UPUTUKILO 7

1Mba Yehova yamba kuli Noe ngwenyi, Njila mu ulungu ni yena ni akwa zuwo lie eswe, mumu nakumona yena mukwa ululi kumeso jami mu chisemuko chino. 2A kuli tushitu eswe a kulinanga ukatambule shimbiali ni shimbiali, ni kuji ni chihwo chenyi. A kuli tushitu keshi kulinanga ukatambule aali ni aali, kuji ni chihwo chenyi. 3A kuli tujila a mu tetela nawa, ukatambule shimbiali ni shimbiali, a kuji ni chihwo, akafunge mbuto ya mwono ha kuzazuluka cha hashi heswe. 4Mumu kwasala matangwa shimbiali mba mungunokesa vula hashi, makumi awana a matangwa ni makumi awana a ufuku. Yuma yeswe ya mwono natangile mungujimuna ha kuzazuluka cha mavu. 5Noe yalinga nikulita ni yuma yeswe Yehova yamwamba.

6Noe te yapwa ni makulakaji asambano a miaka muze sanga lia meya liapwile hano hashi. 7Chocho Noe yanjila mu ulungu, ni anenyi, ni mukwo-pwo, ni mapwo ja anenyi, mumu ha sanga lia meya. 8A kuli tushitu a kulinanga ni waze keshi kulinanga, ni a tujila, ni a tushitu eswe akukalala ha mavu, 9yanjila aali ni aali kuli Noe mu ulungu, a kuji ni chihwo ngwe Zambi yamba Noe.

10Mba chapwile kulutwe lia matangwa shimbiali meya a sanga apwile hashi.

11Ha makulakaji asambano a miaka ya mwono wa Noe, ha kakweji wamuchiali, ha tangwa kumi ni liamuchishimbiali, ha tangwa lioliene mafuji eswe a jondo aapukwile ni manjanela a mwilu azulukile. 12Mba vula wapwile hashi makumi awana a matangwa ni makumi awana a ufuku. 13Ha tangwa limuwika Noe, ni Sheme, ni Hame, ni Yafwe, ana ja Noe ni pwo lia Noe ni mapwo atatu ja anenyi hamuwika no anjilile mu ulungu. 14O ni tushitu eswe, kashitu ni kashitu nikulita ni vungu lienyi, ni yimuna nikulita ni mavungu jo, ni tushitu a kukalala aze akukalala hashi nikulita ni mavungu jo, ni tujila eswe nikulita ni mavungu jo, kajila mweswawo. 15O eswe anjilile mu ulungu hamuwika ni Noe, aali ni aali a musunya weswe muze mwatwama mwiku wa mwono. 16Waze anjilile te kuji ni chihwo a ku musunya weswe ngwe Zambi yamutuma. Mba Yehova yamwajililamo.

17Sanga liapwile hashi makumi awana a matangwa chocho meya aliwezele, azundwile ulungu ukazunduke helu lia hashi. 18Mba e meya akumbile aliwezele kuhiana hashi, ulungu yiuya ha meya. 19Chocho meya akumbile kuhiana hashi, milundu yeswe yisuku ya kushi lia malilu yafukiwile. 20Yahiana helu kumi lia mbandu ni mbandu jitano, milundu yeswe yafukiwile. 21Musunya weswe wafwile, uze wakwenda hashi, ni tujila, ni yimuna, ni tushitu, ni akwa kukalala eswe aze akukalala hashi, ni atu eswe. 22Waze eswe apwile ni mwiku wa Spiritu ya mwono mu mazulu, eswe te apwile hashi homu afwile. 23Anongesene eswe a mwono ha kuzazuluka cha mavu, ni atu, ni yimuna, ni akwa kukalala, ni tujila a mwilu, waanongesene hashi, Noe wika wasalile ni waze apwile nenyi mu ulungu. 24Meya akumbile hashi kulakaji lia matangwa ni makumi atano a matangwa.

Currently Selected:

UPUTUKILO 7: Csa

Highlight

Copy