Lukas 24

Jesu i dne le ngad aden.

1Sabbath boen, su bihin su la sal le madourang, beg ilndri ngaibad ad Jesu. Longu ngohondonreen i da le nemesu. 2Su gin ilndri bad i da marbohangai gin lendi. 3Be su gin me baghege, su de danoni numbuen ad Ndorlaben Jesu bui. 4Meluasu i ieb leri, de dansu i bui, aga derbe. Malabo sor gamel marmou, sor la bage, salo asor beren, hengerang. 5Su noh manden, begmarsu gina boan, sor vong le ndro su: Desa mu gahi homo i da mamaren le dogrosu su da ginmad? 6I do da bui, i gin ndne lie le ngad aden. Hanguruen nongen aden i da gin bosoui le ndro mu le gor Galilea. 7Dege i gin bai: Su gilgi Ndurndramed gle nemesu ndramed momen ge, su dadhe i ir gei, madolo muren i gedne lie. 8Malabo su hanguruen nongen aden. 9Su bieni ngaibad, su bosoui nongen le longu ogo le ndro su lao aden masongul e homo, ma le ndro su masi. 10Aga ngarsu bihin su da gin dogi le ngaibad: Maria ber Magdala, Johana, Maria nanen Jakobus, ma su holel la born, su ogo gin bosoui le ndro su Apostel longu masigane. 11Su ge, su gin hanguruen nongen asu bihin molhege, de dansu boro i bui. 12Petrus i dne, i hilou le ngaibad, i godurhu, i ilndri salo masi le numbuen Jesu. Boen i mul la um. Meluan i ieb le longu ogo masigane.

Sor marmou ber Emaus.

13E lele, sor marmou asu lao ad Jesu sor dogi le rang ogo le gor si mandehe, i manan hebe le gor Jerusalem, ngarn Emaus. 14Sor vong le goure le longu masigane i da gin meher le rang i da gineao. 15Su da vong ndon, Jesu i la born ndro sor le sal. 16Begmarsor dansu i bui aga Jesu. 17Malabo i ndemani sor: Nongen admor hi derbe, mor da bai le sal admoro? 18Bormarsor i gosusngo, sor de dogi bui. Homo asor ngarn Kleovas i bodeie: Uo homo ge ber Jerusalem i de gin hirong leri masou, le longu masigane i da gin meher ndro du? 19I ndemani sor: Sehe longu? Sor bodeie: Longu masi le ad Jesu ber Nasaret, i hom Provet manden ge, i da gin hinen gelman ndoun, i da gin henunuen su ndramed masi longu ber lang. 20Su ndurhian adu, ma su labenen gin dieni i na gmed, boen su gin dadhe i le gei. 21Iou ge, iou gin belengen le rang, i beg rumburdi su Israel le nemesu ndremda rah adu. Eruar i rang madolo i da gineao le longu masi ogo. 22Su bihin holel, su adu, su gin meher, su gin bosoui me ndro du nongen le longu, meluadu gin ieb leri, su gin bai: Su gina madourang le ngaibad aden, 23su de gin danoni numbuen Jesu bui, boen su gin mul, su gin bai, su gin ilndri Angelo, su da gin vong le ndro su: Jesu i mamaren. 24Su holel adu su gina le ngaibad, ma su gin ilndri longu masigane dege su bihin gin bai. Jesu ge, su de gin lele i bui. 25Malabo i vong le ndro sor: Danmor hanguruen heb monen bui, bergolmor i ndoun ndoun ge, de danmor boro nongen asu Provet ber goru heb hian bui. 26Longu ogo masigane i da gin meher ndro Mesias, Ndorlaben Jehova ha lengi i, i gmehere ndro i, boen i gina le engerang aden. 27Boen i boharni le ndro sor Nongen Helian i da le Buk ad Mose, i da le Buk asu Provet, su da gin boharni le ad Jesu goru. 28Malabo su gin meher baghege le gor Emaus gor si, su beg dogi ri. Jesu beg dogi le sal. 29Sor ndemani i, sor bai: Hian uo dandon le um adu, lobing beg meher, rang gineao malabo. I la um asor, beg medir. 30Su beg ien gan, i la born ndro sor, la mandrgosgeao asor, boen i hedi suslong, i bo lodu leri, i iendri suslong, i hengen i le ndro sor. 31Malabor begmarsor i reu, su dansu: Aga Jesu. Malabo Jesu i do da bui, i gineao. 32Sor vong, sor bai: Iouoro do da le sal gin hirong nongen aden, aga i dege moan i da iad le bergoldoro, be i gin boharni Nongen Helian. 33Sor dne, sor mul la gor Jerusalem, sor ilndri su masongul e homo ma su masi, su da gin me goure. 34Su ogo su vong le ndro sor: Ndorlaben gin ndne lie ndangen, Simon gin ilndri i. 35Sor lie, sor bosoui le ndro su longu masi, i da gin meher ndro sor le sal ma le um, be Ndorlaben i gin ien suslong, begmarsor gin reu dansor aga Jesu.

Nongen ad Jesu le ndro su lao aden.

36Su da vong ndon, Jesu i da le dogrosu, i vong le ndro su, i boi: Mandri ad Jehova na ge ndro mu. 37Su masi su noh, su hanguruen le bergolsu: Aga meluan ad hom ndramed. 38Jesu i vong le ndro su: Desa mu go noh, desa de danmu boro i hian bui. 39E lele nemo e ndego, io ie gle mondro e lele io, boro mondro, heb sengen i da le meluan bugane, heb ndrun aden bui, e lele mondro e ndrun ordo. 40Boen i bosilieni le ndro su nemen e ndegen. 41Su mugmug manden ge, meluasu i ieb leri, de dansu i bui aga ndangen, Jesu i ndemani su: 42Hengen heb gan me ono; su hengen le ndro i heb ni. 43I hedi ni, i gin ien i le begmarsu masigane. 44Boen i vong le ndro su: Aga nongen ordo, io da gin bosoui le ndro mu, ar mu gin dogi le sal ordo, io gin boi: Longu masi na gmeher dege su gin hondre le Buk ad Mose, le Buk asu Provet, le Buk Psalm, longu masi su da gin hondre gle ordo 45Boen i gin hengen le ndro su, su dansu Nongen Helian, i da le Buk. 46Boen i vong le ndro su: Su gin hondre goru: Ngendian dsoln na gmeher ndro Mesias, madolo muren i gedne lie. 47Su gobharni nongen ber lang le ngarn aden, su ndramed garbelueni bern asu, boen i beg sibui longu asu momen giao. Nongen ogo le ndro su gor ma gor bosanged, hanu le ndro su ber gor Jerusalem. 48Mu ge, gorbo, mu gobharni gleri. 49Ma hanguruen longu hendre ogo: Io beg rendegien le ndro mu Meluan Helian, mu dandon le gor ogo, irbelengeni ndoui ad Jehova ber belengan i da beg meher ndro mu.

Jesu dogi le gor lundielang.

50Boen i dulieni su baghege le gor Betanien, i daui nemen le belengan, i hengen su. 51Be i da hengen su, i voh le belengan, i gineao le lang. 52Su los le boan, boen su mul la gor Jerusalem, su mugmug manden. 53Su da le um ad Jehova sidesi, su bamugueni Jehova.

Currently Selected:

Lukas 24: LLENT

Highlight

Copy