Mataio 23

20. PAKANA MA 3.

1Iesu i wapua diat a tara‐na‐kaiya ma ra nuna tara‐na‐wawera lena, 2Diat a kum tenatimtimu ma ra kum te Faresaio diat ki tau u ra kinkini in Moses: 3ia kuma a kum lig rap diat piri ta muat, muat a peti ku, muat ururu uni kai: ma koniku muat patap u diat u ra makiradiat; kuma diat piri ku ma pa diat peti. 4Diat dopakutai bulug a kum kinikip i mawat, ma i kidokopa diat a tara diat loi, ma diat paki u ra pupuakidiat a tara: ma diat kai diat patut ba diat wamakili ma ra kalkali na limadiat. 5Diat pam a nudiat pinapam rap ba a tara diat boboi diat uni: kuma diat pam a parereta a nudiat kum buk na wakodop, ma diat pam a wiyok pai bulug a titi ra nudiat kum malu, 6diat nem akiti kai a gaia ra tadaru u ra witamai, ma ra kinkini na tadaru u ra ruma na lotu, 7ma ra wewatai u ra matanabug, ma diat nemi lena, a tara diat tara Rabi korom diat. 8Muat kai konima di tara Rabi korom muat: kuma rā ku a numuat Tenawawera, ma muaina muat. 9Ma konima muat tara tamamuat korom te u Vuravura: kuma rā ku a Tamamuat, ia ba i ki u ra maua. 10Koniku di tara tadaru korom muat: kuma ra ku a numuat Tadaru, Karisito ia. 11Ia ba i muka un muat kura ut a numuat wetula ia. 12Ma ia ba i pet‐a‐lakalakapa i, kura din wakinalik i, ma ia ba i wakinalikpa i, kura din pet‐a‐lakalakapa i.

13-14A kaina lig korom muat a kum tenatimtimu ma ra kum te Faresaio, a kum tenawaruwaruka muat! kăbi muat balbalatbat diat a tara ko ra matanitu i ra maua: kuma pa muat ruk iai, ma pa muat madekua diat ba diat pot na ruk.

15Akaina lig korom muat a kum tenatimtimu ma ra kum te Faresaio, a kum tena waruwaruka muat! kuma muat wan liuta a tai ma ra wanua rap ba muat ben ta muana uni lena in lotu welara ma muat, ma ba muat a benpa i, muat pam i lena na tun Kiena ia ru pakan un muat.

16Akaina lig korom muat a kum tenawarawi pula, kuma muat piri lenkumi, Ba te i welimăn ma i watug i uni a ruma na lotu, a lig bia ku kuma; ma ia ba i welimăn ma i watugi uni a kold i ra ruma na lotu, di wita i uni. 17A kum loglog ma ra kum pula muat: O oi na pa diara i gala, a kold duk, ba a ruma na lotu duk, ia ba i watabu i uni a kold? 18Ma ia ba i welimăn ma i watugi uni a kiuai‐na‐wetu, a lig bia ku kuma; ma ia ba i welimăn ma i watugi uni a wetabara kuma i tana u ra kiuai, di wita i uni. 19A kum pula muat: O oi na pa diara i gala, a wetabara duk, ba a kiuai duk, ia ba i watabui uni a wetabara? 20Ia ba i welimăn ma i watugi uni a kiuai, i welimăn uni ma u ra lig rap kai i tana uni. 21Ma ia ba i welimăn ma i watugi uni a ruma na wetu, i welimăn uni ma un ia bulug i ki uni. 22Ma ia ba i welimăn ma i watugi uni a maua, i welimăn u ra kinkini a nu ra Kalou, ma un ia bulug ba i ki tau uni.

23Akaina lig korom muat a kum tenatimtimu, ma ra kum te Faresaio, a kum tenawaruwaruka muat! kuma ko ra no pakan a urumăli muat tari rā pakan, ma ra kum lig rap lenkuma muat peti, ma ra kum lig i mawat u ra wewadu muat talbeguai, a nakokon ma ra maramari, ma ra nuru: i ka ba muat pet a lig rap kumi, ma pa i ka ba muat talbegua a lig kuma. 24A kum tenawarawi pula muat, kuma muat labo‐wăliua a gatgat ma muat kanompa a kamel.

25Akaina lig korom muat a kum tenatimtimu ma ra kum te Faresaio, a kum tenawaruwaruka muat! kuma muat dur a pani ra la ma ra kupep, ma ra balana i teg ma ra wauru ma ra kogana. 26A Faresaio pula ui, Un duri mun a bala ra la ma ra kupep, ba in maramarek bulug a panina.

27Akaina lig korom muat a kum tenatimtimu ma ra kum te Faresaio, a kum tenawaruwaruka muat! kuma muat welara ma ra kum ruma na minat ba di mowoi, na taman diat bobo awakak, ma ra baladiat i teg ma ra kum uru a nu ra kum minat, ma ra duru rap kai. 28Lenkuma muat kai, kuma korom diat a tara muat bobo lena a kum tenapetoduru muat, ma ra balamuat i teg ma ra waruwaruka ma ra petakakai.

29Akaina lig korom muat a kum tenatimtimu ma ra kum te Faresaio, a kum tenawaruwaruka muat! kuma muat pam a kum ruma na minat u diat a kum parofita, muat maratai bulug a kum ruma na minat a nu ra kum tenapetoduru, 30muat piri kai lenkumi, Ba miat lalaun ugai ma diat a kum tamamiat mukamuka, pa miat waraut diat ba diat um doko diat a kum parofita. 31Ia kuma muat wapuana muat uni lena, muat ku a kum na tudiat diat umdokua diat a kum parofita. 32Muat a pet a tegpa a pupua a nu ra tamamuat. 33A kum ui muat, a kum bulumuru na ui kai, muat a laun lelawai ko ra binabalu na gunugut u Kiena.

34Ia kuma, boboi, kura ag tula diat a kum parofita korom muat, ma ra kum tenamanana, ma ra kum tenawawera: rā magan ko diat kura muat a umdokoua diat ma akwat diat u ra kabai; rā magan bulug muat a rapu diat u ra numuat kum ruma na lotu, ma muat a pet na bilbil u diat tak u ra taman ma in tuk u ra taman bulug: 35ba in wan taun muat uni a kap i diat a kum tenapetoduru rap di a um dokoua diat u vuravura, tak u ra kapin Abel a tenapetoduru, ma i tuk u ra kapin Sakaria na tun Barakia, ia ba muat umdokoua i na liwan ta ra ruma tabu ma ra kiuai‐na‐wetu. 36Iau piri ligtatuna ta muat, a kum lig rap kumi, kura in wan tau u ra tauntara kumi.

37Ierusalem, Ierusalem, ia ba i umdokoua diat a kum parofita, ma i biritdokopa diat di tula diat koromi! mogoro na pakan iau ligna ben ugai a kum na tumliklik le ra kereke i ben ugai a kum natnatina na tudag i ra bibiana, ma muat patut ku! 38Boboi, di talbeguai korom ui a num ruma, ma i kapkapana ku. 39Kuma iau piri ta muat, Pa muat a bobo iau balet in tuk u ra pakan a wanua kuma muat a piri uni lena, I dan ia ba i wan pat u ra ya ra Tadaru.

Currently Selected:

Mataio 23: RAI

Highlight

Copy