LUKA 22

1Achi, chiwanyino cha mbolo kuyishi futunwiso hichakundama, jina liacho ngwo, Chizomboka. 2Ni asasendote akwa lutwe ni akwa kusonyeka afupile ngwe chize mahasa kumushiha; mumu evwile woma wa atu.

3Mba Satana wanjilile muli Yundase, jina lienyi likwo, Ka-Keriote, yoze hanamwalula wa kuli kumi ni aali. 4Iye wayile akahanjike ni asasendote akwa lutwe ni tupitau ngwe chize mamukunjika kuli ayo. 5O awahililile, alilakenyene kumwaha mbongo. 6Iye Watayijile kuchilinga, mba wafupile mwaka upema kumukunjika kuli ayo, muze kukushi mbunga.

7Mba tangwa lia mbolo kuyishi futunwiso hiliaheta, muze chatamba kushiha chitapo cha Chizomboka. 8Iye watumine Petulu ni Yoano, ngwenyi, Yénu, nukatuluiikile Chizomboka, hanga tukalie. 9O ambile kuli iye ngwo, Kulihi unazange yetu tukachilulike? 10Iye wambile kuli ayo ngwenyi, Muze hinwanjila mwimbo, lunga makatakana ni yenu, kanambata sapa ya meya; nukamukaule ku zuwo muze manjilamo. 11Nukambe kuli mwenya zuwo ngwenu, Longeshi ngwenyi, Chilihi chipatulo cha ngeji, muze mungukalila Chizomboka hamwe ni tumbaji twami? 12Iye kumakanulweza chipatulo cha kwilu, cha kwala; muze mwene nukalulike. 13O ayile, awanyine chizechene ngwe ambile kuli ayo, no alulikile Chizomboka.

14Muze ola hiyaheta, Watwamine ku mesa, ni apostolo hamwe nenyi. 15Iye wambile kuli ayo ngwenyi, Ni usona wunji hingunazange kulia Chizomboka chino hamwe ni yenu shimbu kanda ngwivwa lamba: 16mumu ngunambe kuli yenu ngwami, Chichi kachilia ndo muchimanunuka mu wanangana wa Zambi. 17Iye wanjile musenge ni muze te hasakwila, wambile ngwenyi, Wenu, nulianyinewo hakachi kenu: 18mumu ngunambe kuli yenu ngwami, Chichi kanwa nichimwe ku mihuko ya vindera chize ku haliapwila ndo wanangana wa Zambi hiweza. 19Iye wanjile mbolo, ni muze te hasakwila, wayipalwile, waaheleyo, ngwenyi, Yino mujimba wami auhanyine hali yenu: chino lingenu nukangwiwuluke. 20Ni musenge chizechene kulutwe lia kulia, ngwenyi, Musenge uno we usendo waha mu manyinga jami, waze anamwangana hali yenu. 21Alioze tatenu, kwoko lia yoze mangukunjika hamwe ni yami ha mesa lili: 22mumu mwe Mwana Mutu chamwenemwene maya ngwe amuselelecho; alioze lamba kuli yoze mutu mamukunjika! 23O aputukile kulihula hakachi ko, yoze hakachi ko malinga chuma chino.

24Kwapwile nawa kulihamika hakachi ko hali yoze hakachi ko mamuvuluka ngwo, Munene Wahiana eswe. 25Iye wambile kuli ayo ngwenyi, Mianangana ja mavungu kakupwa ni unene helu lio, ni waze akwete chiyulo helu lio kakwavuluka ngwo, Akwa kuwahisa. 26Alioze ni yenu kuchapwile chocho; alioze yoze munene Wahiana eswe hakachi kenu, akapwe ngwe kanuke; ni mukwa lutwe akapwe ngwe yoze wakuvumbika. 27Mumu iya munene Wahiana, shina yoze matwama ku mesa, nyi? Shina yoze mavumbika? Hi yoze matwama ku mesa ko, nyi? Alioze yami nguli mukachi kenu ngwe yoze unavumbika.

28Alioze yenu nuli waze hananyongonona hamwe ni yami mu yeseko yami; 29ngunannsela wanangana, chizechene ngwe Tata wanguselelewo. 30Hanga nukalile, nukanwine ku mesa yami mu wanangana wami. Kumunukatwama ha ngunja nikupatwila kumi lia mavungu ni mavungu aali a Izalele.

31Mba Mwene wambile ngwenyi, Semone, Semone, tala, Satana hananufupu hanga akanusale ngwe tiliku. 32Alioze naliumbile hali yena, hanga Ufulielo we kuuchi kahwa; ni yena muze hiwalumuka, ukajikijise mandumbu je. 33Wambile kuli iye ngwenyi, Mwene, ngunahase kuya hamwe ni yena chipwe ku zuwo lia ususu chipwe ku kufwa nawa. 34Iye wambile ngwenyi, Ngunakwambulwila Petulu, ngwami, Ndemba kechi katambika musono uno ndo yena mukalikala katatu ngwe kwangunyingikine.

35Iye wambile kuli ayo ngwenyi, Muze nanutumine kunushi chikwama, chipwe chipakumuna, chipwe haku, nwahonene chuma chimwe, nyi? O ambile ngwo, Nichimwe. 36Iye wambile kuli ayo ngwenyi, Alioze haliapwila yoze uli ni chikwama akachimbate, chizechene nawa chipakumuna; ni yoze keshi katana, akalanjise hina lienyi, akalande umwe. 37Mumu ngunambe kuli yenu ngwami, Chatamba chino chinasonewa kumanunuka muli yami ngwo, Amwalwile hamwe ni yitanguke: mumu yuma ya kutwala kuli yami songo yikwete. 38O ambile ngwo, Mwene, tala, kuno kwali tutana aali. Iye wambile kuli ayo ngwenyi, Kunahu.

