ZEKARIA 3
3
1Mba yangulweza Yoshua, sasendote mukwa lutwe, kanamana kumeso ja mungelo wa Yehova, ni Satana kanamana ku chindume chenyi amusume. 2Yehova yamba kuli Satana ngwenyi, Satana, Yehova akukanjise! Yehova mukwa kutongola Yerusaleme akukanjise! Yono hi mutondo ko wa kuchangumuna ku kahia? 3Achi Yoshua te kanamana kumeso ja mungelo ni mazalo a luchisa. 4Mungelo yamba kuli waze anamana kumeso jenyi ngwenyi, Muzulenu mazalo wano a luchisa. Mba yamba kuli iye ngwenyi, Tala hinakuchiza uhenge we; mungukujika ni mazalo a ndando yinene. 5Yingwamba ngwami, Ase chipangula chipema ha mutwe wenyi. O yasa chipangula chipema ha mutwe wenyi, ni kumujika mazalo apema, shimbu mungelo wa Yehova unachimanako.
6Mungelo wa Yehova yalongesa Yoshua ngwenyi, 7Yehova-wa-Tujita kanambe ngwenyi, Nyi muwenda mu majila jami, nikufunga shimbi jami, mukayilia zuwo liami, nikufunga maze jami, ni yami mungukwaha poko ya kunjila hakachi ka wano anamana kuno. 8Yena Yoshua sasendote mukwa lutwe, panjika hamwe ni akwenu waze akutwama kumeso je, mumu o kapwa chilayi. Tala, mungukaneha kavumbi kami mwe Mutango. 9Ha liwe lino hinasa kumeso ja Yoshua, liwe limuwika lia yihanda shimbiali mungwolaho sona jalio, munguchiza uhie wa chifuchi ha tangwa limuwika. Chocho kanambe Yehova-wa-Tujita. 10Yehova-wa-Tujita kanambe ngwenyi, Ha tangwa lize yenu eswe, mutu ni mutu, makalakenya mwenyembo kutwama mushi lia mutondo wenyi wa uva ni wa mukuyu.
Currently Selected:
ZEKARIA 3: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
