Mataio 27
27
20. PAKANA MA 7.
1Ba i keke pat u ra malana, diat rap a kum tadaru na pinapet, ma ra kum takana a nu ra tara diat pigit a maden an Iesu, lena diat a umua i: 2ma diat dota i, diat ben igenuai i, ma diat taram‐arua i korom Pailato a kovana.
3Ma Iuda, ia ba i ogopa i, ba i boboi lena diat nakokon uni lena in wirua, i nukpuku i uni ma i kiptai balet a tula no pakan a măni korom diat a kum tadaru na pinapet ma ra kum takana. 4ma i piri ta diat, Iau pet akakai, kuma iau ogopa a tenapetoduru. Ma diat piri tana, Miat bakai, miat lawai? ui ia. 5Ma i ogtai na pia u ra ruma tabu a kum pakan a măni, ma i wan igen ma i bibig. 6A kum tadaru na pinapet diat rakanpa a kum pakan a măni, ma diat piri lena, I tabu ba miat pakitai u ra ka na utna a nu ra ruma na wetu, kuma a mata ra kap ia. 7Ma diat wepak uni, ma diat kipi ma i a pakan a wanua kuma di pam a kum la uni. 8Ia kuma di watugi uni lena, A wanua na kap, ma i tuk u ra bug kumi. 9Ma di pet a wewaotpai uni a pirapira a nun Ieremia a parofita lena, Diat rakanpa a tul a no pakan a măni, a matana ia kup ia ba di luk matanta i u diat a kum na tun Israel: 10ma diat kiptai mai a wanua kuma di pam la uni lenkuma a Tadaru i piri tag.
11Ma Iesu i turu na ra mata ra kovana: ma ra kovana i tiri lena, A Tui a nu ra Iudaia ui, ba pate? Iesu i uruniauot tana, Len ut kuma u piri. 12Ma diat a kum tadaru na pinapet ma ra kum takana diat takuna i, ma pa i piri ma ta lig. 13Ma Pailato i tiri uni, Ka, pa u walogoro a kum lig diat takuna ui uni? 14Ma pa i piri ma ta lig tana: ma ra kovana i kakaian ma ut uni.
15A makira ra tadaru kuma, ba diat witamai i papāra te ko diat diat ki u ra ruma na boboto korom diat a tara‐na‐kaiya, ia ku ba diat tikan wălipa i. 16Ma i ki u ra ruma na boboto u ra pupukai kuma, te ba i winarag akit, a yana Baraba. 17Ba diat tolug ugai, Pailato i tiri diat lenkumi, O oi kuma muat nemi ba ag papāra korom muat? Baraba duk, ba Iesu duk, ia ba di patapai a yana bulug Karisito? 18Kuma i nunurai lena diat taramarua i korom i u ra wetom.
19Ma ba i ki kubai u ra kinkini na nakokon a nuna marama i wetula korom i, ma i lena, Koniku pet ta lig u ra tenapetoduru kuma, kăbi u ra bug kumi mogoro na lig iau karianai un i u ra beberon.
20A kum tadaru na pinapet ma ra kum takana diat pira‐tul diat a tara‐na‐kaiya lena diat an arig kup Baraba, ma diat a umua Iesu. 21A kovana i tiri diat lena, O oi na pa diara muat nemi ba ag papāra i korom muat? Ma diat lena, Baraba ia. 22Pailato i tiri diat lena, Awa ăg peti korom Iesu, ia ba di patapa i bulug Karisito? Ma diat piri lena, Un akwatai u ra kabai. 23I tiri diat balet lena, Urawa, awa i petakakai? Ma diat piri na karagap uni lena, Un akwata i u ra kabai. 24Ma Pailato ba i boboi lena i kana pirabat diat ma diat warekereke kabin uni i rakanpa a pala, ma i ki a limana ma i na ra matadiat a tara‐na‐kaiya, ma i piri lena, Pa ag tarugai iau ma muat ba in wirua a tenapetoduru bi: muat ku muat a nunurai. 25Ma ra kum tara rap diat ora piri lena, A winiruana un miat ku, u diat kai a kum na tumiat.
26Ma i papāra Baraba korom diat: ma ba i rapu mun Iesu, i taramarua i lena di akwata i u ra kabai.
27Ma diat a kum tenawineum a nu ra kovana, diat benpa Iesu u ra ruma na tadaru, ma diat benpa diat rap a kum tenawineum korom i. 28Ma diat paua i kon i a nuna kum malu, ma diat wakop i balet ma in a tara ua malu. 29Ma diat wiri a pārik ko ra diwai taraloklokono, ma diat wapārikta i uni, ma diat paki a wuwuru u ra waot na limana; ma diat tutudug na ra matana, ma diat tatauru un i lena, Un toka kaia ku a Tui a nu ra Iudaia! 30Ma diat kar i, ma diat rakanuai balet a wuwuru kon i, ma diat um a in a lorina mai. 31Ba diat tataurupa mun, diat pauai balet kon i a in a tara na malu, ma diat patai balet a nuna kum malu, ma diat benigenpa i, ba diat an akwata i u ra kabai.
