Lukas 22

Nongen le ngendian ad Jesu. Su ndurhian beg daii Jesu.

1Uru asu Juda gin me, su bosoui i Pasah. Aga uru le suslong ma le ndurmeh. 2Su ndurhian, ma su ndremda hernou su vong la goure, beg daii Jesu de dansu i bui, su ghinen i derbe. Su ndramed masi su hirong nongen aden, su noh su ndramed.

Judas hevani Jesu.

3Beld Satan la bergoln ad Judas. Ngarn aden Isgariot lie, i homo asu masongul e rumou. 4I la ndro su ndurhian, le ndro su ndremda hernou, beg hevani Jesu le ndro su. 5Be su gin hirong i, su mugmug ge, su boi, su beg hengen le ndro i moni, i somui ri. 6I bogulue Jesu, beg hevani i le ndro su.

Su dueni gous asu.

7Rang gin meher, su da dueni ndurmeh gle gous asu. 8Jesu rendegien Petrus sor Johanes, i vong le ndro sor, i boi: Mor gal, mor dueni ndurmeh gle gan anu. 9Su ndemani i: Du gain ndurmeh anu girn oho? 10I bodeie: Mor gal gor, mor sohal hom gamel, i hedi lumiandran le hauen, mor gor ndrbon, i la um hom. 11Mor vong le ndro i, mor bai: Ndorlaben i ndemani uo, um i da oho, io gle bo gous leri, ma su lao ordo. 12Muren i gobsilieni um hom le ndro mu manden ge, boen moro sueri gous adu. 13Sor gina, sor ilndri longu masigane dege Jesu gin bai. Su sueri gan la.

Jesu daui gan helian le ndro su lao aden.

14Rang ad Jesu gin me, i la mandrgosgeao, su lao aden su la born ndro i. 15I vong le ndro su, i boi: Bergolo gunuen hi bui beg ien ndurmeh la dogromu hanu, muren ngendian ordo beg meher. 16Io boi le ndro mu, io de gien gan ogo bersilie bui, le gor lundielang io ghinen i boen. 17Muren i hedi lumianndrunvain, i bo lodu leri, i vong, i boi: Ghedi lumiandrunvain ogo gilmui leri. 18Io boi le ndro mu io de ilmui ndrunvain bui lie, muren io gu ilmui lie mahouen le gor ad Jehova. 19Boen i hedi suslong, i bo lodu leri, i iendri suslong, i hengen i le ndro su, i boi: Aga mondro, gle ndro mu, ghanguruen leri ma ghinen i dagara lie. 20Su gin ian boen, i hedi lumiandrunvain, i vong, i boi: Lumiandrunvain ogo aga ndrai ordo, le regunha Jehova, su gharengeni le asu mabosanged. 21Ghanguruen longu hendre ogo: Nemen aden, i da beg hevani io, i da le mandrgosgeao adu. 22Ehe, Ndurndramed i iao sal aden, dege Jehova ie lengi, ndramed ge, i da hevani i, i gina momen gane. 23Malabo su vong le goure, homo i bode: Io ie? Homo i bode: Io ie?

Heb nongen le ndro su lao ad Jesu.

24Su gin vong le goure, sie asu i manden hanu le asu masi. 25I vong le ndro su: Su ndurhian ber boan su ndounen su gor masi, su ha lengi su gabmugueni su. 26Mbue hinen dagara. Be homo i lengi i hom labenen, i ogo i dege hom mbunana dege hom lao dandendegei. 27Sie labenen homo i da lugdo le mandrgosgeao aden i ien gan, de homo i da bo mburer le gan? Danmu, i ge, i da lugdo mi mandrgosgeao. Io ge, io da le dogromu dege hom lao dandendegei. 28Mu ge, de gin bieni io bui, sidesi mu la born ndro io. 29Io ghinen mu le ndurhian asu, dege Bo Domo ie lengi io ghinen i. 30Io ha lengi mu da le mandrgosgeao ordo ber gor lundielang mu da bo gous le mandrgosgeao ordo mu lugdo im logna asu ndurhian, mu gob gord le ndro su gor masongul e ruo asu Israel.

31Simon, Simon, e lele, Satan ie lengi ndoa le ndro mu, i beg seslaini mu beg rui mu. 32Io gin soling le ndro Jehova, uo gboro ndoui ordo. Bersi muren, be uo garbelueni bern adem gle houen, osbani su nderm. 33Petrus i bodeie: Ndorlaben, io gal ndro uo gle kalabus lie, io gamed bersi ge. 34Jesu i bode: Petrus, io vong le ndro uo, goho ma de dang eruar masou, uo gbieni io maberdolo, uo abde, uo de danem io bui.

