LUKA 8

1Mba kulutwe lia kashimbu wapalikile ndusu ku limbo ni limbo, ni chihunda ni chihunda, nikwambujola sango lipema lia wanangana wa Zambi; ni kumi ni aali apwile hamwe nenyi. 2Mba amwe mapwo waze aawukile kuli maspiritu a ungulungulu, hi ku kukokoloka: ngwo, Maria jina likwo Ka-Mandala, kuli iye andemoniu shimbiali atuhukile. 3Joana, pwo lia Kuza, kafufuchi ka Heronde, ni Suzana ni akwo anji waze amuvumbikile ni yikumba yo.

4Muze mbunga yinene akungamine kuli iye, ni waze a ku limbo ni limbo apwile nikwizaza kuli iye, wahanjikile ni chishima ngwenyi, 5Chikuwa watuhukile mukukuwa mbuto yenyi: shimbu akuwile, yimwe yaholokelele ku sesa lia jila; ayiliachile kushi lia yiliato, ni tujila a mwilu ejile, ayitakishile. 6Yikwo yaholokelele ha mawe; muze yasokele, yomine, mumu meya akuhi. 7Yikwo yaholokelele mukachi ka mingonga; ni mingonga yasokele kumuwika nayo, yayikeketesele. 8Yikwo yaholokelele ha mavu apema, yasokele, yemine mbuto, kulakaji lia yisuho. Shimbu ambile yino yuma, watambikile ngwenyi, Yoze uli ni matwi a kwivwa, evwe.

9Tumbaji twenyi amuhulile chize chishima chino muchipwa. 10Iye wambile ngwenyi, Hananwehecho kunyingika yijimbikilo ya wanangana wa Zambi, alioze kuli akwo yinapu ni yishima; hanga nikutala, kechi kamona, nikwivwa, kechi kanyingika. 11Achi, chino we ulumbunwiso wa chishima ngwami, Mbuto, lie liji lia Zambi. 12Alioze waze a ku sesa lia jila, waze hanevu; kulutwe lia chize meza Ndiapu, machiza liji ku mbunge jo, hanga kechi kafuliela akaalamwine. 13Alioze waze ha liwe, waze muze hevwa, matambula liji ni uwahililo; ni wano keshi miji, mafuliela ha kashimbu, ni ha mwaka wa cheseko masulumioka. 14Yize yaholokelele hakachi ka mingonga, waze hanevu ni shimbu maya mu jila yo, makeketela ni yipikalo ni upite ni kuwaha cha mwono uno, keshi kwima mbuto ku ungunu. 15Yize ha mavu apema, waze mu mbunge jipema, jashishika, muze hevwa liji, malikakaminya, mema mbuto ni uhumikizo.

16Niumwe muze te hawika ndeya, mayifuka ni chisoka, hanji mayisa mushi lia muhela; alioze mayisa ha chikwachilo cha ndeya, hanga waze manjila akamone pangu. 17Mumu chuma cha kuswama chakuhi chize kechi kachisolola; chipwe chuma cha kuhengama chize kechi kachinyingika, nikuchisolola. 18Kashika kanyamenu ngwe chize munwivwa; mumu mweswawo ukwete, kumakamwaha; ni mweswawo keshi nacho, chipwe chize kananyongo ngwenyi, Nguli nacho, mamuchizacho.

19Naye ni ana-akwo ejile kuli iye, alioze kahashile kuheta kuli iye mumu ha mbunga. 20Mba amulwezelecho ngwo, Noko ni anaakwenu kanamana haze kanazange kukumona. 21Iye waakumbulwile ngwenyi, Mama ni ana-akwetu wano ha kwivwa liji lia Zambi kakulilinga.

22Tangwa limwe wanjilile mu ulungu, iye mwene ni tumbaji twenyi; iye wambile kuli ayo ngwenyi, Tuzaukenu, tuye mu sali lia Chitende; no akatukile ku ngenge. 23Shimbu achili nikuzauka, iye wayile tulo: ni kakundukundu walundumukine ha Chitende, ni ulungu waputukile kuzala ni meya, apwile mu Utoji. 24O ejile kuli iye, amulawishile ngwo, Mwata, Mwata, tunatoko. Iye walawile, Wámbilile fuji ni kufuza cha meya: neyo yaholele, kwapwile kúlú. 25Iye ngwenyi, Ulihi Ufulielo wenu? O nikwivwa woma, akomokene, nikuliamba umwe kuli mukwo ngwo, Yono iya mámba chipwe fuji ni meya, muyimwononokena?

