MATEU 5

1Ha kumona mbunga, wakandukile ha mulundu, ni muze te hatwama, tumbaji twenyi ejile kuli iye: 2Wapakwile kanwa lienyi, waalongesele, ngwenyi,

3Kawaha yiswale mu Spiritu, mumu wanangana wa malilu niwo.

4Kawaha waze akulinyenga, mumu kumakaalembejeka.

5Kawaha akwa kushimbika, mumu kumakatunga he hashi.

6Kawaha waze akwivwa usona ha ululi, ngwe zala ni pwila anevu, mumu kumakakuta.

7Kawaha akwa kwivwa keke, mumu kumakawana keke.

8Kawaha akwa kupema mu mbunge, mumu kumakamona Zambi.

9Kawaha yitakanyishi, mumu kumakaavuluka ngwo, Ana a Zambi.

10Kawaha waze anaahungumiona mumu ha ululi, mumu wanangana wa malilu niwo.

11Kunwawaha muze manuchoka, ni muze manuhungumiona, ni muze manulamikiza ungulungulu, mumu hali yami. 12Wahililenu, likwizenu, mumu kwononona chenu chinene mu malilu: mumu chocho ahungumionene aprofeta waze aliangilile.

13Yenu nuli mungwa wa hashi: alioze kachi mungwa unasamuka, neka mauyemesa nawa? Kuwatele nawa nichimwe shina kuumbila haze, akauliate kushi lia yiliato ya atu.

14Yenu nuli pangu lia hashi. Limbo lize liatungiwa ha mulundu kulishi kuhasa kuswama. 15Chipwe atu keshi kuwika ndeya, akayise mushi lia chisoka, alioze ha chikwachilo cha ndeya, mba muyitemuka kuli waze eswe ali mu zuwo. 16Chizechene pangu lienu likatemuke kumeso ja atu, hanga akamone yitanga yenu yipema, akachichimieke Tatenu yoze uli mu malilu.

17Kanda nushinginyeka ngwe nejile mukwonwona shimbi hanji mikanda ya aprofeta; chejile mukwonwona, alioze mukumanununa. 18Mumu pundu, ngunambe kuli yenu ngwami, Ndo lilu ni hashi muyihwa, toshi limuwika hanji toma yimuwika kuyichi kahwa nichimwe ku shimbi ndo yeswe muyiza kupwa. 19Kashika mweswawo matangula limuwika lia ku maliji ano akepe ahiana eswe a shimbi, malongesa atu chocho, kumakamuvuluka ngwo, Mukepe Wahiana eswe mu wanangana wa malilu: alioze mweswawo nwalinga, nikwalongesa, mwenawo kumakamuvuluka ngwo, Munene mu wanangana wa malilu. 20Mumu ngunambe kuli yenu ngwami, Kunuchi kanjila nichimwe mu wanangana wa malilu shina ululi wenu muuhiana uze wa akwa kusonyeka ni A-Fwariseu.

21Hinunevu ngwe achambile kuli a shakulu ngwo, Kanda ushiha; mweswawo mashiha matela upatwilo. 22Alioze yami ngunambe kuli yenu ngwami, Mweswawo matenuka ni mukwo matela upatwilo; ni mweswawo mamba kuli mukwo ngwenyi, Raka! matela upatwilo unene; ni mweswawo mamba ngwenyi, Yena chihepuke! matela upatwilo wa Ngehena ya kahia. 23Kashika kachi unalambula chawana che ku chilumbilo, ni kuze muwiwuluka ngwe mukwenu chuma chimwe a kuli nacho. 24Hichikako chawana che ku chilumbilo, Uliange kuya ukawane ni mukwenu, mba ukeze, ukalambule chawana che. 25Litese nikawashi ni mukwa kole ye, shimbu uli hamwe nenyi mu jila, kuchina hanji mukwa kole ye makukunjika kuli sopi, ni sopi makukunjika kuli kapita, akakumbile mu zuwo lia ususu. 26Pundu ngunambe kuli yena ngwami, Kuchi katuhukamo nichimwe ndo mufweta kalumbongo ka kusula.

27Hinunevu ngwe achambile ngwo, Kanda ulinga utanji: 28alioze yami ngunambe kuli yenu ngwami, Mweswawo matala pwo mukumuvwila usolo, halinga nenyi utanji kulu mu mbunge yenyi. 29Alioze kachi liso lie lia chindume mulikutalingisa, litombongonemo, ulimbile: mumu Shinaho utokese chihanda chimuwika, kuchina mujimba we weswe makaumbila mu Ngehena. 30Nyi kachi kwoko lie lia chindume mulikutalingisa, liteteko, ulimbile: mumu Shinaho utokese chihanda chimuwika kuchina mujimba we weswe maumbila mu Ngehena.

31Achambile nawa ngwo, Mweswawo malakula mukwo-pwo, akamwehe mukanda wa kulakula. 32Alioze yami ngunambe kuli yenu ngwami, Mweswawo malakula mukwo-pwo shina ha chikuma cha upangala, mamupwisa chitanji; ni mweswawo mambata yoze hanamulakula malinga utanji.

33Cheka nawa hinunevu ngwe achambile kuli a shakulu ngwo, Kanda nulishinga, alioze ukamanunune kuli Mwene mashingo je. 34Alioze yami ngunambe kuli yenu ngwami, Kanda nulishinga nichimwe; chipwe ni lilu, mumu ye ngunja ya Zambi; 35chipwe ni hashi, mumu che chitwamo cha yiliato yenyi; chipwe ni Yerusaleme, mumu lie limbo lia Mwanangana munene. 36Chipwe kanda ulishinga ni mutwe we, mumu kushi kuhasa kupwisa lukambu umuwika mutoma chipwe mulá. 37Alioze liji lienu likapwe, ewa, ewa; hanji ka, ka, mumu yeswayo yahiana yino yakatuka kuli mwe mupi.

38Hinunevu ngwe achambile ngwo, Liso ha liso, lizo ha lizo: 39alioze yami ngunambe kuli yenu ngwami, Kanda nukalimika ni ungulungulu: alioze mweswawo makulamba ha tafu lia chindume, mutewulwile likwo nawa. 40Kachi umwe mazanga kukusuma mulonga, akuchize mbinja, mwehe chikuto che nawa. 41Mweswawo makukamba kuya nenyi kilometro yimuwika, yako nenyi jiali. 42Hana kuli yoze makwita, ni kuli yoze mazanga kukutambula mukuli kanda ukamumba nyima.

43Hinunevu ngwe achambile ngwo, Ukazange mwenyembo we, ukavwile kole mukwa kole ye: 44alioze yami ngunambe kuli yenu ngwami, Zangenu akwa kole jenu, Wahisenu waze akunushinga, lingenu kanawa kuli waze akunuvwila kole, lembenu hali waze akunusaula ni waze akunuhungumiona; 45hanga nukapwe ana a Tatenu yoze uli mu malilu: mumu kakuvumbula tangwa lienyi hali api ni apema; kakunokesa vula hali akwa ululi ni hali yihenge. 46Mumu kachi nunazange waze akunuzanga, kwononona chika nuli nacho? Chipwe akwa kufwetesa lijimu keshi kulinga chimuwika, nyi? 47Mumu kachi nunameneka akwenu wika, ika nunalingi kuhiana akwo? Akwa mavungu keshi kulinga chocho, nyi? 48Kashika pwenu angunu, ngwe Tatenu wa mwilu kapwa mungunu.

Currently Selected:

MATEU 5: Csa

Highlight

Copy