UPUTUKILO 6

1Mba muze atu aputukile kwoka hashi nikusema ana a mapwo, 2ana a Zambi a malunga amwene ana a mapwo ja atu ngwo, Apema, kashika ambachile mapwo hakachi ka waze eswe azangile. 3Mba Yehova yamba ngwenyi, Spiritu yami kechi kalitachika ni atu matangwa eswe, se iye nawa musunya. Hindu matangwa jenyi kumakapwa kulakaji lia miaka ni makumi aali a miaka. 4Kwapwile yindululu hashi ha matangwa aze. Mba kulutwe nawa muze ana a malunga a Zambi anjilile kuli ana ja atu a mapwo, o aasemenene ana. Ana aze apwile akwa ndundo a shakulu; akwa lufuma.

5Chocho Yehova yamona ungulungulu wa atu hashi, ngwenyi, Wahiana. Chikwo ngwenyi, Kutaka cheswe cha manyonga ja mu mbunge jo, chipi wika matangwa eswe. 6Yehova yalikonyeka chize atangile atu hano hashi. Chamunehenene chinyengo mu mbunge yenyi. 7Kashika Yehova yamba ngwenyi, Atu ano natangile mungwanongesa hashi; ni atu, ni tushitu, ni tututu, ni tujila a mu tetela, mumu hichangukonyekesa chize naatangile. 8Alioze Noe wawanyine vumbi kumeso ja Yehova.

9Yino ye yisemuko ya Noe. Noe wapwile mukwa ululi, keshi kapalia mu chisemuko chenyi. Noe waliendelele ni Zambi. 10Noe wapwile ni ana atatu a malunga; ni Sheme, ni Hame, ni Yafwe.

11Hashi hapihile kumeso ja Zambi. Hashi te hazala to ni upupilo. 12Zambi wamwene hashi kumanyi hapihile mumu akwa mwono eswe hanapihisa majila jo hashi. 13Mba Zambi yamba kuli Noe ngwenyi, Kumeso jami songo lia musunya weswe hilieza, mumu hashi hazala to ni upupilo kuli ayo, kashika mungwanongesa hamuwika ni he hashi. 14Ulitungile ulungu wa mutondo wa mungofwe. Tunga yipatulo mu ulungu; ukaushile haze ni muchima ni usososhi. 15Chichize muutunga: kusuha chawo muchipwa makulakaji atatu a yitenda; kutoha chawo muchipwa makumi atano a yitenda; kusuha chawo kwilu makumi atatu a yitenda; 16ukatunge njanela mu ulungu, ku cheseko cha chitenda chimuwika akamutunge kwilu. Chikolo cha ulungu ukachise mu lumbu. Mukachilinga ni chipatulo cha hashi, ni cha hakachi, ni cha helu. 17Mumu yami mwene munguneha sanga lia meya hashi lia kunongesa musunya weswe kushi lia malilu uze ukwete mwiku wa mwono; e eswe ali hashi kumafwa. 18Alioze mungukolesa usendo wami ni yena. Kumukanjila mu ulungu, ni yena, ni ana je a malunga, ni mukwenu-pwo, ni mapwo ja ana je hamuwika ni yena. 19Kuli akwa mwono eswe a musunya weswe, aali a ku mavungu eswe vungu ni vungu munjisa mu ulungu ukaafunge a mwono hamwe ni yena, akapwe a kuji ni chihwo. 20A kuli tujila nikulita ni mavungu jo, ni yimuna nikulita ni mavungu jo, ni tushitu eswe akukalala hashi nikulita ni mavungu jo, aali a ku mavungu eswe vungu ni vungu kumanjila hamwe ni yena ukaafunge a mwono. 21Twala nawa kulia cheswe munulia, ukachikunge kuli yena, chikapwe kulia kuli yena ni kuli ayo. 22Chocho yalinga Noe nikulita ni chize cheswe Zambi yamwamba, chocho yalinga.

Currently Selected:

UPUTUKILO 6: Csa

Highlight

Copy