LUKA 1
1
1Mumu te anji hanalisela kusoneka sango lia kutwala ku yikuma yize hiyinamanunuka pundu hakachi ketu, 2chizechene ngwe atukunjikileyo, waze apwile yela ni tulala twa lie liji, chize ku uputukilo, 3changupemenene yami nawa, se hingunanyingika yuma yeswe pundu chize ku #1.3 hanji, kwilu. uputukilo, kusoneka nikululika kuli yena Teofwilu mulemu Wahiana; 4hanga ukanyingike pundu umwenemwene wa yuma yize akufumbileyo.
5Kwapwile ha matangwa a Heronde, mwanangana wa Yundeya, umwe sasendote, jina lienyi Zakaria, wa ku ngango ya Abija: neye wapwile ni mukwo-pwo wa kuli ana a Arone, jina lienyi Izabele. 6O, eswe aali, apwile akwa ululi kumeso ja Zambi, kanende mu maliji eswe a shimbi ni upatwilo wa ululi wa Mwene, keshi kapalia. 7Alioze kapwile ni mwana, mumu te Izabele wapwile mumba, no eswe aali miaka yo hiyoka.
8Mba shimbu alingile usasendote wenyi kumeso ja Zambi, nikulita ni ngango yenyi, 9nikulita ni ndako ya usasendote, chapwilile kuli iye, ha kuta chela kunjila mu tembele ya Mwene mukwocha#1.9 yitumbo ya vumba lipema. linsensu. 10Chizavu cheswe cha atu te kanalembe haze ha ola ya insensu. 11Mungelo wa Mwene wasolokele kuli iye, kanamana ku sali lia chindume lia chilumbilo cha insensu. 12Zakaria walipikalile muze amumwene, woma wamukwachile. 13Alioze mungelo wambile kuli iye ngwenyi,
Kanda wivwa woma, Zakaria;
mumu hanapanjika ku kuliumba che;
ni mukwenu-pwo Izabele kumakakusemena mwana-lunga, ukamuluke jina ngwe, Yoano.
14Kumukapwa ni uwahililo ni kulikwiza; anji kumakawahilila ha kusemuka chenyi.
15Mumu kumakapwa munene kumeso ja Mwene,
kechi kanwa vinyu, chipwe kunwa chimwe chisasu, ka;
iye makazala tò ni Spiritu Musandu,
chize ku jimo lia naye.
16Kumakatewulwila anji hakachi ka ana a
Izalele kuli Mwene Zambi yo.
17Kumakaya kulutwe lia meso jenyi ni spiritu ni tachi ja Eliya,
mukutewulwila mbunge ja atato kuli ana,
ni yihulia ku ukanyame wa akwa ululi; mukululikila Mwene amwe atu aalulikile.
18Zakaria wambile kuli mungelo ngwenyi, Neka mungunyingika chino? Mumu nguli mukulwana, ni mukwetu-pwo miaka yenyi hiyoka. 19Mungelo wamukumbulwile ngwenyi, Yami nguli Gabriele, nakumana kumeso ja Zambi; angutumine mukuhanjika ni yena, ngukwambulwile lusango yono mupema. 20Mba tala, kumuhola kulungunga, kuchi kuhasa kuhanjika ndo tangwa lize yino yuma muyipwa, mumu kwafulielele maliji jami, eno kumakamanunuka ha mwaka wo. 21Atu atwaminyinyine Zakaria, o akomokene mumu ha kushimbula chenyi mu tembele. 22Mba muze atuhukile, kahashile kuhanjika kuli ayo; o anyingikine ngwo, Hamona usolwelo mu tembele. Iye wanyongonwene nikulinga yilayi kuli ayo, alioze wasalile kamama. 23Muze matangwa a kulingila chenyi amanunukine, wahilukilile ku zuwo lienyi.
24Kulutwe lia matangwa aze, mukwo-pwo Izabele wasesekele ufumba; iye waswamine tukweji atano, ngwenyi, 25Chocho Mwene hanalingi kuli yami, ha matangwa aze muze atalile hali yami mukuchiza luchoko yoze akungwamba hakachi ka atu.
26Achi, ha kakweji wamuchisambano, Zambi watumine mungelo Gabriele ku limbo lia mu Ngalileya, jina liacho Nazare. 27Kuli umwe *virgem hanamulakenya kuli lunga, jina lienyi José, mukwa zuwo lia David; ni jina lia mwe virgem Maria. 28Mungelo wejile kuli iye, wambile ngwenyi, Vulie! Yena hanakuvumbisa kuli Zambi; Mwene kwali hamwe ni yena; kuwawaha hakachi ka mapwo. 29Alioze walipikalile chikolo ha liji lienyi, wanyongene chize kumeneka chino muchipwa. 30Mungelo wambile kuli iye ngwenyi,
Kanda wivwa woma, Maria, mumu hiunawane vumbi kumeso ja Zambi;
31mba museseka mu jimo, mukasema mwanalunga, munumuluka jina ngwe, Yesu.
32Iye kumakapwa munene, makamuvuluka ngwo, Mwe Mwana wa Chitunda;
Mwene Zambi kumakamwaha ngunja ya tato David;
33iye kumakayula akwa zuwo lia Yakomba ku miaka ya mutolo; ni wanangana wenyi kuuchi kuhwa.
34Maria wambile kuli mungelo ngwenyi, Ngwe kuchi chino muchikapwa se kanda nguchilimona ni lunga? 35Mungelo wamukumbulwile ngwenyi,
Spiritu Musandu kumeza hali yena,
ni tachi ja mwe Chitunda kumujikuzulamina Chizulie;
kashika nawa chuma chisandu chize muchikasemuka,
kumakamuvuluka ngwo, Mwe Mwana Zambi.