35Boen i boi le ndro su: Goru io gin rendegien mu le sal, moni ademu bui, ndob bui, sumianegen bui, mu gin mundrul ie? Su bode: Bugane. 36I boi le ndro su: Ar homo moni i da ndro i, i ghedi i le sal, dagara ndob aden; heb memrad ad homo bui, i semani salo aden, boen i sim mordo borla gleri. 37Io boi le ndro mu: Malabo Nongen Helian su gin hondre i gmehere boen: I da le dogrosu daiandramed. Aga ndangen, longu masi ogo beg meher ndro io malabo. 38Su bodeie: Ndorlaben, e lele mordo borla maruo gorbo. I bodeie: Aga hian i mosen.

Soling ad Jesu le Getsemane.

39Boen i bieni gor, i dogi ndre bahali Oliva, dege bern aden sidesi. Su lao aden su la born ndro i. 40Su gin meher le logna aden, i vong le ndro su: Bo raring, debosan Satan i seslaini mu. 41Boen i la heb lendi, i godurhu, i soling, i bai: 42Bo Domo, ar uo lengi, hedi longu ogo giao, io ha lengi dege uo lengi. 43Hom Angelo ber lang gin meher, gin sobani i gle ndoui ber lang. 44Malabo i da soling ndoun ndoun ge, ndran le busngad i da muh le boan, i dege ndrai. 45Boen i dne, i la ndro su lao aden, i ilndri su medir ge, ndrnesu gin gosusngo manden. 46I vong le ndro su, i boi: Desa mu medir la? Edne, soling ndro Jehova, debosan Satan i seslaini mu.

Su hosi Jesu.

47I da vong ndon, su ndramed mabosanged su me dala, homo asu masongul e rumou, ngarn Judas i la hanu, i la ndro Jesu, i da hunghung i. 48Jesu i vong le ndro i, i bode: Judas, uo da hunghung Ndurndramed, beg hevani i? 49Su da ndro i, be su gin ilndri, su beg hosi Jesu, su ndemani i: Ndorlaben, iou beg bo iil le ndro su, beg rii su gle mordo borla. 50Homo asu i rii lao ad ndurhian, i sehi delengan sengen. 51Jesu i bode: Mbue hinen dagara aga de heb monen bui, boen i dori delengan, delengan gin hivur. 52I vong le ndro su ndurhian, su da gin meher ndro i, i boi: 53Mu da gin meher ndro io dege le ndro hom daiandramed, mordo ber bahun i da le nememu. Bing si, rang si, io da le dogromu le um ad Jehova, mu de gin boro io bui, aga rang ademu ge, ndoui ber ndrogum gin meher ri.

Petrus bieni Jesu.

54Be su gin hosi Jesu, su dulieni i le gor ad Ndurhian, Petrus i la ndrbon i da manan. 55Su gin singeni moan su min mandrmoan, Petrus la born ndro su. 56Hom bihin ilndri i la mandrmoan i lele ndoun, i vong, i boi: Ndramed ogo i hom lao aden. 57Petrus i boi loldi, i boi: Bihin, io de dono i bui. 58Heb eluen bui muren, homo lie i vong i boi: Uo homo asu. Petrus i bode: Ndramed, io bui. 59Boen homo lie i vong: Ndangen ndramed ogo i da le sal la born ndro Jesu, i homo asu Galilea. 60Petrus i bode: Ndramed, io de dono nongen adem bui, io de dono i bui uo abde sa. I da vong ndon, goho i da dang. 61Malabo Ndorlaben i belueni bormarn le ndrbon, i lele begmarn ad Petrus. Malabo Petrus i hanguruen nongen ad Ndorlaben, i da gin vong le ndro i: Goho ma de dang masou, uo gbieni io maberdolo, uo abde, io dono uo bui. 62Boen i la lobohonum i reng manden.

Su boii Jesu.

63Su ndramed su da bogulue Jesu, su bo momen le ndro i, su rui i. 64Su nhui bormarn gle salo, boen su ndemani i, su boi: Gobharni me ndro du, sie gin rii uo? 65Su gin boii dagara le nongen asu momen dsoln. 66Madourang su labenen ber gor, su ndurhian, ma su ndremda hernou, su la goure, su dulieni Jesu le ndro su, 67su vong le ndro i, su boi: Ar uo mesias, absou me ndro du. Jesu i bode: Ar io bosoui me ndro mu, de delengamu le nongen ordo bui, 68ar io ndemani mu le longu hendre, mu de vong de la ndro io hebsa bui. 69Malabo rang gin me, Ndurndramed i da le nemen sengen ad Jehova gle ndoui aden. 70Su masi su vong: Uo Ndur Jehova de bui? I bodeie: Ehe, io ie. 71Su bode: Desa iou gahi nongen, aga i vonei, bohon aden gin bai, iou masi gin hirong i.

Currently Selected:

Lukas 22: LLENT

Highlight

Copy