LUKA 2
2
1Achi, ha matangwa aze, kwakatukile shimbi kuli Sesare Angusetu, akasoneke yifuchi yeswe ya hashi. 2(Mba asonekene kusoneka chino chitangu muze Kwirinu apwile nguvulu ya Seria). 3Atu eswe ayile akaasoneke, mutu ni mutu ku limbo lienyi. 4José nawa wakatukile ku Ngalileya, ku limbo lia Nazare, wakandukile ku Yundeya, ku limbo lia David, jina lialio, Mbeteleme, mumu iye mukwa zuwo ni mukwa jimo lia David: 5hanga akamusoneke hamwe ni Maria, pwo lienyi, te kali ni ufumba. 6Mba shimbu apwileko, matangwa a kusema chenyi amanunukine. 7Iye wasemene mwanenyi wa lunga mutangu, wamuvungile mu mahina, wamupombesele mu chililo; mumu kumwapwile muhela hali ayo mu zuwo lia kuzeka ngeji.
8Kwapwile tufunga mu chifuchi chize kanafungu mapanga jo haze ha ufuku. 9Mba, mungelo wa Mwene wamanyine #2.9 pundu ngwo, muchikatala hali yetu. hehi no, ni uhenya wa Mwene watemukine ha kwajingilika; no evwile woma wunji. 10Mungelo wambile kuli ayo ngwenyi, Kanda nwivwa woma; mumu ngunanwambulwila sango lipema lia uwahililo unene, lize kumulikapwa kuli atu eswe. 11Mumu musono, mu limbo lia David, Chilamwina kanasemuka kuli yenu, iye Kristu mwe Mwene. 12Chino che chilayi kuli yenu; kumunukawana mwe mwana-kemba wa kuvunga mu mahina, kanapombo mu chililo. 13Mba susumuku kwapwile hamwe ni mungelo, yizavu ya tujita twa mwilu kanahalisa Zambi, ngwo,
14Uhenya kuli Zambi mwilu mwahiana,
Hano hashi sambukila hakachi ka atu akumuwahila.
15Muze angelo akatukile kuli ayo, akaye mwilu, tufunga aliambile umwe kuli mukwo ngwo, Tuyenu haliapwila ndo ku Mbeteleme, tukatale chino chuma hichapwa, chenacho Mwene hatunyingikisa. 16O ejile kapupushi, awanyine Maria ni José, ni mwe mwana-kemba kanapombo mu chililo. 17Muze amumwene, alumbunwine liji lize evwile lia kutwala kuli yono mwana. 18Ni waze eswe achivwile, akomokene ha yuma yize tufunga aambulwilile. 19Alioze Maria wafungile maliji ano eswe nikwazewula mu mbunge yenyi. 20Mba tufunga ahilukile, nikuchichimieka nikuhalisa Zambi ha yuma yize yeswe hanevu, ni yize hanamono, chizechene ngwe chize achihanjikile kuli ayo.
21Ku songo lia matangwa muze hamupwisa ngalami, amulukile jina ngwo, Yesu, lienalio amulukilelio kuli mungelo, muze te jimo kanda lichiseseka.
22Muze matangwa a kupemesa cho nikulita ni shimbi ya Mose amanunukine amunehene ku Yerusaleme, mukumutumbikila kuli Mwene; 23(nikulita ngwe chinasonewa mu shimbi ya Mwene ngwo, Mwana mweswe wa lunga maliangila kusemuka, kumakamuvuluka ngwo, Musandu kuli Mwene); 24akahane chitapo nikulita ni chize anambe mu shimbi ya Mwene ngwo, Tutele aali, hanji ana aali a membe. 25Kumanyi, mwapwile umwe lunga mu Yerusaleme, jina lienyi Semone; yono lunga wapwile mukwa ululi, mukwa kuwayila Zambi, kanatatatata kulembejeka cha Izalele: ni Spiritu Musandu wapwile hali iye. 26Iye hamulwezacho kuli Spiritu Musandu ngwe kechi kufwa ndo mamona mwe Kristu wa Mwene. 27Iye ku tachi ja Spiritu wanjilile mu tembele: muze yisemi anehenemo mwe mwana-kemba Yesu, akamulingile nikulita ni ndako ya shimbi, 28hohene wamutambwile mu moko jenyi, wachichimiekene Zambi ngwenyi,
29Mwene, haliapwila ndungo ye akatuke kama ni sambukila,
nikulita ni liji lie;
30mumu meso jami hamona ulamwino we.
