ते-रा सब्द दिन लगभग गोटा सहर रेनकू भगवान राः बचन अँजोम लगड कू जवर एना। 45लेकिन एहूदिकू होड़कू ञेंलते हिसका एना कू, तहाँ हेंकू पवलुस टेबोः तेड हेना बिरोध रे, निन्दा टेबोः कू उडूंग तेडा। 46लेकिन पवलुस अवुर बरनबास हिमत केते कींञ कहनी तेडा, “भगवान राः बचन मड़ंग ते अपे एहूदिकू लाय वपे लगड जरूरी दोहो एना, लेकिन अपे हेना मेने पे मनो गडा, अवुर अनन्त जीवन ञँम लायिक मेने पे बनोः तना। हेनाते अलिंञ अनजातकू हनते लिंञ पँजे यडा। 47कहेकि परभु न याःतेय हुकूम वडलिञाँ,

‘इंञ अम अनजातकू लगड इंजोत हवे मेनतेंञ ठहरो केडमिआँ,

ताकि अम धरती राः छोर अँगम पाप वरी माफी ञँमुः राः टेबोः मी लाय वकू।’”#एसा 49:6

48नआँ अँजोम केते अनजातकू खुसी एना, अवुर भगवान राः बचन कू बडेय वडा; अवुर अनन्त जीवन ञँम लगड चुनो तडकुआ, हेंकू बिसवास तेडाकू। 49तहाँ परभु राः बचन सगोर जघा रे मिरीज यनु। 50लेकिन एहूदिकू, बड बडे ओड़ाः तेनकू भगवान राः डर-भय ते दोहोनकू कोड़िकू, अवुर सहर रेनकू बड बडे होड़कू कू भड़को तेडा, अवुर हेंकू पवलुस अवुर बरनबास कू अड़ंगा तेडा, अवुर अकू इलाका वरी कू उडूंग गोत्तेड किञूँ। 51तहाँ हेंकींञ हेंकू मड़ंग रे कटत कींञ राः धुड़ी कुटा केते इकुनियुम हनते कींञ चलो एना। 52अवुर चेलाकू खुसी अवुर पवितर आत्मा तेकू भरपूर चलो एना।#मत्ती 10:14; मरकुस 6:11; लूका 9:5; 10:11

Currently Selected:

परेरित 13: ksz

Highlight

Copy