26O ahetele ku chifuchi cha A-Ngarase, chize chalitalangana ni Ngalileya. 27Muze atuhukile hashi, umwe lunga wa ku limbo watakanyine nenyi, mwenawo wapwile ni andemoniu shimbu linene, kazalile hina, katwamine mu zuwo, alioze hakachi ka chifuka. 28Muze amwene Yesu wakololokele nikufulamana kumeso jenyi, iye ni liji linene wambile ngwenyi, Kuchi yami ni yena, Yesu mwe Mwana wa Zambi Chitunda? Ngunaliumbu kuli yena ngwami, Kanda ungupinjisa kama. 29Mumu te hamba Spiritu ya luchisa atuhuke muli mutu. Mumu kanji wamukwachile: ni atu amulayile wa kukasa ni malenge ni kuli; iye nikupatula makana pundu, amuhungumionene kuli ndemoniu ku puya. 30Yesu wamuhulile ngwenyi, Jina lie, yena iya? Iye wambile ngwenyi, Yami Tununu, mumu te anji anjilile muli iye. 31Waliumbile kuli iye, ngwenyi, Kanda ututuma mu jondo. 32Kwapwile kuze mbunga ya ngulu anji kanali ha mulundu, o aliumbile kuli iye, aatayize kunjila muli ayo. Iye waatayijile. 33Mba andemoniu atuhukile muli mutu, anjilile muli ngulu ni mbunga alundumukine ha mbongo mu Chitende, yafwa.

34Muze waze aalishile amwene chize alingile, achinyine akachambulule mu limbo ni ku minda. 35O atuhukile mukumona chize chapwile, ejile kuli Yesu, awanyine mutu yoze muli iye hatuhuka andemoniu, kanatwama ku yiliato ya Yesu, hazala hina, hapwa ni mana, no evwile woma. 36Waze achimwene, aambulwilile ngwe chize apwishile mungunu mukwa andemoniu. 37Ni chizavu cheswe cha ku chifuchi cha A-Ngarase amulembele akatuke kuli ayo: mumu evwile woma wunji; iye wanjilile mu ulungu akahiluke. 38Alioze yoze lunga muli iye atuhukile andemoniu, waliumbile kuli iye hanga akapwe hamwe nenyi: alioze washikile nenyi ngwenyi, 39Hiluka ku zuwo lie, ukambujole yuma yinene hakulingila Zambi. Iye wayile kwenyi, nikwambujola ndusu mu limbo lieswe yuma yinene amulingilile Yesu.

40Muze Yesu ahilukile, mbunga amusambililile; mumu o eswe apwile nikumutalatala. 41Kumanyi, lunga wejile, jina lienyi Yara, iye wapwile mukwa kuyula sunangonga, wafulamanyine ku yiliato ya Yesu, waliumbile kuli iye, eze ku zuwo lienyi; 42mumu wapwile ni mwana umuwika wa pwo ni ngwe kumi lia miaka ni miaka yiali, wapwile hakamwihi ni kufwa.

Alioze shimbu ayile, mbunga amushinjekele. 43Ni pwo, yoze wapwile ni musongo wa kuhita manyinga kumi lia miaka ni miaka yiali, mwenawo wahwishile kulu yikumba yenyi yeswe kuli mbuki, alioze kahashile kumuwuka niumwe. 44Wejile kunyima, wasele minwe ku lupula wa hina lienyi, ni haze hene kuhita cha manyinga jenyi chalitwaminyine. 45Yesu wambile ngwenyi, Iya wangusa minwe? Muze eswe alikalile, Petulu ni waze apwile hamwe nenyi ambile ngwo, Mwata, mbunga anakujingilika, nikukushinjeka, ni yena ngwe, Iya wangusa minwe, nyi? 46Alioze Yesu ngwenyi, Umwe wangusa minwe; mumu kunevwa tachi kujatuhuka muli yami. 47Muze pwo amwene kaswamine, wejile nikuchikima, iye nikufulamana kumeso jenyi, wambulwile kumeso ja atu eswe ha chikuma chize amusele minwe ni ngwe chize wahindukile haze hene. 48Wambile kuli iye ngwenyi, Mwanami, hamuka; ufulielo we hiwakupwisa mungunu; uye kanawa.

49Shimbu te achili nikuhanjika, umwe wa ku zuwo lia mukwa kuyula sunangonga yeza, nikwamba kuli iye ngwenyi, Mwané hafwa, kanda ukatalisa Longeshi nawa. 50Alioze Yesu ha kuchivwa, wamukumbulwile ngwenyi, Kanda wivwa woma; fuliela lume, iye kumakamupwisa mungunu. 51Muze ahetele ku zuwo, katayijile niumwe kunjila, shina Petulu ni Tiangu ni Yoano, ni tato ni naye ya mwana-pwo. 52Eswe te kanalili, nikulila mbimbi hali iye; alioze wambile ngwenyi. Kanda nulila; mumu kafwileko, alioze mu tulo ali, 53O amusehele, nikunyingika ngwo, Hafwa kulu. 54Alioze iye waatuhwishile eswe, iye, nikumukwata ku kwoko, watambikile ngwenyi, Mwana, hinduka. 55Spiritu yenyi yahilukilile, wahindukile haze hene: neye wambile amwehe chimwe cha kulia. 56Ni yisemi jenyi alishikishilile; alioze waahele koki kanda akaambulwila niumwe chize alingile.

Currently Selected:

LUKA 8: Csa

Highlight

Copy