YOANO 6

1Kulutwe lia yino yuma Yesu wayile mu sali lia Chitende cha Ngalileya, chenacho Chitende cha Taipiria. 2Mbunga yinene amukawile, mumu amwene yilayi yize alingile hali mieji. 3Yesu wakandukile ha mulundu, watwamineho hamwe ni tumbaji twenyi. 4Achi, Chizomboka, chiwanyino cha A-Yunda, Chakundamine. 5Yesu kashika ha kuhetula meso jenyi, nikumona mbunga yinene kaneza kuli iye, yamba kuli Fwilipe ngwenyi, Kulihi mutulanjila mbolo, hanga wano akalie. 6Chino wambile hanga amweseke: mumu iye mwene wanyingikine chize malinga. 7Fwilipe wamukumbulwile ngwenyi, Mbolo ja kufwika kulakaji aali a mbongo kujishi kuheta hali ayo, hanga mweswe wa kuli ayo akatambule chimwe chikepe. 8Umwe wa kuli tumbaji twenyi, Andeleu, mwanakwo wa Semone Petulu, yamba kuli iye ngwenyi, 9Kwali kuno umwe kanuke, iye mbolo jitano ja sevwata ni tuyishi twaali ali no; alioze yino yika hali anji apwa haha? 10Yesu wambile ngwenyi, Twamisenu atu. Achi, mwapwile mwambu wunji muma muze. Kashika malunga atwamine, ha kwaalula ngwe tununu atano. 11Yesu kashika wanjile mbolo; ni muze te hasakwila, wayipangilile kuli waze atwamine; ni tuyishi nawa chizechene, chize cheswe azangile. 12Muze te hakuta, yamba kuli tumbaji twenyi ngwenyi, Kungululenu yipalupalu yinasala, hanga nichimwe kuchichi katoka. 13Ayikungulwile kashika, azalishile kumi lia yipakili ni yipakili yiali ya yipalupalu ya mbolo jitano ja sevwata yize yasalile kuli waze alile. 14Kashika muze atu amwene chilayi chize alingile Yesu, ambile ngwo, Yono chamwenemwene mwe profeta yoze meza hano hashi.

15Kashika Yesu, nikunyingika ngwe ambile kwiza akamuchangumune, hanga akamupwise mwanangana, wakatukile cheka nawa, akaye ku mulundu, iye mwene ukawenyi.

16Muze hapwile chingoloshi, tumbaji twenyi apalumukine ku Chitende; 17o anjilile mu ulungu, kanazauka Chitende akaye ku Kafwanaume. Hapwile milima kulu, ni Yesu te kanda achiza kuli ayo. 18Ni Chitende te chinafuzu mumu ha fuji yinene yize yalambileho. 19Muze te kashika hapulula ngwe kilometro jiwana hanji kilometro jisambano, yamona Yesu kanende ha chitende nikukundama ku ulungu; o evwile woma. 20Alioze yamba kuli ayo ngwenyi, Yami mwene; kanda nwivwa woma. 21Azangile kashika kumutambula mu ulungu: haze hene ulungu wahetele kuze atalikishile.

22Muze hikwacha, mbunga yize amanyine mu sali lia Chitende amwene kukwapwile wato ukwo shina umuwika, ni Yesu kanjililemo hamwe ni tumbaji mu wato, alioze tumbaji twenyi ayile ukawo. 23(Alioze mato akwo akatukile ku Taipiria, ahetele hakamwihi no homa haze alilile mbolo, muze te Mwene hasakwila): 24kashika muze mbunga amwene ngwe Yesu kapwileko, chipwe tumbaji twenyi, anjilile mu maulungu, o ayile ku Kafwanaume, nikufupa Yesu.

25Muze te hamuwana mu sali lia Chitende, ambile kuli iye ngwo, Longeshi, mwiji muka wahetanga kuno? 26Yesu waakumbulwile, ngwenyi, Pundu, pundu ngunambe kuli yenu ngwami, Nunangufupu, hi ha yilayi yize nwamwene ko, alioze mumu nunakalia mbolo, nunakakuta. 27Kanda nukalinga milimo ha kulia chize cha kutoka, alioze nukalinge milimo ha kulia chize chili ni mwono wa mutolo, chenacho mwe Mwana Mutu makanwaha: mumu iye, Zambi mwe Tata hanamujiki ni Chijikilo. 28Ambile kuli iye kashika ngwo, Kuchi mutulinga hanga tukalinge yitanga ya Zambi. 29Yesu waakumbulwile, ngwenyi, Chino che chitanga cha Zambi, hanga nukafuliele yoze hanamutumu iye. 30Ambile kuli iye kashika ngwo, Mba chilayi chika mulinga hanga tumone, tukufuliele? Chika wakulinga? 31Akaka alile maná mu puya; ngwe chinasonewa ngwo, Waahele mbolo mwilu mukulia. 32Yesu kashika wambile kuli ayo ngwenyi, Pundu, pundu, ngunambe kuli yenu ngivami, Hi Mose ko wanuhele mbolo ya mwilu: alioze Tata kakunwaha mbolo yamwenemwene ya mwilu. 33Mumu ye mbolo ya Zambi yoze mahulumuka mwilu, mahana mwono kuli akwa hashi. 34Ambile kuli iye kashika ngwo, Mwene, twehe kama mbolo yino matangwa eswe.

