Mataio 21

20. PAKANA MA 1.

1Ba diat wan na matiti Ierusalem, ma diat wan pat u Betfake, u ra tagai na kum Olive, Iesu i tulua ta ruadi ko diat a nuna disaipel. 2ma i piratai ta diara lenkumi, Muru wan u ra taman na muka ta muru, muru boboi ma ut iai rā asa di pitakototai, ma ra natina kai i turu ugai mai: muru palapa diara ma muru ben diara urin. 3Ba te i pira ta lig ta muru uni, muru wapua i lena, Diara ka korom a Tadaru; ma in tul a kakaua diara. 4A lig kumi di peti ba in wewaot uni a pakan a pirapira a parofita i pira mukatai lenkumi, 5Wapua diat a Sion lena, Boboi, a numuat tui i wan pat korom muat, a tenakomonopa ia, i ka u ra asa, ma ra nat na asa kai.

6Diara a ru disaipel diara wan, ma diara peti lenkuma Iesu i patarantai ta diara. 7ma diara benpa a asa, ma ra natina, ma diara lăgunta a nudiara malu uni; ma Iesu i ki tau uni. 8Ma ra tara‐na‐kaiya diat lăgunta a nudiat kum malu u ra akapi: rā tara bulug diat buru‐kutua a kum ulu, ma diat paki u ra akapi. 9Ma ra tara‐na‐kaiya diat muka tana, ma diat kai diat murumur i, diat ara wewatai ma diat lena, Osana, korom na Tun David: i dan ia ba i wan urin u ra ya ra Tadaru; Osana u ra maua na te akit. 10Ma ba i wan pat u Ierusalem i lăklăkon tau uni a baladiat a tara rap u ra taman, ma diat lena, O oi bi? 11Ma ra tara‐na‐kaiya diat piri lena, Ia bi a parofita ia, Iesu taka Nasaret Kalilaia.

12Ma Iesu i ruk u ra ruma na lotu a nun Nara, ma i lurua diat rap diat kukul u ra ruma na lotu, ma i buli‐kuopua a kum luu a nu ra kum tenawekiā măni, ma ra kum kinkini kai a nudiat diat wiurai a kum tabun: 13Ma i piri ta diat, Di a timutai lenkumi, A nug ruma din watugi uni lena, a ruma na ararig: muat kai muat pampai lena a babag a nu ra kum tenawerara.

14A kum pula ma ra kum buka diat wan korom i u ra ruma na lotu: ma i wakadelpa diat. 15Ma diat a kum tadaru na pinapet ma ra kum tenatimtimu ba diat bobo a kum lig na kakaian i a petai, ma ra kum nat ba diat wewatai u ra ruma na wetu lena, Osana korom na Tun David; diat kămkămiak uni, ma diat piri tana. 16Ka pa u walogoro a lig diat bi diat piri? Ma Iesu i piri ta diat, Lelawai ku? Pa muat luki utbai lena, U a pam awakwakakpa a pirawalauai ko ra wadiat a kum nat magalon, ma ra kum nat nono? 17Ma i wan talura diat, ma i wan tak u ra taman u Betania ma i maren u iai.

18U ra malana, ba i wan talili kubai u ra taman, i molo. 19Ma i bobo en a fik i tana u ra papara akapi, ma ba i wan koromi pa i bobo ta lig i tana uni, a kum dono ku; ma i piri tana, Koniku ta uaina balet kon ui tak u ra bug kumi, ma pa in rap. Ma en a fik kuma i marag ma ut, 20A tara‐na‐wawera ba diat boboi diat kakaian uni, ma diat lena, Wenam! en a fik i marag ma ut! 21Iesu i wapua diat uni lena, Iau piri ligtatuna ta muat, ba muat nuru, ma pa i lăklăkon a balamuat, pa muat peti ku a lig kumi di petai u ren a fik, kura ba muat a piri kag ta ra tagai bi lena, Un takat ui, ma din ogua ui u na tai, kura din peti. 22Ma ra kum lig rap, ba muat arig kupi u ra ararig, ba muat nuru uni, kura din tari ta muat.

