LUKA 7

1Muze te hamanununa maliji jenyi eswe mu matwi ja atu, wanjilile mu Kafwanaume.

2Ndungo ya umwe kapitau, mulemu kuli iye, Wayijile, te wambile kufwa. 3Muze evwile hali Yesu, watumine kuli iye makulwana a A-Yunda, nikumulembela, hanga eze akahindwise ndungo yenyi. 4O muze ejile kuli Yesu, aliumbile kuli iye ngwo, Kanatela ulinge chino hali iye; 5mumu kanazange vungu lietu, iye mwene watutungile sunangonga yetu. 6Yesu wayile hamwe no, ni muze haheta hakamwihi ni zuwo, kapitau watumine tusendo kuli iye, ngwo, Mwene, kanda ulikatalisa; mumu chatelele unjile mu zuwo liami; 7kashika chipwe chatelele kwiza kuli yena, alioze ambenu liji, ni mukweze wami kumahinduka. 8Mumu yami nawa nguli mutu angusele mushi lia chiyulo, ni nguli no mushi lia yami, maswalale, mungwamba kuli yono ngwami, Yako, mba maya; ni kuli mukwo ngwami, Tweya, mba meza; ni kuli ndungo ngwami, Linga chino, mba machilinga. 9Muze Yesu evwile yino yuma, wamukomokenene, watewulukilile ku mbunga yize amukawile ngwenyi, Chawanyine Ufulielo upwa haha, chipwe mu Izalele, ka. 10Ni waze aatumine, ha kuhilukila ku zuwo, awanyine ndungo te hahinduka.

11Ha tangwa likwo, wayile ku limbo jina lialio, Naine, ni anji a kuli tumbaji twenyi ni mbunga yinene ayile hamwe nenyi. 12Shimbu machikundama ku chikolo cha limbo, kumanyi, ambachile haze lunga mufu, mwana wa wika wa naye, iye twamishi; ni mbunga yinene ya ku limbo apwile hamwe nenyi. 13Muze Mwene amumwene, wamuvwilile keke, wambile kuli iye ngwenyi, Kanda ulila. 14Iye wakundamine, wasele minwe ku muhango; ni akwa kumbata amanyine, iye wambile ngwenyi, Mukweze, ngwami, Hinduka. 15Mufu wahindukile, waputukile kuhanjika, mba Wamuhanyine kuli naye. 16Eswe akwachile woma; o achichimiekene Zambi ngwo, Profeta munene hanasoloka hakachi ketu; chikwo ngwo, Zambi hanatale hali atu jenyi. 17Ni liji lino lia kutwala kuli iye liamwanganyine mu Yundeya mweswe, ni mu chifuchi cheswe cha kujingilika.

18Tumbaji twa Yoano amwambulwilile ha kutwala ku yino yuma yeswe. 19Mba Yoano watambikile aali a kuli tumbaji, waatumine kuli Yesu, ngwenyi, Shina yena uli yoze meza, nyi? Shina mutatalatala mukwo? 20Muze malunga ahetele kuli iye, ambile ngwo, Yoano Chipapachisa hatutuma kuli yena, ngwenyi, Shina yena uli yoze meza, nyi? Shina mutatalatala mukwo? 21Ha ola yize yene wawukile anji ku misongo, ni yilungo, ni maspiritu a ungulungulu; walawishile meso ja tupuputa anji. 22Mba Yesu wakumbulwile ngwenyi, Yénu, nukambulwile Yoano chize hinwamona, ni chize hinwevwa; tupuputa kanalaula ku meso, yilema kanende, akwa mbumba kanapeme, ni afwa-matwi kanevu, afu kanahinduka, kuli yiswale kakwambujola sango lipema. 23Kawaha mweswawo kechi kanguvwila sonyi.

24Muze te tunganda twa Yoano hakatuka, waputukile kwamba ku mbunga ha kutwala kuli Yoano ngwenyi, Ika nwayilile ku puya mukutala? Lumbungu unanyiki ni fuji, nyi? 25Alioze ika nwayilile mukutala? Mutu unazala mahina a lefuna, nyi? Waze akuzala mahina ja uhenya, kali ni upite wunji nikuwaha, mapwa mu mazuwo ja mianangana. 26Alioze ika nwayilile mukutala? Profeta, nyi? Ewa, ngwami, Umwe Wahiana chikolo profeta. 27Yono hali iye chinasonewa ngwo,

Mungukatuma kanganda kami kulutwe lia meso je,

Mwenawo kumakalulika jila ye kulutwe lie.

