LUKA 21

1Iye wahetwile meso wamwene pichi waze anambila yawana yo mu milambu. 2Wamwene nawa umwe twamishi wa pwo chiswale kanambilamo tumbongo tukepe twaali. 3Iye wambile ngwenyi, Chamwenemwene, ngunambe kuli yenu ngwami, Yono twamishi wa pwo chiswale kambilamo kuhiana eswe: 4mumu wano eswe cha ku upite wo hahana ku milambu; alioze iye cha ku uswale wenyi hahana cheswe anakapwa nacho.

5Shimbu amwe ahanjikile ha kutwala ku tembele, ngwe hayihenyamisa ni mawe apema ni milambu, wambile ngwenyi, 6Ha kutwala ku yuma yino nunamono, matangwa kumakeza muze kechi kahichika kuno liwe nilimwe ha likwo, lize kechi kalipuzula. 7O amuhulile, ngwo, Longeshi, mwiji muka kashika yino yuma muyikapwa? Chilayi cha kwiza cha yino yuma chika? 8Iye wambile ngwenyi, Kanyamenu kanda akanupiangula, mumu anji kumakeza mu jina liami, ngwo, Yami Kristu, ni mwaka hiwakundama: kanda nwakaula. 9Muze munwivwa ha jita ni yizungozungo, kanda nukasusumiana; mumu chatamba yino yuma kupwa hatangu; alioze songo kulichi kapwa kamunomuno.

10Hohene wambile kuli ayo ngwenyi, Akwa vungu limwe kumakakatukila akwa vungu likwo, ni akwa wanangana umwe Kumakakatukila akwa wanangana ukwo. 11Kumukukapwa minyiko yinene kweka ni kweka, ni tupunga ni yilungo. Kumukukapwa yuma ya kuvwisa woma ni yilayi ya mwilu. 12Alioze shimbu yino yuma yeswe kanda yipwa, kumakanukwata, kumakanuhungumiona, kumakanukunjika ku masunangonga ni mazuwo ja ususu, nikununeha kumeso ja mianangana ni manguvulu mumu ha jina liami. 13Alioze Kumuchikapwa kuli yenu mukuhana Shindakenyo, 14chipatulenu kashika mu mbunge jenu kanda nukapukuna shimbu kanda chize manukumbulula. 15Mumu kumungukanwaha kanwa ni mana, aze akwa kulimika ni yenu eswe kechi kahasa kuchinda chipwe kuhamika. 16Alioze kumakanukunjika chipwe kuli yisemi, ni asongo-ni-atu, ni usoko, ni tusendo; o kumakashiha amwe a kuli yenu. 17Kumakanuvwila kole kuli eswe mumu ha jina liami. 18Lukambu niumwe wa mitwe yenu kechi katoka. 19Mu uhumikizo wenu nukazuke mwono wenu.

20Alioze muze munumona Yerusaleme hayijingilika ni yilombo ya maswalale, hohene nukanyingike ngwenu, Kukuwa chayo hichakundama. 21Hohene waze mapwa mu Yundeya akachinyine ku milundu, ni waze mapwa muchima liayo akatuhukemo; ni waze mapwa mu yambu kanda akanjilamo. 22Mumu wano e matangwa a kukala milonga, hanga yuma yize yeswe yinasonewa yikamanunuke. 23Alioze lamba kuli waze mapwa ni ufumba ni kuli waze maamwisa ha matangwa aze! mumu kumukukapwa huli linene ha chifuchi ni utenu kuli atu ano. 24Kumakafwa ku lutwilo wa katana, kumakaatwala funge ku mavungu eswe; ni Yerusaleme kumakayiliata kuli akwa mavungu, ndo miaka ya akwa mavungu muyikamanunuka.

25Mba kumukukapwa yilayi mu tangwa ni kakweji ni matongonoshi; ni hashi kupinda cha mavungu ni kulifwita, ha lundunjila wa kalunga-lwiji, ni mikanya yenyi; 26atu nikulezumioka ha woma, ha kutalatala yuma yize muyiza ha yifuchi yeswe ya hashi, mumu tachi ja malilu kumujikanyika. 27Hohene kumakamona mwe Mwana Mutu kaneza mu lelwa ni tachi ni uhenya unene. 28Muze yino yuma muyiputuka kupwa, hetukenu, nutale kwilu; mumu ukule wenu unakundama.

29Iye wahanjikile chishima kuli ayo ngwenyi, Talenu mukuyu ni mitondo yeswe; 30muze muyisokoloka, munuchimona, mununyingika yenwene ngwenu, Lwiza hapwa hakamwihi. 31Chizechene ni yenu nawa muze munumona yino yuma kumanunuka, nukanyingike ngwenu, Wanangana wa Zambi uli hakamwihi. 32Pundu, ngunambe kuli yenu ngwami, Chisemuko chino kuchichi kahwa nichimwe ndo yuma yeswe muyiza kupwa. 33Lilu ni hashi kumuyikahwa, alioze maliji jami kechi kahwa nichimwe.

34Alioze keyelenu kuli yenwene kuchina hanji mbunge jenu mujilema ni upulutu, ni kuzengewa, ni yipikalo ya mwono uno, ni tangwa lize mulitulumuka hali yenu ngwe muheto susumuku hiliasoloka. 35Mumu chocho mulikeza hali waze eswe akutwama ha kuzazuluka cha hashi heswe. 36Alioze lenu ha shimbu lieswe, nikuliumba, hanga nukakumbe, nupuluke ku yino yuma yeswe kumuyikapwa, nukamane kumeso ja mwe Mwana Mutu.

37Ni tangwa ha tangwa, wapwile nikulongesa mu tembele; ni ufuku ha ufuku wapwile nikutuhwoka nikuuhwisa ha mulundu uze ngwo, Olevwe. 38Ni atu eswe alimenekene nikwiza kuli iye mu tembele mukumwivwa.

Currently Selected:

LUKA 21: Csa

Highlight

Copy