39Iye watuhukile, wayile ngwe ndako yenyi ku mulundu wa Olevwe; ni tumbaji nawa amukawile. 40Muze aheteleko, wambile kuli ayo ngwenyi, Lembenu hanga kunuchi kanjila mu cheseko. 41Iye wasosolokele kuli ayo chipinji ngwe kukonga cha liwe; iye waliumbile ha makungunwa nikulemba ngwenyi, 42Tata, kachi unapale, Chiza kama musenge uno kuli yami, hindu hi upale wami ko, alioze niwe, ukalingiwe. 43Mungelo wa mwilu wasolokele kuli iye, nikumutakamisa. 44Iye nikupinda, walembele ni mbunge yeswe kuhiana, ni matukuta jenyi apwile ngwe masoto anene a manyinga anasotwoka hashi. 45Iye muze akatukile ku kulemba chenyi, wayile kuli tumbaji twenyi, waawanyine mu tulo mumu ha chinyengo. 46Iye wambile kuli ayo ngwenyi, Kuchi te nuli mu tulo? Katukenu, nulembe, hanga kunuchi kanjila mu cheseko.

47Shimbu machihanjika, mbunga kaneza, ni yoze jina lienyi, Yundase, umwe wa kuli kumi ni aali, wayile kulutwe lio, wakundamine kuli Yesu mukumumbeja. 48Alioze Yesu wambile kuli iye ngwenyi, Yundase, unakunjika mwe Mwana Mutu ni mbeju, nyi? 49Muze waze amujingilikile amwene chize muchikapwa, ambile kuli iye ngwo, Mwene, tulambe ni katana, nyi? 50Mba umwe wa kuli ayo walambile ndungo ya sasendote mukwa lutwe, wamutetele twitwi lienyi lia chindume.

51Alioze Yesu wakumbulwile, ngwenyi, Atayize chocho wika. Iye wasele minwe yenyi ha twitwi lienyi, wamuwukile. 52Hohene Yesu wambile kuli asasendote akwa lutwe ni tupitau twa tembele, ni makulwana, waze ejile hali iye, ngwenyi, Nunejila ngwe hali muhuza ni tutana ni mitondo, nyi? 53Muze napwile hamwe ni yenu tangwa ha tangwa mu tembele, kunwangukwachile: alioze ola yino niyenu, ni ya je tachi ja milima.

54O yamukwata, yamutwala, yamuneha ku zuwo lia sasendote mukwa lutwe; alioze Petulu wakawile kanonajila. 55Muze te hawika kahia muchima lia yize, hatwama hamuwika, Petulu Watwamine hakachi ko. 56Mba umwe mwana-pwo mukwa milimo, ha kumumona shimbu anatwama mu chite cha kahia, iye, nikumuhulikila meso, wambile ngwenyi, Yono nawa kapwanga hamwe nenyi. 57Alioze walikalile, ngwenyi, Pwo, chamunyingikine. 58Kulutwe lia shimbu likepe, mukwo wamumwene, wambile ngwenyi, Yena uli umwe wa kuli ayo; alioze Petulu wambile ngwenyi, Lunga, hi yami ko. 59Kulutwe lia shimbu ngwe ola yimuwika, mukwo walihalwile ngwenyi, Chamwenemwene, ni yono nawa kapwanga hamwe nenyi; mumu iye Ka-Ngalileya. 60Alioze Petulu wambile ngwenyi, Lunga, Chanyingikine chize unambe. Haze hene shimbu machihanjika, ndemba watambikile. 61Mwene watewulukile, watalile meso kuli Petulu. Petulu wewulukile liji lia Mwene, ngwe chize ambile kuli iye ngwenyi, Shimbu ndemba kanda achitambika musono uno, yena mukalikala yami katatu. 62Iye watuhukile, Walilile chikolo.

63Malunga waze akwachile Yesu, amukekwine, amulambile. 64O amufukile meso, amuhulile ngwo, Profeteza kuli yetu, iya wakulamba? 65Ni yuma yinji yikwo ahanjikile kuli iye, nikumushililika.

66Muze hikwacha, makulwana ja atu, e asasendote akwa lutwe ni akwa kusonyeka akungulukile; no amutwalile ku punga, ngwo, 67Kachi mwe Kristu yena, twambulwile. Iye wambile kuli ayo ngwenyi, Kachi mungunwambulwila, kunuchi kafuliela nichimwe. 68Nyi kachi mungunuhula, kunuchi kungukumbulula. 69Alioze chize ku haliapwila ndo kulutwe, mwe Mwana Mutu kumakatwama ku kwoko lia chindume lia tachi ja Zambi. 70O eswe ambile ngwo, Mwe Mwana Zambi yena, nyi? Iye wambile kuli ayo ngwenyi, Chize yenu nunambe pundu, yami nguli. 71O ambile ngwo, Kuchi tunafupu nawa ha Shindakenyo, mumu yetwene hitwevwa ku kanwa lienyi mwene?

Currently Selected:

LUKA 22: Csa

Highlight

Copy