23Ma ba i ruk u ra ruma na lotu, a kum tadaru na pinapet ma ra kum takana diat wan korom i, ba i wawera kubai ma diat tiri, U pampa a kum lig bi u ra nakokon a nun oi? O oi kuma i tarata a nakokon kuma tam? 24Ma Iesu i piri ta diat lena, Iau kai, ag tiri muat un ta lig, ba muat a wapuata iau uni, iau kai, ag wapua muat lena a nun oi a nakokon iau pampai uni a kum lig kumi. 25A bapitaiso a nun Ioane, takawai duk ia? Tak u ra maua duk: ba ko diat a tara duk? Ma diat pirapira ugai lenkumi, Ba dat piri lena, Tak u ra maua ia; ia kai in tiri dat balet lena, Lelawai bakai kuma pa muat nurutau un i? 26Ba dat piri lena, Ko diat a tara ku ia; dat buruta diat a tara‐na‐kaiya; kuma diat rap diat kanapi lena, A parofita Ioane. 27Ma diat piri balet tan Iesu lena, Bi pa miat nunurai. Ia kai i piri ta diat lena, Iau kai pa ag wapua muat lena a nun oi a nakokon iau pampai uni a kum lig kumi.

28Kumi kai, Awa muat kanapi? Rā muana ru na tunalik muana; I wan korom a mukana, ma i tula i lena, Na tuglik, kumari un papam u ra pinapam‐na‐vaine. 29Ma i patut pa ut mun, ma i lena, Pa ag wan ma: ma na muru i nukpuku i, ma i wan ku. 30I wan bulug korom a murumurina, ma i tula i bulug lenkuma. Ia kai i taram, ma i lena, Ag wan ma: ma pa i wan. 31O oi na pa diara i taram u ra wetula a nun tamana? Ma diat piri lena, A mukana ku. Iesu i wapua diat lena, Iau piri ligtatuna ta muat, a kum telona ma ra kum kuo kura diat ruk muka muat u ra matanitu a nun Nara. 32Kuma Ioane i wan korom muat u ra makira ra petoduru, ma pa muat nurutau un i: a kum telona ma ra kum kuo diat nurutau un i: ma ba muat bobopai, pa muat nukpuku muat na muru ba muat a nurutau un i.

33Te bulug a pirapira welwelara muat a walogoroi: Rā petpalig i marut a pinapam‐na‐vaine, ma i liblibbatai, ma i kil pai uni a tug na waine; i pamta kai a ruma na pakpakila; ma i tuturata diat uni a kum tenapinapam, ma i wan igen u ra wanua. 34Ma ba i marawai a pupukai na taun mauru, i tula diat a nuna kum wetula korom diat a kum tenapinapam, ba diat a rakanpa a nuna wetakom. 35Ma diat a kum tenapinapam diat pampa diat a nuna kum wetula, ma diat rapu te, te bulug diat umdokopa i, ma te bulug diat biridokopa i ma ra wat. 36I tuluai balet ta magan a nuna wetula, mogoro u diat na muka: ma diat pet lenkuma balet korom diat. 37Na muru i tuluai korom diat na tunalik, ma i piri lena, kura diat a ururu u na tuglik. 38A kum tenapinapam, ba diat bobo na tunalik, diat pirapira ugai lenkumi, Ia bi in turu kele tamana; muat in, dat a umua i, ma dat a rāpa a nuna pinapam ba nudat ma. 39Ma diat pampa i ma diat og a pariua i ko ra pinapam, ma diat umdokopa i. 40Ba i wan pat a tadaru kuma, ba nuna a pinapam‐na‐vaine, awa duk in peti korom a kum tenapinapam kuma? 41Diat piri tana, In umdokoa rapua diat a kum akakaina tara kuma, ma in tari a pinapam‐na‐vaine korom ra kum tenapinapam bulug, diat ba diat a tari tana a kum uaina u ra kum pupukaina. 42Iesu i tiri diat lena, Pa muat luki utbai u ra Buk‐tabu lenkumi, A wat kuma a kum tena‐ug‐wedaun‐wat diat tikan‐wăliuai, ia kuma di pakitai lena, a wat na inuk u na te ia; Kon Ieova a lig kumi, ma ra lig na kakaian ia na ra matadat? 43Ia kuma iau piri ta muat uni lena, Kura din kip igenuai kon muat a matanitu a nun Nara, ma din tari ta diat a un‐a‐tara in ua a uaina. 44Ma ia ba in puka tau u ra wat kumi in takinakina uni; ia kai ba a wat kumi in puka tau uni in ak‐kinakinaua i le ra kabu na pia.

45Ma diat a kum tadaru na pinapet ma ra kum te Faresaio ba diat walogoropa a nuna kum pirapira welwelara, diat nunurai lena i piri u diat ku. 46Ma ba diat ligna pam i, diat buruta diat a tara‐na‐kaiya, kuma diat lena, A parofita ia.

Currently Selected:

Mataio 21: RAI

Highlight

Copy