35Yesu wambile kuli ayo ngwenyi, Mbolo ya mwono yami; yoze meza kuli yami kechi kevwa zala nichimwe, ni yoze mangufuliela yami kechi kevwa pwila nichimwe ha mwaka niumwe. 36Alioze nambile kuli yenu ngwami, Hinunangumono, hindu kunushi kufuliela. 37Waze eswe Tata mangwaha, kumakeza kuli yami; ni yoze meza kuli yami chichi kamumbila haze nichimwe. 38Mumu hingunahulumuka mwilu, hi mukulinga upale wa yami mwene ko, alioze upale wa yoze wangutumine. 39Uno we upale wa Tata yoze wangutumine, hanga a kuli waze eswe hanangwehe chichi katokesa niumwe, alioze ngukamuhindwise ha tangwa lia kusula. 40Mumu uno we upale wa Tata, mweswawo mamona mwe Mwana, akamufuliele, akapwe ni mwono wa mutolo; mungukamuhindwisa ha tangwa lia kusula.

41Kashika A-Yunda alinyenyetene hali iye, mumu wambile ngwenyi, Mbolo yize yahulumukine mwilu yami. 42O ambile ngwo, Yono hi Yesu mwana José ko, nyi? Tato ni naye kutwaanyingikine, nyi? Mba ngwe kuchi anambe ngwenyi, Hingunahulumuka mwilu. 43Yesu waakumbulwile ngwenyi, Kanda nulinyenyeta hakachi kenu. 44Niumwe mahasa kwiza kuli yami shina mwe Tata wangutumine mamukoka; mungukamuhindwisa ha tangwa lia kusula. 45Chinasonewa mu mikanda ya aprofeta ngwo, O eswe kumakalongoloka kuli Zambi; kashika mweswe hanevu kuli mwe Tata; lianalilongesa kuli iye, meza kuli yami. 46Kuchapwile ngwe umwe hamona mwe Tata, shina yoze wa kuli Zambi, iye hanamono mwe Tata. 47Pundu, pundu, ngunambe kuli yenu ngwami, Yoze mafuliela, mwono wa mutolo ali nawo. 48Mbolo ya mwono yami. 49Akakenu alile maná mu puya, no afwile. 50Yino ye mbolo yize yinahulumuka mwilu, hanga umwe akayilie, mba kechi kafwa.

51Ye mbolo ya mwono yami, yize yahulumukine mwilu: kachi umwe malia mbolo yino kumakapwa ni mwono ndo ku miaka ya mutolo: ewa, ni mbolo yize mungukahana te musunya wami uze mungukahana ha mwono wa akwa hashi.

52Kashika A-Yunda alihangulwile hakachi ko ngwo, Ngwe kuchi yono mahasa kutwaha musunya wenyi mukulia? 53Yesu wambile kuli ayo ngwenyi, Pundu, pundu, ngunambe kuli yenu ngwami, Kunushi ni mwono muli yenu shina munulia musunya wa mwe Mwana Mutu, shina mununwa manyinga jenyi. 54Yoze malia musunya wami, manwa manyinga jami, mwono wa mutolo ali nawo; kumungukamuhindwisa ha tangwa lia kusula. 55Mumu musunya wami kulia chamwenemwene, ni manyinga jami kunwa chamwenemwene. 56Yoze malia musunya wami, manwa manyinga jami, katwama muli yami, ni yami muli iye. 57Chizechene ngwe Tata mukwa mwono wangutumine, ni yami nguli ni mwono mumu hali Tata; chocho yoze mangulia, iye nawa kumapwa ni mwono mumu hali yami. 58Yino ye mbolo yahulumukine mwilu: kuchapwile ngwe tulamba twenu alile maná, afwile; yoze malia mbolo yino kumakapwa ni mwono ndo ku miaka ya mutolo. 59Yino yuma wambile mu sunangonga nikulongesa mu Kafwanaume.

60Anji kashika a kuli tumbaji twenyi muze evwile chino, ambile ngwo, Liji lino likalu; iya mahasa kulivwa? 61Alioze Yesu se kananyingika muli iye mwene ngwe tumbaji twenyi alinyenyetene ha chino, wambile kuli ayo ngwenyi, Chino chinanutalingisa, nyi? 62Mba kuchi muchipwa kachi munumona mwe Mwana Mutu kanazezuka kuze apwile hatangu? 63Yoze wakupwisa ni mwono, mwe Spiritu; musunya kuushi kufumbuka nichimwe; maliji aze ngunahanjika kuli yenu, Spiritu ni mwono. 64Alioze kwali amwe a kuli yenu keshi kufuliela. Mumu Yesu wanyingikine chize ku uputukilo waze kafulieleleko, ni yoze mamukunjika. 65Iye wambile ngwenyi, Ha chikuma chino nambanga kuli yenu ngwami, Niumwe mahasa kwiza kuli yami shina mamwahacho kuli mwe Tata.

66Mumu ha chino anji a kuli tumbaji twenyi ayile kunyima, kaliendelele nenyi nawa. 67Kashika Yesu wambile kuli kumi ni aali ngwenyi, Ni yenu nawa nunazange kuya, nyi? 68Semone Petulu wamukumbulwile ngwenyi, Mwene, kuli iya mutuya? Yena e maliji a mwono wa mutolo uli no. 69Hitunafuliela, kutunanyingika mwe Musandu wa Zambi yena. 70Yesu waakumbulwile ngwenyi, Chanutongwele, yenu kumi ni aali, nyi? Mba umwe wa kuli yenu iye ndiapu umwe. 71Achi, wahanjikile ha kutwala kuli Yundase Ka-Keriote, mwana Semone, mumu iye te mamukunjika, se wapwile umwe wa kuli kumi ni aali.

Currently Selected:

YOANO 6: Csa

Highlight

Copy