32Ba diat pari u na taman diat bobo a muana a te Kurene, a yana Simon, ma diat liglurapa i lena in weuru ma diat, ma in lo a kabai. 33Ba diat wan pat u ra bual a iana Kolkota (a pipilaina, A bual na lora), 34diat tari tana a waine diat paki welotoi ma ra mapak na diwai, ba in inimi: ma ba i namene tamatai, i patut uni. 35Ma ba diat akwata i mun u ra kabai, diat palau diat u ra nuna kum malu, ba diat wirimadigi uni: 36ma diat ki iai, ma diat waruabat i. 37Ma diat paki na te na ra in a lorina a buk u ra lig ba diat takuna i uni, lena IA BI IESU A TUI A NU RA IUDAIA.
38Ma di akwata diara kai ru tenawawera u ra ru kabai, rā u ra waot na limana, ma rā u ra maira na limana.
39Ma diat ba diat wanwan akit i, diat tatauru un i ma diat lilia a matadiat nana; ma diat lena, 40Ui, ba u regpa a ruma na wetu ma u pami balet ta tul a bug ku, un walaunpa ui: ba na Tun Nara ui un pari ko ra kabai. 41Lenkuma kai diat a kum tadaru na pinapet diat tatauru uni, ma diat a kum tenatimtimu ma ra kum takana kai lena, 42I walaunpa diat a tara, i kana walaun ia ut. A Tui a nu ra Israel ia: ba in pari ma ut ko ra kabai miat a nurutau uni. 43I nurutau un Nara; awakak ba in walaunpa i kumari, ba i nem i: kuma i a piritai lena, Iau kumi na Tun Nara iau. 44Ma diara ru tenawerara di akwat ugai ditul u ra tul a kabai, diara kai diara pira ululi un i lenkuma.
45Ma tak u ra nom na pakana bug ma i tuk u ra limadi ma watdi a pakana, a boboto i pulubat a wanua rap. 46Ma u ra limadi ma watdi a pakan a bug Iesu i wewatai u na te lena, Eli, Eli, lama sabaktani? a pipilaina, a nug Kalou, a nug Kalou, lelawai kuma u talbegua iau? 47Ma ta magan ko diat diat turu iai, ba diat walogoro i, diat piri lena, A muana bi i wata Ilaita. 48Ma ra ko diat i kala ma ut ma i rakanpa ta karunamat, ma i puktai ma ra pala i matitira, ma i pakitai u ra wuwuru, ma i tari tana ba in inimi. 49Ma ra tara kai diat lena, Ki tau ut mun; dat a boboi ba Ilaita in wan pat duk in walaun i ba pate.
50Ma Iesu i wewatai balet u na te, ma i tarua i ma ut a niono. 51Ma boboi, di rarat‐a‐weranapa a malu na binabat i ra ruma na wetu, taka na te ma i tuk na pia; ma i talauru a wanua rap; ma i tapuar a kum wat pipi; 52Ma di papa a kum ruma na minat; ma di waturupatua diat a mogoro a kum tenapetoduru diat inep; 53ma ba i lalaun balet mun, diat pari ko ra kum ruma na minat, ma diat wan u ra taman tabu, ma diat pua korom diat a mogoro.
54A tadaru na wineum kai ma diat diat ki ugai mai ba diat waruabat Iesu, ba diat bobo a kuria ma ra lig rap di petai, diat burut akit uni, ma diat piri lena, A ligtatuna, na Tun Nara ia bi.
55Ma ta kalina tebuan, diat ba diat patap un Iesu taka Kalilaia ma diat balura i, diat turu iai ma diat bobo i taka na welwelik: 56Maria taka Makdala, ma Maria kai a nadiara Iakob ma Iose, ma ra nadiat a kum na tun Sebedaio, ditul turu ugai ma diat.
57Ma ba malurap ma, rā petpalig taka Arimataia, a iana Iosefa, a disaipel kai a nun Iesu: 58a muana kumi i wan korom Pailato ma i arig kup a minatin Iesu. Ma Pailato i piri lena diat a tari tana. 59Ma Iosefa i rakanpa a minatina, ma i pului ma ra kabag na malu ba i maramarek, 60ma i wainepta i u ra nuna ruma na minat, ia ba di buru matakinai u ra wat: ma i bulibata a bonanaka i ra ruma na minat ma ra watpi, ma i wan talura i. 61Ma Maria taka Makdala, ma Maria taka diara ki iai na ra mata ra ruma‐na‐minat.
62U na buru, a bug ba i patap u ra bug tinaga, a kum tadaru na pinapet ma ra kum te Faresaio, diat tolug ugai korom Pailato, 63ma diat lena, Tadaru, miat kodopo a pakan a pirapira a nu ra tenawaruwaruka kuma lena, Ba i rap tul a bug ăg turu balet. 64Ia kuma un nakokon uni lena din pam a dekdekbatai a ruma na minat un ta tul a bug, kaduk a nuna tara na wawera diat wan pat ma diat rakanua i mun, ma diat wapua diat a tara lena, I a turu balet ko ra mat: ma ra waruwaruka ba na muru in pikoina akit u ra waruwaruka na muka. 65Pailato i piri ta diat, Diat tana na muat a kum tenawarua: muat wan ku, muat pam a dekdekbatai lenkuma muat nemi. 66Ma diat wan, ma diat pam a dekdekbatai, ma diat wakilagbat a wat pi; ma ra kum tenawarua kai diat turu ugai ma diat.
Currently Selected:
Mataio 27: RAI
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1896.