28Ngwami, Hakachi ka waze akusemuka kuli mapwo, profeta wahiana Yoano Chipapachisa wakuhi niumwe. Alioze yoze mukepe Wahiana eswe mu wanangana wa Zambi kanapu munene Wahiana iye. 29Ata eswe ni akwa kufwetesa lijimu muze evwile, asambishile Zambi, se aapapachishile ni upapachiso wa Yoano. 30Alioze A-Fwariseu ni akwa shimbi alitunyine ha kutwala kuli ayo ene mana ja Zambi, se kaapapachishile kuli iye.

31Ngwe aya kashika mungupwisa atu ja chisemuko chino? Mba malifwa neya? 32O kanapu ngwe ana anatwama mu yitanda nikulitambika umwé kuli mukwo ngwo,

Twembanga ndembo kuli yenu, kunwahanganyine;

twalinyenganga kuli yenu kunwalilile.

33Mumu Yoano Chipapachisa kejile nikulialia, chipwe nikunwanwa vinyu, mba nunambe ngwenu, Ndemoniu akwete. 34Mwe Mwana Mutu haneza nikulia, nikunwa, mba nunambe ngwenu, Talenu, chipulutu ni chizengewi, kasendo ka akwa kufwetesa lijimu ni yivulumunyi. 35Alioze mana kanasambe hali ana jenyi eswe.

36Alioze umwe wa kuli A-Fwariseu wamulakenyene, alie hamwe nenyi, iye wanjilile mu zuwo lia Ka-Fwariseu, watwamine ku mesa. 37Kumanyi, pwo wa mu limbo, chivulumunyi, muze anyingikine te iye kanatwama ku mesa mu zuwo lia Ka-Fwariseu, wanehenemo kasaji ka yitumbo ya vumba lipema; 38iye, nikumana kunyima ku yiliato yenyi, nikulila, waputukile kusanyisa yiliato yenyi ni masoji jenyi, wayikusumwine ni kambu ja mutwe wenyi; wambejele yiliato yenyi, wayiwayishile ni yitumbo. 39Muze Ka-Fwariseu yoze wamulakenyene, achimwene, wambile mu mbunge ngwenyi, Yono nyi profeta manyingika yono pwo unamuse minwe, chize apwa, mumu iye chivulumunyi. 40Yesu wamukumbulwile, ngwenyi, Semone, chuma chimwe nguli nacho kwamba kuli yena. Iye yamba ngwenyi, Longeshi, ambenu. 41Ngwenyi, Umwe mukwa kuhana mikuli wapwile ni akwa mikuli aali; umwe wapwile ni kongo lia kulakaji atano a mbongo, ni mukwo makumi atano. 42Muze kapwile nacho nichimwe cha kufweta, waakonekenene eswe aali. Iya wa kuli ayo mamuzanga kuhiana? 43Semone wakumbulwile, ngwenyi, Ngunashinginyeka yoze amukonekenene lize liahiana. Wambile kuli iye ngwenyi, Hiwapatula kanawa. 44Iye, nikutewulukila kuli pwo, wambile kuli Semone ngwenyi, Unamono yono pwo, nyi? Nanjilanga mu zuwo lie, kwanguhele meya a kusanyisa yiliato yami, alioze iye hasanyisa yiliato yami, yayikusumuna ni kambu jenyi. 45Kwanguhele mbeju niyimwe, alioze iye hanga nanjilanga kalitwaminyine kumbeja yiliato yami. 46Mutwe wami ni yitumbo kwauwayishile, alioze iye hawayisa yiliato yami ni yitumbo. 47Kashika, ngwami, Ngunamukonekena milonga yenyi yinji; mumu wazangile chikolo: alioze yoze mamukonekena chikepe, mazanga chikepe. 48Iye wambile kuli iye ngwenyi, Ngunakukonekena milonga ye. 49Waze atwamine hamwe nenyi ku mesa, aputukile kwamba mu mbunge jo ngwo, Yono iya chipwe kakukonekena milonga? 50Iye wambile kuli pwo ngwenyi, Ufulielo we hiwakulamwina; uye kanawa.

Currently Selected:

LUKA 7: Csa

Highlight

Copy