31Uze hiunalulika kumeso ja atu eswe;
32pangu lia kutemwina akwa mavungu,
ni uhenya wa atu je, A-Izalele.
33José ni naye akomokene ha yuma yize ahanjikile ha kutwala kuli iye. 34Semone waawahishile, wambile kuli naye Maria ngwenyi,
Yono hanamusela ha kulimbuka ni ha kukatuka cha anji mu Izalele;
akapwe chilayi chize anachihamikina.
35Ewa, ni katana kumakatuwa mu mbunge ya yena mwene;
hanga akasolole manyonga a mbunge jinji.
36Kwapwile umwe, Ana, profeta wa pwo, mwana Fwanwele, wa ku vungu lia Ashe, (matangwa jenyi hoka, se watwamine hamwe ni mukwo-lunga miaka shimbiali chize ku umbachiso wenyi; 37iye wapwile twamishi ndo ku makumi nake a miaka ni miaka yiwana), kakatukile ku tembele, alioze wavumbikile Zambi, nikulitwamina kulia, nikuliumba ufuku ni mwalwa. 38Iye, nikukanduka ha ola yize yene, wasakwililile Zambi, wahanjikile ha kutwala kuli iye kuli waze eswe ataliletalile ukule wa Yerusaleme.
39Muze te hamanununa yuma yeswe nikulita ni shimbi ya Mwene, ahilukilile ku Ngalileya ku limbo lio ene, te ku Nazare.
40Mwe Mwana watatukile, watakamine mu Spiritu, wazalile tò ni mana: ni vumbi lia Zambi liapwile hali iye.
41Yisemi jenyi apwile nikuyaya mwaka ha mwaka ku Yerusaleme ha chiwanyino cha Chizomboka. 42Muze apwile ni kumi lia miaka ni miaka yiali, akandukile ku Yerusaleme nikulita ni ndako ya chiwanyino; 43muze te hamanununa matangwa, shimbu anahiluka, mwe mwana-lunga Yesu, wasalile kunyima mu Yerusaleme; ni yisemi jenyi kachinyingikine. 44Alioze, se anyongene ngwo, Mu chendo ali, ayile wenyi wa tangwa, mba amufupilefupile hakachi ka usoko wo ni akwo. 45Muze kamuwanyineko, ahilukilile ku Yerusaleme, nikumufupa. 46Kulutwe lia matangwa atatu, amuwanyine mu tembele, kanatwama mukachi ka alongeshi, kanaapanjika, kanaahula yihula. 47Ni waze eswe amuvwile, alishikishilile ha malinjekela jenyi ni makumbululo jenyi. 48Muze amumwene, alishimwokene; ni naye wambile kuli iye ngwenyi, Mwanami, kuchi te hiwalinga chize ni yetu? Tatenu ni yami hitunakufupu nikupinda. 49Iye wambile kuli ayo ngwenyi, Kuchi te nunakangufupa? Kunwanyingikine ngwe changutamba kulinga yuma ya Tata, nyi? 50Kuliaalumbunukine liji lize ahanjikile kuli ayo. 51Iye wapalumukine hamwe no ku Nazare, wazeyele kuli ayo; ni naye wafungile maliji ano eswe mu mbunge yenyi.
52Mba Yesu wasenyene kulutwe ni mana ni Chizundamo, nikuwana vumbi kumeso ja Zambi ni atu.
Currently Selected:
LUKA 2: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