36Mba musonye Izabele, iye nawa hanaseseka mwana-lunga ha ushinakaji wenyi; ni yono mwe kakweji wamuchisambano kuli yoze amuvulukile ngwo, Mumba. 37Mumu ni Zambi nichimwe machisa kenu. 38Maria wambile ngwenyi, Nguli ndungo ya Mwene, chikapwe kuli yami nikulita ni liji lie. Mba mungelo wakatukile kuli iye.
39Maria wakatukile ha matangwa aze, wayile kapupushi ku chifuchi cha milundu, ku limbo lia mu Yunda. 40Wanjilile mu zuwo lia Zakaria, wamenekene Izabele. 41Muze Izabele evwile kumeneka cha Maria, mwana-kemba watumbukile mu jimo lienyi; ni Izabele wazalile tò ni Spiritu Musandu; 42wakololokele ni liji linene ngwenyi, Kuwawaha mukachi ka mapwo, ni muhuko wa jimo lie kuwawaha. 43Kuchi te hangwaha chino, te naye ya Mwene wami meza kuli yami? 44Mumu, muze liji lia kumeneka che hilianjila mu matwi jami, mwana-kemba katumbuka ni kulikwiza mu jimo liami. 45Kawaha yoze wafulielele, mumu kumanunuka kumuchikapwa cha yuma yize hanahanjika Mwene kuli iye.
46Maria wambile ngwenyi,
Mbunge yami yinalemesa Mwene.
47Spiritu yami hiyinalikwiza muli Zambi Chilamwina chami.
48Mumu hanatale ulelu wa ndungo yenyi wa pwo;
Mumu chize ku haliapwila ndo ku miaka,
Yisemuko yeswe kumuyikanguvuluka ngwo, Kawaha.
49Mumu mukwa tachi jeswe hanangulingila yuma yinene;
Jina lienyi lisandu.
50Keke yenyi kuyili ku yisemuko ni yisemuko kuli waze akumuvwila woma.
51Hanalweze ndundo ni kwoko lienyi;
Hanamwange akwa kulengumuka mu kunyonga cha mbunge jo;
52Hanapupu akwa kuyula ku ngunja jo,
hananangamisa akwa kulilelesa.
53Hanakuchisa akwa zala ni yuma yipema;
hanakatwisa pichi mokomoko.
54Hanakwasa Izalele kavumbi kenyi,
hanga akewuluke keke;
55Kuli Apalahama, ni kuli munyachi wenyi ndo ku miaka ya mutolo
(chizechene ngwe ahanjikile kuli tulamba twetu).
56Maria Watwamine hamwe nenyi ngwe tukweji atatu, mba wahilukilile ku zuwo lienyi.
57Achi, mwaka wa kusema cha Izabele wamanunukine; iye wasemene mwana-lunga. 58Enyembo jenyi ni usoko wenyi evwile ngwo, Mwene hokesa keke yenyi kuli iye, no awahililile hamwe nenyi. 59Mba ha tangwa liamuchinake ejile akapwise mwe mwana ngalami; o ambile kumuluka jina lia tato ngwo, Zakaria. 60Alioze naye wambile ngwenyi, Hi chocho ko; alioze amuluke Yoano. 61O ambile kuli iye ngwo, Niumwe hakachi ka usoko we uli ni jina lino, wakuhi. 62O alingile yilayi kuli tato, kuhula chize mazanga kumuluka. 63Iye wechile mukanda, wasonekene ngwenyi, Jina lienyi Yoano. No eswe akomokene. 64Ni kanwa lienyi liapakukile haze hene ni limi lienyi liatusukile, neye wahanjikile nikufumanyisa Zambi. 65Woma wapwile hali waze eswe atwamine ha kwajingilika; alihanjikishile yino yuma mu chifuchi cheswe cha milundu ya Yundeya. 66Mba waze eswe ayivwile, ayipachikile mu mbunge jo, ngwo, Yono mwana kuchi makapwa? Ni kwoko lia Mwene liapwile hamwe nenyi.
67Tato Zakaria wazalile tò ni Spiritu Musandu, yaprofeteza ngwenyi,
68Mwene Zambi ya Izalele afumane; mumu hanatale hali atu jenyi, hanaalingila ukule.
69Hanasolola mbinga ya ulamwino hali yetu mu zuwo lia David kavumbi kenyi.
70(Chizechene ngwe ahanjikile ku makanwa ja aprofeta jenyi asandu, waze apwile chize ku miakulwila),
71Hanga akatulamwine ku moko ja akwa kole jetu, ni ku moko ja waze eswe akutuvwila kole;
72Mukulweza keke kuli tulamba twetu, mukwiwuluka usendo wenyi usandu;
73Shingo lize walishingile kuli kulwetu Apalahama,
74Mukuhana kuli yetu, tukapuluke ku moko ja akwa kole jetu, tukamulingile ni woma wakuhi,
75Mu usandu ni ululi kumeso jenyi matangwa eswe a mwono wetu.
76Ewa, ni yena mwana, kumakakuvuluka ngwo, Profeta wa mwe Chitunda: mumu kumukaya kulutwe lia meso ja Mwene mukululika majila jenyi;
77Mukunyingikisa atu jenyi ulamwino ha ukonekeno wa milonga yo.
78Mumu ha mbunge ya keke ya Zambi yetu, ku yenayo kucha cha tangwa kwilu #1.78 pundu ngwo, muchikatala hali yetu. muchikacha hali yetu,
79Mukupanguka hali waze akutwama mu milima ni mu Chizulie cha kufwa; mukutemwina molu jetu mu jila ya sambukila.
80Mwe mwana watatukile, wafundwile mu Spiritu, wapwile mu puya ndo tangwa lia kumulweza kuli A-Izalele.
Currently Selected:
LUKA 1: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
